‘Say Dios, Sikato so Mamabaleg’!

“Say mantanem tan manalog andi gapo’ra, noag say Dios a sikato so mamabaleg.”​—1 COR. 3:7.

1. Diad anton kimey itayo nipasen a “kakimeyan na Dios”?

 “KAKIMEYAN na Dios.” Ontan so impaneskribe nen apostol Pablo ed pribilehyon sarag tayon amin a gamoran. (Basaen so 1 Corinto 3:5-9.) Say pribilehyon tutukoyen to et say kimey tayon manggaway babangatan, tan inkompara to itan ed panagtanem tan panagsalog na bukel. Pian ontalona tayo ed sayan importantin kimey, kaukolan tayo so tulong nen Jehova ta unong ya impanonot la nen Pablo ‘say Dios sikato so mamabaleg.’

2. Akin ya ontulong ed sikatayon nawalaan na dugan panmoria ed ministeryo tayo so katuaan a ‘say Dios, sikato so mamabaleg’?

² Sayan katuaan et ontulong ed sikatayon manpaabeba tan nawalaan na dugan panmoria ed ministeryo tayo. Nayarin makulikuli itayo ed panagpulong tan panangiyaral, balet diad kaunoran, sano walay nagmaliw a babangatan, say talagan nepeg a narayew et si Jehova. Akin? Lapud anggan antoy gawaen tayo, agtayo sigpot a naamtaan no panon a nagagawa itan, tan lalo lan agtayo itan kontrolado. Oniay matukotukoy ya impaneskribe nen Arin Solomon ed sayan kipapasen: “Agmo amta so gawa na Dios a sikato so manggawa ed amin.”​—Ecl. 11:5.

3. Anto so pamparaan na panagtanem na literal a bukel tan panaggaway babangatan?

³ Balet, kasin makapadismaya la so kimey tayo lapud agtayo sigpot a naamtaan no panon a magmamaliw a babangatan so sakey? Andi. Pagmaliwen ingen na satan a makapaliket tan makapainteres so kimey tayo. Oniay inkuan nen Arin Solomon: “Dia ed kabuasan itanem mo so binim, tan dia ed labi agmo ipiko so limam; ta agmo amta no anto so onaligwas, no saya kasi odino saman, no sikara kasi nampadpara naani a maong.” (Ecl. 11:6) No mangisibwag itayoy literal a bukel, agtayo amta no iner odino no kasin ontubo itan, ta dakel iray bengatlan agtayo kontrolado. Singa ontan met so panaggaway babangatan, unong ya ipapabitar nen Jesus ed duaran ilustrasyon to a nirekord ed komapat a kapitulo na Ebanghelyo nen Marcos. Imanoen tayo pa sirin no antoy naaralan tayo ed sarayan ilustrasyon.

Nanduruman Klase na Dalin

4, 5. Sumaryoen pa so ilustrasyon nen Jesus nipaakar ed sakey a toon nantanem diad impangisibwag toy bukebukel.

⁴ Diad Marcos 4:1-9, insalaysay nen Jesus so nipaakar ed sakey a toon nantanem, ya angisibwag na bukebukel a dinmadapo ed nanduruman pasen: “Dengel yo: Nia, say managtanem linma a mantanem: Et agawa, nen nantanem, arum a bukel dinmapo ed gilig na dalan, et saray manok ya atap linma ra tan sikatoy kinan da. Tan say arum dinmapo ed mabaton pasen, ya andian na dakel a dalin; et tampol, a tinmubo, lapu ed anggapoy aralem a dalin to. Et sanen tinmayagtag so banwa, sikatoy naldab; tan lapu ed anggapo so lamo’to sikatoy amagaan. Tan saray arum dinmapo ed leet na saray sabitan, et saray sabitan tinmubo ra et sikatoy tinabonan da, et sikatoy agnambunga. Tan saray arum dinmapo ed maong a dalin, et nambunga, a tinmutubo tan binmobuna; et nambunga, na santalomplo tan sanemaplo, tan tunggal-lasus.”

⁵ Nen panaon na Biblia, say panagtanem na bukel et kaslakan lan gagawaen panamegley na panagsibwag. Isibuwag na samay mantatanem iray bukebukel ya ingkuyabo to odino walad pananginan.  Kanian diad sayan ilustrasyon, agginagala na samay nantanem ya ilira iramay bukel ed espisipikon klase na dalin. Noagta, natural labat a nandurumay dapoan da lapud ta insibsibuwag iratan.

