Onaligwas ed Espiritual Diad Pangalig ed si Pablo

“Akibakal ak ed maabig a pibabakal, asumpal ko so binati’ko, inunor ko so pananisia.”​—2 TIM. 4:7.

1, 2. Antoran pananguman ed bilay so ginawa nen Saulo a taga Tarso, tan anton importantin kimey so ginapoan to?

 SIKATOY sakey a toon mautek tan maprinsipyo. Balet ta ‘nambilay [unong] ed kaalakan na laman to.’ (Efe. 2:3) Diad saginonor, indeskribe toy inkasikato a ‘maayew, manamasegsegang tan managdumsis’ a too. (1 Tim. 1:13) Sayan too et si Saulo, a taga Tarso.

² Balet asabi panaon, inuma-uman nen Saulo so bilay to. Intalirak toy datin kagagawa to tan sikatoy nansagpot a maong pian say ‘pakagunggonaan na karaklan so naanap to imbes a say pakagunggonaan to.’ (1 Cor. 10:33) Sikatoy nagmaliw a mauyamo tan maaro ed saramay dati et biktima to. (Basaen so 1 Tesalonica 2:7, 8.) Oniay insulat to: “[“Nagmaliw ak a ministro,” NW]. . . . Dia ed siak, a kamelagan ak nen say kamelmelagan ed saray amin a sasantos, niiter so saya a grasya, pian ipulong ko ed saray Gentiles so saray agnatukor a kayamanan nen Kristo.”​—Efe. 3:7, 8.

3. Anto so nitulong ed sikatayo na panaral ed saray sulat nen Pablo tan ed rekord na impanministeryo to?

³ Si Saulo, ya akabkabat met a Pablo, et makapadindinayew ya amaaligwas ed espiritualidad to. (Gawa 13:9) Kanian, say sakey a seguradon dalan pian ompeles so iyaaligwas tayo ed katuaan bilang indibidual et say panaral tayo ed saray  sulat nen Pablo tan ed rekord na impanministeryo to, tan insan tayo aligen so pananisia to. (Basaen so 1 Corinto 11:1; Hebreos 13:7.) Nengnengen tayo pa no panon a say panggawa ed satan et mamakiwas ed sikatayon iyugali so regular a personal a panagaral, bayuboan so tuan aro ed totoo tan nawalaan na dugan panangipasen ed inkasikatayo.

Inyugali nen Pablo so Panagaral

4, 5. Panon ya agunggonaan si Pablo ed personal a panagaral?

⁴ Si Pablo et sakey a Fariseon akapanaral ed ‘salian nen Gamaliel, [tan] nipasal unong ed elet na ganggan na saray atateng,’ kanian amta to la no antoy karga na Kasulatan. (Gawa 22:1-3; Fil. 3:4-6) Kayari na inkabautismoan to, sikatoy tampol a ‘linma ed Arabia,’ nayarin diad Syrian Desert odino diad sakey a mareen a pasen diad Arabian Peninsula, a bali-balin pandalepdepan. (Gal. 1:17) Maseguron labay nen Pablo a dalepdepen iramay teksto a mamapaneknek a si Jesus so Mesias. Sakey ni, labay nen Pablo so makapanparaan parad kimey a manatalaran ed sikato. (Basaen so Gawa 9:15, 16, 20, 22.) On, impanaon to so pandalepdep ed maespiritual iran bengatla.

⁵ Lapud personal a panagaral nen Pablo, akabisado tan atalo-talosan to so Kasulatan tan bilang resulta et epektibo so panagbangat toy katuaan. Alimbawa, sanen sikatoy walad sinagoga na Antioquia diad Pisidia, aliwa labat ya aminliman inaon to so Hebreon Kasulatan pian paneknekan a si Jesus so Mesias. Tan aminpigapiga to met a tinukoy iray walad masanton sulsulat. Talagan makakombinsin maong so panagkatunongan to kanian ‘dakel a Judios tan masimpit ya apatumbok [odino proselita] so tinmumbok ed kindi Pablo tan Bernabe’ pian mas makaaral ni. (Gawa 13:14-44) Kalabas na pigaran taon, sanen sikatoy nila na pigaran Romanon Judio ed ayaman to, impaliwawa to iray bengabengatla ed sikara “a pinatua to so panarian na Dios, tan kinalaran to ra nipaakar ed Jesus dia ed panamegley na ganggan nen Moises tan saray propetas.”​—Gawa 28:17, 22, 23.

