Say Salita nen Jehova et Mabilay

Saray Pabitar ed Saray Libro a Corinto

MAPAGAN tuloy si apostol Pablo ed espiritualidad na saray walad kongregasyon na Corinto. Nadngelan ton agmanpapaknaan iray agagi ditan tan kokonsintien day imoralidad. Say kongregasyon et nansulat met ed si Pablo pian amtaen so pigaran bengatla. Kanian nen manga 55 C.E., sanen si Pablo et walad Efeso diad samay komatlon misionaryon kimey to, insulat toy unona ed duaran sulat to parad saray taga Corinto.

Samay komaduan sulat, a mapatnag a ginawa pigaran bulan labat ed saginonor et katuloyan na samay inmuna. Lapud ta saray kipapasen ed loob tan paway na kongregasyon na Corinto nen inmunan siglo et dakel so piparaan to ed kipapasen tayo natan, say mensahe na sulat nen Pablo et im-importante ed sikatayo.​—Heb. 4:12.

‘MANPUYAT, MANSIANSIA, OMBISKEG’

(1 Cor. 1:1–16:24)

“Sikayon amin salitaen yo so saksakey a bengatla,” so insimbawa nen Pablo. (1 Cor. 1:10) Ta ‘anggapo so arum ya angiletnegan [ed Kristiano iran kalidad] nen say si Kristo.’ (1 Cor. 3:11-13) Nipaakar ed samay milalawanan diad kongregasyon, inkuan nen Pablo: “Paekal yo sirin so mauges a too ed pegle’yo.” (1 Cor. 5:13) “Say laman ag-onkana ed lawanan,” so imbaga to, “balet onkana ed Katawan.”​—1 Cor. 6:13.

Bilang ebat ed “saray bengatla ya insulat [da],” angiter si Pablo na maabig tan praktikal a simbawa nipaakar ed panangasawa tan pansiansian marikit odino balolaki. (1 Cor. 7:1) Kayari ton kinomentoan so Kristianon inkaulo, say inkauksoy na saray Kristianon pantitipon, tan say inkapeteg na kikioli, imbaga nen Pablo iyan panamaseseg: “Manpuyat kayo, mansiansia kayo ed pananisia, manugali kayo na singa ugali laki, tan ombiskeg kayo.”​—1 Cor. 16:13.

Makasulatan Iran Tepet a Naebatan:

1:21​—Talaga kasin uusaren na Dios so “kakulangkulangan” pian iliktar iray mananisia? Andi. Balet, lapud ‘agbinidbir na mundo so Dios lapu ed kakabatan ton dili,’ singa sirin kakulangkulangan ed mundo so uusaren na Dios pian iliktar so totoo.​—Juan 17:25.

5:5​—Anto so kabaliksan na “yawat komon itan [a mauges] a too ed Satanas a kaderal na laman, pian say espiritu nilaban”? No say agmagbabawin nanggawa na graben kasalanan et inekal la ed kongregasyon, sikatoy kabiangan lamet na mauges a mundo nen Satanas. (1 Juan 5:19) Sirin, sikatoy nibagan  singa la niyawat ed si Satanas. Say impamataynan ed saman a too so nanresulta ed kaekal na mauges ya impluensya to ed kongregasyon, tan ed pansiansia na espiritu na kongregasyon.​—2 Tim. 4:22.

7:33, 34​—Anto so tutukoyen na balikas a “saray kayarian na mundo” a pampagaan na saray walaan na asawa? Tutukoyen nen Pablo iray bengatla a diad inagew-agew a bilay et nepeg a pampagaan na saray Kristianon walaay asawa. Kabiangan ed saraya so tagano, kawesen, tan panayaman, balet agkabiangan iray mauges a bengatla na sayan mundo ya ipupulisay na saray Kristiano.​—1 Juan 2:15-17.

11:26​—Nipaakar ed panagselebra ed impatey nen Jesus, walay sinalambit nen Pablo a “kapagno,” panon kabetbet itay “kapagno,” tan “angga ed” kapigan itan? Ibabaga nen Pablo a kapagno mibiang iray alanaan a Kristiano diad emblema na Memoryal, a maminsan ed sakey taon, salanti, kada Nisan 14, “ipakabat [da] so impatey na Katawan.” Gawaen da iya “angga ed isabi to,” salanti, anggad pangawat to ed sikara diad kioli ra’d tawen.​—1 Tes. 4:14-17.

