Agmo Amta No Dinan so Onaligwas!

“Dia ed kabuasan itanem mo so binim, tan dia ed labi agmo ipiko so limam; ta agmo amta no anto so onaligwas.”​—ECL. 11:6.

1. Akin et namparan makapadinayew tan talagan ontulong ed sikatayon magmaliw a mapaabeba so pakaimaton ed ibabaleg na saray tanaman?

 KAUKOLAN na sakey a dumaralos so mananos. (Sant. 5:7) Kayari ton nitanem iray bukel, kaukolan ya alagaren to iratan ya ombasik tan ombaleg. No maabig so panaon, kalkalna iratan ya onsimit. Insan iratan magmaliw a tanaman ya anggad manbunga la. Kabebekta, diad ilalabas na panaon, say uma et akaparaan la parad panagani. Talagan makapadinayew so pakaimaton ed milagro na ibabaleg! Tan talagan tulongan itayo na saya a magmaliw a mapaabeba lapud amta tayo no siopay talagan Amabaleg ed saratan. On, nayarian tayon asikasoen iratan a bukel, tan makatulong itayo met ed pansalog. Ingen ta say Dios lambengat so makasarag a mamabaleg ed saratan.​—Ikompara so 1 Corinto 3:6.

2. Diad samay ilustrasyon nen Jesus ya asingbat ed akadkaunan artikulo, antoran punto nipaakar ed espiritual ya ibabaleg so imbangat to?

² Singa abitla la ed akadkaunan artikulo, inyaliling nen Jesus so kimey a panangipulong ed Panarian diad panagtanem na bukel na sakey a dumaralos. Diad samay ilustrasyon to nipaakar ed nanduruman klase na dalin, indanet nen Jesus ya anggano maabig a bukel so intanem na samay dumaralos, akadepende nin siansia ed kipapasey puso na samay indibidual no ombaleg itan odino andi. (Mar. 4:3-9) Dia met ed samay ilustrasyon nipaakar ed sakey a toon nantanem na bukel tan naugip, indanet ton agsigpot ya amta na sayan too no panon a binmaleg iray tanem to. Say rason et lapud say Dios so amabaleg ed saratan, aliwan say too. (Mar. 4:26-29) Natan et konsideraen tayo so talora nin ilustrasyon nen Jesus, salanti, samay ilustrasyon to nipaakar ed bukel na mustasa, nipaakar ed lebadura, tan nipaakar ed iket. *

Say Ilustrasyon Nipaakar ed Bukel na Mustasa

3, 4. Antoran aspekto nipaakar ed mensahe na Panarian so idadanet na ilustrasyon nipaakar ed bukel na mustasa?

³ Say ilustrasyon nipaakar ed bukel na mustasa a nirekord met ed Marcos kapitulo 4 et mangidadanet na duaran bengatla: unona, say makapakelaw ya idarakel na totoon mangaawat ed mensahe na Panarian; komadua, say proteksion a nagagamoran da. Inkuan nen Jesus: “Panon so pangyulibayan tayo ed panariay Dios? Ono anto ya alimbawa so pangipaakaran tayo’d sikato? Sikato so kaulibay na sakey a bukel na mustasa a sano sikatoy nitanem ed dalin, anggan sikatoy melag nen saray amin a bukel a wala ed dalin, manwarin ontan sano sikatoy nitanem, ontubo, tan magmaliw a balbaleg nen saray amin a pisipising, tan mangipaway na angkakabaleg a sanga; ed ontan a saray kamanokan ed tawen nayarian da so ompokok ed sirum [to].”​—Mar. 4:30-32.

⁴ Dedeskribien na saya so ibubulaslas na “panariay Dios” a napapaneknekan diad ikakayat na  mensahe na Panarian tan iyaaligwas na Kristianon kongregasyon manlapu la’d Pentecostes 33 C.E. Say bukel na mustasa et melmelanting, a nayarin mangiyaliling ed sakey a melmelag a bengatla. (Ikompara so Lucas 17:6.) Ingen agmanbayag, sayan tanaman et ombaleg a nasabi toy 10 ya anggad 15 piye tan nawalaan na angkabaleg a sanga, kanian singa la itan sakey a kiew.​—Mat. 13:31, 32.

