Panangasawa tan Panagpamilya Diad Sayan Panaon na Anggaan

“Say panaon apatikeyan la.”​—1 COR. 7:29.

1. (a) Antoran kaplesan a pananguman so kabiangan ed saray mairap a pidenengan? (b) Akin a pampapagaan tayo so panguuman na saray estandarte ed pamilya?

 IMPROPESIYA na Salita na Dios a say tanda na “panaon na kasumpalan” et saray guerra, yegyeg, eras, tan salot. (Dan. 8:17, 19; Luc. 21:10, 11) Impasakbay met na Biblia a diad sayan mapeligron peryodo na panaon et baleg so pangumanan na totoo. Diad sarayan kritikal a “kaunoran ya agew,” kabiangan ed saray mairap a pidenengan et saray problema ed pamilya. (2 Tim. 3:1-4) Akin a pampapagaan tayo iratan a pananguman? Lapud malaklaknab tan mabisbiskeg iratan kanian sarag dan impluensyaan so panmoria na saray Kristiano natan nipaakar ed panangasawa tan panagpamilya. Panon?

2. Anto so panmoria na kaslakan a totoo ed panangasawa tan diborsio?

² Diad sarayan panaon, mainomay tan kasmak  la so panagdiborsio, tan diad dakel a bansa et maples a manatagey so bilang na saray mandidiborsio. Anggaman ontan, nepeg a malinew ed nonot tayo a say panmoria nen Jehova a Dios ed panangasawa tan diborsio et sigpot a midumaan ed kaslakan ya aabobonan na totoo. Anto sirin so panmoria nen Jehova?

3. Anto so panmoria nen Jehova tan Jesu-Kristo ed panangasawa?

³ Iilaloan nen Jehova a Dios a lawas tooren na saray sanasawa so sipanan da ed kasal. Sanen kinasal nen Jehova so sankaunaan a laki tan bii, inkuan to a “say sakey a laki . . . et yamong to so asawa to, et saksakey ira a laman naani.” Diad saginonor et inulit nen Jesu-Kristo itan a balikas insan to inyarum: “Say impantipon na Dios sirin, aleg a sianen na too.” Inkuan ni nen Jesus: “Siopaman a laki a mangisian naani na asawa to, nilikud ed impilawanan tan mangasawa na sananey a bii, mankasalanan ed pikakalugoran.” (Gen. 2:24; Mat. 19:3-6, 9) Kanian, momoriaen nen Jehova tan si Jesus a say panangasawa et legay-bilay a bedber, a mangangga labat no ompatey so sakey a kapareha. (1 Cor. 7:39) Lapud sagrado ya uksoyan so panangasawa, seryoson bengatla so pandiborsio. Diad tua, inkuan na Salita na Dios a kagula nen Jehova so pandiborsio ya anggapoy Makasulatan a basiyan. *​—Basaen so Malaquias 2:13-16; 3:6.

Responsablin Panangasawa

4. Akin a nagbabawian na arum a kalangweran a Kristiano so impangganat dan mangasawa odino miasawa?

⁴ Diad sayan marelmeng a mundo a pambibilayan tayo, andi lay pinonot na totoo noag say sekso. Inagew-agew a dakel so nanenengneng tayon mabanday iran litrato odino babantayan. Agtayo nayarin ibaliwala so epekto na saratan ed sikatayo, nagkalalo la ed saray pinabli tayon kalangweran ed kongregasyon. Anggano agda labay, liingen na saratan so seksual a pilalek da. Kanian, antoy nepeg a gawaen na saray kalangweran a Kristiano ed sayan mauges ya impluensya? Arum so asaksakbay ya angasawa odino akiasawa pian ag-ira makagawa na seksual ya imoralidad. Balet ag-abayag, nagbabawian na arum ed sikara so desisyon da. Akin? Sano aliwa la ran balon kasal, namoria ran nandumaan ira manaya na panlabayan ed saray inagew-agew a rotina ed bilay. Siempre, baleg itan a problema na sanasawa.