6. Antoy tinmulong ed si Pablo a mansiansian mabiskeg sano manasagmak na subsubok?

⁶ Anggano manasagmak na subsubok si Pablo, intultuloy ton inaral so Kasulatan tan angalay biskeg ed saray impuyan a mensahe na satan. (Heb. 4:12) Sanen sikatoy apriso ed Roma, antis ton’may impamatey ed sikato, imbilin ton awiten nen Timoteo ed sikato ‘iray libro [lukot]’ tan “saray pergamino.” (2 Tim. 4:13) Sarayan dokumento et nayarin kabiangan na Hebreon Kasulatan ya inuusar nen Pablo ed seryoson panagaral to. Pian makapansiansian matoor, im-importante ed si Pablo so pangasol na pikakabat manlapud Kasulatan panamegley na regular a panagaral na Biblia.

7. Manalambit na saray gunggonan nagamoran ed regular a panagaral na Biblia.

⁷ No regular tayon aralen so Biblia, a tekepan tayo itan na panagdalepdep, natulongan itayon onaligwas ed espiritual. (Heb. 5:12-14) Onia so inkanta na salmista nipaakar ed kaimportantian na Salitay Dios: “Say ganggan na sangim magmaong ed siak nen saray nilibo a balbalitok tan pilapilak. Dia ed panamegley na saray ganggan mo marundunong ak nen saray kakabusol ko; ta sikara so ibibak lawas. Pinugeran ko so salisalik ya onarawi ak ed saray mauges a dalan, pian naunor ko so salitam.” (Sal. 119:72, 98, 101) Wala kasi eskedyul yo parad regular a personal a panagaral na Biblia? Manpaparaan kayo kasi parad antokaman a pribilehyo diad panaglingkor ed Dios panamegley na inagew-agew a panagbasa ed Biblia tan panagmorekdek ed saray nababasa yo?

Inaral nen Saulo ya Aroen so Totoo

8. Panoy impantrato nen Saulo ed saray agto karelihyonan?

⁸ Antis nin nagmaliw a Kristiano si Saulo, sikatoy maseseg la ed relihyon ton Judaismo, balet ta ngalngali anggapoy panangiyansakit to ed saray totoon agto karelihyonan. (Gawa 26:4, 5) Sanen tinutupak na pigaran Judio si Esteban, binantayan tora labat. Inabobonan to itan tan nayarin say abaloan to et duga so gagawaen da, a makanepegan labat ed si Esteban so nadusa. (Gawa 6:8-14; 7:54–8:1) Oniay salaysay na Biblia: “Si Saulo pinapairap to so Iglesia, a linmoob  ed saray kaabungan et naneerel na lalaki tan bibii ya impokok to ra ed panangipangawan.” (Gawa 8:3) “Inusilan [to] ra angga ed saray sananey a baley.”​—Gawa 26:11.

9. Antoy naeksperiensya nen Saulo ya amakiwas ed sikaton molimolien so paraan na panagtrato to ed totoo?

⁹ Paarap ed saman si Saulo ed Damasco pian pasegsegangen iray disipulo nen Kristo sanen nampanengneng ed sikato so Katawan a Jesus. Lapud ekstraordinaryon inkamasnag na sayan Anak na Dios, abulag si Saulo, tan agla makakurang a bukor. Diad saramay bektan inusar nen Jehova si Ananias pian ipawil so pakanengneng nen Saulo, talagan anguman la so awawey to ed totoo, tan aglan balot pinmawil ed dati. (Gawa 9:1-30) Natan ta patumbok la nen Kristo, sikatoy nanseet a maong pian napidenengan to so amin a klase na totoo a singa ginawa nen Jesus. Kabaliksan na satan a kaukolan ton ekaley inkamarawal to tan magmaliw a ‘mikakareenan ed ganaganay totoo.’​—Basaen so Roma 12:17-21.