5. Anton iyaaligwas so naeksperiensya na inmunan siglo a Kristianon kongregasyon?

⁵ Say iyaaligwas na Kristianon kongregasyon et ginmapo ed melag labat a lapuan nen 33 C.E. sanen alanaan na masanton espiritu so manga 120 a babangatan. Balet, diad antikey lambengat a panaon, sayan melag a grupo et tugyopen la na nilibon mananisia. (Basaen so Gawa 2:41; 4:4; 5:28; 6:7; 12:24; 19:20.) Diad loob labat na taloran dekada et dinmakerakel iray umaani, kanian nikuan nen apostol Pablo ed kongregasyon diad Colosas a say maong a balita et “nipulong [la] ed amin a pinalsa ed leksab na tawen.” (Col. 1:23) Agaylan makapakelaw ya iyaaligwas!

6, 7. (a) Anton iyaaligwas so agawa manlapu la’d 1914? (b) Anto nin iyaaligwas so nagawa ed arapen?

⁶ Manlapu la’d inkiletneg na Panariay Dios diad tawen nen 1914, saray sanga na “kiew” a mustasa et talagan linmaknab a maong. Naimatonan a mismo na saray totoo na Dios so literal a kasumpalan na propesiya ya inrekord nen Isaias: “Say daiset magmaliw naani a sanlibo, et say melag magmaliw naani a mabiskeg a nasyon.” (Isa. 60:22) Samay melag a grupo na saray alanaan ya akibiang ed panagpulong a kimey nen kagapoy koma-20 a siglo et ag-anggan nanilalo a kasabi 2008, ngalngali la pitoran milyon a Tastasi so mibiang ed panagpulong a kimey diad masulok a 230 a daldalin. Talagan makapakelaw iyan iyaaligwas, a singa ed samay bukel na mustasa ed ilustrasyon nen Jesus!

⁷ Balet, kasin angangga labat la ditan so iyaaligwas? Andi. Agmanbayag, amin lan manaayam ed dalin et magmaliw lan sakop na Panarian na Dios. Naekal lan amin ed satan iray onsusumpa. Tan magmaliw iyan posible aliwan lapud sagpot na saray totoo noagta lapud isalet na Soberanon Katawan a Jehova ed saray nagagawa diad dalin. (Basaen so Daniel 2:34, 35.) Diad satan et naimatonan tayo so ultimon kasumpalan na sananey nin propesiya ya inrekord nen Isaias: “Say dalin napano naani ed pikakabat ed Jehova, singa saray danum sakbongan da so dayat.”​—Isa. 11:9.

8. (a) Siopa so irerepresenta na saramay manok ed ilustrasyon nen Jesus? (b) Natan ni labat, naproprotektaan itayo la manlapud anto?

⁸ Inkuan nen Jesus a sarag na saray manok ed tawen so ompokok ed sirum na sayan Panarian. Ag-isisimbolo na saraya iramay manok a kakabusol na Panarian a mangaakan ed saray maabig a bukel, a singa saramay manok ed ilustrasyon nipaakar ed lakin angisibwag na bukel ed nanduruman klase na dalin. (Mar. 4:4) Noagta, diad sayan ilustrasyon, say irerepresenta na saray manok et matunong a totoo a manaanap na proteksion ed loob na Kristianon kongregasyon. Anggan natan ni labat, naproprotektaan la’raya manlapud saray kagagawan makaderal ed maabig a relasyon da ed Dios, ontan met ed saray marutak ya ag-agamil  na sayan mundo. (Ikompara so Isaias 32:1, 2.) Inkompara met nen Jehova so Mesianikon Panarian ed sakey a kiew tan mapropetiko ton inkuan: “Ed palandey na kaatageyan na Israel sikato naani itanem ko; et sikato naani mansanga, tan manbunga, tan magmaliw a malimgas a sedro, et dia ed silong to manayam naani so amin a manok a nambabangil a payak; ed sirom na saray sanga to manayam ira naani.”​—Eze. 17:23.

