Panon a Napagmaliw a Makabaliksan so Bilay?

“Takotan mo so Dios tan unoren mo so saray ganggan to.”​—ECL. 12:13.

1, 2. Panon tayon nagunggonaan diad pangonsidera ed libron Eclesiastes?

 NONOT mo pay sakey a too a walad sikato lawari so amin. Sikatoy bantog a manuley, sakey ed saray sankayamanan a too diad dalin, tan sankarunongan ed panaon to. Anggaman matalona, siansia nin tetepetan toy inkasikato, ‘Panon a napagmaliw a makabaliksan so bilay?’

² Satan a too et nambilay manga taloran libo a taon lay apalabas. Say ngaran to et Solomon, tan diad libron Eclesiastes et nabasa tayo so impaneskribe to ed panaanap to na inkapnek. (Ecl. 1:13) Dakel so naaralan tayo ed eksperiensya nen Solomon. Peteg a say karunongan a walad libro na Eclesiastes so ontulong ed sikatayo pian makagawa itayo na saray plano odino kalat a mangiter na makabaliksan a bilay.

“Panguusil ed Dagem”

3. Anton importantin katuaan ed bilay na too so nepeg tayon bidbiren?

³ Impaliwawa nen Solomon a pinalsa na Dios so dakdakel tan marakdakep iran bengatla diad dalin. Saratan a bengatla et agmanundan paninteresan, pankelkelawan, tan agbalot sawaan. Balet, agtayo anggan nasarag ya aralen so amin a detalye nipaakar ed palsa na Dios ta antiktikey so bilay tayo. (Ecl. 3:11; 8:17) Unong ed ibabaga na Biblia, daiset iray agew tayo tan magangganon onlabas. (Job 14:1, 2; Ecl. 6:12) Sayan katuaan so mamakiwas ed sikatayo pian makabat ya usaren so bilay. Mairap iya ta say mundo nen Satanas et ipapaarap to itayo ed sananey a direksion.

4. (a) Anto so kabaliksan na Hebreon salita ya impatalos a “kaapaan”? (b) Diad sayan artikulo, anto so pantongtongan tayo nipaakar ed iyuuna na totoo ed bilay da?

⁴ Pian nidanet so kapeligroan na pamperdi ed panaon, inusar nen Solomon diad Eclesiastes so salitan “kaapaan” a 36 a danay. Say Hebreon salita ya impatalos a “kaapaan” so mankabaliksan na andi-kakanaan, andiay kabaliksan, odino andian na magnayon a kablian. (Ecl. 1:2, 3) No maminsan say salitan uusaren nen Solomon a “kaapaan” et mipara ed “panguusil ed dagem.” (Ecl. 1:14; 2:11) Seguradon agnasingkat na too so dagem, kanian siopaman a manalin maningkat ed satan et anggapoy nagunggona to. Ontan met so resulta no iyuna tayo so agmakabat iran kalat. Antiktikey so bilay ed sayan sistema, kanian agtayo iya pirdien ed saray kimey ya anggapo lanlamang so pansumpalan to. Sirin, pian agtayo nalingo, imanoen tayo so pigaran alimbawa ya imbaga nen Solomon, a kaslakan ya uunaen na totoo ed bilay da. Unonan pantongtongan tayo so panagligliwaan tan kayamanan ya iyuuna na saray totoo. Insan tayo isublay so kakanaan na kimey a makapaliket ed Dios.

Kasin Napaliket Itayo na Panagligliwaan?

5. Iner so nan-anapan nen Solomon na inkapnek?

⁵ Singa saray dakel a totoo ed sayan panaon, sinali nen Solomon so mananap na inkapnek  diad impanbilay to a napnoy liket. Onia so imbaga to: “Agko pinokpokan so pusok manlapu ed anggan anto a liket.” (Ecl. 2:10) Iner so nan-anapan to na inkapnek? Unong ed Eclesiastes kapitulo 2, ‘pinaliket to so laman to ed alak’​—balet walay kontrol to​—tan amarakep na saray hardin, nandesinyo na saray palasyo, dinmengel na musika, tan angan na mananam iran tagano.

6. (a) Akin ya aliwa met a makapuy a panliketan iray maabig a bengatla ed bilay? (b) No nipaakar ed panagligliwaan, akin et kaukolan so inkabalanse?

