Magano Lay Pangiliktar na Panarian na Dios!

“Onsabi komon so panarian mo. Nagawa komon so linawam, unong ed tawen, ontan met ed dalin.”​—MAT. 6:10.

1. Antoy manunan bangat nen Jesus?

 DIAD Sermon nen Jesu-Kristo ed Palandey, inlaktip to so modelon pikakasi a nansumaryo ed manunan bangat to. Saray papatumbok to et imbangat ton manpikasi ed Dios: “Onsabi komon so panarian mo. Nagawa komon so linawam, unong ed tawen, ontan met ed dalin.” (Mat. 6:9-13) Si Jesus so “linma ed saray syudades tan aldeas, a nampupulong tan angiyakar na saray maong a balita na panarian na Dios.” (Luc. 8:1) Oniay impaseseg nen Kristo ed saray papatumbok to: ‘Anap yo nin unona so panarian, tan say inkatunong na Dios.’ (Mat. 6:33) Legan yon aaralen iyan artikulo, mannonot na paraan no panon ya usaren iyan materyal ed ministeryo yo. Singa bilang, imanoen no panon yon ebatan irayan tepet: Panon kaimportante so mensahe na Panarian? Akin a kaukolan ya iliktar so totoo? Tan panon so pangiliktar na Panariay Dios?

2. Panon kaimportante so mensahe na Panarian?

² Oniay impasakbay nen Jesus: “Saya ya ebanghelyo na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi so anggaan.” (Mat. 24:14) Say maong a balita na Panariay Dios et im-importante. On, sankaimportantian iyan mensahe ed interon mundo! Diad masulok a 100,000 a kongregasyon na saray Tasi nen Jehova ed interon dalin, ngalngali pitoran milyon a lingkor na Dios so mibibiang ed agnaparaan a panagpulong a kimey, ya ibabaga ra’d arum ya inletneg la so Panarian. Satan ya impangiletneg et maong a balita lapud amawala so Dios na sakey a gobierno ed tawen a sigpot a manuley ed dalin. Diad uley na Panarian, nagawa so linawa nen Jehova ed dalin a singa nagagawa ed tawen.

3, 4. Anto so resulta sano nagawa lay linawa na Dios ed dalin?

³ Anto kasi kipapasen na katooan sano nagawa lay linawa na Dios ed dalin? “Punasen [nen Jehova] so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot.” (Apo. 21:4) Agla mansakit odino ompatey iray totoo lapud atawir a kasalanan tan ag-inkaperpekto. Saray inaatey a walad pakanodnonotan na Dios et walay pankanawnawa ran manbilay ya andi-anggaan, lapud oniay insipan na Biblia: “Wala naani kioli ed bilay na saray matunong tan agmatunong.” (Gawa 24:15) Naandi la’d satan so  guerra, sakit, tan eras, tan say interon mundo et magmaliw lan paraiso. Anggan saray atap odino mapeligron ayayep natan et unamo la ra’d totoo tan diad kapara ran ayep.​—Sal. 46:9; 72:16; Isa. 11:6-9; 33:24; Luc. 23:43.

⁴ Lapud marakdakep iray bendisyon diad uley na Panarian, agpankelawan ya oniay makapaligliwan imbaga na propesiya na Biblia nipaakar ed kabibilay diad satan a panaon: “Saray mauyamo tawiren da naani dalin tan manliket ira a dili ed inkadaakan na kareenan.” Balet, komusta iramay panlalapuay gulo? Oniay impasakbay na Biblia: “Wala ni so daiset, et say bagel onandi.” Ingen, “saray manalagar ed Jehova tawiren da so dalin.”​—Sal. 37:9-11.

5. Anto so nagawa ed kaplesan a sistema na bengabengatla?

⁵ Pian nagawa irayan amin, kaukolan ya ekalen so kaplesan a sistema na bengabengatla kaiba lay mankokontraan iran gobierno, relihyon, tan komersyo na sayan mundo. Ontan a mismo so gawaen na gobierno ed tawen. Si propetan Daniel so apuyanan a mangipasakbay: “Dia ed saray agew naani na saratan ya arari [a manuuley la natan], say Dios na tawen mamaalagey naani na sakey a panarian [ed tawen] ya anggan kapigan agnaani naderal tan say pananguley to agnaani niiter ed sananey a baley: balet buybuyaken to naani tan upoten to naani so saraya ya amin a [kaplesan a] panarian, et sikato so mansiansia lawas.” (Dan. 2:44) Say Panarian na Dios, salanti, say balon gobierno ed tawen, so manuley la’d satan ed tatawagen a balon dalin odino matunong a totoo. On, wala naani “tawen a balo tan dalin a balo, a sikara so panaayaman na katunongan.”​—2 Ped. 3:13.