Say Ilustrasyon Nipaakar ed Lebadura

9, 10. (a) Anton punto so indanet nen Jesus ed samay ilustrasyon nipaakar ed lebadura? (b) Diad Biblia, anto so mabetbet ya irerepresenta na lebadura, tan anton tepet base’d impangusar nen Jesus na lebadura so konsideraen tayo?

⁹ Say iyaaligwas et agnaynay a naiimano na saray totoo, a singa indanet nen Jesus ed ontumbok ya ilustrasyon to. Inkuan ton: “Say panarian na tawen kaulibay na lebadura, ya inalay sakey a bii, tan inkames to’d taloran kasukat ya arina, angga ed alebaduraan ya amin.” (Mat. 13:33) Anto so irerepresenta na sayan lebadura, tan panon iyan miulibayan ed ibubulaslas na Panarian?

¹⁰ Mabetbet a nauusar ed Biblia so lebadura pian mangirepresenta ed kasalanan. Alimbawa, inusar nen apostol Pablo so lebadura ed ontan a paraan sanen tinukoy toy makaderal ya impluensya na sakey a makasalanan diad kongregasyon na Corinto nensaman. (1 Cor. 5:6-8) Kasin diad sayan pankanawnawa et inusar met nen Jesus so lebadura pian irepresenta so ibabaleg na sakey a mauges a bengatla?

11. Panon ya inusar so lebadura diad Israel nensaman?

¹¹ Antis tayon ebatan itan a tepet, kaukolan nin ikonsidera tayo so taloran importantin detalye. Unona, anggaman ag-inyabuloy nen Jehova so pangusar na lebadura legan na piesta na Paskua, diad arum a pankanawnawa et aawaten toray bagat ya alaokan na lebadura. Uusaren so lebadura ed panangiyapay ed komunion na pisasalamat, a diad satan et samay mangiyaapay et boluntaryon mantarya pian pisalamatan si Jehova ed saray panamendisyon to. Sayan pandurungo et mangiiter na liket ed saramay akibiang.​—Lev. 7:11-15.

12. Anto so naaralan tayo ed panangusar na Biblia ed saray simbolo?

¹² Komadua, anggaman say sakey a simbolo et nayarin walaan na negatibon kabaliksan diad sakey parte na Biblia, diad arum a parte et nayarin nausar itan a mangipresenta ed positibon bengatla. Singa bilang, diad 1 Pedro 5:8, si Satanas et niyaliling ed sakey a leon, a mangisisimbolo ed inkasebeg tan inkaruksa to. Balet diad Apocalipsis 5:5, si Jesus et niyaliling met ed leon, salanti, say “Leon ed poli nen Juda.” Diad sayan pankanawnawa, say leon et inusar bilang simbolo na makpel ya inkahustisya.

13. No nipaakar ed espiritual ya iyaaligwas, anto so ipapabitar na ilustrasyon nen Jesus nipaakar lebadura?

¹³ Komatlo, agsinalambit nen Jesus ed ilustrasyon to a dineral na samay lebadura so interon masa na arina, a ginawa ton agla napinabangan. Deneskribe to labat so simplin paraan na panaggaway tinapay. Ginagala na samay bii ya inkames so lebadura tan kabebekta et maabig so nansumpalan na satan. Samay lebadura et akakames la ed masa na arina tan agla nabidbir. Kanian ag-amta na samay bii no panon a pinaalsa na satan imay masa na arina. Ipapanonot na saya ed sikatayo imay dumaralos ya angitanem na bukel insan naugip ed labi. Inkuan nen Jesus a “say bukel onsulming, tan ontubo, sikato [samay dumaralos] agto amta no panon.” (Mar. 4:27) Agaylan  kalinew a panangiyilustra ed agnanengneng a proseso na espiritual ya iyaaligwas na sakey! Nayarin diad gapo et agtayo napatnagan itan, ingen ta diad panaakar na panaon et nanengneng tayo lanlamang.