10, 11. Panon ya impatnag nen Pablo so tuan aro ed totoo?

¹⁰ Balet ta aglabat nankontento si Pablo ed pakawalaan na mareen a siglaotan ed arum. Labay to met ya ipatnag ed sikara so peteg ya aro, tan say Kristianon ministeryo so angiter ed sikato na pankanawnawan manggawa ed satan. Diad samay primeron biahe to bilang misionero, impulong toy maong a balita diad Asia Minor. Ditan et akasagmak na pirmin isusumpa ira di Pablo tan saray kakaiba to, balet ta intultuloy dan tinulongan iray mauyamo a magmaliw a Kristiano. Tan siansian pinmawil ira ed Listra tan Iconio, anggano ginetma na saramay totoo ditan a pateyen si Pablo.​—Gawa 13:1-3; 14:1-7, 19-23.

¹¹ Diad saginonor, dia met ed syudad na Macedonia a Filipos so nan-anapan da na saray maptek impanpuson totoo. Ditan et sakey a Judion proselita a manngaran na Lidia so angawat ed maong a balita tan nagmaliw a Kristiano. Si Pablo tan Silas so pinepekpek na saray autoridad tan inkulong da ra. Balet ta pinulongan ni nen Pablo imay managpriso, tan say resulta et nagmaliw itan a managdayew nen Jehova pati say pamilya to.​—Gawa 16:11-34.

12. Antoy amakiwas ed maruksan si Saulo a magmaliw a maaron apostol nen Jesu-Kristo?

¹² Akin et inawat nen Saulo, a datin managpasegsegang, so pananisia na saray biktima to? Anto so amakiwas ed sikaton magmaliw a maomaong tan maaron too, ya akaparaan a mangirisga ed bilay to pian naamtaan na arum so katuaan nipaakar ed Dios tan Kristo? Oniay impaliwawa nen Pablo: ‘Tinawag ak [na Dios] lapu ed grasya [“agnaparaan a kaabigan,” NW ] to. Pian ipuyan to so Anak to ed siak.’ (Gal. 1:15, 16) Onia ni insulat nen Pablo ed si Timoteo: “Agamoran ko so panangasi, pian dia ed siak a manunaan, si Jesu-Kristo ipanengneng to so amin ya alablabas [ya] anos to, pian uliran na saray manisia ed kaunoran dia ed sikato nipaakar ed bilay ya andi angga.” (1 Tim. 1:16) Pinerdona nen Jehova si Pablo, tan lapud satan ya agnaparaan a kaabigan tan panangasi kanian sikatoy apakiwas a mangaro met ed arum panamegley na impangipulong to ed sikara na maong a balita.

13. Anto so mamakiwas ed sikatayon mangipatnag na aro ed arum, tan panon tayon nagawaan itan?

¹³ Peperdonaen met nen Jehova iray kasalanan tan lingo tayo. (Sal. 103:8-14) “No sika, Jehova, et uninengen mo so saray kasulitan, O Katawan, siopa kasi naani makaalagey?” so intepet na salmista. (Sal. 130:3) No aliwan lapud panangasi To, anggapo komon ed sikatayo so makaeksperiensya ed liket na sagradon panaglingkor,  ni makapanilalon makaawat na andi-anggaan a bilay. Pinasya lan kaabigan so ipapatnag na Dios ed sikatayo. Kanian, singa si Pablo, nepeg met komon a pilaleken tayon ipatnag ed arum so aro panamegley na pangipulong tan pangibangat tayo ed sikara na katuaan tan pamaseseg tayo ed saray agagi tayo.​—Basaen so Gawa 14:21-23.

