Gawaen a Makatunongan Iray Iilaloan Mo Pian Magayaga Ka

“ANTO ’ya, agko lamet agawaan!” Aminpigam lan imbalikas so ontan lapud agmo nagagawaan so implanom a gawaen? Nayari palagin ontan so ibaga na sakey ya ina lapud nakekesawan ed panag-asikaso ed anak ton kapangiyanak tan naeermenan ta dagdaiset lay panaon to ed saray Kristianon kimey. Odino nayarin say sakey ya agi et anggapoy talek to ed inkasikato lapud impamabaleg na atateng to tan ipapasen ton dagdaiset so nagagawaan to ed kongregasyon. Ompan walay sakey a maedad lan Tasi a naeermenan a maong lapud agto la nasarag iramay Kristianon aktibidad a dati et nagagawaan to sanen maksil ni pueg to. Oniay inkuan nen Christiane: “Makadngel ak labat na paliwawan mangipapaseseg ed panagpayunir et makaakis ak la.” Nibaga to itan lapud sikatoy napupugeran na situasyon na pamilya to a makagaway malaglaem diad serbisyo ed si Jehova.

No ontan so nalilikna tayo, antoy gawaen tayo? Panon ya apagmaliw na arum a Kristiano a realistiko so panmoria ra ed saray sirkumstansya ra? Antoray gunggona no balanse so iilaloan tayo?

Magmaliw a Makatunongan

Oniay makatulong a simbawa nen apostol Pablo pian napansiansia so gayaga tayo: “Manggayaga kayo ed Katawan lawas: kuan ko lamet, Manggayaga kayo. Nakabatan komon na amin a too so kasungdoan [“inkamakatunongan,” NW] yo.” (Fil. 4:4, 5) Pian nalikna tayo so liket tan inkapnek ed panaglingkor ed Dios, kaukolan a makatunongan iray iilaloan tayo ed inkasikatayo unong ed abilidad tan sirkumstansya tayo. No ipilit tayon dampoten so agmakatunongan iran kalat, papairapen tayo labat so inkasikatayo. Balet, nepeg itayon manalwar ompan masyadon abebbeba met lay iilaloan tayo ed inkasikatayo, ya usaren so ipapasen tayon limitasyon bilang baraan ed no akin a matalag itayo lan mibiang ed ministeryo.

Antokaman so sirkumstansya tayo, kakaukolanen nen Jehova ya iter tayo’d sikato so sankaabigan, salanti, say mabulbulos tan sigpot-puson panaglingkor. (Col. 3:23, 24) Sano agtayo iiter ed si Jehova so sankaabigan tayo, agtayo nasusumpal so dedikasyon tayo’d sikato. (Roma 12:1) Kaaruman ni, singa tayo isisiblet ed inkasikatayo so pirmin inkapnek, tuan liket, tan arum niran daakan a bendisyon a resultay interon-kamarerwa a panaglingkor.​—Uli. 10:22.

Diad Biblia, say salitan nipatalos a “makatunongan” et walaan na kabaliksan a pagmaliw a makonsidera. Literal a mankabaliksan itan na mapalugar. Satan a salita et walaan met na talos a pagmaliw ya aliwan alablabas ya estrikto. Sirin, no makatunongan itayo, sarag tayon moriaen iray sirkumstansya tayo ed balansin paraan. Mairap ta itan a gawaen? Parad arum et mairap itan, anggano nayarian day magmaliw a  makonsidera ed arum. Alimbawa, no say sakey a kaaro et naiimano tayon nababanalan a maong lapud abunton a kimey to, agtayo kasi tulongan ya ipamoria ed sikato a makabat no manggawa na pigaran pananguman ed bilay to? Mipadpara, nepeg tayon aralen ya ibiig iray sinyalis a mangipapanengneng ya onsosobra itayo la ed mismon limitasyon tayo.​—Uli. 11:17.

