Gegemtanen so “Kasantosan dia ed Takot ed Dios”

DIAD pangidadayew ed si Jehova bilang say sankasantosan ed amin, inkuan na Biblia: “Santo, santo, santo, si Jehova.” (Isa. 6:3; Apo. 4:8) Say Hebreo tan Griegon salita a parad “kasantosan” et kabaliksan toy kalinisan odino malinis a panagdayew, kibiig manlapud saray bengatlan makadutak. Say tutukoyen na inkasanto na Dios et say nagnap ya inkayadyari to ed moral, ya ipapasen ton importante.

Agta kanepegan labat ya ilaloan na say masanton Dios a si Jehova a saramay managdayew to et magmaliw met a masanto, salanti, malinis ed pisikal, moral tan espiritual? Malinlinew so ibabaga na Biblia a labay nen Jehova a magmaliw a masanto iray managdayew to. Oniay nabasa tayo ed 1 Pedro 1:16: “Masantos kayo komon ta masantos ak.” Talaga kasin sarag ya aligen na saray ag-ayadyarin totoo so inkasanto nen Jehova? On, ingen ta agda sigpot a naalig itan. Nipasen itayo a masanto ed arap na Dios no say panagdayew tayo ed sikato et malinis tan no walaan itayo na maapit a siglaotan ed sikato.

Balet, panon tayon makapansiansian malinis ed sayan mundon aliwan malinis ed moral? Antoran kagagawa so kaukolan tayon arawian? Antoray nayarin kaukolan tayon umanen ed panagsalita tan ugali tayo? Naamtaan tayoy ebat diad pangonsidera tayo ed saramay kinaukolan nen Jehova ed saray Judion papawil ed dalin da manlapud Babilonia nen 537 B.C.E.

‘Niwala Naani Dalan na Inkasanto’

Impasakbay la nen Jehova a saray totoo ton akautibo ed Babilonia et makapawil ed dalin da. Diad satan a propesiya et oniay nipaseguro: “Et wala naanid’man so sakey a pulong, tan sakey a dalan, et sikato naani ningaran a, say Dalan na Inkasanto.” (Isa. 35:8a) Ipapatnag na sarayan balikas ya aglabat manggawa si Jehova na dalan pian makapawil iray Judio ed dalin da noagta ipapaseguro to met a proteksionan to ira legan iran manbabaroy.

Diad sayan panaon, angilukas met si Jehova na “Dalan na Inkasanto” parad saray lingkor to pian makapaway ira ed Babilonia a Baleg, say sankamundoan ya empiryo na palson relihyon. Nen 1919, imbulos to iray alanaan a Kristiano manlapud palson panagdayew, tan intultuloy dan nilinis so panagdayew da manlapud palson bangabangat. Tan bilang managdayew nen Jehova natan, panggayagaan tayoy malinis tan mareen a kongregasyon na saray managdayew nen Jehova, no iner sikatoy nadayew tayo tan sikatayoy walaan na maong a relasyon ed sikato tan ed kapara tayon too.

Saray kabiangan na “melag a pulok” na alanaan a Kristiano tan say ondarakel a “baleg a pulok” na “arum a karnero” so amilin manakar ed dalan a masanto tan iimbitaan da so arum a miulop ed sikara. (Luc. 12:32; Apo. 7:9; Juan 10:16) Say “Dalan na Inkasanto” so lukas ed amin a malabay a  mangiyapay ed saray laman da bilang ‘mabilay a bagat, masantos tan makapaliket ed Dios.’​—Roma 12:1.

