Panon so Nepeg a Pantrato Tayo ed Arum?

“Say laba’yo a gawaen komon ed sikayo na saray totoo, ontan met so gawaen yo ed sikara.”​—LUC. 6:31.

1, 2. (a) Anto so Sermon ed Palandey? (b) Anto so singbaten tayo ed sayan artikulo tan ed onsublay?

 PETEPETEG a si Jesu-Kristo so Matalonggaring a Managbangat. Sanen sikatoy impaaresto na saray mamubusol ed sikaton lider na relihyon, saray imbakin opisyal so pinmawil a kalimalima, a kuan da: “Anggapo ni too a nansalita na onia.” (Juan 7:32, 45, 46) Sakey ed saray alay dakep a diskurso nen Jesus et say Sermon ed Palandey. Naromog itan ed kapitulo 5 anggad 7 na Ebanghelyo nen Mateo tan diad Lucas 6:20-49. *

² Nayarin say sankabantogan a balikas ed satan a sermon et samay nipaakar ed panagtrato tayo ed arum. Inkuan nen Jesus: “Say laba’yo a gawaen komon ed sikayo na saray totoo, ontan met so gawaen yo ed sikara.” (Luc. 6:31) Agaylan kaabig so ginawa to ed saray totoo! Pinaabig nen Jesus iray mansasakit tan pinaoli to ni ingen iray inaatey. Balet, mas agunggonaan so totoo sanen inawat da so maong a balitan imbangat to ed sikara. (Basaen so Lucas 7:20-22.) Bilang Tasi nen Jehova, labalabay tayo met so mibiang ed kimey a panangipulong ed Panarian. (Mat. 24:14; 28:19, 20) Diad sayan artikulo tan diad onsublay, singbaten tayo so imbaga nen Jesus nipaakar ed sayan kimey, pati say arum ni ran punto a walad Sermon ed Palandey a mitunosan ed no panon tayon tratoen so arum.

Magmaliw a Mauyamo

3. Anto so kabaliksan na kauyamoan?

³ Inkuan nen Jesus: “Mapalar [odino maliket] iray mauyamo: ta tawiren day dalin.” (Mat. 5:5) Diad Biblia, say kauyamoan et aliwan kaleteyan. Imbes, satan so inkaulimek ya ipapanengneng tayo bilang katutulok ed kakaukolanen na Dios. Napatnagan iyan ugali diad pitotoo tayo. Alimbawa, agtayo ‘itutumang ed anggan siopa so mauges ed mauges.’​—Roma 12:17-19.

4. Akin et maliket iray mauyamo?

⁴ Saray mauyamo et maliket lapud “tawiren day dalin.” Si Jesus a ‘mauyamo tan mapaabeba ed puso’ so ‘tinuron manawir ed amin a bengatla,’ tan sirin et manunan Tomatawir ed dalin. (Mat. 11:29; Heb. 1:2; Sal. 2:8) Impasakbay la a walay kaiba na Mesias odino “anak na too” a manuley diad Panarian ed tawen. (Dan. 7:13, 14, 21, 22, 27) Bilang “mitatawir ed Kristo,” saray 144,000 a mauyamon alanaan so manawir met ed dalin. (Roma 8:16, 17; Apo. 14:1) Diad uley na Panarian, saray arum nin mauyamo so nabendisyonan na andi-anggaan a bilay diad dalin.​—Sal. 37:11.

5. No mauyamo itayo a singa si Kristo, anto so epekto na satan ed personalidad tayo?

⁵ No mapasang itayo, nayarin nasyodotan so arum tan paliisan da itayo. Balet, no mauyamo itayo a singa si Kristo, makapaseseg tayo ed saray kakongregasyon tayo tan labalabay da itayon nakaiba. Say kauyamoan et sakey ed saray siameran bunga a papawalaen ed inkasikatayo na aktibon puersa na Dios no ‘manbilay tan manakar itayo unong ed espiritu.’ (Basaen so Galacia 5:22-25.) Seguradon labay tayoy magmaliw a mauyamon too a paiwawanwan ed masanton espiritu nen Jehova!

Alay Liket na Mapangasi!

6. Antoray marakdakep a kalidad na saray “mapangasi”?

⁶ Inkuan met nen Jesus diad Sermon to  ed Palandey: “[Maliket] iray mapangasi; ta makagamor iray panangasi.” (Mat. 5:7) Saray “mapangasi” et walaan na maaron pililikna tan konsiderasyon, tan aabageyen da ni ingen iray naiirapan. Mamilagron pinakepa nen Jesus so paniirap na totoo lapud “inabagey to ra.” (Mat. 14:14; 20:34) Say panangabagey tan konsiderasyon sirin so nepeg a mamakiwas ed sikatayon mangasi.​—Sant. 2:13.

