Mabiskeg Anggaman Walaray Kakapuyan

SARAG kan taloen na saray kakapuyan mo. Nayarin ompeket iratan ed sika a singa linta, tan say iisipen mo lagi et agmo lan balot naaknit iratan. Odino, ompan liknaen mon anggapoy kakanaan mo, ya ikokomparam so inkasika ed arum, tan isipen mon mas maong nira nen sika. Diad biek a dapag, nayarin walay liliknaen mon sakit a manguupot na biskeg mo tan mangeekal lay ganas mon manbilay. Antokaman ni so rason, basta say pakaliknam et nikutep ka la ed saratan, a singa anggapo lay nagawaan mo. Nayarin say naliliknam et onman ed alikna nen Job, sanen inkuanto ed Dios: “O komon ta iyamot mo ak dia ed Sheol, pian niyagel mo ak a maamo-amot, angga ed say sanok mo onlabas, pian tooren mo ed siak so sakey a tinandaan a panaon, tan nonoten mo ak!”​—Job 14:13.

Antoy gawaen mo pian makaimwas ka ed ontan a kipapasen? Mairap man, maabig no ekal mo nin magano ed isip mo iratan a problemam. Tan imanom pa irayan apuyanan a tepet nen Jehova ed matoor a lingkor ton si Job: “Iner so kawalaan mo sanen inggaton ko so saray panangipaletnegan ed dalin? Ipaliwawam, no walaan ka na pakatalos. Siopa so angigeter na saray sukat to, no antam? Odino siopa so angiyunat na pansukat ed tapew to?” (Job 38:4, 5) Sano nonodnonoten tayo no antoy kabaliksan na sarayan tepet, seguradon napakiwas itayon bidbiren a mas atagtagey nin tuloy so kakabatan tan pakayari nen Jehova. Seguradon walay maabig a rason no akin ya inabuloyan to so onian kipapasen na mundo natan, a nayarin panlalapuan na saray probleman sasagmaken tayo.

“Sakey a Sabit ed Laman”

Wala ni sakey a matoor a lingkor nen Jehova a kinmerew ed sikaton ekalen To komon so problema ton agnaan-andi, ya indeskribe ton “sakey a sabit ed laman.” Saya et si apostol Pablo, tan sikatoy amitlon  akikasi ed Dios a naandi la komon iya. Ag-abitla no anto kasi itan a problema, balet ta nikuan a singa iman makapaingongot a sabit a nayarin mangeekal la’d liket nen Pablo diad panlilingkor to’d si Jehova. Imbaga ton sikatoy singa naynay a tatampalen lapud satan. Onia balet so ebat nen Jehova ed kerew to: “Say grasyak [“agnaparaan a kaabigan,” NW] so masarag ed sika; ta say pakayarik agawan ayadyari ed kakapuyan.” Agsirin inekal nen Jehova itan a sabit ed laman. Kanian kaukolan itan a sungdoan nen Pablo, balet ta oniay inkuanto: “Sano siak so makapuy, dia ed satan mabiskeg ak.” (2 Cor. 12:7-10) Anto so labay ya ibaga nen Pablo?

Agmamilagron naandi so problema nen Pablo. Anggaman ontan, ag-itan akaamper ed sikaton gawaen iray makapadinayew a bengatla diad panaglingkor to’d si Jehova. Sikatoy nanmatalek ed Jehova tan lawas ton kinerew so tulong To. (Fil. 4:6, 7) Kanian, sanen asingger lan manampot so bilay to’d dalin, sarag nen Pablo ya ibaga so onia: “Akibakal ak ed maabig a pibabakal, asumpal ko so binatik ko, inunor ko so pananisia.”​—2 Tim. 4:7.

Uusaren nen Jehova iray ag-ayadyarin totoo pian sumpalen so linawa to anggaman walaray kakapuyan tan problema ra, tan manepeg labat sirin a sikatoy narayew lapud satan. Sarag toran ikdan na giya tan kakabatan pian natalonaan da iray problema tan mansiansia ran maliket diad panlilingkor da’d sikato. On, anggano walaray kakapuyan da, sarag iran usaren nen Jehova pian manggawa na saray abalbaleg a kimey.

Oniay imbaga nen Pablo a rason no akin ya ag-inekal na Dios so sabit ed laman to: “Pian agak komon nadayew na alabas.” (2 Cor. 12:7) Sayan “sabit ed laman” et angipanonot ed si Pablo a walaray limitasyon to tan tinmulong ed sikaton mansiansian mapaabeba. Mitunosan itan ed samay imbangat nen Jesus: “Siopaman a mangitandoro na inkasikato, napaabeba naani; et siopaman a mangipaabeba na inkasikato, nitandoro naani.” (Mat. 23:12) Saray subsubok et makapangibangat ed saray lingkor na Dios a magmaliw a mapaabeba tan ontulong ed sikaran namoria a kaukolan day manmatalek ed si Jehova pian matoor iran makapansungdo. Diad ontan, singa si apostol Pablo, say ‘Katawan so igloria’ ra.​—1 Cor. 1:31.

