Saray Kalidad a Nepeg Tayon Panggunaetan a Bayuboan

“Panggunaetan mon maong a bayuboan so inkatunong, debosyon ed Dios, pananisia, aro, anos, [tan] kauyamoan.”​—1 TIM. 6:11, NW.

1. Anto so panggugunaetan a dampoten na saray totoo natan?

 ANTO ta so pangiyuupotan na saray totoo natan ed biskeg tan panaon da? Singa ibabaga la na Biblia, dakel so manggugunaet a makadampot ed saray maapan kalat. Saray arum et ‘maaro ed pilak,’ a say abaloan da et say pakawalaay materyal a kaykayarian so lapuay liket. Say arum met et “maaro ed saray likeliket,” a satan lay manunaan ed bilay da. (2 Tim. 3:2, 4) Balet diad tua, anggan panon lay kabaleg na pansagpot da pian nadampot iratan et singa ra labat ‘manguusil ed dagem.’​—Ecl. 1:14.

2. (a) Anton tumang so iyiimbita na Dios a dampoten na saray arum a Kristiano? (b) Anton pankanawnawa so inlukas nen Jehova parad karaklan a Kristiano natan?

² Bilang pidumaan ed panggugunaetan a dampoten na maslak a totoo natan, imanoen pa so positibon awawey a walad si apostol Pablo: “Ontundas ak a mamaarap ed kalat a nipaakar ed pakalak na tumang na atagey a panatawag na Dios dia ed Kristo Jesus.” (Fil. 3:14) Ibabaga na Biblia a saray alanaan a Kristiano, a manbilang na 144,000, kaiba lay Pablo, so makaawat ed satan a tumang a mangatatawen a bilay. Manuley iran kaiba nen Jesu-Kristo legan na Sanlibon Taon a panuley to ed dalin. Agaylan abig iyan kalat ya inyimbita nen Jehova a dampoten da! Balet, parad karaklan a tuan Kristiano et walay duman ilalo odino kalat. Maaron iyoopresi nen Jehova ed sikara imay abalang nen Adan tan Eva, salanti, say pankanawnawan manbilay na andi-anggan tekep na perpekton bunigas diad paraison dalin.​—Apo. 7:4, 9; 21:1-4.

3. Panon tayon nipatnag a talagan aapresyaen tayo so agnaparaan a kaabigan na Dios?

³ Agsarag na makasalanan a totoo a nagamoran so andi-anggaan a bilay ed dili ran biskeg anggan mansagpot iran manggawa na maabig. (Isa. 64:6) Ta say andi-anggan a bilay et nagamoran labat diad panisia ed maaron probisyon na Dios parad kilalaban panamegley nen Jesu-Kristo. Panon tayon nipatnag so apresasyon ed sayan agnaparaan a kaabigan na Dios? Say sakey a paraan et diad panumbok tayo ed ganggan ton: “Panggunaetan mon maong a bayuboan so inkatunong,  debosyon ed Dios, pananisia, aro, anos, [tan] kauyamoan.” (1 Tim. 6:11, NW) Say pangonsidera ed sarayan kalidad et makatulong ed balang sakey ed sikatayo pian ‘ondaak’ so determinasyon tayon manggunaet a mangipatnag ed saratan.​—1 Tes. 4:1.

‘Panggunaetan a Bayuboan so Inkatunong’

4. Akin a makasegurado itayon importante a panggunaetan tayon bayuboan so inkatunong, tan antoray manunan kundang a kaukolan a dampoten na sakey?

⁴ Diad duaran sulat to ed si Timoteo et namparan indalatdat nen apostol Pablo iray kalidad a kaukolan tayon panggunaetan a bayuboan, tan say manunaan a sasalambiten to et say “inkatunong.” (1 Tim. 6:11; 2 Tim. 2:22, NW) Ontan met, naynay ya ipapaseseg na arum a bersikulo na Biblia a panggunaetan tayon bayuboan so inkatunong. (Uli. 15:9; 21:21; Isa. 51:1) Say unonan paraan pian nagawaan iya et say ‘pangamta [“igamor na pikakabat,” NW] ed saksakey a tuan Dios, tan ed samay imbaki to, salanti si Jesu-Kristo.’ (Juan 17:3) No panggugunaetan na sakey a bayuboan so inkatunong, sikatoy pakiwasen na satan a magbabawi ed saray kasalanan to tan “manpataoli” pian gawaen so linawa na Dios.​—Gawa 3:19.