7. Anto so ginawa nen Jesus lapud panangabagey to?

⁷ Sanen onla komon a manpainawa si Jesus, sikatoy sinabat na dakel a totoo, tan “naabagey to ra, lapu ed singa ra saray karnero ya andian na managpastol.” Kanian “ginapoan to so nambangat ed sikara na amayamay a bengabengatla.” (Mar. 6:34) Seguradon naliliketan itayo sano inanabang tayo met ed arum so mensahe na Panarian tan say pirmin panangasi na Dios!

8. Akin et maliket iray mapangasi?

⁸ Saray mapangasi et maliket lapud “makagamor iray panangasi.” No kasian tayo ray totoo, kaslakan lan ontan met so gawaen da’d sikatayo. (Luc. 6:38) Niarum ni, inkuan nen Jesus: “No perdonaen yo ray totoo ed kaugsan da, say Ama yon mangatatawen perdonaen to kayo met.” (Mat. 6:14) Saray mapangasi labat so makalikna na liket a manlalapud panamerdona tan panangabobon na Dios.

No Akin a Maliket Iray “Managpareen”

9. Panoy ikiwas tayo no managpareen itayo?

⁹ Wala ni sananey a sinalambit nen Jesus a sengegay panliket, inkuan to: ‘[Maliket] iray managpareen ta ingaran iran anak na Dios.’ (Mat. 5:9) No managpareen itayo, agtayo konsintien odino pibiangan so antokaman a ‘pansianen to iray mankakaaro,’ a singa say panagtalabutob. (Uli. 16:28) Diad salita tan gawa et mikareenan itayo ed saray totoo diad loob tan paway na kongregasyon. (Heb. 12:14) Nagkalalo ed amin, gawaen tayoy anggaay nayarian tayon mikareenan ed si Jehova a Dios.​—Basaen so 1 Pedro 3:10-12.

10. Akin et maliket iray “managpareen”?

¹⁰ Inkuan nen Jesus a maliket ‘iray managpareen ta ingaran iran anak na Dios.’ Lapud kombinsido iray alanaan a si Jesus so Mesias, inter ed sikara so autoridad odino “pankatunongan a magmaliw ya anak na Dios.” (Juan 1:12; 1 Ped. 2:24) Balet, komusta iray managpareen ya ‘arum a karnero’ nen Jesus? Magmaliw ya “Andi-anggaan ya Ama” ra si Jesus. Nagawa itan legan na Sanlibon Taon ya Uley to tan saray kaiba ton tomatawir. (Juan 10:14, 16; Isa. 9:6; Apo. 20:6) Kayari na Milenyon Uley to, saratan a managpareen ya arum a karnero so sigpot lan magmaliw a mangaraldalin ya anak na Dios.​—1 Cor. 15:27, 28.

11. No paigigiya itayo ed ‘kakabatan a nanlapud tagey,’ panon tayon tratoen so arum?

¹¹ Pian onapit itayo ed si Jehova, “say Dios na kareenan,” kaukolan tayon aligen iray kalidad to, pati say pagmaliw ton managpareen. (Fil. 4:9) No paigiya itayo ed ‘kakabatan a nanlapud tagey,’ mikareenan itayo ed arum. (Sant. 3:17) On, magmaliw itayon maliket a managpareen.

‘Pasindag Yo so Silew Yo’

12. (a) Anto so imbaga nen Jesus nipaakar ed espiritual a liwawa? (b) Panon tayon nisindag so liwawa tayo?

¹² No tutulongan tayo so totoo a nawalaan na espiritual a liwawa manlapud Dios, nibagan sankaabigan so panagtrato tayo ed sikara. (Sal.  43:3) Imbaga nen Jesus ed saray babangatan to a sikara so “silew na mundo” tan pinaseseg to ran isindag so liwawa ra pian nanengneng na totoo iray “maong a gawa” ra. Nanresulta itan ed espiritual ya impakaliwawaan odino impakagunggonaan na “saray totoo.” (Basaen so Mateo 5:14-16.) Natan, isisindag tayo so liwawa tayo panamegley na panggagawa tayo na maabig ed kaparan totoo tan pangipupulong ed maong a balita diad “sankamundoan,” odino diad “amin a nasyones.” (Mat. 26:13; Mar. 13:10) Baleg itan a pribilehyo!

