Agkami Tinmakot Ta Tinulongan Kami nen Jehova

Unong ed Salaysay nen Egyptia Petrides

Nen 1972, saray Tasi ed interon Cyprus so nantitipon ed Nicosia pian ondengel ed espisyal a paliwawa nen Nathan H. Knorr, a diad saman et abayag lan mangidadaulo ed kimey na saray Tasi nen Jehova. Abidbir to ak a tampol, tan antis ko nin nikabat so inkasiak et oniay tepet to: “Antoy balita’d Ehipto?” Akabat koy Brother Knorr 20 a taon lay apalabas diad Alexandria, Ehipto, say lugar a binalegan ko.

NIANAK ak diad Alexandria nen Enero 23, 1914. Siak so panguloan ed sikamin apatiran sanaagi. Asingsingger ed dayat so lugar a binalegan mi. Diad saraman a panaon, say Alexandria et marakdakep a syudad, a panaayaman na totoon nanlalapud nanduruman bansa tan kultura. Kabkabat itan lapud arkitektura to tan ed betang to’d awaran. Saray taga Europa et akiulop-ulop ed saray Arabo kanian sikamin sanaagi et akaaral a mansalitay Arabe, Ingles, Pranses, tan Italyano, likud ni ed Griego, say binalegan min salita.

Kayarik a nangraduar, nantrabaho ak ed sakey a kompanyan mandedesinyo na saray kawes ya estilon Pranses. Nanliketan ko so maal-alwar a panagdesinyo tan panagdait na elegante iran kawes ya isusulong na saray mayamyaman tan prominentin bibii parad espisyal iran okasyon. Relihyoso ak met tan labalabay kon basaen so Biblia anggaman agko tanton natatalosan itan.

Kaleganan na satan, diad kapegleyay dekada 1930 et akabat ko si Theodotos Petrides, sakey a makalkalakal a balolakin tubo’d Cyprus. Sikatoy sakey a maong a wrestler, balet ta marundunong met a manggawa na saray kendi tan cake tan nantrabaho ed sakey a kabkabat a lakoay cake. Sikatoy ginmusto’d siak, a sakey a melag a biin andeket so buek to. Mabetbet to ak a haharanaan na romantiko iran Griegon kansion. Nankasal kami nen Hunyo 30, 1940. Talagan malikeliket iraman a panaon. Nanayam kami ed apartment a walad leksab labat na panaayaman di nanay ko. Insan nen 1941, nianak so panguloan ya anak mi a si John.

Naaralan Mi so Katuaan na Biblia

Abayag lan agkontento si Theodotos ed relihyon mi tan walaray tepet to nipaakar ed Biblia. Agko nanaamtaan a sikatoy iyaaralan la manaya na Biblia na saray Tasi nen Jehova. Aminsan, wala ak ed abung a kaibak so anak mi. Walay biin tinmoktok tan inderew to’d siak so sakey a kard a pakabasaay mensahe a nanlapud Biblia. Pian agmet nabaingan, binasak imay kard. Insan ak inopresian na samay bii na saray libron base ed Biblia. Abigla ak, ta onman met iramay libro ya insempet nen Theodotos!

 “Wala lay oniaran libro mi,” so kuan ko. Samay bii et si Eleni Nicolaou. Sikatoy pinaloob ko tan insan nantutumbokan lay tepet ko’d sikato. Agustoan ko so maseeseet ya impangebat to ed kada tepet ko, ya inusar to so Biblia. Diman ko atalosan no anto so mensahe na Biblia. Sanen tinmunda kamin agano ed pantotongtong mi, naimano nen Eleni so litrato nen masiken ko. “Singano kabat ko tay walad litrato!” so kuanto. Abigbigla ak. Pinmaway a siansia so sekreto nen Theodotos. Oonla manayan bukor si Theo ed aral na saray Tasi nen Jehova tan agto ni ingen ibabaga ed siak. Kasempet nen Theodotos ed saman ya agew, inkuan ko’d sikato: “Samay pasen a nilam nen Simba, diad sayan simba, mila ak la’d sika ah?”