13:13​—Diad anton dalan a say aro et babaleg nen say pananisia tan ilalo? No “saray bengatla ya iilaloan” tan ‘agpanduaruwaan’ et agawa la, say panisia tan panilalo ed saratan et ontunda la. (Heb. 11:1) Sirin, say aro et mas babaleg nen say pananisia tan ilalo ta mansiansia iya’d andi-anggaan.

15:29​—Anto so kabaliksan na pakabautismoan odino ‘pakabinyagan nipaakar ed saray inatey’? Aglabay ya ibaga nen Pablo a saray mabilay a totoo et manpabautismo parad saramay inatey ya ag-abautismoan. Say tutukoyen dia nen Pablo et say pakabautismoan na saray Kristianon alanaan na espiritu ed bilay a diad satan et nepeg dan pansiansiaen so katooran da anggad ipatey da tan ed kioli ra ed espiritun bilay.

Saray Leksion Parad Sikatayo:

1:26-31; 3:3-9; 4:7. No mapaabeba tayon iter ed si Jehova so dayew, aliwan diad inkasikatayo, iyaalibansa tayo so pankakasakey ed kongregasyon.

2:3-5. Legan na pampupulong to’d Corinto, say sentro na Griegon edukasyon tan pilosopiya, nayarin mapaga si Pablo no kasin nakombinsi to iray dumerengel to. Balet, agto inabuloyan a makaamper ed panumpal toy inter-Dios a ministeryo so kakapuyan odino takot a nayarin walad sikato. Ontan met, agtayo aabuloyan iray mairap a kipapasen odino balo iran situasyon a mamuger ed sikatayon mangipulong ed maong a balita nipaakar ed Panarian na Dios. Matalek itayon manpatulong ed si Jehova a singa ginawa nen Pablo.

2:16. Say pakawalaan na “kanonotan nen Kristo” et say pangamta tan pangalig ed paraan na panagnonot to, tan sigpot a pangabat ed personalidad to, tan pangalig ed ehemplo to. (1 Ped. 2:21; 4:1) Talagan importante ya aralen tayon maong so impanbilay tan ministeryo nen Jesus!

3:10-15; 4:17. Nepeg tayon analisaen tan paaligwasen so abilidad tayon manbangat tan manggaway babangatan. (Mat. 28:19, 20) No aliwan maabig so panagbangat tayo, nayarin agnatalonaan na iyaaralan tayo iray subok, tan nayarin makasagmak itayo na agaylan ot-ot ed pakaandi ra, a say kilalaban tayo et singa diad panamegley na “apoy.”

6:18. Pian ‘nibatikan tayo so lawanan,’ aliwa labat a saray gawa na por·neiʹa so paliisan tayo, noagta pati say pornograpiya, karutakan, seksual a panagpantasya, pigagantilan, salanti, antokaman a nayarin manresulta ed pilalawanan.​—Mat. 5:28; Sant. 3:17.

7:29. Say sanasawa so nepeg a manalwar, ya ag-alablabas ya akasentro so imano ra ed sakey tan sakey ya anggad punton magmamaliw labat lan segundaryo ed bilay da so kimey na Panarian.

10:8-11. Asaki-sakitan si Jehova sanen nantalabutob iray Israelita sumpad si Moises tan Aaron. Makabat no sigpot tayon paliisan so panagtalabutob.

16:2. Makapantultuloy itayon makapangiter na pinansyal a tulong parad iyaligwas na intereses na Panarian no ipaplano tayo itan a masakbay tan gawaen tayo ed sistematikon paraan.

 “ONYADYARI KAYO KOMON”

(2 Cor. 1:1–13:14)

Imbaga nen Pablo ed saray taga Corinto a nepeg dan “perdonaen tan ligliwaen” so nagbabawin nankasalanan, a binaat. Anggaman say inmunan sulat et amaermen ed sikara, imbalikas nen Pablo so liket to lapud say sengegan na ‘impanermen’ da et “panagsibkel.”​—2 Cor. 2:6, 7; 7:8, 9.

‘Lapud daakan ira ed ganagana,’ pinaseseg nen Pablo iray taga Corinto ya ‘ondaak ed grasya.’ Kayari ton inebatan iray sumusumpa, sikatoy angiter na kaunoran a simbawa parad amin: “Manliket kayo. Onyadyari kayo komon; manligliwa kayo; wala komoy saksakey a kaisipan yo; manbilay kayo ed kareenan.”​—2 Cor. 8:7; 13:11.