14. Antoray nayarin gawaen tayo pian mas napaaligwas ni so panagpulong tan panaglingkor tayo?

¹⁴ Labay met nen Pablo a napaaligwas so panagpulong tan panaglingkor to, tan sikatoy atenyeg ed ehemplo nen Jesus. Say sakey a paraan na impangipatnag na sayan Anak na Dios ed abalbaleg a panangaro ed totoo et say impanpulong to. Inkuan to: “Dakel a tua so aanien, daiset ira balet so manani. Pikasi yo sirin ed Katawan na aanien, pian mangibaki na saray manani ed aanien to.” (Mat. 9:35-38) No bilang ta kinmerew met na ontan si Pablo, sikatoy kinmiwas sirin unong ed satan ta sikaton mismo et maseseg a managpulong. Komusta kayo balet? Sarag yo kasin mas paaligwasen ni so kalidad na ministeryo yo, odino mas aruman ni so oras ya uusaren yo ed panangipulong na Panarian, a nayarin diad panggawa yoy paraan pian makapanpayunir kayo? Ipatnag tayo komon so tuan panangaro ed arum diad panulong ed sikaran makaamta tan mansiansia ed “salita na bilay.”​—Fil. 2:16.

Say Panangipasen nen Pablo ed Inkasikato

15. Panoy impangipasen nen Pablo ed inkasikato diad limog na saray kapara ton Kristiano?

¹⁵ Bilang sakey a ministro, angipanengneng si Pablo na alay abig ya ehemplo diad sananey nin paraan. Anggano amayamay so naawat ton pribilehyo ed kongregasyon, amta nen Pablo ya aliwan lapud impansagpot to odino lapud saray abilidad to kanian agamoran to iratan a bendisyon. Amta ton saratan et panangipatnag labat na Dios ed agnaparaan a kaabigan To. Tan bibidbiren ton wala met iray arum a Kristiano ya epektibon ministro na maong a balita. Aliwan basta-basta so pribilehyo to ed limog na saray totoo na Dios balet ta sikatoy nansiansian mapaabeba.​—Basaen so 1 Corinto 15:9-11.

16. Diad samay isyu ed panagpasegat, panon ya impatnag nen Pablo a sikatoy mapaabeba tan amta toy limitasyon to?

¹⁶ Imanoen pa no panoy impangasikaso nen Pablo ed sakey a probleman linmesa ed Siryanon syudad na Antioquia. Ditan et agmakapanpapakna iray agagi nipaakar ed isyu na panagpasegat. (Gawa 14:26–15:2) Natan, nayarin inisip nen Pablo a sikato so walad sankaabigan a posisyon parad saya tan sara-sarag ton solbaren itan, ta sikato lanti aturon mangidaulo ed panagpulong ed saray ag-agalsiman a Gentiles, saray aliwan Judio. (Basaen so Galacia 2:8, 9.) Bangbalet, sanen pinmatnag ya agtinmalona iray sagpot to, sikatoy nampaabeba tan binidbir toy limitasyon to. Tinumbok toy uksoyan ya iyasingger itan ed mananguley ya ulop ed Jerusalem. Sikatoy sigpot ya akikoopera ed sikara legan dan dedengelen tan insan denisisyonan so ipapanon to, anggad sikatoy imbaki ra bilang sakey ed saray mensahero ra. (Gawa 15:22-31) Sirin et ‘indaulo to so panangipatnag na respeto’ ed saray kapara ton lingkor.​—Roma 12:10b, NW.

17, 18. (a) Anto so binayuboan nen Pablo a liknaan parad saray walad kongregasyon? (b) Anto so naaralan tayo nipaakar ed si Pablo diad samay reaksion na saray elder ed Efeso sanen sikatoy manpatanir la?

¹⁷ Lapud mapaabeba si Pablo, agto met inyarawi so inkasikato ed saray agagi ed kongregasyon. Noagta inyapit toy liknaan to ed sikara. Diad sampot na samay sulat to ed saray taga  Roma, masulok a 20 ya agagi so kinokomusta to a binibitla to ni kangaranan da. Maslak ed saratan et ag-asalambit ed arum nin parte na Kasulatan tan pigara labat so walad espisyal iran pribilehyo. Balet ta matoor iran lingkor nen Jehova, tan inad-aro ira nen Pablo.​—Roma 16:1-16.