5. Anto so makatulong ed saray sanasawa a lawas tooren so sipanan da ed kasal? (Nengnengen met so paimano’d leksab.)

⁵ Talagan mairap sano say inasawa odino akiasawaan na sakey​—anggano kaparan Kristiano ni​—et arawi’d samay iilaloan to. (1 Cor. 7:28) Balet anggan panon lan kairap so situasyon, amta na saray tuan Kristiano a say agmakasulatan a pandiborsio et aliwan sikatoy maabig a solusyon ed saray problema na agmaliket a panangasawa. Kanian, saramay mansasagpot a napansiansia so panamaley da pian tooren so sipanan da ed kasal et nepeg a respetoen tan maaron tulongan na kongregasyon. *

6. Panoy nepeg a pangipasen na saray Kristianon kalangweran ed panangasawa?

⁶ Kasin ugaw ka ni tan anggapo ni asawam? No ontan, panon mon ipapasen so panangasawa? Napaliisan mo so pakasakitan no manalagar ka ni anggad akaparaan la so laman, nonot, tan espiritualidad mo ed panangasawa antis  kan miinaroan ed sakey a Kristiano. Siempre, anggapoy ibabaga na Biblia ya edad na panangasawa. * Balet, ipapanengneng na Biblia a kaukolan a manalagar ka ni anggad nalampasan mo so panaon sano aliwan lan mabisbiskeg so seksual a pilalek. (1 Cor. 7:36, NW) Akin? Lapud pikeweten na mabiskeg a seksual a pilalek so dugan panagnonot, tan sengegan itan na pakagawam na lingo iran desisyon a pakasakitan mo ed saginonor. Tandaan, say makabat a simbawa nen Jehova nipaakar ed panangasawa a walad Biblia et parad pankaabigan tan panliket mo.​—Basaen so Isaias 48:17, 18.

Responsablin Panagpamilya

7. Antoy naeksperiensya na arum a kalangweran a sanasawa, tan akin et sengegan iya na agmarakep a relasyon da?

⁷ Arum ed saray asakbay a nanasawa et nananak a tampol, anggaman ugaw ni ra. Anggapoy panaon dan nakabat so sakey tan sakey lapud wala lay ugaw a mankaukolan na atension 24 oras kada agew. Siempre, natural labat a say manunan imanoen na ina et say kapangiyanak ya ugaw, tan nayarin pangimonan itan na malangwer nin asawan laki. Niarum ni, lapud puyat ed panagkomis et nayarin maingongot ira a sengegay agmarakep a relasyon da. Insan da la’d satan namoria a dakel manayay abalang da ta agla ra natan makapasyar tan agda la nagawaan iramay dati ran gagawaen. Panoy pangipasen da ed anguman a situasyon da?

8. Panoy nepeg a pangipasen tayo ed pagmaliw ya ateng, tan akin?

⁸ No panon a say panangasawa et kaukolan a tooren diad responsablin paraan, ontan met a say pagmaliw ya ateng et nepeg ya ipasen bilang responsabilidad tan pribilehyo ya inter na Dios. Antokaman so manguman ed bilay na Kristianon sanasawa sano wala lay ugaw, nepeg a gawaen day anggaay nayarian da a pidenengan iratan a pananguman diad responsablin paraan. Lapud inikdan nen Jehova so totoo na abilidad a mananak, nepeg ya ipasen na atateng a say kapangiyanak ya ugaw et “tawir [a nanlapud si] Jehova.” (Sal. 127:3) Panseetan na Kristianon ina tan ama a gawaen iray obligasyon da bilang ‘atateng [a nikasakey] ed Katawan.’​—Efe. 6:1.

9. (a) Anto so nalalanor diad pamabaleg ed ugaw? (b) Anto so nagawaan na asawan laki pian natulongan toy akulaw to a mansiansian mabiskeg ed espiritual?

⁹ Pian napabaleg so ugaw, nakaukolan so dakel a taon na pansakripisyo. Baleg a panaon tan sagpot so nalalanor ed satan. Kaukolan a talosan na Kristianon asawan laki a diad pigaran taon kayarin nianak so ugaw et nayarin nadisturbo so akulaw to legan na aral. Ontan met, nayarin mas daiset so pankanawnawa na asawan bii a personal a makapanaral na Biblia tan makapandalepdep. Napaletey na saratan so espiritualidad to. Kanian, nibagan say asawan laki et sakey a responsablin  ateng no gawaen to so anggaay nayarian to a mitulongan ed pangasikaso ed ugaw. Kasabi’d abung, nayari ton itongtong iramay pigaran punto ed aral ya agtanto nadngel na akulaw to. Nayari met a sikato so ontulong a mankomis ta pian mas makapanpulong so akulaw to.​—Basaen so Filipos 2:3, 4.

