Impierno Kasi Tutukoyen nen Jesus?
Impierno Kasi Tutukoyen nen Jesus?
SARAY mananisia ed bangat ya impierno et uusaren dan pinagkabasian so balikas nen Jesus a walad Marcos 9:48 (odino bersikulo 44 tan 46). Ditan et asaglawi toy nipaakar ed ag-ompatey a bigibigis tan apoy ya agnaerep. No bilang ta walay nantepet ed sika nipaakar ed saratan, panon mo itan ya ebatan?
Depende ed bersion na Biblian uusaren da, nayarin ibasa ra so bersikulo 44, 46, odino 48 lapud ta parepareho met so ibabaga na saraya ed arum iran bersion. * Diad Biblia a New World Translation et oniay nabasa tayo: “No say matam so sengegay pankakasalanan mo, sukit mo itan; magmaong nin makaloob ka ed panarian na Dios a saksakey so matam, nen say duaran tuay matam, nibantak ka balet ed Gehenna, a ditan saray bigibigis et ag-ompatey tan say apoy et agnaerep.”—Mar. 9:47, 48.
Dinan man ni so usaren da, say punto et, ibabaga na arum a susuportaan na saman a balikas nen Jesus so pananisia ran sano ompatey so marelmeng, say kamarerwa to et manirap ya andi-angga. Singa bilang, oniay walan komento ed Sagrada Biblia na Unibersidad na Navarre diad España: “Inusar na Katawan tayo [irayan salita] pian tukoyen so kapairap ed impierno. Say kaslakan lan eksplinasyon ed sarayay ‘bigis ya ag-ompatey’ et say andi-anggaan a panermen a nalikna na saramay dusaen ed impierno; tan sayay ‘agnaerep ya apoy’ et say kadusa ra panamegley na pisikal a panirap.”
Ingen, ikompara yo pa so balikas nen Jesus ed samay sampot a bersikulo na propesiya nen Isaias. * Agta mapatpatnag a satan a bersikulo ed kapitulo 66 na Isaias so walad kanonotan nen Jesus ed saman? Ditan et ompatnag a tutukoyen na propeta so nipaakar ed iyakar ed paway na “Jerusalem, dia ed Lawak na Hinnom (Gehenna), a datin pangaagamilan na panagbagat ed totoo (Jer 7:31) tan diad saginonor et nagmaliw a bantakan na basura.” (The Jerome Biblical Commentary) Malinlinew a say tutukoyen na sayan simbolikon balikas ed Isaias 66:24 et aliwan totoon papairapen, ta say asaglawi ditan et saray bangkay. Sakey ni, say tutukoyen to dia ya ag-ompatey et saray bigis, aliwan saray mabilay a totoo odino imortal a kamarerwa. Anto sirin so kabaliksan na samay inkuan nen Jesus?
Nipaakar ed Marcos 9:48 et oniay inkomento na sakey a reperensyan gaway Katoliko, say El evangelio de Marcos. Análisis lingüístico y comentario exegético, Tomo II: “[Saman a] balikas et inala ed Isaias (66,24). Ditan et ipapanengneng na propeta so duaran paraan na kaderal na saray bangkay: diad kabulok tan kapoolan da . . . Say nantumbokan ya impangusar ed salitan bigis tan apoy et ginawa ton mas mapuersa so ideyan kadederal. . . . Sarayan makaderal ya elemento et parehon adeskribe bilang permanente (‘agnaerep, ag-ompatey’): kanian talagan agnatakasan iratan. Diad sayan deskripsion, say mansiansian mabilay et saray bigis tan apoy labat—aliwan say too—tan sigpot a dederalen na saraya so antokaman a napelag ed pakayari ra. Kanian aliwa iyan deskripsion na andi-anggaan a panamairap, noagta sigpot a kadederal, salanti, andi-anggaan ya ipapatey, lapud diad satan et anggapo lay kikioli. Say [apoy] sirin et isisimbolo toy sigpot a kadederal.”
No talagan ipapasen na sakey a say tuan Dios et maaro tan maptek, nepeg ton isipen ya ontan so makatunongan a pantalos ed samay inkuan nen Jesus. Ag-ibabaga nen Jesus a saray marelmeng et napairap ed andi-angga. Noagta, say ibabaga to et sikaray napepeligron mansumpal ed sigpot a kadederal, ya anggapo lay ilalon napaoli.
[Saray paimano ed leksab]
^ par. 3 Diad saramay talagan napanmatalkan a manuskrito na Biblia et anggapoy bersikulo 44 tan 46. Panisiaan na saray iskolar a saratan a duaran bersikulo et nayarin inyarum labat la diad saginonor. Alimbawa, oniay insulat nen Propesor Archibald T. Robertson: “Diad saray sankadaanan tan sankaabigan lan manuskrito et anggapo irayan duaran bersikulo. Saraya et nanlapu ed Western tan Syrian (Byzantine) iran manuskrito tan panangulit labat ed bersikulo 48. Kanian [inekal] mi la so bilang a 44 tan 46 diad saray bersikulo mi ta ag-iratan napanmatalkan.”
^ par. 5 “Et sikara ompaway ira naani, tan onnengneng ira naani ed saray bangkay ya inatey na saray totoo a linmukso nen saman a sumpa ed siak; ta say bigis da ag naani ompatey, anggan say apoy da ag naani naerep; et sikara naani sakey a makapagula ed saray amin a laman.”—Isa. 66:24.