Mas Kaukolan so Panangiliktar Natan

6. Panon a deneskribe na Biblia so kaugsan ed sayan marelmeng a mundo?

⁶ Sanen si Satanas, Adan, tan Eva so nanrebelde ed Dios, a labay day mandesisyon a bukor ed no antoy duga tan aliwa parad sikara, ginmapo so makapasinagem a kipapasen na totoo. Kalabas na masulok a 1,600 a taon, sakbay ya agawa so Delap ed interon dalin, “say kabaglan na too ed dalin abalbaleg, tan mauges labat a lanang so amin a pimorekdek na nonot na puso to.” (Gen. 6:5) Insan manga 1,300 taon kayari na satan et naimatonan nen Solomon so mauge-uges a situasyon, kanian oniay insulat to: “Ninonot ko a magmaong ni kipapasen da ray inaatey nen saray mabilay. Balet lalon maong ni ray agla ran balot nianak, saray agdan balot anengneng iray kaugsan a nagagawa diad tapew na dalin.” (Ecl. 4:2, 3, Maung a Balita) Natan, manga 3,000 a taon lay linmabas et siansia nin onloloor so kaugsan.

7. Akin a mas kaukolan natan so panangiliktar na Dios?

⁷ Anggaman abaybayag lan walay kaugsan, mas kaukolan natan so panangiliktar na Panariay Dios nen say kapiganman. Diad apalabas a 100 a taon et mas grabe iray agawa, tan lalo nin onloloor itan. Alimbawa, inreport na Worldwatch Institute: “Saray biktima na guerra nen [koma-20] a siglo et mamitloy karakel no ikompara ed saray biktima na amin a guerra manlapud unonan siglo AD anggad 1899.” Manlapud 1914 et masulok lan 100 milyon so inatey ed guerra! Unong ed kalkulasyon na sakey ya  ensayklopedia, anggad 60 milyon a totoo so inaatey nen Guerra Mundial II. Natan ta wala lay nuklear ya armas na arum a nasyon, sarag la na totoon deralen so baleg a porsiento na populasyon na mundo. Tan anggan onaaligwas so siensia tan medisina, siansia nin ompapatey so manga limaran milyon ya ugugaw kada taon lapud eras tan sakit.​—Nengnengen so kapitulo 9 na libron Anto so Peteg ya Ibabangat na Biblia?

8. Anto so sigpot ya apaneknekan diad nilibon taon a panuuley na totoo?

⁸ Agsarag na totoon patundaen so kaugsan. Agbalot niiter na politika, komersyo, tan relihyon na sayan mundo so manunan pankaukolan na totoo parad kareenan, inkaaligwas, tan bunigas. Imbes a solbaren iray angkakabaleg a probleman naeeksperiensya na katooan natan, inmarum ni ra laingen. Kanian, say nilibon taon a panuuley na totoo et sigpot ya amaneknek a tua irayan balikas: “Say dalan na too anggapo ed sikato lanlamang; aliwa a wala ed too a manakar a mangitonton ed saray kurang to.” (Jer. 10:23) On, say “sakey a too walaan na pakayari ed sananey pian kaugsan to.” (Ecl. 8:9) Niarum ni, say “lapag a pinalsa maningel ira ya amin tan maniirap ira . . . ya anggad natan.”​—Roma 8:22.

9. Diad “saray kaunoran ya agew,” anto ran kipapasen so agla pakabiglaan na saray tuan Kristiano?

⁹ No nipaakar ed panaon tayo, oniay impasakbay na Biblia: “Dia ed saray kaunoran ya agew onsabi so saray panaon a maatap.” Kayarin deneskribe iray kipapasen diad kaunoran iran agew a say manuuley et totoo, oniay inkuan na propesiya: “Saray totoo a mauges tan saray managsaol onuges la ran onuges.” (Basaen so 2 Timoteo 3:1-5, 13.) Agla itan pakabiglaan na saray Kristiano, lapud “say interon mundo so mandukdukol ed pakayari na sakey a mauges,” salanti, si Satanas. (1 Juan 5:19, NW) Anggaman ontan, maong a balita so magano lan pangiliktar na Dios ed saramay mangaaro ed sikato. Iliktar ira ed sayan maples ya onuuges lan onuuges a mundo.

Say Alenleneg a Napanmatalkan a Manangiliktar

10. Akin a si Jehova so alenleneg a napanmatalkan a Manangiliktar?

¹⁰ Sano ipupulong yo so maong a balita, ipaliwawa yo a si Jehova so alenleneg a napanmatalkan a Manangiliktar. Sikato labat so walaay pakayari tan pilalek a mangiliktar ed saray lingkor to ed antokaman a mauges a situasyon. (Gawa 4:24, 31; Apo. 4:11) Segurado itayon si Jehova so lawas mangiliktar ed totoo to tan manggawa ed saray gagala to, lapud insipan to: “Petepeteg, singa ninonot ko, ontan so nagawa.” On, say salita to so “ag-ompawil ed [sikato] a paoy-paoy.”​—Basaen so Isaias 14:24, 25; 55:10, 11.