¹⁸ Apaseseg met so kongregasyon ed inkamapaabeba tan inkamakaaro nen Pablo. Sanen sikatoy manpatanir la ed saray elder ed Efeso kayari na unor lan bisita to diman, sikatoy “nilakap da ed beklew . . . tan sikato so inangoban da. A nanermen ira ya amin na mapalalo lapu ed salita ya imbaga to ya agda la nanengneng naani so lupa to.” Seguradon aliwan ontan so reaksion da no si Pablo et sakey a toon malastog, tan ambetebetel so pidedeneng to!​—Gawa 20:37, 38.

19. Panon tayon nipatnag so “kaabebaan na kalakal” diad pidedeneng ed saray kaparan Kristiano?

¹⁹ Amin a labay dan onaligwas so espiritualidad da et nepeg a mangipatnag na inkamapaabeba a singa si Pablo. Oniay impaseseg to ed saray kaparan Kristiano: “Anggapon balot komon so gawaen yo a lapud kasusumpa o pampasirayew, noag dia ed kaabebaan na kalakal balang sinansakey ibilang to so arum a magmaong nen say sikaton dili.” (Fil. 2:3) Panon tayon natumbok itan a simbawa? Say sakey a paraan et diad pikoopera tayo ed saray mamatatken ed kongregasyon, a tumboken tayo ray panangiwanwan da tan awaten iray hudisyal a desisyon da. (Basaen so Hebreos 13:17.) Say sakey nin paraan et diad pamabli tayon maong ed amin a kaagian tayo. Saray kongregasyon na Tastasi nen Jehova et kaslakan lan tutugyopen na indibidual iran nandurumaay bansan nanlapuan, kultura, rasa tan abenegan. Balet, aliwa itan a rason pian agtayo la aralen a tratoen so amin ed parepareho tan maaron paraan a singa ginawa nen Pablo, agta ontan? (Gawa 17:26; Roma 12:10a) Nepeg a ‘manaakoan itayo, unong a si Kristo met inako to itayo, ya onkana ed gloria na Dios.’​—Roma 15:7.

‘Siaanos a Batiken’ so Lumba Parad Bilay

20, 21. Antoy ontulong ed sikatayon ontalona ed lumba parad bilay?

²⁰ Say bilay na sakey a Kristiano et nipara ed andukey a lumbay batik. Insulat nen Pablo: “Akibakal ak ed maabig a pibabakal, asumpal ko so binati’ko, inunor ko so pananisia. Manlapu ed natan angga ed arapen wala a niparaan ed siak so balanget na kaptekan, ya iter naani ed siak na Katawan, say maptek ya ukom, ed saman ya agew: tan aliwa labat ed siak, noag dia met ed saray amin a mangaro ed ipayawar to.”​—2 Tim. 4:7, 8.

²¹ No aligen tayo so ehemplo nen Pablo, natulongan itayon ontalona diad pilulumba tayo parad andi-anggaan a bilay. (Heb. 12:1) Sirin, anggan antoy nagawa, mantultuloy tayon paaligwasen so espiritualidad tayo diad pakawalaan na regular a personal a panagaral, pamayuboy baleg a panangaro ed totoo, tan pansiansian mapaabeba.

Panon Mon Ebatan?

• Panon ya agunggonaan si Pablo ed regular a personal a panagaral to ed Kasulatan?

• Akin et nepeg a baleg so panangaro na saray tuan Kristiano ed totoo?

• Antoran kalidad so ontulong ed sikayon tratoen so arum ed pareparehon paraan?

• Panon ya ontulong ed sikayo so ehemplo nen Pablo pian mikoopera ed saray mamatatken ed kongregasyon yo?

[Tepetepet Parad Panagaral]

[Litrato ed pahina 23]

Mangalay biskeg ed Kasulatan a singa ginawa nen Pablo

[Litrato ed pahina 24]

Ipatnag so aro diad panginabang na maong a balita ed arum

[Litrato ed pahina 25]

Antam ta so rason no akin a naad-aron maong na saray agagi si Pablo?