5. Anto so nepeg tayon gawaen pian magmaliw tan mansiansia itayon matunong ed imaton na Dios?

⁵ Minilyon a totoon talagan manggugunaet a mamayubo ed inkatunong so angidedika lay bilay da ed si Jehova tan insimbolo da itan ed bautismo ed danum. No sakey ka la natan a bautismadon Kristiano, kasin naisip mon nepeg a napatnagan la ed panagbilay mo a mantutultuloy mon panggugunaetan a bayuboan so inkatunong? Tan nayarin ontan met lay gagawaen mo. Say sakey a pakapatnagan ed satan et no nibiig mo lay “maong tan mauges” base’d bangat na Biblia sano nipapaarap ka ed saray importantin desisyon ed bilay. (Basaen so Hebreos 5:14.) Singa bilang, no sakey kan marikit odino balolaki a wala la’d suston edad pian miasawa, kasin determinado kan talagan agmikarawan ed sakey ya agbautismadon Kristiano? No talagan panggugunaetan mon bayuboan so inkatunong, agmo abuloyan a nagawa itan.​—1 Cor. 7:39.

6. Anto so nalalanor ed peteg a panagdampot ed inkatunong?

⁶ Say pagmaliw a matunong et miduma ed pantunongtunongan odino ‘alabas a maptek.’ (Ecl. 7:16) Si Jesus et amasakbay sumpad pangipatnag na ontan ya inkatunong pian ipanengneng ed arum a mas maong itayo ni. (Mat. 6:1) On, nalalanor so puso ed peteg a panagdampot ed inkatunong, a nepeg tayon ipetek iray mauges a kanonotan, ugali, motibo, tan pilalek tayo. No itultuloy tayon pankimeyan iya, arawin makapanggawa itayo na seryoson kasalanan. (Basaen so Uliran 4:23; ikompara so Santiago 1:14, 15.) Nilikud ni ed satan, bendisyonan itayo nen Jehova tan tulongan to itayon nadampot so arum niran importantin kalidad na Kristiano.

‘Panggunaetan a Bayuboan so Debosyon ed Dios’

7. Anto so “debosyon ed Dios”?

⁷ No walaan itayo na debosyon ed Dios et seryosoen tayoy dedikasyon tayo tan manmatoor itayo. Inkuan na sakey a diksionaryoy Biblia a samay Griegon salitan impatalos a “debosyon ed Dios” et manutukoy ed sakey a “maabig ya awawey, a diad satan et al-alwaran na sakey ya ag-onkapuy so takot to ed Dios.” Mabetbet a sinmaew iray Israelita  a mangipatnag na ontan a debosyon, a singa ipapanengneng na matungangan inkiwas da anggan sanen kaykayari ni labat na impangiliktar na Dios ed sikara manlapud Ehipto.

8. (a) Lapud impankasalanan nen Adan, anto so linmesan tepet? (b) Panon a niparungtal so ebat ed sayan “sagradon sekreto”?

⁸ Nilibon taon lay linmabas manlapud impankasalanan nen Adan, bangbalet agnin siansia naebatan so tepet a, “Wala kasi siopaman a makapangipatnag na naspot a debosyon ed Dios?” Diad inlabas na saray siglo, anggapo ed makasalanan a katooan so akapangipatnag na naspot a debosyon ed Dios. Balet diad inggeter nen Jehova a panaon, imparungtal toy ebat ed sayan “sagradon sekreto.” Inyalis to ed panag-anakan nen Maria so bilay na bogbogtong ya Anak to ed tawen pian nianak bilang ayadyarin too. Legan na impanbilay nen Jesus diad dalin, tan anggan sanen sikatoy pinatey dan singa kriminal, impanengneng to no antoy kabaliksan na panseryoso ed dedikasyon tan naspot a panmatoor ed tuan Dios. Impatnag na saray pikakasi to no panon ton impasen so panagdayew to ed mangatatawen ya Ama to. (Mat. 11:25; Juan 12:27, 28) Kanian, pinuyanan nen Jehova si Pablo a maneskribe ed “debosyon ed Dios,” panamegley na panukoy ed maabig ya ehemplo na impanbilay nen Jesus.​—Basaen so 1 Timoteo 3:16, NW. *