6. Panoy impangipaliwawa nen Jesus ed samay ilustrasyon nipaakar ed toon nantanem?

⁶ Agtayo la kaukolan ya isipen no antoy kabaliksan na sayan ilustrasyon. Lapud impaliwawa la tan nen Jesus a singa nirekord diad Marcos 4:14-20: “Say managtanem itanem to so salita. Et sikaraya so dinmapo ed gilig na dalan, a diman so nitaneman na salita, et sanen nadngel da tampol a linma si Satanas, tan inekal to so salita a nitanem ed sikara. Tan saraya ontan met sikaray nitanem ed saray mabato a paspasen, a sikara, nen nadngel da so salita, sikatoy inawat dan tampol a magayaga. Et anggapoy lamot da ed inkasikara, noag say manbilay iran maganggano; saman la, no say pakapairap ono pakapasegsegang so nagawa nisengeg ed salita, nitiror ira a tampol. Tan saray arum sikaray nitanem ed nanleleetan na saray sabitan; sikaraya so akadngel na salita. Et saray kapagaan na mundo, tan say panamalingo na saray kayamanan, tan saray pankaliket ed arum a bengabengatla ya onloob ed nonot, leneren da so salita, et sikatoy magmaliw ya agmanbunga. Tan saraya sikara so nitanem ed maong a dalin; saray ondengel na salita, et akoen da tan pabungaen da, na santalomplo, tan sananemaplo, tan tunggal-lasus.”

7. Anto so iyaaliling na samay bukel tan saramay nanduruman klase na dalin?

⁷ Imanoen pan ag-imbaga nen Jesus a nanduruman klase na bukel so nausar. Noagta, saksakey a klase na bukel so sinalambit to a dinmapo ed nanduruman klase na dalin, tan nandurumay nansumpalan to. Say unonan klase na dalin et anawet, odino apedper, samay komadua et atapew odino mabato; samay mikatlo et tinutuboan na saray sabitan; tan samay unor et maong odino mabunan dalin kanian mabunga. (Luc. 8:8) Anto ta’y iyaaliling na samay bukel? Iyaaliling toy mensahe na Panarian a naromog ed Salita na Dios. (Mat. 13:19) Komusta balet iramay nanduruman klase na dalin? Iyaaliling day totoon nandurumaay kipapasen na puso.​—Basaen so Lucas 8:12, 15.

8. (a) Siopa so iyaaliling na samay nantanem? (b) Akin et nanduruma so ikikiwas na saray totoo ed ipupulong tayon Panarian?

⁸ Siopa so iyaaliling na samay nantanem? Iyaaliling to iray kakimeyan na Dios, saramay mangiyaabawag ed maong a balita na Panarian. Saraya so mantatanem tan mansasalog na bukel, a singa di Pablo tan Apolos. Balet, anggano pinasyay pansagpot da, siansia nin agmanpaparay resulta na saratan. Akin? Lapud nandurumay kipapasey puso na saramay makadngel na mensahe. Diad samay ilustrasyon, anggapo’d kontrol na samay nantanen so pansumpalan na intanem to. Talagan baleg a ligliwa iya, nagkalalo la ed saramay matoor ya agagin dakel lan taon a mankikimey, say arum et piga-pigamplon taon ni ingen,  balet ta ngalngali anggapoy nanengneng dan resulta! * Akin?

9. Anton makapaligliwan katuaan so parehon indanet nen apostol Pablo tan Jesus?

⁹ Aliwan say resulta na kimey na samay mantatanem so pakasukatay katooran to. Ontan so walad kanonotan nen Pablo sanen inkuan to: “Balang sakey awaten to so upa ton dili ya unong na sagpo’to.” (1 Cor. 3:8) Say upa odino tumang sirin et ag-akadepende ed resulta na samay sagpot, noagta diad samay mismon sagpot. Ontan met so indanet nen Jesus kapawil na saramay babangatan ton nampulong. Diad saman et malikeliket ira ta akapapaway ira na saray demonyo diad impangusar day ngaran nen Jesus. Balet, anggaman talagan makapaliket itan, oniay inkuan nen Jesus ed sikara: “Agkayo manliket nisengeg ed saya, a saray espiritu ontulok ira ed sikayo; manliket kayo ingen ta saray ngaran yo nisulat ira ed tawen.” (Luc. 10:17-20) No say impantanem na sakey a manangipalapag et agnanresulta ed dakel a babangatan, agto labay ya ibagan sikatoy onkukulang la’d kuli odino pananisia kompara ed arum. Lapud ta say sakey lantin manunan akadependian na resulta et say kipapasen na puso na samay akadngel. Balet diad kaunoran, say talagan mamapabaleg ed satan et say Dios!

