Pansiansiaen so ‘Arom nen Inmuna’

“Itultuloy mon bembenan a maong so wala ed sika.”​—APO. 3:11, NW.

1, 2. Anto so aliknam sanen akombinse ka a say naaaralan mo nipaakar ed si Jehova et katuaan?

 KASIN nanonotan mo ni sanen unaan mon naamtaan so marakdakep ya ilalon iyoopresi nen Jehova ed matulok a totoo? No nensaman et sananey so relihyon mo, antoy aliknam sanen impaliwawa iray gagala na Dios ed sika manlapud Biblia odino sanen alinewan ka ed saray bangat a dati et mairap mon talosan? Nayarin amoriam ya apalikdo ka manaya. Balet malikeliket ka la natan ta aliwawaan ka! No pinabaleg ka na Kristianon atateng, kasin nanonotan mo ni aliknam sanen akombinse ka a say naaaralan mo nipaakar ed si Jehova et katuaan tan nandesisyon kan manbilay unong ed satan?​—Roma 12:2.

² Dakel ed saray agagi so mangibaga ed sika a malikeliket ira, inmapit ira ed si Jehova, tan misalsalamat ira ta inyasingger to ira ed sikato. (Juan 6:44) Pinakiwas ira na liket da a mibiang ed saray kimey na Kristiano. Lapud liket da et labay dan ibaga so alikna ra ed anggan siopa. Ontan met kasi so aliknam?

3. Anto so situasyon ed kongregasyon na Efeso sanen angiter na mensahe si Jesus ed sikara?

 ³ Diad saray inmunan siglon Kristiano ed kongregasyon na Efeso et sinalambit nen Jesus so nipaakar ed ‘aro ra nen inmuna.’ Dakel so maabig a kalidad na saray taga Efeso, balet tinmabang so datin aro ra ed si Jehova. Kanian, inkuan nen Jesus ed sikara: “Siak amtak so saray gawam, tan say sagpot mo, tan kasungdoan mo, tan say agmo pakayarin mangitepel ed saray mauges a totoo, tan sinalim so saray tatawagen day inkasikaran apostoles, tan aliwa ra, aromog mo ra a matila; tan mantepel ka tan nansungdo ka, lapu ed ngaran ko, tan agka pinmakil. Balet wala so isumpak ed sika, ta inkaindan mo so akauna ya arom.”​—Apo. 2:2-4.

4. Akin et importante ed panaon tayo so mensahe nen Jesus ed saray taga Efeso?

⁴ Say simbawa nen Jesus ed Efeso tan ed arum ni ran kongregasyon et matukoy ed kipapasen na saray alanaan diad peryodo na panaon manlapud 1914. (Apo. 1:10) Anggaman ontan, posible nin anggad natan et nabalang na arum a Kristiano so ‘aro ra nen inmuna’ ed si Jehova tan ed katuaan. Lapud satan, usisaen pa no panon a diad pannonot tan pandalepdep ed saray dilin eksperiensyam et napansiansiam, napapetang, tan napaaralem mo so aro tan seseg ya aliknam nen inmuna ed Dios tan ed katuaan.

Anto so Akakombinse ed Sika a say Naaralan Mo et Katuaan?

5, 6. (a) Anto so nepeg a paneknekan na balang Kristiano ed inkasikato? (b) Anto so akakombinse ed sika a katuaan so ibabangat na saray Tasi nen Jehova? (c) Anto so makatulong ed sakey pian napapetang to so inmunan aro to?

⁵ Antis ya idedika na sakey so bilay to ed si Jehova, ‘salien’ odino paneknekan to nin unona ed inkasikato no anto so “maong, tan makapaliket, tan nasnaspot a linawa na Dios.” (Roma 12:1, 2) Kabiangan ed satan so panaral ed ibabangat na Biblia. Say akakombinsian na sakey a too a katuaan so ibabangat na saray Tasi nen Jehova et nayarin midumaan ed impakakombinsian na arum. Walaray apakiwas sanen abasa ra ed Biblia so ngaran na Dios odino sanen atalosan da so tuan kipapasen na saray inaatey. (Sal. 83:18; Ecl. 9:5, 10) Asagyat so arum ed aroan na totoo nen Jehova. (Juan 13:34, 35) Tan walaray atangguyor ed no anto so kabaliksan na pagmaliw ya agkabiangan na mundo. Atebek da a saray tuan Kristiano et agnayarin mibiang ed saray isyu ed politika odino guerra na anggan dinan a nasyon.​—Isa. 2:4; Juan 6:15; 17:14-16.