9. Panon tayon nadampot so debosyon ed Dios?

⁹ Lapud makasalanan itayo, agtayo sarag a nipatnag so naspot a debosyon ed Dios. Balet ta sarag tayon panggunaetan a bayuboan itan. Kabaliksan na saya a gawaen tayo so anggaay nayarian tayo a tumboken a maap-apit so ehemplo nen Jesus. (1 Ped. 2:21) Sirin et agtayo magmamaliw a singa saramay mansimpisimpitan a ‘walaan na nengneng na inkasanto [odino debosyon ed Dios] ingen itapat da so pakayari na satan.’ (2 Tim. 3:5) Balet, agkabaliksan na saya a say tuan debosyon ed Dios et agmangilalanor ed akinpaway iran itsura. Peteg a lalanoren to itan. Singa bilang, no mamipili itayo na kawes parad kasal odino kawes ya usaren legan a man-shopping odino mitindaan, kaukolan a say itsura tayo et mikompormi ed ibabaga tayon ‘mananisia itayo ed Dios.’ (1 Tim. 2:9, 10, Maung a Balita) On, nipatnag tayon talagan panggugunaetan tayon bayuboan so debosyon ed Dios no ikokonsidera tayo iray matunong ya estandarte na Dios ed inagew-agew a kabibilay tayo.

‘Panggunaetan a Bayuboan so Pananisia’

10. Anto so kaukolan tayon gawaen pian mansiansian mabiskeg so pananisia tayo?

¹⁰ Basaen so Roma 10:17. Pian nabayuboan tan napansiansia na sakey a Kristiano so mabiskeg a pananisia, nepeg a mantultuloy ton dalepdepen iray makanakanan katuaan a naromog ed Salita na Dios. Pian natulongan itayo, “say matoor tan makabat ya aripen” so angitarya na dakel iran maabig a publikasyon. Say talora ed sarayan alay abig iran libro et say The Greatest Man Who Ever Lived, Manaral Manlapud Sankamaongan a Managbangat tan “Gala Magmaliw Kan Patumbok Ko.” Sarayan libro et denisinyo pian natulongan itayon nakabat a maong si Kristo tan pian natumbok tayo so ehemplo to. (Mat. 24:45-47) Sarayan aripen et angiyarunsa met na saray aral, asamblea, tan kombension, a maslak ed saraya et mangipapabitar ed saray “salita nen Kristo.” Wala tay nanonotan yon paraan a nayari yon gawaen pian lalo kayon nagunggonaan ed sarayan bengatla legan yon ‘iimatleken ed baleg a seseg’ iray itatarya na Dios?​—Heb. 2:1.

11. Anto so betang na pikakasi tan katutulok ed panggugunaet tayon mamayubo ed pananisia tayo?

 ¹¹ Say pikakasi et sakey nin tulong pian ombiskeg so pananisia tayo. Aminsan et oniay mikakasin kerew na saray papatumbok nen Jesus ed sikato: “Aruman mo so pananisia mi.” Sarag tayo met a kerewen ed Dios so ontan. (Luc. 17:5) Pian napabiskeg so pananisia tayo, kaukolan ya ipikasi tayo so tulong na masanton espiritu na Dios ta say pananisia et sakey ed saray kabiangan na “bunga na espiritu.” (Gal. 5:22) Say katutulok ed saray ganggan na Dios et mamabiskeg met ed pananisia tayo. Singa bilang, ompan sarag tayo nin mas padaaken so pibibiang tayo ed panagpulong a kimey. No gawaen tayo itan et maseguron nalikna tayo so baleg a liket. Tan legan tayon momolimolien iray bendisyon a nagagamoran tayo diad ‘panaanap nin unona ed panarian tan say inkatunong [na Dios],’ mas lalon ombiskeg so pananisia tayo.​—Mat. 6:33.

‘Panggunaetan a Bayuboan so Aro’

12, 13. (a) Anto so balon ganggan nen Jesus? (b) Diad anto iran importantin dalan a nabayuboan tayo so singa-Kriston aro?