⁶ Kasin kokondenaen na Biblia so panliket a kaibay kakaaro? Siempre andi. Insulat ni ingen nen Solomon a say maliket a panangan kayari na sanagew ya impantrabaho et regalo na Dios. (Basaen so Eclesiastes 2:24; 3:12, 13.) Kaaruman ni, papasesegen a mismo nen Jehova iray tobonbalo a ‘manggayaga tan paliketen ira komon na puso ra’ diad dugan paraan. (Ecl. 11:9) Tua, kaukolan tayo so panrelaks tan panligliwaan. (Ikompara so Marcos 6:31.) Balet, aliwan sikato’tay manunaan ed gagala na bilay, a singa say palamis ya aliwan manunan tagano. Seguradon mipakna kayo ya anggaman labalabay yoy palamis, magano kayon onsawa no satan labat so kakanen yo, tan daiset labat so sustansia na satan. Ontan met, apaneknekan nen Solomon a no say bilay et isentro ed liket, ‘panguusil itan ed dagem.’​—Ecl. 2:10, 11.

7. Akin a nepeg a maalwar tayon pilien iray panligliwaan?

⁷ Kaaruman ni, aliwan amin a panligliwaan et maabig, ta dakel so talagan makaderal na espiritualidad tan moral. Pigara la kasin milyon so nanermen lapud ‘labay da labat lay manliket,’ a nandruga, nanbuanges, odino nansugal ira? Si Jehova et mapangasin amasakbay ed sikatayo a no abuloyan tayo so puso odino mata tayo a manggawa na makapuy iran bengatla, nasagmak tayo so mauges iran resulta.​—Gal. 6:7.

8. Akin a makabat a nonoten so paraan na kabibilay tayo?

⁸ Nagkalalo la, no uunaen tayo so liket, agtayo la nagawaan iray mas importantin bengatla. Tandaan, antiktikey so bilay tan agtayo nibagan maksil tayon naynay tan agbalot manproblema. Sikato’tay rason no akin ya intuloy ya impaimano nen Solomon a mas maong ni onla ed ponpon​—nagkalalo la ed ponpon na matoor a Kristiano​—nen say onla ed “abung na liket.” (Basaen so Eclesiastes 7:2, 4.) Akin? Lapud legan tayon ondedengel na paliwawa ed ponpon tan nodnonoten so impanmatoor ed si Jehova na saman ya inatey, ompan napaseseg itayon usisaen met so paraan na kabibilay tayo. Bilang resulta et napakiwas itayon umanen iray plano odino kalat tayo pian makabat a nausar so nakekeraan a bilay tayo.​—Ecl. 12:1.

Kasin Napenek Itayo na Kayamanan?

9. Anto so naamtaan nen Solomon nipaakar ed pakawalaay kayamanan?

⁹ Si Solomon et sakey ed saray sankayamanan a too nen insulat to so Eclesiastes. (2 Awa. 9:22) Inkuan to: “Nalak ya amin iray labalabay ko.” (Ecl. 2:10, Maung a Balita) Anggaman ontan, naamtaan to ya aliwan say kayamanan so makapangiter na inkapnek. Onia so apaneknekan to: “Say mangaro ed pilak agnapesel ed pilak; odino say mangaro ed daakan, agnapesel ed munat.”​—Ecl. 5:10.

10. Anto so mangiter na tuan inkapnek tan kayamanan?

¹⁰ Anggaman maples a manguuman so balor na kayamanan, siansia nin maksil so panangingganyo na satan. Diad agano nin surbi ed Estados Unidos, 75 porsiento na amin a walad unonan taon ed kolehyo et kalat day “onyaman.” Onliket ira kasi anggan adampot da lay kalat da? Andi, ta naimano na saray managsukimat a no say manunan imanoen et materyal, makasbel iya ed liket tan inkapnek. Nensaman ni et ontan met so konklusyon nen Solomon. Insulat to: “Nantipon ak met na pilak tan balitok, tan say kayamanan na saray arari . . . Et nia, amin sikato nen saman so kaapaan, tan panguusil ed dagem.” * (Ecl. 2:8, 11) Balet no say bilay  tayo et usaren ed impapuson panaglingkor ed si Jehova tan naawat tayo so panamendisyon to, nawalaan itayo na tuan kayamanan.​—Basaen so Uliran 10:22.

Anton Kimey so Makapangiter na Tuan Inkapnek?