⁶ Parad dakel, saratan a rason tan arum ni ra so gapoan na impangaro ra ed Dios. Ipanaon pan nonoten no anto so akakombinse ed sika ed katuaan. Siempre, nanduruma so kipapasen tan personalidad na balang too, kanian saray manunan rason na impangarom ed si Jehova  tan impanisiam ed sipasipan to et nayarin midumaan ed arum. Ompan anggad natan et saratan ni so pakakakombinsian mo, a singa nen inmunan naaralan mo iratan. Ag-anguman so katuaan. Kanian, no umamengen mo imay kanonotan tan liknaan mo nensaman, napasimbalom tan napapetang mo imay datin arom ed katuaan.​—Basaen so Salmo 119:151, 152; 143:5.

Paaralem Moy ‘Inmunan Arom’

7. Akin a kaukolan tayon paaralemen so inmunan aro tayo ed katuaan, tan panon tayon nagawaan itan?

⁷ Nayari pa lagin dakel lay anguman ed bilay mo nanlapu la nen indedikam so inkasika ed si Jehova. Importante so inmunan arom ed katuaan, balet diad inlabas na panaon, kinaukolan mon paaralemen so panangarom pian naarap iray balon subok ed pananisiam. Ingen ta tinulongan ka nen Jehova. (1 Cor. 10:13) Kanian, importante met ed sika iray eksperiensyam ed apalabas a taotaon. Akatulong iratan pian onaralem so inmunan arom, tan lapud saratan et apaneknekan mo met ed inkasika so maong tan makapaliket a linawa na Dios.​—Jos. 23:14; Sal. 34:8.

8. Panon ya impaamta nen Jehova so inkasikato ed si Moises, tan panon a lalon akabat na saray Israelita so Dios?

⁸ Pian iyilustra, imanoen pa so kipapasen na saray Israelita sanen imbaga nen Jehova so gagala to ya iliktar ira ed panangaripen na Ehipto. Impaamta na Dios so inkasikato ed si Moises diad impangikuan: “Magmaliw ak ed antokaman a pagmaliwan ko.” (Exo. 3:7, 8, 13, 14, NW) Mankabaliksan iya a si Jehova so magmaliw ed antokaman a nakaukolan pian ibulos so totoo to. Diad saray saginonor ya agawa tan unong a kakaukolanen na situasyon, naimatonan na saray Israelita so impangipatnag nen Jehova ed nanduruman aspekto na personalidad to, salanti, bilang Makapanyarin-amin, Ukom, Lider, Manangiliktar, Bumabakal, tan Manangitarya.​—Exo. 12:12; 13:21; 14:24-31; 16:4; Neh. 9:9-15.

9, 10. Anton situasyon so makatulong pian nakabat na sakey so Dios, tan akin a maabig no nonoten iratan ya eksperiensya?

⁹ Duma so situasyon mo ed saray Israelita nensaman. Anggaman ontan, nayarin walaray eksperiensyam ya akakombinsian mon say Dios et interesado ed sikan mismo, tan satan so amabiskeg ed pananisiam. Nayari pa lagin si Jehova so nagmaliw a Manangitarya, Managligliwa, odino Managbangat mo. (Basaen so Isaias 30:20b, 21.) Odino nayarin atebek mon mapatpatnag ya inebatan so pikakasim. Ompan sanen walay problemam et tinulongan ka na sakey a kaagian. Odino ompan diad personal a panagaral mo et naimanom iray tekston onaplika ed sika.

¹⁰ No iyistoryam iratan ya eksperiensyam ed arum, nayarin agda itan pandinayewan. Ta aliwa met iratan a milagro. Balet parad sika et makabkabaliksan iratan. On, si Jehova so nagmaliw ed antokaman a nakaukolan ton pagmaliwan parad sika. Nonoten pa so apalabas a taotaon mo ed katuaan. Kasin walaray nanonotan mon situasyon ya aliknam so panangasikaso nen Jehova ed sika? Say aliknam ed saman a panangaro’d si Jehova et napapawil mo no nodnonoten mo iratan ya inkagawa tan say aliknam. Pablim iratan ya eksperiensya. Dalepdep mo iratan. Paneknek iratan ya interesado si Jehova ed sika bilang indibidual, tan satan a papanisiaan mo et agnapaandi na anggan siopa.

Usisam so Inkasika

11, 12. No aliwa lan singa dati so panangaro na sakey a Kristiano ed katuaan, anto kasi so rason, tan anto so insimbawa nen Jesus?

