No Panon a Naoorganisa so Mananguley ya Ulop

SAY Mananguley ya Ulop na saray Tasi nen Jehova et tutugyopen na saray dedikadon lalaki ya alanaan iran ariripen na Dios. Irerepresenta ray matoor tan makabat ya aripen a klase a sikatoy manangitarya na espiritual a tagano, tan lapuan na saray instruksion tan panamaseseg ed panagpulong a kimey diad interon mundo.​—Mat. 24:14, 45-47.

Wala so sinimban miting na sayan Mananguley ya Ulop, a kaslakan a nagagawa ed Mierkoles. Sayan miting et ontutulong ed sikaran mankimey a nankakasakey. (Sal. 133:1) Manlilingkor met irayan membro na Mananguley ya Ulop ed nanduruman komite. Singa naimano tayo ed onggendan iran parapo, balang komite et walaan na partikular a betang a parad kilaknab na panagpulong a kimey na saray Tasi nen Jehova.

◼ COORDINATORS’ COMMITTEE: Sayan komite et tutugyopen na saray coordinator na balang komite na Mananguley ya Ulop tan sakey a sekretaryo a membro met na Mananguley ya Ulop. Seseguroen na saya a say amin a komite et maabig tan matinunos so kipapakurang to. Aasikasoen met na sayan komite iray aliwan basta-basta iran emerhensia, panamasegsegang, kalamidad, tan arum niran maganat a kimey a mangaapekta ed saray Tasi nen Jehova diad interon mundo.

◼ PERSONNEL COMMITTEE: Saray agagi ed sayan komite so angipiyaan na responsabilidad a mangiter na tulong tan mangasikaso ed pisikal tan espiritual a pankaukolan na amin a membro na pamilyan Bethel. Responsabilidad na sayan komite so pamili tan panawag ed saray magmaliw a membro na pamilyan Bethel tan sikara met so mangeebat ed saray tepet nipaakar ed panaglingkor da ed Bethel.

◼ PUBLISHING COMMITTEE: Sayan komite so mangiimaton ed panag-imprinta, panangipalapag, tan panangipawit na saray literatura tayo ed sankamundoan. Sikara met so mangaasikaso ed saray panag-imprintaan tan ed amin a kayarian na nanduruman korporasyon ya uusaren na saray Tasi nen Jehova. Sayan komite met so mandedesidi no panon a sankaabigan a nausar iray pundon nidonasyon parad sankamundoan a kimey na Panarian.

◼ SERVICE COMMITTEE: Saray membro na sayan komite so mangaasikaso ed panagpulong a kimey tan ed antokaman a pamaakaran a mangilalanor ed saray kongregasyon, payunir, mamatatken tan saray ombiabiahen manangasikaso. Sikara met so mangiimaton ed panagparaan na Ministeryo Tayo ed Panarian tan sikara met so mangiimbita ed saray estudyante a manaral ed Gilead tan Ministerial Training School, tan kayari to et sikaray mangiiter ed asainmin da.

◼ TEACHING COMMITTEE: Sayan komite so mangiyuuksoy na saray materyal ya iprepresenta ed saray asemblea, kombension, tan ed saray pantitipon na kongregasyon. Mangiyaarunsa met iray nibase ed Biblia iran programa parad saray pamilyan Bethel tan sikara so mangaasikaso ed nanduruman eskuelaan a singa say Gilead tan Pioneer Service School, tan mangipaparaan ed saray audio tan video a materyal.

◼ WRITING COMMITTEE: Responsabilidad na sayan komite ya asikasoen so kisulat na saray espiritual a tagano ya iyimprinta tan ibunog ed saray agagi tan ed publiko. Eebatan na sayan komite iray tepet nipaakar ed Biblia tan sikatoy mangaaproba ed saray materyal a singa say drama tan paliwawa. Aasikasoen met na sayan komite so kimey a panagpatalos diad interon mundo.

Inyaliling nen apostol Pablo so ulop na saray alanaan ed sakey a laman, insan to indanet so importantin betang na amin a membro na satan. Indanet to met so panaaroan tan pantutulongan da, a kaukolan da so sakey tan sakey pian nagawaan da so inter na Dios a kimey da. (Roma 12:4, 5; 1 Cor. 12:12-31) Say Ulo, si Jesu-Kristo et manusustuni ed nakaukolan na sarayan alanaan, ya aliling to et kabiangan na laman to, pian namantini ra so maabig a kooperasyon tan koordinasyon. Ontan met, tataganoen to ira ed espiritual. (Efe. 4:15, 16; Col. 2:19) Say Mananguley ya Ulop et inorganisa ed onian paraan pian mangidaulo, legan ya iwawanwan ira nen Jehova panamegley na masanton espiritu to.