11, 12. Antoy ipapaseguro na Dios ed saray lingkor to?

¹¹ Impaseguro nen Jehova ya iliktar to ray lingkor to no ipaakseb to lay panangukom to ed saray mauges. Oniay inkuan na Dios sanen imbaki toy propeta Jeremias pian makpel a mansalita ed saray graben mankakasalanan: “Agka antakot.” Akin? “Ta wala ak ed sika pian ilaban ka.” (Jer. 1:8) Mipadpara, sanen magano lan deralen nen Jehova so mauges a Sodoma tan Gomorra, imbaki toy duaran anghel pian tulongan dan makapaway a maligen si Lot tan say pamilya to ed satan a pasen. “Dia ed saman si Jehova inuran to so Sodoma tan Gomorra na asupre tan apoy.”​—Gen. 19:15, 24, 25.

¹² Anggano interon mundo ni, sarag nen Jehova ya iliktar iramay manggagawa na linawa to. Alimbawa, sanen dineral to ed Delap so mauges a mundo nensaman, “inlaban to si Noe, a pati arum nin pitora, sakey a managpulong na katunongan.” (2 Ped. 2:5) Sano deralen la nen Jehova iyan mauges a mundo, iliktar to lamet iray matunong. Kanian, oniay ibabaga na Salita to: “Anapen yo si Jehova, sikayo ya amin a mauyamo ed dalin . . . anapen yo so inkatunong, anapen yo so kauyamoan: nayari a sikayo naani niyamot dia ed agew na sanok nen Jehova.” (Sof. 2:3) Bilang resulta na satan ya interon mundon kaderal, ‘say maptek so manayam ed dalin, balet say marelmeng so napegpeg a manlapu ed dalin.’​—Uli. 2:21, 22.

13. Panon ya iliktar nen Jehova iray inatey lan lingkor to?

 ¹³ Balet, dakel la so inatey a lingkor na Dios lapud sakit, panamasegsegang, tan arum ni ra. (Mat. 24:9) Kanian, panon irayan iliktar? Singa imbaga nen niman, “wala naani kioli ed bilay na saray matunong.” (Gawa 24:15) Talagan makapaligliwan naamtaan ya anggapon balot so makaamper ed si Jehova diad pangiliktar to’d saray lingkor to!

Sakey a Matunong a Gobierno

14. Akin a matalek itayon say Panarian na Dios et matunong a gobierno?

¹⁴ Diad ministeryo yo, ipaliwawa yo a say Panarian nen Jehova ed tawen et sakey a matunong a gobierno. Tua iya lapud nipapatnag na saya iray marakdakep a kalidad na Dios, a singa say inkahustisya, inkatunong, tan aro. (Deu. 32:4; 1 Juan 4:8) Inter na Dios so Panarian ed si Jesu-Kristo, say sankakualipikadoan a manuley diad dalin. Gagala met nen Jehova a mangala na 144,000 ya alanaan a Kristiano diad dalin pian manbilay ed tawen bilang kaiban mananawir nen Kristo a manuley diad interon dalin.​—Apo. 14:1-5.

15. Antoy pidumaan na uley na Panariay Dios ed uley na totoo?

¹⁵ Say uley nen Jesus tan saray 144,000 et talagan midumaan ed uley na saray agperpekton totoo! Saray manuley ed sayan sistema na bengabengatla et maslak a maruksa tan lalagyaten day sakop da a miguerra, kanian minilyon so ompapatey. Agpankelawan a bibilinen itayo na Biblia ya agtayo nepeg a panmatalekan so too, “a dia ed sikato anggapo so tulong”! (Sal. 146:3) Balet alay abig iray kalidad nen Kristo a nanengneng ed pananguley to! Oniay imbaga nen Jesus: “Dago kayo’d siak, amin yon nasasagpotan tan nabebelatan, et ikdan ta kayoy pampainawa. Ala yoy pakok ed sikayo, tan manaral kayo’d siak; ta mauyamo ak tan mapaabeba ak a puso: et naromog yoy inawa nipaakar ed saray kamarerwa yo. Ta say pakok mainomay, tan anlemew so awit ko.”​—Mat. 11:28-30.

Magano lan Manampot so Kaunoran iran Agew!

16. Panon a mangangga so kaunoran iran agew?

¹⁶ Manlapud 1914, sayan mundo et wala la’d kaunoran iran agew, odino panaon na “anggaan.” (Mat. 24:3) Maganggano lan nagawa so tinawag nen Jesus a “baleg ya irap.” (Basaen so Mateo 24:21.) Sampotan na sayan agnaparaan ya irap so interon mundo nen Satanas. Balet panon ya onggapo so baleg ya irap? Tan panon itan a manampot?