¹² Basaen so 1 Timoteo 5:1, 2. Angiter si Pablo na praktikal a simbawa no panon a nipatnag na saray Kristiano so aro ed balang sakey. Say debosyon tayo ed Dios et kaukolan a laktipen toy katutulok ed balon ganggan nen Jesus ya ‘aroen so balang sakey’ a singa met ed impangaro to ed sikatayo. (Juan 13:34) Oniay indanet nen apostol Juan: “Say walaan na kayamanan to ed sayan mundo, tan nanengneng to so agi to a naukolan, et kapotan to so panangasi to, panon so pansiansia na aroy Dios ed sikato?” (1 Juan 3:17) Wala tay nanonotan yon praktikal a paraan pian nipanengneng yoy panangaro?

¹³ Say sananey nin paraan a nipanengneng tayon panggugunaetan tayon bayuboan so aro et say pagmaliw tayon manamerdona, ya agtayo manem-em na sakit na linawa ed saray agagi tayo. (Basaen so 1 Juan 4:20.) Noag ingen labay tayon tumboken iyan apuyanan a simbawa: “Mantetepelan so sakey tan sakey, tan manpeperdonaan so balang sakey, no say siopaman a too wala so pangidaleman to ed siopaman; unong ed impamerdona na Katawan ed sikayo, ontan met so gawaen yo.” (Col. 3:13) Wala tay napangiyaplikaan yo ed sayan simbawa diad kongregasyon? Perdonaen yo kasi?

‘Panggunaetan a Bayuboan so Anos’

14. Anto so naaralan tayo manlapud say kongregasyon ed Filadelfia?

¹⁴ Agtanto makapaangat so panggaway anggaan na nayarian tayo no say kalat tayo et maganon nadampot, ingen ta duma la no mairap itan odino mas binmayag nen say iilaloan tayo. Malinlinew sirin a say pandampot ed andi anggaan a bilay et mankaukolan na anos. “Lapu ed inunor mo so salita na kasungdoan [anos] ko, sika met ilaban taka ed oras na katukso,” so imbaga nen katawan a Jesus ed kongregasyon diad Filadelfia. (Apo. 3:10) On, imbangat nen Jesus a kaukolan tayo so anos, sakey a kalidad ya ontulong ed sikatayon ag-onsuko sano nipapaarap ed saray problema tan pakatuksoan. Maseguron makapadinayew so impananos na saray agagi ed Filadelfia nen inmunan siglo sanen say pananisia ra et niiyan ed dakel a subok. Kanian, pinaseguroan ira nen Jesus a tulongan to ra lamet sano naeksperiensya ra so mas babaleg a subok.​—Luc. 16:10.

15. Anto so imbangat nen Jesus nipaakar ed panagsungdo?

¹⁵ Amta nen Jesus a saray papatumbok to et busolen na mundo tan saray agmananisian kakanayon da, kanian diad amiduan pankanawnawa et sikaray pinaseseg to diad impangikuan ton: “Bang say mansungdo ya angga ed kasampotan, sikato lanlamang naani so nilaban.” (Mat. 10:22; 24:13) Imbangat met nen Jesus no panon a nagamoran na saray babangatan to so nakaukolan dan biskeg pian makapansungdo sano nasusubok ira. Diad sakey ed saray ilustrasyon to, inyaliling to ed mabaton dalin iray totoo a ‘malikeliket ya angawat ed salita [na Dios],’ ingen ta sinmuko sanen asubok  so pananisia ra. Balet ta inyaliling to iray matoor a papatumbok to ed mabuna a dalin, lapud “binembenan” da so salita na Dios tan ‘nambunga ira tekep na anos.’​—Luc. 8:13, 15.

16. Anton maaron probisyon so akatulong ed minilyon a totoo pian makapansungdo?

¹⁶ Naimano yo kasi imay sekreto pian makapansungdo itayo? Nepeg tayon ‘bembenan’ so salita na Dios, a pansiansiaen itan a mabilabilay ed kanonotan tan puso tayo. Pian nagawaan tayo itan, makatulong so New World Translation of the Holy Scriptures, sakey a patalos na Biblia a susto tan mainomay a basaen, tan nipapalapag la ed ondarakel a lenguahe. No diad inagew-agew et dalepdepen tayo iray walad Salita na Dios, natulongan itayon nagamoran so biskeg a nakaukolan tayo pian makapantultuloy a manbunga ‘tekep na anos.’​—Sal. 1:1, 2.

