Kasin Akaparaan Kan Mangidepensa ed Pananisiam?

ASALIM ta lay niiyan ed situasyon ya inisip mon talagan kaukolan mon idepensay pananisiam? Imanoen pay eksperiensya nen Susana, sakey a 16 años ya agin bii a taga Paraguay. Aminsan, legan na pankaklase ra, walay nankomento a saray Tasi nen Jehova kuno et agmanisia ed si Jesu-Kristo, si Maria, tan ed “Daan a Sipan.” Wala ni nankuan a saray Tasi et panatiko, a mas labay da ni ompatey nen say natambal. No sikay walad saman a situasyon, anto kasi reaksyon mo?

Say ginawa nen Susana et sikatoy nampikasi ed si Jehova, insan nantagey na lima to. Ingen, magano lan nasumpal so klase ed saman, kanian impatanir to la’d samay maestra da no sarag ton ipaliwawa ed klase so pananisia to bilang sakey ed saray Tasi nen Jehova. Inmabobon a tampol imay maestra. Kanian diad loob na duay simba et imparaan nen Susana so presentasyon to diad tulong na brosyur a Jehovah’s Witnesses​—Who Are They? What Do They Believe?

Asabin siansia so agew na pangipresenta nen Susana. Impaliwawa to no akin ya atawag itayon Tasi nen Jehova. Ontan met ed say ilalo tayo ed arapen tan no akin ya agtayo manpapasaksak na dala. Insan to imbaga ed saray kaklase to a sarag day mantepet. Et dakel so nantatagey na lima ra. Nandinayew so maestra ed impangebat na sayan tobonbalon bii ed tepetepet panamegley na saray teksto ed Biblia.

Inkuan na sakey a kaklase to, “Asalik lay linma’d Kingkom Hall et anggapoy anggan sakey a rebolto diman.” Labay na maestra ya amtaen no akin ya ag-itayo manguusar na rebolto. Sirin et imbasa nen Susana so Salmo 115:4-8 tan Exodo 20:4. Abigla so maestra, kanian intepet to, “Akin balet ey et napnoy imahen iray simbaan mi, anta malinlinew manayan isesebel itan na Biblia?”

Asabi toy 40 minuto so tepet tan ebat a diskusyon. Sanen tinepetan nen Susana so interon klase no labay dan nabantayan so video a No Blood​—Medicine Meets the Challenge, et ‘on’ so kuan dan amin. Kanian inyeskedyul na maestra ra so pambantay tan pansisingbat da lamet diad ontumbok ya agew. Kayari ran abantayan so video, impaliwawa nen Susana iray panagtambal ya ag-uusaran na dala ya aawaten na arum iran Tasi nen Jehova. Nipaakar ed satan, oniay inkomento na maestra: “Agko amta a dakel ni manayay arum a paraan na panagtambal ya ag-uusaray dala, pati saray bentaha na saratan. Balet, para labat amo’d saray Tasi iratan?” Sanen akabatan ton parad amin iratan, inkuan na maestra, “No ondalaw lamet iray Tasi ed abung mi, mitongtong ak pa’d sikara.”

 Diad katuaan to say 20-minuton diskusyon ya imparaan nen Susana et asabi toy taloy oras. Kalabas na sakey simba, sinmublay met iray kaklase ton mangipresenta ed saray sisisiaen da. Kayari da et dakel so nantetepet, balet ta agda naebatan iratan tan agda nidepensa so pananisia ra. Tinmepet laingen so maestra, “Akin et agyo naaligan iyay kaklase yon Tasi nen Jehova, a sarasarag ton idepensay pananisia to?”

Say ebat da et: “Ta sikara et talagan aaralen day Biblia. Sikami balet et andi.”

Ninmengneng so maestra ed si Susana, tan inkuan to: “Talagan aaralen moy Biblia tan panggugunaetan mon iyaplika iratan. Kanepegan moy nakomendaan.”

Sarag pa met nen Susana so agla onesel. Ingen ta diad impansalita to et inalig to so maabig ya ehemplo na samay akautibon Israelitan bii ya ag-abitlay ngaran to. Saya imay tobonbalon nagmaliw ya aripen ed sankaabungan na Sirianon heneral a Naaman a walaay makapadimlan sakit ed baog. Sikatoy nansalita tan inkuan to ed katawan ton bii: “No komon ta say katawan ko a laki onarap ed propeta a wala ed Samaria! Sirin onabig ed kating to.” Ag-apokpokan na sayan marikit so mantasi nipaakar ed tuan Dios. Tan nanresulta iya ed impagmaliw nen Naaman a managdayew ed si Jehova.​—2 Ara. 5:3, 17.

Mipadpara, agmet nitepel nen Susana so agmantasi nipaakar ed si Jehova tan ed saray totoo to. Kanian diad impansalita to pian idepensay pananisia to sanen naangat iray sisisiaen to, inunor toy Makasulatan a ganggan: “Dayewen yo so Katawan a Dios ed kapusoan yo; tan maparaan kayo lawas ya onebat ed siopakaman a mankaukolan ya ipaliwawa yo so gapo na satan ya ilalo a wala ed sikayo, balet siuuyamo tan sitatakot.” (1 Ped. 3:15) Kasin akaparaan ka met a mangidepensa ed pananisiam tan tampol a gawaen itan no nakaukolan?

[Litrato ed pahina 17]

Makatulong irayan uusaren pian nidipensam so pananisiam