Say Responsabilidad na Saramay Akadngel ed Salita

10. Iner akadepende so pagmaliw odino agpagmaliw a singa mabunan dalin na sakey ya indibidual ya akadngel ed salita?

¹⁰ Komusta balet iramay akadngel ed salita? Nigeter la kasi no panoy ikiwas da? Andi. Depende ed sikara’tan no magmaliw iran singa samay mabunan dalin odino andi. Diad tua, say kipapasen na puso na sakey a too et nayarin magmaliw a maabig odino mauges. (Roma 6:17) Diad samay ilustrasyon nen Jesus, inkuan ton, “sanen nadngel” na arum so salita, sinmabi Satanas tan inekal to itan. Balet, agkabaliksan na sayan agla itan napaliisan. Diad Santiago 4:7 et pinaseseg iray Kristiano a ‘sumpaen day Diablo,’ pian taynan to ra. Inkuan met nen Jesus a walaray diad primero et maliket ya angawat ed salita balet ta atiror lapud “anggapoy lamot da ed inkasikara.” Ingen, saray lingkor na Dios et nasisimbawan ‘onlamot tan ompasen ed aro’ pian narandan da so ‘kaawang tan karukey tan kaatagey tan kaaralem [na katuaan], tan naamtaan day aro nen Kristo a manalonggaring ed kakabatan.’​—Efe. 3:17-19; Col. 2:6, 7.

11. Antoy gawaen na sakey pian say salita et agnalener na saray kapagaan tan kayamanan na sayan mundo?

¹¹ Nikuan ya inabuloyan na saramay arum ya akadngel ed salita a looban tan leneren na “kapagaan na mundo, tan say panamalingo na saray kayamanan” so salita. (1 Tim. 6:9, 10) Panon da komon ya apaliisan itan? Oniay inkuan nen Pablo: “Nabulos kayo komon a manlapu ed aro na pilak, panliketan yo so bengatla a wala ed sikayo: ta sikaton dili imbaga to: Agtaka naani taynan, tan agtaka naani ikaindan.”​—Heb. 13:5.

12. Akin et nandurumay karakel na bunga na saramay iyaaliling na mabunan dalin?

¹² Kaunoran, inkuan nen Jesus a saramay nitanem ed maong a dalin et ‘nambunga na santalomplo, tan sananemaplo, tan tunggal-lasus.’ Anggaman say arum a kinmiwas ed salita et walaan na maabig a kipapasen na puso tan nambunga, nanduruma so nagawaan da ed panangipulong ed maong a balita, depende ed saray sirkumstansya ra. Alimbawa, nayarin nalimitaan so arum ed pibibiang da’d panagpulong lapud itatatken odino makapakapuy a sakit. (Ikompara so Marcos 12:43, 44.) Singa nibaga la, ag-itan kontrolado na samay nantanem, balet ta sikatoy manliket no nanengneng ton papabalegen odino papaaligwasen itan nen Jehova.​—Basaen so Salmo 126:5, 6.

Naugip Imay Nantanem

13, 14. (a) Sumaryoen pa so ilustrasyon nen Jesus nipaakar ed toon angisibwag na bukel. (b) Siopa so iyaaliling to imay nantanem, tan anto so iyaaliling na samay bukel?

¹³ Diad Marcos 4:26-29, walay sananey nin ilustrasyon nipaakar ed sakey a toon nantanem: “Onia so panariay Dios, singano say sakey a too  mangipopor [“angisibwag,” NW] na bukel ed dalin. Tan naugip tan ombangon ed labi tan agew, et say bukel onsulming, tan ontubo, sikato agto amta no panon. Say dalin mamabunga ed sikaton dili, unona say tangkay, insan say eba, insan say balibal a napnoy bukel na mais. Balet sano aloto so bunga, tampol a ’yan to so kompay, ta asabi lay panagani.”

¹⁴ Siopa iyay nantanem? Panisiaan na arum a membroy Kakristianoan a si Jesus so tutukoyen na saya. Balet, nayari tayo kasin ibaga a si Jesus et naugip tan agto amta no panoy intubo na samay bukel? Seguradon andi! Sirin, singa nibaga la, iyaaliling na sayan nantanem so indibidual iran manangipalapag na Panarian, saramay mantatanem na bukel na Panarian diad maseseg a panagpulong da. Samay bukel ya insibwag da et sikato ‘may salitan ipupulong da. *

15, 16. Anton katuaan nipaakar ed literal tan espiritual ya iyaaligwas so indanet nen Jesus ed ilustrasyon to nipaakar ed managtanem?