‘Panggunaetan a Bayuboan so Kauyamoan’ tan Kareenan

17. (a) Akin ya im-importanti ya ipatnag tayo so “kauyamoan”? (b) Panon ya impatnag nen Jesus a sikatoy mauyamo?

¹⁷ Anggapoy toon labay toy napalsaan ed sakey a bengatlan agto met ginawa odino agto imbaga. Kaslakan lan say masanok a reaksion to et ‘Agko ‘tan ginawa!’ Balet ta mas maabig komon no ipatnag toy “kauyamoan,” agta ontan? (Basaen so Uliran 15:1.) Sano apansalitaan da itayo na aliwa et talagan kaukolan tayon pokpokay liknaan tayo pian nipatnag tayoy kauyamoan. Si Jesu-Kristo et angipatnag na naspot ya ehemplo ed saya. “Sanen ayew-ayewen da agto binmales ya angayew; sanen apadpairap agnaningongot; noag ingen inmatalek to so laman to ed manangiter na tunong.” (1 Ped. 2:23) Tua ya agtayo sigpot a naalig si Jesus ed sayan pamaakaran, bangbalet, agta sarag tayon paaligwasen so panangipatnag ed kauyamoan?

18. (a) Anton maabig a resulta so napawala na kauyamoan? (b) Papasesegen itayon gegemtanen so anto nin kalidad?

¹⁸ Bilang panangalig ed si Jesus, lawas tayo komon ya ‘akaparaan ya onebat’ parad pananisia tayo, balet diad paraan a “siuuyamo tan sitatakot.” (1 Ped. 3:15) On, say pagmaliw tayon mauyamo et makatulong pian agla onabot ed sangsangan iray pandurumaay opinyon, dia man ed kapananisiaan tayo odino ed pulongan. (2 Tim. 2:24, 25) Say kauyamoan et ontulong ed sikatayon napanggayagaan so kareenan. Nayarin saya so rason no akin a diad komaduan sulat nen Pablo ed si Timoteo et inlaktip to so “kareenan” bilang sakey ed saray kalidad a kaukolan tayon lawas ’tumboken’ odino panggunaetan a bayuboan. (2 Tim. 2:22; ikompara so 1 Timoteo 6:11.) On, say “kareenan” et sakey ed saray kalidad ya ipapaseseg na Kasulatan a nepeg tayon gegemtanen.​—Sal. 34:14; Heb. 12:14.

19. Natan ta akonsidera tayo la so pitoran kalidad na saray Kristiano, anto lay determinado tayon panggunaetan, tan akin?

¹⁹ Asumpal tayo lan asingbat so pitoran kalidad ya ipapaseseg a panggunaetan a bayuboan na saray Kristiano, salanti, inkatunong, debosyon ed Dios, pananisia, aro, anos, kauyamoan tan kareenan. Talagan baleg a bendisyon no panggugunaetan a paaligwasen na saray agagi ed loob na kongregasyon so panangipatnag ed sarayan alay abig a kalidad! Saya so mamagalang ed si Jehova tan mangiyabuloy ed sikaton manmoldi ed sikatayo parad kirayew to.

[Paimano ed leksab]

Saray Punton Nepeg a Dalepdepen

• Anto so kabaliksan na panggunaet a pamayubo ed inkatunong tan debosyon ed Dios?

• Anto so ontulong ed sikatayo ed panggunaet tayon mamayubo ed pananisia tan anos?

• Anto so nepeg ya epekto na aro ed paraan na pidedeneng tayo ed balang sakey?

• Akin a kaukolan tayon panggunaetan ya ipatnag so kauyamoan tan kareenan?

[Tepetepet Parad Panagaral]

[Litrato ed pahina 12]

Amasakbay si Jesus sumpad mansimpisimpitan a panangipatnag na inkatunong pian pandinayewen iray totoo

[Litrato ed pahina 13]

Nagegemtan tayoy pananisia diad pandalepdep ed saray katuaan ed Salita na Dios

[Litrato ed pahina 15]

Sarag tayon bayuboan so aro tan kauyamoan