13. Anto so naiimano ed sikatayo?

¹³ Inkuan nen Jesus: “Say sakey a syudad a nipasen ed tapew na sakey a pukdol agnayarin yamot.” Dinanman a syudad a walad palandey et sankanengneng. Mipadpara, bilang manangiyabawag na Panarian et naiimano so maabig a kimey tan ugali tayo a singa say inkadangka tan inkasimpit.​—Tito 2:1-14.

14. (a) Deskribien so lamparaan nen inmunan siglo. (b) Antoy kabaliksan na agtayo pangiyamot ed “salop” na espiritual a liwawa tayo?

¹⁴ Inkuan nen Jesus ya imbes ya iyan ed dalem na salop so say sakey a lamparaan a sinelselan, satan so iyan ed panangitoonan pian nasilewan so amin a walad abung. Say lamparaan nen inmunan siglo et gawa ed langa. Tan say pabilo to so maneesep ed larak (kaslakan lan larak na olibo) pian tuloy-tuloy ya ondangat. Kaslakan lan satan so itatapew ed tabla odino metal a panangitoonan pian “sindagan to ray amin a wala ed loob na abung.” Siempre, anggapoy toon manelsel na lamparaan insan to lanlamang sakoban itan na “salop.” Aglabay nen Jesus ya iyamot na saray babangatan to ed “salop” so espiritual a liwawa ra. Kanian kaukolan tayon isindag so liwawa tayo, tan agbalot abuloyan so isusumpa odino panamasegsegang a pansengegan na pangiyamot odino agtayo pangibaga ed katuaan na Biblia.

15. Antoy epekto na “maong a gawa” tayo ed arum a totoo?

¹⁵ Sinalambit nin unona nen Jesus so onsisinag a lamparaan, insan to inkuan ed saray babangatan to: “Ontan met pasindagen yo komon so silew yo ed arap na saray totoo; pian nanengneng da so saray maong a gawa yo, et galgalangen da so Ama yo a wala ed tawen.” Lapud “maong a gawa” tayo, arum so ‘angigalgalang’ ed Dios diad impagmaliw dan lingkor to. Talagan mamaseseg itan ed sikatayo pian mantultuloy a “singa silesilew dia ed mundo”!​—Fil. 2:15.

16. Pian magmaliw a “silew na mundo,” anto so kaukolan tayon gawaen?

¹⁶ Pian magmaliw itayon “silew na mundo,” kaukolan ya ipulong tayo so Panarian tan manggawa na babangatan. Balet, wala ni kakaukolanen ed sikatayo. Oniay insulat nen apostol Pablo: “Manakar kayon singa anak na liwawa. Ta say bunga na liwawa sikato so amin a kaabigan tan kaptekan tan katuaan.” (Efe. 5:8, 9) Kaukolan a napanuliranan so kondukta tayo. On, nepeg tayon unoren so simbawa nen apostol Pedro: “Masimpit komon so tongtongan [“kondukta,” NW] yo ed utel na saray bugkalot, pian dia ed panalabutob da ed sikayo a singa managgawa na mauges nitandoro ra so Dios ed agew na idalaw to, lapu ed saray maong a ginawgawa yo a naimatonan da.” (1 Ped. 2:12) Balet, antoy nepeg a gawaen no aderal so relasyon na sanagi?

 ‘Mipulangan Ka ed Agim’

17-19. (a) Anto so “bagat” odino ‘panangaro’ a sinalambit ed Mateo 5:23, 24? (b) Panon kaimportante so pipulangan ed agi, tan panon iyan impaliwawa nen Jesus?

¹⁷ Diad Sermon nen Jesus ed Palandey, pinasakbayan to ray babangatan to ya agda eem-emey sanok tan panamusol ed agi ra. Imbes, tampol iran mipulangan ed asakitan dan agi. (Basaen so Mateo 5:21-25.) Imanoen pan maong so simbawa nen Jesus. No bilbilang ta mangibabagat kayo ed altar insan yo diman anonotan ya asakitan yo so agi yo, antoy nepeg yon gawaen? Itilak yo ni’d arap na altar so bagat yo tan onla kayon mipulangan ed agi yo. Kayari na satan, sarag yo lay ompawil a mangibagat.