14. Anton aspekto na panagpulong a kimey so iyiilustra na katuaan a say lebadura et palebagen to so interon masa na arina?

¹⁴ Sayan proseso na iyaaligwas et aliwa labat lan agnanengneng, noagta malaklaknab met. Sananey lamet iyan aspekto a nidanet ed samay ilustrasyon nipaakar ed lebadura. Samay lebadura et pinalebag to so amin a “taloran kasukat ya arina.” (Luc. 13:21) Singa say lebadura, say panangipulong na Panarian a sengegay indakel na saray babangatan so linmaknab ed punton say Panarian et nipulong la “angga ed kasampotan na dalin.” (Gawa 1:8; Mat. 24:14) Talagan baleg a pribilehyo so pakapibiang ed sayan makapadinayew ya idaraak na kimey na Panarian!

Say Iket

15, 16. (a) Isumaryo pa so ilustrasyon nen Jesus nipaakar ed iket. (b) Anto so irerepresenta na iket, tan anton aspekto na ibubulaslas na Panarian so tutukoyen na saya?

¹⁵ Say mas importanti nen say bilang na saray papatumbok nen Jesus et say kalidad da bilang papatumbok. Sayan aspekto na iyaaligwas na Panarian so tinukoy nen Jesus ed sananey nin ilustrasyon to, samay nipaakar ed iket. Inkuan to: “Lamet, say panarian na tawen miulibay ed sakey ya iket, ya impelag ed dayat, et manala na amin a kanengnengan [na sira].”​—Mat. 13:47.

¹⁶ Say iket, a mangirerepresenta ed panangipulong na Panarian, so manitipon na nanduruman nengneng na sira. Intuloy nin inkuan nen Jesus: “Sanen napno [lay iket], insakbit da ed gilig; et imyurong ira, tan tinipon da’ray maong ed saray belbelyag, saraman balet so [“agnaakan,” NW] imbantak da’d arawi. Ontan so nagawa naani ed anggaay mundo; saray angheles ompaway ira naani, tan ibiig da naani so saray mauges ed saray matunong. Tan sikaray ibuntok da ed horno na apoy; sikato naani paningel tan panngalatenget na saray ngipengipen.”​—Mat. 13:48-50.

17. Anton peryodo na panaon so tutukoyen na samay panangibiig ya asalambit ed ilustrasyon nen Jesus nipaakar ed iket?

¹⁷ Kasin say tutukoyen na sayan panangibiig et say unor a panangukom ed saray karnero tan kanding ya imbaga nen Jesus a nagawa sano sikatoy onsabi ed gloria to? (Mat. 25:31-33) Andi. Say kagawa na satan ya unor a panangukom et sano onsabi si Jesus legan na baleg ya irap. Samay panangibiig balet ya atukoy ed ilustrasyon nipaakar ed iket et nagawa diad panaon na “anggaan.” * Tutukoyen na saya so panaon a pambibilayan tayo, salanti, saray agew ya ompugta’d baleg ya irap. Kanian, panon a nagagawa natan iyan panangibiig a kimey?

18, 19. (a) Panon a nagagawa natan so panangibiig a kimey? (b) Anton kundang so kaukolan a gawaen na saray matuan-impanpuson totoo? (Nengnengen met so paimano ed leksab a walad pahina 21.)

¹⁸ Literal a minilyon ed sarayan simbolikon sira manlapud dayat na katooan so asagyat  ed kongregasyon nen Jehova ed sarayan modernon panaon. Arum ed saraya et onaatendi ed Memoryal, mimiaral, tan inmabuloy a paiyaralan na Biblia. Balet, kasin amin na saraya et peteg a tuan Kristiano? Nayari palagin “insakbit [ira] ed gilig [na dayat],” balet ibabaga ed sikatayo nen Jesus a saramay “maong” labat so ikarga ed belbelyag, a mangirerepresenta ed Kristianon kongregasyon. Balet saramay aliling toy agnaakan a sira et ibantak ed mangapuy-apoy a palbaan a mankabaliksay kadederal ed arapen.