17. Anto so ipapanengneng na Biblia nipaakar ed igapo na baleg ya irap?

¹⁷ Biglaan so igapo na baleg ya irap. On, onsabi so “agew na Katawan” diad panaon ya ag-iilaloan “sano ibabaga ray, Kareenan tan andi-paga.” (Basaen so 1 Tesalonica 5:2, 3.) Onggapo so impasakbay a baleg ya irap sano iisipen na saray nasyon ya asingger da lan naresolbe so arum ed saray angkakabaleg a  problema ra. Say biglan kaderal na “Babilonia a Baleg,” say sankamundoan ya empiryo na palson relihyon so pakabiglaan na mundo. Ontan met so nalikna na arari tan saray arum ni sano ipaakseb la so panangukom ed Babilonia a Baleg.​—Apo. 17:1-6, 18; 18:9, 10, 15, 16, 19.

18. Antoy gawaen nen Jehova sano atakien la nen Satanas so totoo To?

¹⁸ Wala naani “tanda diad agew tan bulan tan saray bibitewen,” tan “ompatnag so tanda na Anak na too ed tawen.” Insan tayo la’d satan ‘ontangay ta say karondon tayo et asingger la.’ (Luc. 21:25-28; Mat. 24:29, 30) Atakien na puersa nen Satanas, odino Gog, iray totoo na Dios. Balet nipaakar ed saratan a mangaataki ed saray matoor a lingkor nen Jehova, oniay inkuan To: ‘Say maniwit ed sikayo et manidiwit ed bukel na matak.’ (Zac. 2:8) Kanian, ag-ira naderal nen Satanas. Akin? Lapud onkiwas a tampol so Soberanon Katawan a Jehova pian isalba iray lingkor to.​—Eze. 38:9, 18.

19. Akin a makapanmatalek itayo a deralen na armada na Dios ed tawen so sistema nen Satanas?

¹⁹ Sano mibakal la si Jehova ed saray nasyon, ‘naamtaan da a sikato si Jehova.’ (Eze. 36:23) Ibaki toy puersa ya uusaren ton mangipaakseb ed panangukom to​—saray agnabilang ya espiritun pinalsa ya idadaulo nen Kristo Jesus​—pian deralen so kera ed sistema nen Satanas diad dalin. (Apo. 19:11-19) No nanonotan tayo, diad sakey ya inkagawa et sakey labat ya anghel so ‘angabil ed sanlasus walomplo tan limanlibo’ a kabusol na Dios ed loob labat na sanlabi. Kanian, makapanmatalek itayo a mainomay a deralen na armada ed tawen so amin a nakekeran kabiangan na sistema nen Satanas ed dalin sano say baleg ya irap et mamantok la ed Armagedon. (2 Ara. 19:35; Apo. 16:14, 16) Si Satanas tan saray demonyo to so ibantak tan ikulong ed kaaralman ed loob na sanlibon taon. Insan diad kaunoran, sikaray deralen.​—Apo. 20:1-3.

20. Diad panamegley na Panarian, anto ray sumpalen nen Jehova?

²⁰ Naandi la sirin so kaugsan ed dalin, tan saray maptek a totoo so manbilay ya andi-anggaan ed sayan globo. Napaneknekan la’d satan a si Jehova so Matalonggaring a Manangiliktar. (Sal. 145:20) Diad panamegley na Panarian, iyalangon toy inkasoberano to, pasantosen toy sagradon ngaran to, tan gawaen toy marakdakep a gagala to ed dalin. Komon ta panliketan mon maong so ministeryom legan mon ipupulong iyan maong a balita tan tutulongan iramay “tinandaan ed bilay ya andi-anggaan” pian namoria ran magano lay pangiliktar na Panarian na Dios!​—Gawa 13:48.

Kasin Nanonotan Mo?

• Panon ya indanet nen Jesus so kaimportantian na Panarian?

• Akin a mas kaukolan so panangiliktar natan nen say kapiganman?

• Anto ray amta tayon nagawa legan na baleg ya irap?

• Panon a napaneknekan a si Jehova so Matalonggaring a Manangiliktar?

[Tepetepet Parad Panagaral]

[Saray litrato ed pahina 12, 13]

Impasakbay na Salitay Dios a diad panaon tayo et nagawa so agnaparaan a panagpulong ed interon mundo

[Litrato ed pahina 15]

No panon ya inliktar nen Jehova si Noe tan say pamilya to, niliktar To itayo met

[Litrato ed pahina 16]

“Punasen [nen Jehova] so amin a lua . . . ; tan anggapo la naani ipatey.”​—Apo. 21:4