No saray atateng ya amabaleg ed sikatayo et atagtagey so iilaloan da, mas mairap parad sikatayo so nawalaay makatunongan a panmoria ed saray limitasyon tayo. Walaray arum a say pakalikna ra sanen ugugaw nira et nepeg a lawas dan gawaey sankaabigan pian ad-aroen ira na atateng da. Sano ontan so alikna tayo, ompan nalilingo itayo ed no panoy pangipapasen nen Jehova ed sikatayo. Tandaan ya inaro itayo nen Jehova lapud sigpot-puson panlilingkor tayo’d sikato. Say Salita na Dios so mamapaseguro ed sikatayo a si Jehova et “kabkabat to so inkagawa tayo, a sikato nanodnonotan to a sapok itayo.” (Sal. 103:14) Amta to iray limitasyon tayo tan aroen to itayo no maseseg tayon panlingkoran anggaman wala iratan a limitasyon. Say Dios tayo et aliwan singa estrikton amo. Say pannodnonot ed satan so makatulong ed sikatayo pian ag-atagtagey so iilaloan tayo ed inkasikatayo, a bibidbiren a walaray limitasyon tayo.​—Miq. 6:8.

Anggaman ontan, arum so nairapan a mamayubo ed balansin awawey. No ontan so kipapasen mo, akin ya agpatulongan ed eksperiensyadon agi a kabkabat to ka? (Uli. 27:9) Singa bilang, labay mo ta so manregular payunir? Agaylay abig itan a kalat! Kasin naiirapan kan dampoten itan? Ompan kaukolan mon pasimplien so bilay mo. Odino nayarin itongtong ed sika na napanpiyaan mon Kristianon kaaro no kasin praktikal ed sika natan so manpayunir, anggaman dakel so responsabilidad mo ed pamilya. Natulongan to kan manetermina no talaga kasin nasarag mo ray kaaruman a kimey a plaplanoen mon dampoten odino no antoray kaukolan mon umanen, diad ontan et dakel ni nagawaan mo. Say asawan laki so makatulong met ed asawa to ed sayan pamaakaran base ed abilidad na akulaw to. Singa bilang, nayari ton isuheri ed asawa to ya antis a gapoan so bulan a dakerakel so kimey et kaukolan toy magenap a painawa. Makatulong iya pian maksil so laman to tan napansiansia toy gayaga ed ministeryo.

Mannonot na Saray Bengatlan Sarag Mon Gawaen

Lapud itatatken odino ikakapuy na bunigas et nalimitaan la so panaglingkor tayo ed si Jehova. No sakey kan ateng, nayarin ipasen mon daiset so napipinabangan mo’d personal a panagaral odino ed saray miting lapud nauupot lay oras mo ed panangasikaso ed angkelag niran anak mo. Anggaman ontan, agta no maminsan et agmo la laingen nanengneng iray posiblin nagawaan mo no say piimanom et saray limitasyon mo?

Nilibon taon lay apalabas, pipilaleken na sakey a Levita so bengatlan agto nagawaan. Sikatoy apribilehyoan a manlingkor ed templo a  duay simba kada taon. Anggaman ontan, alay abig so pankaliktan ton makapanayam la lawas diad asingger ed altar. (Sal. 84:1-3) Antoy akatulong ed sayan matoor a laki a mankontento? Amoria ton anggan say sakey agew ed saray saban na templo et balbaleg lan pribilehyo. (Sal. 84:4, 5, 10) Mipadpara ed satan, imbes ya akasentroy imano tayo ed saray limitasyon tayo, maong no salien a nonoten iray posiblin nagawaan tayo tan apresyaen iratan.

Bilang alimbawa, imanoen pay Nerlande, sakey ya agin bii a taga Canada. Sikatoy agmakaakar tan liknaen ton dagdaiset so nagawaan to ed ministeryo. Ingen, inuman to itan a negatibon kanonotan, tan impasen ton personal a teritorya to imay mall a walad asingger. Impaliwawa to: “Ipupuestok so wheelchair ko diad abay na yurongan ed mall. Panliliketan ko so pampulong ed saramay onyuyurong tan manpapainawan magano.” Napnapnek si Nerlande lapud pibibiang ed sayan importantin nengneng na ministeryo.

Manggawa na Saray Pananguman No Nakaukolan

Isipen pay mapmaples a bapor ya itutulak na dagem so layag to. Kabebekta, sinmabi maksil a bagyo kanian kapilitan ya umanen na managtimon so layag na bapor. Siempre, agto kontrolado so bagyo, balet no walay umanen to’d layag, siansian nakontrol to so bapor. Mipadpara ed satan, mabetbet ya agtayo kontrolado so nasasagmak tayon singa bagyo iran kipapasen ed bilay. Balet, anggad iyaabuloy na sirkumstansya, nakontrol tayo so bilay tayo no manggawa itayo na saray pananguman ed panangusar ed pisikal, mental, tan emosyonal a kapasidad tayo. Sano ikonsidera so kaplesan a kipapasen tayo, natulongan itayon napansiansia so inkapnek tan gayaga tayo ed panaglingkor ed Dios.​—Uli. 11:2.