¹⁹ Saramay datin papaiyaralan na Biblia ed saray totoo nen Jehova, balet ta tinmunda la et niyaliling ed saramay agnaakan a sira. Arum a pinabaleg na saray Kristianon atateng et talagan agmalabay a manumbok ed bakat nen Jesus. Masuyat iran mandesisyon a manlingkor ed si Jehova odino kayari na pigaran panaon na impanlingkor da et tinmunda ira. * (Eze. 33:32, 33) Balet no nipaakar ed saramay matuan impanpuson totoo, talagan kakkaukolan a patipon ira ed kongregasyon ya iyaaliling na samay belbelyag, sakbay na agew na unor a panangukom tan mansiansia ira ed maligen a pasen.

20, 21. (a) Anto so naaralan tayo ed impanrepaso na saray ilustrasyon nen Jesus nipaakar ed ibabaleg odino iyaaligwas? (b) Anto so determinado yon gawaen?

²⁰ Anto sirin so naaralan tayo ed antikey ya impanrepaso ed saray ilustrasyon nen Jesus nipaakar ed ibabaleg odino iyaaligwas? Unona, talagan agaylay ibubulaslas na intereses na Panarian diad dalin, a singa ed samay bukel na mustasa. Anggapo so siopaman a makaamper ed kilaknab na kimey nen Jehova! (Isa. 54:17) Sakey ni, saramay “ompokok ed sirum [na samay kiew]” et naproproteksionan manlapud si Satanas tan say marelmeng a mundo to. Komadua, say Dios, sikato so mamapabaleg. Singa samay inkames a lebaduran pinalebag toy interon masa, sayan iyaaligwas et agnaynay a sankanengneng odino natalosan, ingen ta peteg a nagagawa! Komatlo, aliwan amin a kinmiwas et apaneknekan a makanepegan. Arum et singa ed saramay agnaakan a sira ed ilustrasyon nen Jesus.

²¹ Balet, say makapaseseg et amayamay a makanepegan so onaapit ed si Jehova! (Juan 6:44) Saya so nanresulta ed agnapokpokan ya indaraak ed dakel a bansa. Si Jehova labat so nepeg a narayew ed amin na sarayan ibubulaslas. Say pakakaimaton ed saya so nepeg a mamaseseg ed balang sakey ed sikatayo ya ontumbok ed panonot a nisulat pigaran siglo lay apalabas: “Dia ed kabuasan itanem mo so binim . . . ta agmo amta no anto so onaligwas, no saya kasi odino saman, no sikara kasi nampadpara naani a maong.”​—Ecl. 11:6.

[Saray paimano ed leksab]

Panon Yon Ebatan?

• Anto so naaralan tayo ed samay ilustrasyon na bukel na mustasa nipaakar ed ibubulaslas na Panarian tan ed pakaprotektaan manlapud si Satanas tan say marelmeng a mundo to?

• Anto so irerepresenta na samay lebadura ed ilustrasyon nen Jesus, tan anton katuaan nipaakar ed ibubulaslas na Panarian so indanet nen Jesus?

• Anton aspekto ed iyaaligwas na Panarian so nipaimano ed samay ilustrasyon nipaakar ed iket?

• Panon itayon makaseguro a makapansiansia itayon kabiangan ed saramay ‘atipon ed belbelyag’?

[Tepetepet Parad Panagaral]

[Saray litrato ed pahina 18]

Antoy naaralan tayo ed samay ilustrasyon na bukel na mustasa nipaakar ed iyaaligwas na kimey na Panarian?

[Litrato ed pahina 19]

Anto so naaralan tayo ed samay ilustrasyon nipaakar ed lebadura?

[Litrato ed pahina 21]

Anto so ililitrato na samay panangibiig ed saray maong a sira manlapud agnaakan a sira?