¹¹ No aliwa lan singa dati so panangarom ed Dios tan ed katuaan, agto labay ya ibagan anguman so Dios. Agbalot manguuman si Jehova. (Mal. 3:6; Sant. 1:17) Sikatoy interesado ed sika natan a singa dati. Kanian no anguman so relasyon mo ed si Jehova, anto kasi rason? Kasin lapud naliliknam a mas dakel so pakadedesdesan tan pakakaaburidoan mo ed bilay?  Ompan diad apalabas et mas masimoon kan manpikasi, mas makulin manaral, mas mabetbet a mandalepdep. Kasin nensaman et mas maseseg ka ed ministeryo tan regular a mimiaral nen say natan?​—2 Cor. 13:5.

¹² Ompan anggapo met so naimanom ya angumanan mo, balet no wala, anto kasi rason? Kasin saray obligasyon mo, a singa say pangitarya na magenap parad pamilya, pangasikaso ed laman, odino arum ni ra, so sengegan na agmo la masyadon pannononot ed inkaasingger na agew nen Jehova? Oniay inkuan nen Jesus ed saray apostol to: “Manlikas kayo ed inkasikayo ompan saray puso yo napano ed inkasiba, tan panagbuek, tan saray kapagaan ed sayan bilay, et onsabi ed sikayo ed kasanlilikna so saman ya agew a singa sakey a patit. Ta ontan so isabi to ed saray amin a manaayam ed tapew na amin a dalin. Balet manbantay kayo ed amin a panaon, a mikasi kayo, pian ontalona kayo a nilaban ed sarayan amin a bengatlan nagawa.”​—Luc. 21:34-36.

13. Anto so angiyalilingan nen Santiago ed Salita na Dios?

¹³ Si Santiago, a pinuyanan a nansulat na Biblia, so amaseseg ed saray kaparan mananisia a masimoon dan usisaen so inkasikara diad tulong na Biblia. Insulat to: “Mananumpal kayo komon na salita, ya aliwan dumerengel labat, a tilatilaan yo so inkasikayon dili. Ta no say siopaman ompasen a dumerengel na salita, et aliwan mananumpal, kapara to so sakey a too a nenengnengen to so sipor a lupa to ed sakey a salming [odino espiho]; ta nengnengen to so lupa to, insan onarawi, et tampol a nalingwanan to no anto so nengneng to a too. Bangbalet siopaman a manimano ed ayadyarin katunongan, say katunongan na pankanawnawa, tan mansiansia ditan, sikato so bangta aliwa a maililingwan a dumerengel, mananumpal ingen ed gawa, sayan too mapalar naani ed gawa to.”​—Sant. 1:22-25.

14, 15. (a) Panon a makatulong so Biblia pian napaaligwas moy espiritualidad mo? (b) Antoran tepet so morekdeken mo?

¹⁴ Say sakey a too et man-espiho pian naseguro a sikatoy presentable. Alimbawa, no nanengneng na laki a bangking so korbata to, ayosen to itan. No nanengneng na bii a maguloy buek to, sagaysayen to itan. Mipadpara, tutulongan itayo na Biblia ya usisaen so inkasikatayo. No ikokompara tayoy inkasikatayo ed ibabaga na Biblia a nepeg tayon pagmaliwan, sirin et uusaren tayo itan a pinagka-espiho. Balet antoy kana na pan-espiho no agtayo lanlamang ipetek so anengneng tayon lingo? Makabat itayo no onkiwas itayo base ed nanenengneng tayo ed “ayadyarin katunongan [odino ganggan],” a magmaliw a “mananumpal” ed satan. Kanian, no nalikas na siopaman a tinmabang so inmunan aro to ed si Jehova tan ed katuaan, maabig no morekdeken to irayan tepet: ‘Antoray desdes ed siak natan, tan antoy reaksion ko ed saratan? Anto so reaksion ko nensaman? Wala tay anguman?’ No iparungtal na satan a panangusisa ed dili so antokaman a kakapuyan, agmo iratan ibabaliwala. No nakaukolan so pananguman, kiwas ka lan tampol.​—Heb. 12:12, 13.

¹⁵ Say ontan a panagdalepdep so ontulong met pian makapanggawa ka na saray kalat a mamaaligwas ed espiritualidad mo. Si apostol  Pablo so angiter na pinuyanan a simbawa ed kakimeyan to a si Timoteo pian napaaligwas toy ministeryo to. Oniay impaseseg nen Pablo ed sikato: “Seetan [odino morekdeken] mo so sarayan bengatla, sikara labat so arapen mo; pian say ibubunam nipatnag komon ed saray ganagana.” Diad tulong na Biblia, maabig met no morekdeken tayo iray sarag tayon paaligwasen.​—1 Tim. 4:15.