“Say Agmalinis Agnaani Ondalan ed Sikato”

Nen 537 B.C.E., kaukolan a nakapet na saray ompapawil a Judio so sakey ya importantin kakaukolanen. Nipaakar ed saramay onkualipikan manakar ed “Dalan na Inkasanto” oniay inkuan na Isaias 35:8b: “Say agmalinis ag naani ondalan ed sikato.” Lapud say gagala na impawil na saramay Judio ed Jerusalem et say pangiletneg lamet ed puron panagdayew, aliwa sirin itan a pasen parad saray makasarilin pilalek, kaandiay respeto ed saray sagradon bengatla, odino mangaagamil na karutakan. Kaukolan a pansiansiaen na sarayan akapawil so atagey ya estandarte nen Jehova ed moral. Saramay mankaliktan na panangabobon na Dios natan et kaukolan met a makakapet ed satan a kakaukolanen. Kaukolan day mansiansia ed “kasantosan dia ed takot ed Dios.” (2 Cor. 7:1) Anto ta iran marutak ya ag-agamil so kaukolan tayon paliisan?

Insulat nen apostol Pablo a “sankapatnagan so saray gawa na laman,” salanti “sikaraya: pikakalugoran, karutakan, kaalakan na laman.” (Gal. 5:19) Say pikakalugoran et manutukoy ed amin ya agmanepeg a seksual ya ag-agamil diad paway na uksoyay panangasawa. Say kaalakan na laman et lalanoren toy ‘kaandiay moralidad; kabandayan; anggapoy baing tan binabastos a kondukta.’ Mapatpatnag a namparan say pikakalugoran tan say kaalakan na laman et misumlangan ed inkasanto nen Jehova. Kanian saray nalalamlaman a mangagamil ed saratan et agnaabuloyan a mantultuloy a magmaliw a kabiangan na Kristianon kongregasyon odino sikaray nadispelo. Ontan met so nagawa ed saray nalalamlaman lan mangagamil na alablabas a karutakan, salanti, ‘karumsisan [odino karutakan] a siaagap.’​—Efe. 4:19.

Say salitan “karutakan” et sakey a terminon dakel so lalanoren ton kasalanan. Samay Griegon salita parad satan et lalaktipen toy amin a klase na inkarutak, salanti, inkarutak ed saray kondukta, diad panagsalita, tan pati say pibibiang ed arum a relihyon. Sasaglawien met na satan iray arum a nengneng na marutak a kagagawa a nayarin agmankaukolan na hudisyal iran aksion. * Balet, no mantultuloy a manggawa na ontan a karutakan so sakey, gegegemtanen to kasi inkasanto?

Isipen pa labat ya inggapo na sakey a Kristiano so sekreton pannengneng na pornograpiya. Kabebekta lapud kalkalnan naliliing laray marutak a pilalek to, onkapuy lay determinasyon ton mansiansian malinis ed imaton nen Jehova. Nayari palagin agni asabi punto a say gagawaen to et nibagan alablabas lan karutakan, balet ta seguradon agto la nauunor imay nisimbawan itultuloy a konsideraen labat iray ‘bengatlan malinis, nababalita a maong, masimpit, tan daydayewen.’ (Fil. 4:8) Say pornograpiya et sakey a bengatlan marutak tan talagan deralen toy maabig a relasyon na sakey ed Dios. Agkomon anggan nabitla ed limog tayo so antokaman a marutak a bengatla.​—Efe. 5:3.

Nia ni so sakey ya alimbawa. Iyan tayo lan say sakey a Kristiano et nagmaliw lan kagagawa toy pan-masturbate odino panam-amayo ed kayarian to pian sigagalan liingen iray seksual a pilalek to, a nayarin bansagan to ni itan na pambantay na  pornograpiya. Anggaman ag-espisipikon abitla ed Biblia iyan kagagawa, agta seguradon dutakan na satan so kanonotan tan emosyon na sakey? No itultuloy ton gawaen itan, agta seguradon naderal so personal a relasyon to ed Dios, tan magmaliw lan marutak ed imaton To? Ipapuso tayo sirin so simbawa nen apostol Pablo a “linisan tayo komon so inkasikatayon dili ed ami tilol na laman tan espiritu” tan “pateyen [tayo] sirin so kabiangan [tayo] a wadia ed tapew na dalin; panaglawan, karutakan, kaalakan, mauges a getma tan agum.”​—2 Cor. 7:1; Col. 3:5.