10, 11. (a) Panon a napabaleg iray anak ed “panamilin” nen Jehova? (b) Akin a makanepegan na komendasyon so dakel a Kristianon ateng?

¹⁰ Say pagmaliw a responsablin ateng et aliwa labat lan say pangiter ed anak na tagano, kawes, ayaman, tan pangasikaso ed bunigas. Nagkalalo la ed sayan mapeligron panaon na anggaan, nakaukolan a manlapud kaugawan et naaralan lan tumboken na ananak iray moral a prinsipyo. Nepeg a pabalegen ira diad “kadudusa [odino disiplina] tan panamilin na Katawan.” (Efe. 6:4) Saglawien na sayan “panamilin” so pangipaslep na kanonotan nen Jehova ed saray anak manlapud kaugawan anggad importantin taotaon na inkatobonbalo.​—2 Tim. 3:14, 15.

¹¹ Sanen inkuan nen Jesus ed saray patumbok to a nepeg a “manggawa [ira] na saray babangatan ed amin a nasyones,” seguradon say labay ton ibaga et kaukolan a tulongan na atateng a magmaliw a babangatan iray anak da. (Mat. 28:19, 20) Mairap itan lapud dedesdesen na sayan mundo iray kalangweran. Kanian, saray ateng a pinabaleg da iray anak da pian magmaliw a maseseg a Kristiano so talagan makanepegan na komendasyon na kongregasyon. ‘Dinaeg’ da so impluensya na mundo panamegley na pananisia tan katooran da bilang responsablin atateng.​—1 Juan 5:4.

Andiay Asawa Odino Anak Lapud Maabig a Gagala

12. Akin et walaray arum a Kristiano a nansiansian andiay asawa ed pigay taon?

¹² Lapud “say panaon apatikeyan la” tan “say ugali na sayan mundo nanaebas” odino manguuman, papasesegen itayo na Salita na Dios a nonoten so bentaha na anggapoy asawa. (1 Cor. 7:29-31) Kanian agla angasawa odino akiasawa so arum a Kristiano, tan wala met iramay nansiansian andiay asawa ed pigay taon. Nakomendaan ira lapud agda inanamot so pagmaliw dan marikit odino balolaki pian iyuna so dilin pankaabigan da. Dakel so agla angasawa odino akiasawa pian napanlingkoran si Jehova ya anggapoy abala. (Basaen so 1 Corinto 7:32-35.) Arum ed saray marikit tan balolaki so manlilingkor bilang payunir odino Bethelite. Saray arum et kaliktan day pausar a nagkalalo ed organisasyon nen Jehova kanian panseseetan day onkualipika pian makapanaral ira’d Ministerial Training School. Diad tua et ipapasen na saramay pigay taon a nampayunir, a diad saginonor et angasawa odino akiasawa, a nagugunggonaan ni so panamaley da ed saray makanan leksion a naaralan da ed saraman a taon.

13. Akin a nandesisyon so arum a Kristianon sanasawa ya agla mananak?

¹³ Diad arum a bansa, wala ni sananey a nagagawan pananguman ed saray pamilya​—nampaknaan na dakel a sanasawa ya agla  ra mananak. Ontan so desisyon da lapud irap na bilay, tan walaray arum a labay dan anggapoy makaabala ed pangiyuna da’d atagey a propesyon. Diad limog na saray Kristiano, wala met iray sanasawa a nandesisyon ya agla mananak. Balet, ginawa ra itan pian mas bulos iran makapanlingkor ed si Jehova. Aglabay ya ibaga na satan a sarayan sanasawa et aliwan normal so panamaley da. Anggaman ontan, mabulos dan isakripisyo so pigaran bendisyon na panangasawa pian niyuna so Panarian. (1 Cor. 7:3-5) Arum ed saratan a sanasawa so manlilingkor ed si Jehova tan ed saray agagi diad sirkito, distrito, odino diad Bethel. Saray arum et manpapayunir odino manlilingkor bilang misionaryo. Seguradon aglingwanan nen Jehova so kimey tan aro ya impanengneng da ed ngaran to.​—Heb. 6:10.