11. Anto so ibabaga na Biblia ed kakanaan na pankimey?

¹¹ Inkuan nen Jesus: “Si Amak mankikimey ni angga ed natan, tan siak mankimey ak.” (Juan 5:17) Seguradon apenek si Jehova tan Jesus ed impankimey da. Impabitar na Biblia ya aliketan si Jehova ed impamalsa to: “Say Dios anengneng to so amin a bengatla a ginawa to, et nia maong iran tuloy.” (Gen. 1:31) Nen anengneng na saray anghel so palsa na Dios, “inmeyag ira lapu ed liket.” (Job 38:4-7) Nanliketan met nen Solomon so kimey a walaay importantin gagala.​—Ecl. 3:13.

12, 13. (a) Panon ya imbalikas na duaran too so inkapnek da lapud inkakuli ra? (b) Akin et makapadismaya no maminsan so trabaho odino anapan?

¹² Amta na dakel a totoo so kakanaan na makulin pantrabaho. Singa bilang, onia so imbaga na matalonan pintor a si José: “No nipintam so nononoten mo, naliknam a singa ka akasabi ed toktok na atagey a palandey.” Onia met so inkuan nen Miguel, * a sakey a negosyante: “Makapnek so pankimey ta nalegpet mo so pamilyam. Tan naliknam met a walay agawaan mo.”

¹³ Diad biek a dapag, dakel a trabaho so apasakey tan makapasawa. No maminsan, nadidismaya iray mantratrabaho odino aliwa ni ingen a patas so trato ed sikara. Unong ya indanet nen Solomon, walaray totoon mangiras ya uusaren day koneksion da ed saray walad pakauley tan nayarin mangawat met na tumang a singa aawaten na makulin komikimey. (Ecl. 2:21) Dakel nin bengatla so manresulta ed pakadismaya. Say maaligwas a negosyo et ompan nalugi lapud ikakapuy na ekonomya odino ag-iilaloan iran nagawa. “Pinmawil ak pian nanengneng ed leksab na banwa a say lumba et aliwan diad saray masiglat, nisay bakal et diad saray mabiskeg, nisay tagano et diad saray makabat, nisay kayamanan et diad saray makatalos, nisay pamalangkap et diad saray makaamta; lapud say panaon tan ag-iilaloan a nagawa et onsasabi ed sikaran amin.” (Eclesiastes 9:11, NW) Mabetbet a say pantatalikarkar na too pian onasenso et manresulta ed sakit na linawa tan inkadismaya, ta namoria ton sikato manaya so ‘nankimey nipaakar ed dagem.’​—Ecl. 5:16.

14. Anton kimey so naynay a makapangiter na tuan inkapnek?

¹⁴ Wala kasi kimey ya agbalot makapadismaya? Onia so apaneknekan nen José, say pintor ya abitla nen niman: “Diad ilalabas na saray taon, nabalang odino naderal iray impinta. Balet, aliwan ontan ed saray espiritual a bengatlan nagagawaan tayo. Diad pangunor ed si Jehova ed panagpulong na maong a balita, atulongan koy arum a nagmaliw a maabig tan maptek a Kristiano, tan permanente itan a tulong ed  sikara. Ag-itan nabayaran.” (1 Cor. 3:9-11) Imbaga met nen Miguel a sikatoy mas napepenek ed panagpulong ed Panarian nen say diad trabaho to. Inkuan to: “Anggapo lay makapipara ed naliknam a liket sano ninanabang mo so katuaan na Biblia ed arum, tan nalikas mon tinmanek iya ed puso na toon apulongan mo.”

“Ibantak Mo so Tinapay Mo”

15. Anto so nakaukolan pian magmaliw a talagan makabaliksan so bilay?

¹⁵ Bilang konklusyon, anton talaga so nakaukolan pian magmaliw a makabaliksan so bilay? Nalikna tayo so tuan inkapnek no usaren tayo so antiktikey a bilay tayo ed sayan sistema pian gawaen so maabig odino pian paliketen si Jehova. Napaapit itayo ed si Jehova, nabangatan tayo iray anak tayo unong ed estandarte na Biblia, natulongan tayo so arum a nakabat si Jehova, tan napansiansia tayoy pikakaaro ed saray agagi. (Gal. 6:10) Amin na saraya et mangiter na permanentin kakanaan tan bendisyon ed saramay makakagawa ed saratan. Makapainteres so impaneskribe nen Solomon ed kablian na panggawa na maabig. Imbaga to: “Ibantak mo so tinapay mo ed tapew na saray danum; ta sikato so naromog mo ed kayari na saray dakel ya agew.” (Ecl. 11:1) Pinaseseg nen Jesus iray disipulo to: “Mangiter kayo, et naikdan kayo.” (Luc. 6:38) Niarum ni, insipan a mismo nen Jehova a tumangan to iramay manggagaway maabig ed arum.​—Uli. 19:17; basaen so Hebreos 6:10.