16. Anton peligro so kaukolan yon pan-alertoan sano uusisaen yo so inkasikayo diad tulong na Biblia?

¹⁶ No masimoon mon usisaen so inkasika, nayarin naimanom iray pigaran kakapuyan mo. Ompan pakadismayaan mo itan, balet agmo aabuloyan itan a nagawa ed sika. Ta say gagala na pangusisa ed dili et say pangamta ed no dinan so papaaligwasen. Siempre, labay nen Satanas a nalikna na sakey a Kristiano ya anggapoy kana to lapud ag-inkayadyari. Diad tua, walaray angibagan kagula na Dios so amin a panaglingkor ed sikato. (Job 15:15, 16; 22:3) Aliwan tua itan, kanian pirmin sinuppiat itan nen Jesus; papablien na Dios so balang sakey ed sikatayo. (Basaen so Mateo 10:29-31.) Say impakaamtam ed saray kakapuyan mo so nepeg a mamakiwas ed sika a mapaabeban panggunaetan a paaligwasen so inkasika, diad tulong nen Jehova. (2 Cor. 12:7-10) No nalilimitaan kayo lapud sakit odino inkatatken, manggawa kayo na makatunongan iran kalat, balet agkayo onsusuko tan agyo pabebetelen so aro yo.

Dakel so Pisalamatan

17, 18. Antoray nagunggonam no paaralemen moy inmunan arom?

¹⁷ Dakel a gunggona so nagamoran mo no itultuloy mon paaralemen so inmunan arom. Napalaknab moy kakabatan mo ed Dios tan napaaligwas moy apresasyon mo ed maaron panangiwanwan to. (Basaen so Uliran 2:1-9; 3:5, 6.) Oniay inkuan na salmista: “Dia ed panangunor ed [hudisyal iran desisyon nen Jehova] wala so baleg a tumang.” “Say panamatua nen Jehova matua, gawaen to a makalakal so andi-amta.” Niarum ni, “mapalar so saray ayadyari ed dalan da, sikara a manaakar ira ed loob na ganggan nen Jehova.”​—Sal. 19:7, 11; 119:1.

¹⁸ Seguradon mipakna ka a dakel iray maabig a bengatlan nepeg mon pisalamatan. Natatalosan mo no akin ya oniay nagagawa ed mundo. Nagugunggonaan ka ed amin a probisyon ya iiter na Dios ed totoo to natan. Seguradon misasalamat ka met ta inyasingger ka nen Jehova ed sankamundoan a kongregasyon to tan inikdan to kay pribilehyon magmaliw a sakey ed saray Tasi to. Salim pan bilangen iray bendisyon ed sika. No ilistam iratan, anganko et andukerukey. No lanang mon bilangen iray bendisyon ed sika, seguradon makatulong itan pian niyaplikam iyan simbawa: “Itultuloy mon bembenan a maong so wala ed sika.”​—Apo. 3:11, NW.

19. Likud ni’d pandalepdep ed relasyon mo ed Dios, anto so nakaukolan pian napansiansiam a mabiskeg so espiritualidad mo?

¹⁹ Say pandalepdep ed inaligwasan na pananisiam diad loob na pigaran taon et sakey labat a paraan pian nabembenan mon maong so wala ed sika. Naynay ya ipapaimano na sayan magasin so arum ni ran nakaukolan pian napansiansiam a mabiskeg so espiritualidad mo. Kaiba ed saratan so pikakasi, iyaatendi tan pibibiang ed saray Kristianon pantitipon, tan maseseg a panagpulong. Makatulong iraya pian tuloytuloy a napasimbalom, napapetang, tan napaaralem mo so inmunan arom.​—Efe. 5:10; 1 Ped. 3:15; Jud. 20, 21.

Anto so Ebat Mo?

• Panon a saray rason na impangarom ed si Jehova so makapaseseg ed sika natan?

• Nakombinse ka ed anto no nodnonoten mo iramay eksperiensyam ed loob na taotaon?

• Akin a kaukolan mon usisaen so arom ed Dios?

[Tepetepet Parad Panagaral]

[Litrato ed pahina 23]

Anto so akasagyat tan akakombinse ed sika ed katuaan?

[Litrato ed pahina 25]

Kasin walaray nanenengneng mo’d inkasika a kaukolan mon umanen?