Akaamot Iran Kakapuyan

Arum so walaan na kakapuyan a nayarin agda amta odino agda bidbiren ni ingen. Alimbawa, ompan sobsobra lay talek na sakey ed sarili to, kanian isipen ton agto la kaukolay tulong na arum. (1 Cor. 10:12) Say sakey met nin kakapuyan na maslak a totoo et say pilalek dan magmaliw a bantog.

Si Joab, a nagmaliw a heneral na armada nen Arin David, et makpel, mautek tan madiskarte. Balet ta sikatoy akagawa na saray graben kasalanan a mangipapatnag na inkamapalakbat tan inkamaambisyoso to. Duaran heneral so pinatey to. Unona et pinatey toy Abner, lapud labay toy makabales. Tan diad saginonor et pinatey to met si Amasa a kapinsan to, a kunwari et angoban to, tan binembenan ni na kawanan a lima to so balbas na sayan kapinsan to, insan kabebekta et dinuyok toy kampilan panamegley na kawigin lima to. (2 Sam. 17:25; 20:8-10) Inanamot nen Joab iyan pankanawnawa pian pagiten so karibal ton si Amasa a sinmalat ed sikaton heneral, ta iilaloan to lagin sikatoy nipawil ed inka-heneral. Mapatnag ya agkinontrol nen Joab so liknaan to, tan say sinisiblet ya ambisyon to. Sikatoy maruksan kinmiwas tan agbalot angipanengneng na panagbabawi. Kanian sanen asingger lan ompatey si Arin David, imbilin to’d anak ton si Solomon a seguroen ton nadusa si Joab ed amin a kaugsan a ginawa to.​—1 Ara. 2:5, 6, 29-35.

Agtayo komon patatalo ed saray mauges a pilalek, ta diad tua et sarag tayon daegen iray kakapuyan tayo. Unona, nepeg tayon bidbiren tan aksobien iratan. Insan tayo la’d satan makapanggaway paraan pian ontalona. Sarag tayon regular ya ipikasi ed si Jehova a tulongan to itayon manaeg ed saratan, tan seetan ya aralen so Salita to, a sukimaten ditan iray paraan no panon a nalabanan iray mauges a pilalek. (Heb. 4:12) Agtayo komon nadidismaya no kaukolan tayon itultuloy a labanan iratan. Sayan pipupuligesgesan et nayarin mantultuloy ni ingen anggad agtayo ni perpekto. Ontan so naeksperiensya nen Pablo tan oniay inaksobi to: “Agko met gawaen so labay ko; noag ingen say kabusol ko, sikato man so gawaen ko.” Balet, singa kabat tayo la, agnampadaeg si Pablo ed saray kakapuyan to, tan agto inisip a talagan anggapo lay nagawaan to ed saratan. On, intultuloy toy akipuligesgesan, a nanmatalek ed tulong na Dios panamegley  nen Jesu-Kristo. (Roma 7:15-25) Diad arum nin sulat to et oniay inkuanto: “Leweten ko so laman ko, tan iyan ko ed silong na kaaripenan: ta agla piga no nagawa, no kayarik ya angipulong ed saray arum, siak a dili so nipulisay.”​—1 Cor. 9:27.

Kaslakan lan say tendensia tayo et ibaraan odino ikatunongan iray kiwas tayo. Balet ta, napaliisan tayoy ontan a tendensia no aligen tayoy panmoria nen Jehova, a gawaen tayo imay insimbawa nen Pablo ed saray Kristiano: “Busol yo so mauges: ompeket kayo ed maong.” (Roma 12:9) Ontulong so inkamatua ed sarili, determinasyon, tan disiplina pian ontalona tayo ed pipupuligesgesan ed saray kakapuyan tayo. Onia so kinerew nen David ed si Jehova: “Salim so pusok tan linawak.” (Sal. 26:2) Amta nen David a sigpot a kabat na Dios no antoray talagan walad utel na puso tayo tan Sikatoy makapangiter na tulong kapiganman a kaukolan tayo itan. No tumboken tayoy panangiwanwan nen Jehova panamegley na Salita tan masanton espiritu to, agmanbayag et natalonaan tayo la iray kakapuyan tayo.

Walaray totoon nagogonigon lapud saray probleman diad padesir da et agda nasarag a bukor. Balet ta seguradon natulongan tan napabiskeg ira na saray mamatatken ed kongregasyon. (Isa. 32:1, 2) Makabat met no magmaliw itayon realistiko ed saray iilaloan tayo, a bidbiren tayon walaran talagay probleman agsigpot a nasolusyonan diad sayan sistema na bengabengatla. Anggaman ontan, dakel so akaaral met lanlamang a mangarap ed saratan tan awalaan iray maliket a bilay.