16. Kapigan so sankaabigan a panaon pian iplano so bilay tayo?

¹⁶ Nipaakar ed pangusar tayo na bilay, papasesegen itayo na Biblia a legan ya ugaw itayo ni et manggawa itayo la na makabat iran desisyon. No ontan so gawaen tayo, ag-itayo nadismaya ed arapen. (Ecl. 12:1) Talagan makapaermen no pirdien tayo so kaksilan tayo diad pangusil ed pananagyat na sayan mundo, insan tayo naamtaan ya andi-kakanaan manaya itan, a singa labat panguusil ed dagem!

17. Anto so ontulong pian pilien mo so sankarakpan a paraan na kabibilay?

¹⁷ Mipadpara ed maaron ama, labay nen Jehova a panliketan moy bilay, makagawa na maabig, tan paliisan so pakasakitan. (Ecl. 11:9, 10) Anto so makatulong pian nagawaan mo iraya? Iplanom a palaknaben so serbisyom ed Dios, insan mo pansagpotan a dampoten itan. Ngalngali 20 a taon lay apalabas, kaukolan nen Javier so manpili no kasin sikatoy mandoktor odino manpayunir. Inkuan to: “Nayarin makapnek so pagmaliw a doktor, balet ag-itan mipara ed aliknak a liket diad intulong ko ed pigaran totoo a mangamta ed katuaan. Say panagpayunir ko so sigpot ya amaliket ed bilay ko. Say pagbabawian ko labat et no akin ya agak ginmapon tampol.”

18. Akin a makabkabaliksan so bilay nen Jesus diad dalin?

 ¹⁸ Anto sirin so sankaimportantian a bengatla a nepeg tayon dampoten? Oniay akasulat ed libro na Eclesiastes: “Say sakey a maong a ngaran sikato so magmaong nen say mabli a larak; tan say agew na ipatey, nen say agew na kianak.” (Ecl. 7:1) Anggapo lay sankaabigan ya alimbawa ed saya noag say impanbilay nen Jesus. Seguradon sikatoy nanggawa na maabig a ngaran ed si Jehova. Diad impanmatoor nen Jesus anggad patey, indepensa toy inkasoberano na Ama to tan inter toy dondon bagat a makapangisalba ed sikatayo. (Mat. 20:28) Diad antikey a panaon a wadiad dalin si Jesus, sikatoy perpekton ehemplo na makabkabaliksan a bilay a panseseetan tayon aligen.​—1 Cor. 11:1; 1 Ped. 2:21.

19. Anto so makabat a simbawa nen Solomon?

¹⁹ Nayari tayo met a nawalaan na maabig a ngaran ed Dios. Parad sikatayo, say maong a reputasyon ed si Jehova et arawin mas makana nen say kayamanan. (Basaen so Mateo 6:19-21.) Diad inagew-agew, dakel so paraan pian makagawa itayo na maabig a ngaran ed si Jehova tan napagmaliw na satan a makabaliksan so bilay tayo. Alimbawa, nayarian tayon ipulong so Panarian ed arum, pabiskegen so panamaley tan pamilya tayo, tan paeleten so relasyon tayo ed si Jehova panamegley na personal a panagaral tan iyatendi ed saray pantitipon. (Ecl. 11:6; Heb. 13:16) Labay mo kasin napagmaliw a makabkabaliksan so bilay mo? No ontan, mantultuloy a tumboken so simbawa nen Solomon: “Takotan mo so Dios tan unoren mo so saray ganggan to; ta saya sikato so katiponan na kanepegan na too.”​—Ecl. 12:13.

[Saray paimano ed leksab]

Panon Mon Ebatan?

• Anto so mamakiwas ed sikatayo pian nonoten a maong no antoray kalat tayo ed bilay?

• Panon so nepeg a panmoria tayo ed liket tan kayamanan?

• Anton klase na kimey so mangiter na magnayon ya inkapnek?

• Anton importantin bengatla so nepeg tayon pansagpotan a dampoten?

[Tepetepet Parad Panagaral]

[Litrato ed pahina 23]

Panon tayon ipapasen so panagligliwaan?

[Litrato ed pahina 24]

Akin a makapkapnek so panagpulong?