Tepetepet na Saray Manbabasa

Inkuan nen apostol Pablo a say ‘lapag ya Israel et nilaban.’ (Roma 11:26) Say labay ton ibaga kasi et nasabisabin magmaliw a Kristiano so amin a Judio?

Andi, aliwan ontan so labay ya ibaga nen Pablo. Lapud ta bilang sakey a nasyon, saray kapolian nen Abraham et agda binidbir a si Jesus so Mesias. Tan diad inlabas na saray panaon manlapu la’d samay impatey nen Jesus et binmitar ya aglan talaga nakomberte so amin a Judio ed Inkakristiano. Ingen, siansia nin tua imay inkuan nen Pablo a say ‘lapag ya Israel et nilaban.’ Diad anton pantalos balet?

Inkuan nen Jesus ed saray lider na relihyon a kapanaonan to: “Say panariay Dios naekal naani ed sikayo, tan niiter naani ed sakey a nasyon a mamapaway na saray bungabunga.” (Mat. 21:43) Lapud bilang nasyon et impulisay na Israel si Jesus, ipaarap la nen Jehova so imano to ed sananey a nasyon, say espiritual a nasyon. Tan tinawag itan nen Pablo ya “Israel na Dios.”​—Gal. 6:16.

Papaneknekan na arum a teksto ed Kristianon Griegon Kasulatan a say “Israel na Dios” et tugyopen na 144,000 ya alanaan iran Kristiano. (Roma 8:15-17; Apo. 7:4) Sayan grupo et laktipen to iray aliwan Judio unong a papaneknekan na Apocalipsis 5:9, 10. Ditan et ipapanengneng ton sarayan alanaan a Kristiano et nanlapud “balang kailalakan, tan salita tan baley, tan nasyon.” Saray membro na espiritual ya Israel so pinili pian magmaliw a ‘panarian tan saserdote, tan manari ra ed tapew na dalin.’ Anggaman impulisay la nen Jehova so Israel bilang say apilin nasyon, nayari nin siansia a makapipulangan ed sikato iray indibidual manlapud satan. Tan say arum ed saratan et saray apostol tan say dakel niran akaunan Kristiano. Siempre, sarayan Judio, a singa met ed arum ed katooan, et kaukolan a nasaliw ed dala nen Jesu-Kristo.​—1 Tim. 2:5, 6; Heb. 2:9; 1 Ped. 1:17-19.

Anggano abalang na karaklan a Judio nen inmunan siglo so pankanawnawan miuley ed si Jesus, agnaamper so pakasumpal na gagala nen Jehova a Dios. Talagan nasumpal a nasumpal itan, lapud oniay imbalikas to panamegley na propeta to: “Ontan met naani so salitak ya ompaway ed sangik; sikato naani ag ompawil ed siak a paoypaoy, no ag ingen sumpalen to naani so kaliktan ko, tan onaligwas naani ed bengatla a pangyakaran ko ed sikato.”​—Isa. 55:11.

Nasumpal a nasumpal met so gagala na Dios a manugyop na 144,000 a nakaiba na Anak to a manuley ed tawen. Malinlinew so ibabaga na Biblia a say Dios et mamili na kompleton bilang a 144,000, tan ag-itan nakulangan!​—Apo. 14:1-5.

Sirin, sanen insulat nen Pablo a say ‘lapag ya Israel et nilaban,’ agto ipapasakbay a magmaliw a Kristiano so amin a Judio. Imbes, say labay ton ibaga et nasumpal so gagala na Dios a walay 144,000 ya espiritual iran Israelita a miuley ed Anak to, si Jesu-Kristo, diad tawen. Diad inggeter na Dios a panaon, say akompleton bilang, salanti, say “lapag ya Israel,” et nilaban odino niwalad maligen a kipapasen, tan agmabayag et manuley lara bilang arari tan saserdote ed Mesianikon Panarian.​—Efe. 2:8.

[Saray litrato ed pahina 28]

Saray alanaan et nanlapu ed “balang kailalakan, tan salita tan baley, tan nasyon”