Makasulatan Iran Tepet a naebatan:

2:15, 16​—Diad anton pantalos a sikatayoy “makaroyroyon balingit nen Kristo”? Ontan itayo lapud tutumboken tayo so ibabaga na Biblia tan ipupulong tayo so mensahe na satan. Anggaman sayan “balingit” et nayarin aglabalabay na saray agmatunong a totoo, makaroyroyon balingit iya ed si Jehova tan ed saray masimoon a totoo.

5:16​—Panon a saray alanaan a Kristiano et “anggapo so amta [ra] a too unong ed laman”? Say rason et lapud agda nenengnengen iray totoo ed pisikal a paraan, salanti, ag-ira mangipapanengneng na paboritismo lapud kayamanan, rasa, odino etniko tan nasyon a nanlapuan. Say importante ed sikara et say espiritual a relasyon da ed saray kaagian da.

11:1, 16; 12:11​—Kasin agmakatunongan si Pablo ed saray taga Corinto? Andi, aliwan ontan. Balet parad arum, nayarin singa mapaatagey tan agmakatunongan si Pablo ed saray imbaga to sanen sikatoy apasootan a mangidepensa ed inka-apostol to.

12:1-4​—Siopa so “nitekkiab ed Paraiso”? Lapud anggapoy arum a toon tutukoyen na Biblia ya awalaan na ontan a pasingawey, tan satan a balikas nen Pablo et tinumbokan na impangidepensa to’d inka-apostol to, nayarin say isasalaysay to ed satan et say dilin eksperiensya to. Nayarin say nipasingawey ed apostol et say espiritual a paraison panggayagaan na Kristianon kongregasyon diad “panaon na kasumpalan.”​—Dan. 12:4.

Saray Leksion Parad Sikatayo:

3:5. Base’d prinsipyo, ibabaga na sayan bersikulo a pagmamaliwen nen Jehova a kualipikado ed ministeryo iray Kristiano panamegley na Salita to, masanton espiritu to, tan say organisasyon to diad dalin. (Juan 16:7; 2 Tim. 3:16, 17) Nepeg tayon seetan ya aralen so Biblia tan saray base’d Biblian publikasyon, ipikasin naynay so masanton espiritu, tan regular ya onatendi tan mibiang ed saray aral.​—Sal. 1:1-3; Luc. 11:10-13; Heb. 10:24, 25.

4:16. Lapud papasimbaloen nen Jehova so ‘inkatoo tayo ed inagew-agew,’ nepeg a regular tayon anamoten iray probisyon nen Jehova, a kabaliksan ton agtayo papaulyanan ya onlabas so sanagew ya anggapoy ginawa tayo pian napabiskeg so relasyon tayo ed Dios.

4:17, 18. No tandaan tayon ‘say ermen et anlemew tan maganggano’ labat, natulongan itayon manmatoor ed si Jehova anggan diad kairapan.

5:1-5. Talagan marakdakep so impangibalikas nen Pablo ed liknaan na saray alanaan a Kristiano nipaakar ed ilalo ran mangatatawen a bilay!

10:13. Bilang pangaligan, say pankimeyan tayo labat et diad teritorya na kongregasyon tayo, nilikud labat no walay espisipikon uksoyan ya ontulong itayo ed pasen a babaleg so pankaukolan.

13:5. Pian ‘nadalepdep tayo no wala itayo ed pananisia,’ nepeg tayon seguradoen a say kondukta tayo et mitunosan ed nanaaralan tayo’d Biblia. Pian ‘nasali tayoy inkasikatayon dili,’ nepeg tayon usisaen no panon kabiskeg so espiritualidad tayo, say abilidad tayon mangusar na “pakalikna [odino pakatebek]” tayo, tan say kalaknab na saray gawa tayo bilang panangipatnag na pananisia. (Heb. 5:14; Sant. 1:22-25) Diad pangiyaplika’d simbawa nen Pablo, makapantultuloy itayon makapanakar ed dalan na katuaan.

[Litrato ed pahina 26, 27]

Anto so kabaliksan na saray salitan “kapagno kanen yo so saya a tinapay, tan inuman yo so kopa”?​—1 Cor. 11:26