Diad samay unaan a miting ya inatendian ko, manga samplora so wadman ya aningbat ed libro na Biblia a Miqueas. Talagan tinalo-talosan koy amin a naaral ko diman! Manlapu’d saman, kada Biernes na labi et lalaen da kami la di George tan Katerini Petraki pian iyaralan na Biblia. Si tatay ko tan say duaran agik et sumpa ed panaaral mi ed saray Tasi. Say yugtan ko balet, anggaman agnagmaliw a Tasi et agmet la akibabali. Ingen, inawat nen nanay ko so katuaan na Biblia. Kanian nen 1942, siak, si nanay ko, tan si Theodotos, so abautismoan ed dayat diad Alexandria pian isimbolo so impangidedika mi na bilay mi ed kinen Jehova.

Saray Pananguman ed Bilay Mi

Ginmapo so Guerra Mundial II nen 1939, tan ag-abayag et linmoor itan. Diad asasakbay a parte na dekada 1940, say Heneral na Aleman a si Erwin Rommel tan say armada to et nankampo diad El Alamein, ya asingger ed panaayaman mi, tan say Alexandria et napno na saray Britanon sundalo. Nantipon kami na impamaga iran tagano. Sanen kinerew na amo nen Theodotos a sikato so mangasikaso ed lakoan to na cake a walad Port Taufiq ya asingger ed Suez, diman kami la nanayam. Diad Port Taufiq et inanap kami na sanasawan Tasi a mansasalita’y Griego, anggaman agda amta so address mi. Say ginawa ra et nampulong ira’d kabkaabungan ya anggad apugta ra so panaayaman mi.

Sanlegan min manaayam ed Port Taufiq, inyaralan mi na Biblia si Stavros tan Guila Kypraios, pati ‘ray anak dan si Totos tan Georgia. Satan a pamilya et nagmaliw a maap-apit a kaaro mi. Talagan labalabay nen Stavros so manaral na Biblia, kanian say gagawaen to et iyaatrasado to na sakey oras so amin a relo’d abung da. Diad ontan et agmi naabotan so sankaunoran a biahe na tren tan agkami la laingen makaalis ed abung da. Manaaral kami ya anggad nasabi mi aralem lay labi.

Labinwalon bulan kamin nanayam ed Port Taufiq. Kaukolan mi ompawil ed Alexandria ta nansakit si nanay ko. Sikatoy nansiansian matoor ed si Jehova ya anggad impatey to nen 1947.  Alikna mi lamet ed saman a pankanawnawa so panamabiskeg a manlalapud si Jehova panamegley na pililimog ed saray kakaaro min matatken ed espiritual. Wala met iray panaon a pinarawes mi iray misioneron paarap ed asainmin da’d arum a bansa leleg ya akadaong a magano’d Alexandria so niluganan dan barko.

Saray Liket tan Ermen Mi

Nen 1952, inyanak ko so komaduan anak mi a nginaranan min James. Bilang atateng, labay min ombaleg iray anak mi ed kaliberliber a makapabiskeg ed espiritual. Kanian, impausar mi so abung mi pian pandaragupan parad regular a panagaral na Biblia tan mabetbet met ya iimbitaan mi’d abung iray walad sigpot-panaon a serbisyo. Lapud satan, say anak min panguloan a si John, et naad-aro toy katuaan tan nagmaliw a payunir anggaman tinedyer ni labat. Legan na satan, diad labi et sikato met so maneeskuela pian nisumpal toy sekular ya edukasyon to.

Agnambayag, nalmoan a walay sakit nen Theodotos ed puso tan sikatoy binagaan a kaukolan to lan tundaan imay trabaho to. Apat taon ni labat nen James. Anto la kasi gawaen mi? Sankanonot mi imay sipan nen Jehova ya: “Agka antakot, ta wala ak ed sika.” (Isa. 41:10) Agaylay liket mi ta sanen 1956 et naimbitaan kamin manpayunir ed Ismailia, asingger ed Suez Canal. Agmi itan inilaloan! Saray tinmutumbok a taon ed Ehipto et agaylay gulo kanian kakkaukolan na saray agagi so panamaseseg.

Nen 1960, kaukolan mi lan taynan so Ehipto, ya asansakey maleta kami labat. Nanayam kami’d Cyprus, say islan binalegan nen masiken ko. Diad satan a panaon et linmoor lay sakit nen Theodotos tan agto la makapantrabaho. Maong labat ta walay sanasawan agi ya angiyopresi na napanayaman mi. Makapaermen ta duay taon ed saginonor et inatey so masiken ko. Siksikami labat la nen James so sankaiba tan sikatoy uga-ugaw ni. Nanayam met si John ed Cyprus balet ta angasawa la tan wala lay dilin pamilya to a nepeg ton asikasoen.