Aglambengat kokonsintien na sayan mundo nen Satanas so marutak iran ag-agamil noagta ilalagyat to ni ingen iratan. Tua a nayarin talagan sakey ya angat so agpibiang ed sarayan marutak a kagagawa. Balet ta saray tuan Kristiano et nepeg ya agla “manaakar a singa kakaakar met na saray Gentil [totoo na nasyon] ed maapan kalakal da.” (Efe. 4:17) On, abuloyan itayo nen Jehova a mantultuloy a manakar ed “Dalan na Inkasanto,” salambengat no arawian tayo irayan marutak ya ag-agamil, walaman so makakaimaton odino anggapo.

“Anggapo so Leon a Manayam Naanid’man”

Nayarin kaukolan met na arum so manggawa na baleg a pananguman diad panagsalita tan kondukta ra pian napanggayagaan day panangabobon na masanto a Dios, si Jehova. Say Isaias 35:9 so mangibabaga na onia: “Anggapo so leon a manayam naanid’man, tan anggapo met so mangasebeg ya ayep ya ontatdang diman,” satan imay “Dalan na Inkasanto.” Saray totoon say kakikiwas tan panagsalita ra et bayolenti tan agresibo et niyaliling ed masebeg ya ayep. Talagan agnayari ontan iran klase na totoo ed balon mundo na Dios. (Isa. 11:6; 65:25) Sirin, kaukolan ya ikaindan na saramay mankaliktan ed panangabobon na Dios so oniaran inaayep a personalidad tan itultuloy dan gegemtanen so inkasanto.

Ipapanonot met ed sikatayo na Biblia a “saray amin a kapaitan, tan sanok, tan ingongot, tan ingal, tan mauges a panagsalsalita, naekal komon ed sikayo, pati amin a mauges a kanonotan.” (Efe. 4:31) Diad Colosas 3:8 et nabasa tayon: “Iyarawi yo met so saratan ya amin, pasnok, ingongot, mauges a nonot, inkalabir a makapabaing a salita ya ompaway ed sangi yo.” Saramay balikas a “mauges a panagsalita” tan “makapabaing a salita” diad sarayan teksto et manutukoy ed ansakit, andiay respeto odino maayew iran panagsalita.

Diad panaon tayo, nagmaliw a singa labat la normal so oniaran ansakit tan garambasal a panagsalita anggan diad mismon ayaman. Man-eebatan iray sanasawa na saray salitan singa onsasaksak ed kasakit, maruksa, tan makaekal na dignidad, ya anggan saray ananak da et pansalitaan day ontan. Nepeg ya agbalot nagawa so ontan iran panagsalita ed loob na Kristianon pamilya.​—1 Cor. 5:11.

Panggegemtan ed “Kasantosan dia ed Takot ed Dios”​—Sakey a Bendisyon!

Agaylan abig a pribilehyo so pakapanlingkor ed masanton Dios, si Jehova! (Jos. 24:19) Talagan anggapo lay kaparpara to iyay espiritual a paraiso ya angitarokan nen Jehova ed sikatayo. Say pamasiansia tayo ed kondukta tayo a masanto et peteg a sikatoy sankaabigan a dalan na bilay.

Agla manbayag, say insipan na Dios a Paraiso diad dalin et nagawa la. (Isa. 35:1, 2, 5-7) Saramay manpipirawat ed satan tan saramay mantutultuloy a manggegemtan ed maridios a kabibilay et nawalaan na pasen diman. (Isa. 65:17, 21) Gawaen tayo sirin so anggaay nayarian tayo ya itultuloy a dayewen so Dios ed malinis a paraan tan pansiansiaen so maapit a siglaotan ed sikato.

[Paimano ed leksab]

[Litrato ed pahina 26]

Anto so kinaukolan pian saray Judio et makapanakar ed “Dalan na Inkasanto”?

[Litrato ed pahina 27]

Deralen na pornograpiya so relasyon na sakey ed si Jehova

[Litrato ed pahina 28]

‘Saray amin ya ingalan tan mauges a panagsalita et naekal komon ed sikayo’