¹⁸ Kaslakan a say “bagat” odino ‘panangaro’ et sakey ya iyaapay ed si Jehova diad templo. Im-importante iray bagat ya ayep nensaman lapud diad Mosaikon Ganggan et imbaga na Dios ed saray Israelita a kabiangan itan na panagdayew da ed sikato. Balet, no nanonotan na sakey ya asakitan toy agi to, iyuna to ni panresolbe ed problema nen say pangibagat. Inkuan nen Jesus ya “itilak mod’man so panangarom ed arap na altar, et onla ka, ta mipulangan ka nin unona ed agim, insan ka ed satan onla tan isaklang mo so panangarom.” Kaukolan so pipulangan ed agi antis ya ibagat so kakaukolanen na Ganggan.

¹⁹ Agsinalambit nen Jesus so espisipikon bagat tan kasalanan. Kanian, iguntang ni na sakey so antokaman a panangiyapay no nanonotan ton asakitan to so agi to. No say iyapay et mabilay ya ayep, itilak ni itan “ed arap na altar” na panagpoolay bagat diad saban na saserdote ed templo. Kayarin naareglo so problema, insan la ompawil a mangibagat imay akasakit.

20. Akin a nepeg tayon aregloen a tampol so problema no walay pasnok tayo ed sakey ya agi?

²⁰ Diad panmoria na Dios, say relasyon tayo ed saray agagi et importantin kabiangan na dugan panagdayew. Baliwala ed si Jehova iray bagat ya ayep no saramay mangiyaapay et aliway panagtrato ra ed kaparan too. (Miq. 6:6-8) Kanian, binilin nen Jesus iray babangatan to a ‘mipulangan iran magano [odino tampol].’ (Mat. 5:25) Mipadpara ed satan, oniay insulat nen Pablo: “Onsanok kayo, ingen ta agkayo mankakasalanan: agkomon onselek so agew a sipapasnok kayo ni: Tan agyo palongkitan so diablo.” (Efe. 4:26, 27) No bilang ta makatunongan so pampasnok tayo, nepeg tayon aregloen a tampol so problema pian agmansiansiay pasnok tayo, diad ontan et agnaabuloyan so Diablo a manganamot ed sikatayo.​—Luc. 17:3, 4.

 Lawas Marespeton Tratoen so Arum

21, 22. (a) Panon tayon niyaplika so simbawa nen Jesus a kapkapaningbat tayo? (b) Anto so pantongtongan tayo ed onsublay ya artikulo?

²¹ Komon ta ontulong ed sikatayo so apantongtongan tayon Sermon nen Jesus ed Palandey pian maabig tan marespeto tayon tratoen so arum. Anggaman amin tayo et ag-ayadyari, sarag tayon iyaplika so simbawa nen Jesus lapud agto iilaloan so bengatlan agtayo nagawaan, tan ontan met so nalilikna na Ama tayon walad tawen. Diad tulong na pikakasi, impapuson sagpot, tan panamendisyon nen Jehova a Dios, magmaliw itayon mauyamo, mapangasi, tan managpareen. Ontan met, nisindag tayo so espiritual a liwawa a kirayewan nen Jehova. Niarum ni, no aderal so relasyon tayo ed sakey ya agi, sarag tayoy makapipulangan ed sikato.

²² Pian abobonan nen Jehova so panagdayew tayo, kaukolan a dugay panagtrato tayo ed kaparan too. (Mar. 12:31) Diad onsublay ya artikulo, pantongtongan tayo so arum ni ran imbaga nen Jesus ed Sermon to ed Palandey ya ontulong ed sikatayon mantultuloy a manggawa na maong ed arum. Kayari na impandalepdep ed sarayan punto ya inala ed marakdakep a diskurso nen Jesus, tepetan tayoy inkasikatayo, ‘Panon kon tratratoen so arum?’

[Paimano ed leksab]

Anto so Ebat Mo?

• Antoy kabaliksan na pagmaliw a mauyamo?

• Akin et maliket iray “mapangasi”?

• Panon tayon nisindag so liwawa tayo?

• Akin a tampol itayon ‘mipulangan ed agi tayo’?

[Tepetepet Parad Panagaral]

[Litrato ed pahina 4]

Say pangiyabawag ed mensahe na Panarian so importantin paraan pian nisindag tayoy liwawa tayo

[Litrato ed pahina 5]

Nepeg a napanuliranan so kondukta na saray Kristiano

[Litrato ed pahina 6]

Gawam so anggaay nayarian mo a mipulangan ed agim