Imanoen pa so pigaran alimbawa. No medyo makapuy so laman tayo, maabig no paliisay makapabanal iran aktibidad ed mismon agew a walay aral ed labi pian walay biskeg tayon onatendi. No gawaen tayo itan, nagunggonaan itayon maong ed pililimog ed saray agagi. Odino no say sakey ya ina et agmakapila ed panagkabkaabungan ta say anak to et maniinagem, nayarian ton imbitaan iray agagin bibii ed abung to pian nakaiba ton manpulong panamegley na telepono leleg a nauugip so anak to.

Panon to no lapud sirkumstansyam et agmo naaral so amin a singbaten ed saray miting ed kongregasyon? Siempre, nadeterminam met no kaunongan so sarag mon iparaan, tan gawam so anggaay nayarian mo. No manggawa itayo na  pigaran pananguman ed saray plano tayon mainomay a nadampot, makapansiansia itayon aktibo tan maliket.

Mankaukolan met na determinasyon tan sagpot no umanen tayo iray kalat tayo. Say sanasawan taga Pransya a si Serge tan Agnès so nanggaway baleg a pananguman ed plano ra. Inkuan nen Serge: “Nen akabatan mi nen Agnès a sikatoy malukon, amta min agmi la sarag so magmaliw a misionero, a singa pinilalek mi.” Natan, sakey lan ama na duaran maliligsan ugugaw si Serge. Oniay impaliwawa to no panoy impangiletneg da na balon kalat bilang sanasawa: “Lapud agkami la makapanlingkor ed arum a bansa, denesidi mi lay magmaliw a ‘misionero’ ed mismon bansa mi. Angiba kami ed grupon mansasalita na sananey a lenguahe.” Agunggonaan ira kasi ed impangiletneg ed sayan balon kalat? Oniay inkuan nen Serge: “Alikna min mausa-usar kami ed kongregasyon.”

Si Odile, sakey ya agin bii a taga Pransya a manedad lay masulok a 70 so manliliknay osteoarthritis ed pueg, kanian agto sarag so manalagey a mabayag. Sikatoy adismaya ta say kipapasen to so mamupuger ed sikaton makapibiang ed panagkabkaabungan. Ingen, agsinmuko. Noagta inuman toy metodo to, a nampulong panamegley na telepono. Inkuan to: “Mas mainomay tan mas makapalikliket itan nen say inilaloan ko!” Nipawil so ligsa to ed ministeryo lapud sayan metodo ed panagpulong.

Mangitarok na Bendisyon so Makatunongan Iran Iilaloan

No makatunongan so panmoria tayo ed no antoy nagawaan tayo, napaliisan tayoy dakel a kaermenan. Diad pangiletneg na realistiko iran kalat, anggaman walaray limitasyon tayo et nalikna tayon walay agawaan tayo. Tan anggan panoy kamelag na agawaan tayo, panliketan tayo itan.​—Gal. 6:4.

Legan a babayuboan so balansin panmoria ed no antoy iilaloan tayo ed inkasikatayo, magmaliw tayon mas makonsidera ed saray agagi. Lapud amta tayo iray limitasyon da, lawas tayon pabpablien so nagagawaan da parad sikatayo. No ipapatnag tayoy apresasyon ed antokaman a tulong da, lalo itayon makapantutulongan tan makapantatalosan. (1 Ped. 3:8) Tandaan, si Jehova a maaron Ama et agton balot aanapen so mas nen say nasarag tayon iter ed sikato. Insan no walaan tayo na balanse iran iilaloan tan kalat a sarag tayon dampoten, saray espiritual ya aktibidad so lalon makapnek tan makapagayaga.

[Blurb ed pahina 29]

Pian nalikna tayo so liket tan inkapnek ed panaglingkor ed Dios, kaukolan a makatunongan iray iilaloan tayo ed inkasikatayo unong ed abilidad tan sirkumstansya tayo

[Litrato ed pahina 30]

Naliliketan si Nerlande lapud gagawaen toy nasarag to ed ministeryo

[Litrato ed pahina 31]

Aralen ya “umaney layag na bapor”

[Credit Line]

© Wave Royalty Free/age fotostock

[Litrato ed pahina 32]

Agunggonaan si Serge tan Agnès ed impangiletneg day balo iran kalat