Agkami Apaulyanan Legan na Mairap Iran Panaon

Insan, wala lamet so sanasawan angiyopresi na napanayaman mi, si Stavros tan Dora Kairis. Tinmalimukor ak ya akisalamat ed si Jehova lapud intarya to lamet so pankaukolan mi. (Sal. 145:16) Sanen inlako di Stavros tan Dora so abung da, nampaalagey ira na balon abung a say leksab to et ginawan Kingdom Hall, tan impagawaan da kami met na  duaran melag a kuarto, parad siak tan parad si James.

Diad saginonor et angasawa met lay James. Sikato tan say asawa to et akapanpayunir ya anggad nianak so panguloan ed saray apatiran anak da. Walay agawan gulo’d politika diad Cyprus nen 1974, duay taon kayari na samay makatantandan imbisita nen Brother Knorr. * Dakel so anaynan na kaabungan da tan inmalis ed arum a lugar, kaiba la iray Tasi nen Jehova. Sakey ed saratan et say anak kon si John. Sikatoy nanayam la’d Canada a kaibay asawa to tan taloran anak da. Anggaman ontan so agawa, makapalikliket ta siansia nin dinmakel so bilang na saray manangipalapag na Panarian ed Cyprus.

Sanen mangaawat ak lay pension, sarag ko lay mibiang a mas malaglaem ed ministeryo. Balet, pigaran taon so apalabas, siak so naataki, tan akiayam ak ed ana’kon si James tan say pamilya to. Diad saginonor, sanen linmoor so sakit ko, naospital ak na pigaran simba insan kayari to et nanayam ak la ed panagkumponian. Anggaman pirmi so naliliknak a sakit, pupulongan ko iray nars, arum a pasyente, tan saray ombibisita. Ontan met, mabetbet so panagaral ko, tan lapud maaron tulong na saray agagi, makakaatendi ak ed CBS ya asingger diad panagkumponian.

Ligliwa Legan na Inkatatken

Naliligliwa ak sano nababalitaan ko so nipaakar ed saramay atulongan mi nen Theodotos. Dakel ed saray anak tan apo ra et walad sigpot panaon a serbisyo​—arum so manseserbi ed Australia, Canada, Inglatera, Gresya, tan Switzerland. Natan, say anak kon si John tan say asawa to et manaayam ed Canada a kaibay anak da a laki. Say panguloan dan bii tan say asawa to et manlilingkor bilang payunir. Say bolirek dan bii tan say masiken to, si Linda tan Joshua Snape, et naimbitaan a manaral ed koma-124 a klase na Gilead School.

Say anak kon si James tan say asawa to et manaayam la natan ed Alemanya. Say duaran anak dan laki et manlilingkor et Bethel, say sakey et diad Atenas, Gresya, tan samay sakey et diad Selters, Alemanya. Say bolirek dan laki, pati say anak dan bii tan say asawa to et payunir diad Alemanya.

Dakel so iyistorya mi ed si nanay ko tan ed si Theodotos diad kikioli! Seguradon naliketan ira sano naamtaan dan agaylay dakep na impatawir da ed pamilya mi. *

[Saray Paimano ed Leksab]

[Blurb ed pahina 24]

Alikna mi lamet ed saman a pankanawnawa so panamabiskeg a manlalapud si Jehova panamegley na pililimog ed saray kakaaro min matatken ed espiritual

[Mapa ed pahina 24]

(Parad aktual a format, nengnengen so publikasyon)

CYPRUS

NICOSIA

DAYAT A MEDITERANEO

EHIPTO

CAIRO

El Alamein

Alexandria

Ismailia

Suez

Port Taufiq

Suez Canal

[Credit Line]

Imbase ed NASA/Visible Earth imagery

[Litrato ed pahina 23]

Kaibak si Theodotos nen 1938

[Litrato ed pahina 25]

Ana’kon si James kaiba toy asawa to

[Litrato ed pahina 25]

Ana’kon si John kaiba toy asawa to