¹⁵ Inkuan nen Jesus a samay nantanem et “naugip tan ombangon ed labi tan agew.” Agkabaliksan na saya a mapaulyan imay nantanem. Noagta, ipapanengneng labat na satan so normal a rotinay bilay na kaslakan a totoo. Saray salitan nausar ed sayan bersikulo et manutukoy ed tuloy-tuloy a pankikimey to ed agew tan iyuugip to ed labi. Impaliwawa nen Jesus no antoy agawa legan na satan. Inkuan ton: “Say bukel onsulming, tan ontubo.” Insan to inyarum: “Sikato agto amta no panon.” Say nidanet et ontutubo imay bukel “ed sikaton dili.” *

¹⁶ Anto sirin so ipapabitar nen Jesus dia? Imanoen pan say nidanet et say ibabaleg na bukel tan say kalkalnan inkagawa na satan. “Say dalin mamabunga ed sikaton dili, unona say tangkay, insan say eba, insan say balibal a napnoy bukel na mais.” (Mar. 4:28) Say imbaleg na satan et aliwan biglaan, noagta kalkalna. Ag-itan napasoot odino naapura. Ontan to met ed espiritual ya iyaaligwas. Kalkalna met itan legan ya aabuloyan nen Jehova ya ombaleg so katuaan ed sakey a puson mangawat.​—Gawa 13:48; Heb. 6:1.

17. Sioparay manggayaga sano nambunga so bukel na katuaan?

¹⁷ Panon balet a makapibiang a “tampol” ed panagani imay nantanem ‘sano aluto la so bunga’? Sano papabalegen nen Jehova so katuaan na Panarian ed puso na saray balon babangatan,  nasabisabi punton pakiwasen laray panangaro ed Dios pian idedikay bilay da ed sikato. Tan isimbolo da itan diad pampabautismo ra. Saramay agagin lalaki a mantutultuloy ya onaaligwas et kalkalnan makakadampot na saray responsabilidad ed kongregasyon. Kanian, say bungay Panarian et namparan anien na samay orihinal a nantanem, tan saray arum niran manangipalapag a nayarin ag-aktual ya akibiang ed impangitanem na samay bukel a nanresulta ed sayan partikular a babangatan. (Basaen so Juan 4:36-38.) On, “say mantanem tan say manani [et parehon] makapanggayaga.”

Saray Leksion ed Sikatayo

18, 19. (a) Panon ya amaseseg ed sikan mismo so impanrepaso tayo ed saray ilustrasyon nen Jesus? (b) Anto so aralen ed ontumbok ya artikulo?

¹⁸ Anto so naaralan tayo ed impanrepaso ed sarayan duaran ilustrasyon a nirekord ed Marcos kapitulo 4? Malinlinew a walay kimey a nepeg tayon sumpalen, salanti, panagtanem. Nepeg ya agtayon balot aabuloyan iray antokaman a baraan tan problema a mamatunda ed sikatayo. (Ecl. 11:4) Balet, agtayo met lilingwanan a nibilang itayon kakimeyan na Dios, tan alay-abig iyan pribilehyo. Si Jehova so sengegan na pagmamaliw na saray totoo a babangatan, diad pamebendisyon to ed sagpot tayo tan ed sagpot na saramay mangawat ed mensahe. Amta tayon agtayo nayarin pasooten so siopaman ya onaligwas ed espiritual. Tan nepeg ya agtayo met nadidismaya odino onkakapuy no matayam odino ngalngali anggapoy nanengneng tayon aaligwasan da. Talagan makapaligliwan naamtaan a say pakasukatay inkatalona tayo et say katooran tayo ed si Jehova tan ed inter ton pribilehyo a pangipulong na “ebanghelyo na panarian . . . ya onkanan pamintuaan ed saray amin a nasyones.”​—Mat. 24:14.

¹⁹ Anto ni so imbangat nen Jesus ed sikatayo nipaakar ed iyaaligwas na sakey a balon babangatan tan ed kimey na Panarian? Say ebat et walad arum ya ilustrasyon ya akarekord ed Ebanghelyo. Aralen tayoy pigara ed saraya diad onsublay ya artikulo.

[Saray paimano ed leksab]

Natandaan Yo Kasi?

• Anto so pigaran pamparaan na panagtanem na literal a bukel tan panangipulong ed mensahe na Panarian?

• Antoy panusukatan nen Jehova ed katooran na saray manangipulong ed Panarian?

• Anto so indanet nen Jesus a pamparaan na literal tan espiritual ya iyaaligwas?

• Panon a namparan ‘manggayaga imay nantanem tan managani’?

[Tepetepet Parad Panagaral]

[Saray litrato ed pahina 13]

Akin et inkompara nen Jesus so managpulong na Panariay Dios ed mantatanem na bukel?

[Saray litrato ed pahina 15]

Saramay iyaaliling na mabunan dalin et sigpot-puson mibibiang ed panangipulong na Panarian unong ed saray sirkumstansya ra

[Saray litrato ed pahina 16]

Say Dios, sikato so mamapabaleg