‘Irap ed Laman’

14, 15. Anton ‘irap ed laman’ so nayarin naeksperiensya na Kristianon atateng?

¹⁴ Inkuan nen apostol Pablo ed saray sanasawan Kristiano a nawalaan ira na “irap da ed laman.” (1 Cor. 7:28) Kaiba ed saya iray problema ed bunigas na sanasawa, ananak, odino saray maedad lan atateng da. Nayarin laktipen met na saya iray problema tan sakit na pagew na pamabaleg ed ananak da. Unong a sinalambit la ed gapo na sayan artikulo, impasakbay na Biblia a diad “saray kaunoran ya agew” et “onsabi so saray panaon a maatap” a mairap a pidenengan. Say sakey a mairap a pidenengan et saray anak a “matulay ed saray kaatengan da.”​—2 Tim. 3:1-3.

¹⁵ Parad Kristianon atateng, say pamabaleg ed ananak et aliwan mainomay. Agtayo napaliisan iray makapuy ya epekto na kaplesan a “panaon a maatap.” Kanian, kaukolan a lawas pilabanan na saray Kristianon atateng so makapatey ya impluensya na “kaugalian na sayan mundo” ed ananak da. (Efe. 2:2, 3) Tan ag-ira naynay a manatalo! No bilang ta tinmundan nanlingkor ed si Jehova so sakey ya anak, talagan “irap” itan na atateng a nanseet ya amabaleg ed sikato ed katuaan na Dios.​—Uli. 17:25.

“Wala Naani Baleg ya Irap”

16. Anton “irap” so impropesiya nen Jesus?

¹⁶ Antokaman ya “irap” a naeksperiensya ed panangasawa tan panilalak et melag labat no ikompara ed sananey nin irap. Satan ya irap et agbalot naparaan. Diad propesiya nen Jesus nipaakar ed presensia to tan ed panaoy anggaan na sistema na bengabengatla, inkuan to: “Wala naani baleg ya irap ed satan, ya anggapo so ontan a nanlapud gapo na mundo ya angga ed natan, anggapo, anggapo la naani.” (Mat. 24:3, 21) Diad saginonor et impaamta nen Jesus a naliktaran na baleg ya ulop itan a “baleg ya irap.” Balet, ituloy na sistema nen Satanas so impasya tan unor lan pangataki to ed saray mareen a Tasi nen Jehova. Seguradon mairap itan a panaon ed sikatayon amin, balang lan adulto odino kalangweran.

17. (a) Akin ya agtayo alablabas a panaburidoan so arapen? (b) Antoy nepeg a mangimpluensya ed panmoria tayo ed panamaley tan panagpamilya?

¹⁷ Anggaman ontan, kaukolan ya agtayo alablabas a panaburidoan so arapen. Saray ateng a matoor ed si Jehova so makapanilalo a sikara tan saray ugugaw nin anak da so naprotektaan. (Basaen so Isaias 26:20, 21; Sof. 2:2, 3; 1 Cor. 7:14) Balet diad kaplesan, komon ta say impakaamta tayo ed kapeligroan na panaon a pambibilayan tayo so mangimpluensya ed panagnonot tayo nipaakar ed panangasawa tan panagpamilya diad sayan panaon na anggaan. (2 Ped. 3:10-13) Diad ontan, balang lan wala odino anggapoy asawa tayo, napagalangan tan nirayew tayo si Jehova tan say kongregasyon.

[Saray paimano ed leksab]

Bilang Repaso

• Akin et agnepeg a mangganat a mangasawa odino miasawa iray kalangweran a Kristiano?

• Antoy lalanoren na pamabaleg ed anak?

• Akin a dakel a Kristiano so nansiansian andiay asawa tan no wala, akin et ag-ira nananak?

• Anton “irap” so nayarin sagmaken na Kristianon atateng?

[Tepetepet Parad Panagaral]

[Litrato ed pahina 17]

Akin et makabat a manalagar ni ray kalangweran a Kristiano anggad wala la ra’d dugan edad a mangasawa o miasawa?

[Litrato ed pahina 18]

Baleg so nitulong na asawan laki pian mas makapibiang so asawa to ed panaglingkor ed Dios

[Litrato ed pahina 19]

Akin a nandesisyon so arum a Kristianon sanasawa ya agla mananak?