Seguradon Ontulong si Jehova

Antokaman so problema tayo ed sarayan mairap a panaon, say pakaseguroan tayo et igiya tan sustunien itayo nen Aman Jehova. Onia so ipapaseseg na Biblia ed sikatayo: ‘Manpaabeba kayo sirin ed silong na makapanyarin limay Dios, pian itandoro to kayo ed kanepegan a panaon; imatalek yo ya amin ed sikato so kapagaan yo, ta sikato asikasoen to kayo.’​—1 Ped. 5:6, 7.

Imanoen pay eksperiensya nen Kathy, a sakey ya abayag lan Bethelite. Sanen naamtaan ton say masiken to et walay sakit ton Alzheimer’s, inisip ton agto nasarag iray angat ya itarok na satan. Nanlapu la’d saman et sikatoy inagew-agew ya akikasi ed si Jehova, ya onkekerew na kakabatan tan kasil na linawa. Legan na iloloor na sakit nen masiken to, nanggunaetan na saray maaron agagin lalaki ya aralen so nipaakar ed sayan sakit pian  amta ra no panon iran makaadapta ed satan, tan pinabiskeg na saray mangiyaansakit ya agagin bibii so liknaan nen Kathy. Inusar nen Jehova irayan agagi bilang sakey a paraan pian napabiskeg si Kathy, kanian ayarian ton inasikaso so masiken to ed ngalngali 11 a taon anggad impatey to. Imbaga to: “Atekepay lua so masimoon a pisasalamat ko ed si Jehova lapud amin a tulong to, a sengegan no akin ya akapansungdo ak. Posible manayan diad andukey a panaon et nagawaan ko niray kimey ko anggaman makapkapuy ak tan naknaksawan la!”

Tulong Pian Natalonaan Iray Akaamot a Kakapuyan

Sano say pakalikna na sakey et anggapoy kana to, nayarin isipen to lan agdengelen nen Jehova so ikerew toy tulong diad panaon na gonigon. No ontan so naliliknam, maabig no nonoten mo iyay imbaga nen David sanen nagbabawian toy graben impankasalanan da nen Bat-seba: “Say sakey a puso a maralit tan mansisibkel, agmo la balbalawen, O Dios.” (Sal. 51:17) Masimoon so impanbabawi nen David, tan amta ton sikatoy makaasingger ed Dios tan nailaloan toy panangasi To. Si Jesus et inalig toy Jehova ed panangipatnag na maaron panangiyansakit. Diad tua et inyaplika nen Mateo ed si Jesus iramay salita nen Isaias a: “Say kawayan a betag sikatoy agto naani puteren, tan say pabilon manasewek agto naani erepen.” (Mat. 12:20; Isa. 42:3) Sanen wadia’d dalin si Jesus, inabagey to iray mapaabeba tan nalalames a totoo. Agto inekalan na ilalo’d bilay irayan totoon aliling to et singara lamparaan a ngalngali la naerep. Noagta sikatoy maar-aron angiyansakit ed sikara, a tinulongan to iran namoria ya inaro ira na Dios tan amta To so sasagmaken dan ir-irap. Ontan so impideneng to’d saray totoo sanen sikatoy wadia’d dalin. Antoy padesir mo, anguman la kasi Jesus, odino siansia nin sikatoy mililikna ed saray kakapuyan mo? Imanom pan sikato imay tinukoy na Hebreos 4:15 a makayarin “mangasi ed saray kakapuyan tayo.”

Sanen insulat nen Pablo so nipaakar ed “sabit ed laman” to, imbaga ton say pakayari nen Kristo et ‘nanayam ed sikato.’ (2 Cor. 12:7-9) Alikna to sirin so proteksion na Dios panamegley nen Kristo. Singa si Pablo, agtayo met komon patatalo ed saray kakapuyan tan problema tayo. Natan, pian mansiansia itayon mabiskeg ed espiritual, anamoten tayo so amin ya itatarya nen Jehova parad sikatayo panamegley na mangaraldalin ya organisasyon to. Gawaen tayoy amin a nayarian tayo, tan insan sigpot a manmatalek ya igiya nen Jehova iray kurang tayo. Sano naeksperiensya tayoy pakayari na Dios ya ontulong ed sikatayon manalona ed saray kakapuyan, nibaga tayo met la imay imbaga nen Pablo: “Sano siak so makapuy, dia ed satan mabiskeg ak.”​—2 Cor. 12:10.

[Litrato ed pahina 3]

Lawas nampikasi si Pablo ed si Jehova parad tulong pian nasumpal toy ministeryo to

[Litrato ed pahina 5]

Inmatalek nen Arin David ed si Joab so armada

[Litrato ed pahina 5]

Pinatey nen Joab so karibal ton si Amasa

[Litrato ed pahina 6]

Saray mamatatken et maaron mangiiter na Makasulatan iran simbawa pian natulongan itayon talonaan iray problema