Talonaan Iray Subok ed Panagkabkaabungan
Talonaan Iray Subok ed Panagkabkaabungan
‘Apabayani [“nampakpel,” NW] kami diad panamegley na Dios tayo a mangisalita ed sikayo na ebanghelyo na Dios ed dakel a sumpaan.’—1 TES. 2:2.
1. Antoray subok ed si Jeremias, tan panon ton atalonaan iratan?
SI Jeremias et toon walay liknaan a singa sikatayo. Sanen impaamta nen Jehova ed sikato so kimey ton magmaliw a “propeta ed saray nasyon,” oniay inkuan to: “O, Katawan a Jehova! Nia, agko amta so mansalita; ta ugaw ak.” Anggaman ontan, lapud manmamatalek ed Jehova, inawat to so asainmin. (Jer. 1:4-10) Diad masulok ya 40 taon, si Jeremias so imbaliwala, impulisay, binalaw, tan kinabil ni ingen. (Jer. 20:1, 2) No maminsan et labay to lay onsuko. Balet, nanseetan ton impulong so mensahen aglabay a dengelen na karaklan. Diad pakayari na Dios, asumpal nen Jeremias imay kimey ya agton balot nagawaan no sikaton bukor lambengat.—Basaen so Jeremias 20:7-9.
2, 3. Panon a nasusubok iray lingkor na Dios natan a singa met ed naeksperiensya nen Jeremias?
2 Nalilikna met na dakel ed saray lingkor na Dios natan so alikna nen Jeremias. Sanen nononoten tayo nensaman so nipaakar ed panagkabkaabungan, arum ed sikatayo so angikuan: ‘Satan so agkon balot nagawaan.’ Balet, nen amoria tayon gagala manaya nen Jehova ya iyabawag so maong a balita, nampakpel itayo tan nagmaliw ya okupado ed panagpulong. Anggaman ontan, lapud saray nagagawa ed bilay tayo, no maminsan et naiirapan so dakel ed sikatayon makapantultuloy a manpulong. Tua, mairap so pangigapo na panagpulong ed kaabungan tan say pangitultuloy ed saya anggad kasampotan.—Mat. 24:13.
3 Panon to no iyaaralan ka la na Biblia na saray Tasi nen Jehova tan medyo abayag ka met lan onaatendi ed saray pantitipon na kongregasyon, balet ta masuyat kan onggapon mankabkaabungan? Odino panon to no abautismoan ka la, ingen ipapasen mon mairap so mankabkaabungan anggaman sarag met na laman mo a gawaen itan? Makaseguro ka ya amin a lingkor na Dios, antokaman so kipapasen da, et natatalonaan da ray subok ed panagkabkaabungan. Diad tulong nen Jehova et nasarag mo met itan.
Manpakpel
4. Anto so akatulong ed si apostol Pablo pian makapanpakpel a mangipulong ed maong a balita?
4 Seguradon onabobon ka a say panagpulong a kimey ed interon mundo et nagagawa, aliwan diad panamegley na pakayari odino karunongan na too, noag diad panamegley na espiritu na Dios. (Zac. 4:6) Nibaga met so ontan no nipaakar ed ministeryo na balang Kristiano. (2 Cor. 4:7) Alimbawa, isipen pay apostol Pablo. Legan ton nononoten imay panaon sanen sikato tan say kaiba ton misionero so pinairap na saray onsusumpa, oniay insulat to: ‘Nantepel kami nensaman, tan makapabaing so impakapairap mi ed Filipo, . . . apabayani [“nampakpel,” NW] kami diad panamegley na Dios tayo a mangisalita ed sikayo na ebanghelyo na Dios ed dakel a sumpaan.’ (1 Tes. 2:2; Gawa 16:22-24) Nayarin agtayo inilaloan a say maseseg a managpulong a si Pablo et walaray panaon a nairapan met a nampulong. Ingen ta singa sikatayo, kaukolan nen Pablo so manmatalek ed si Jehova pian makapanpakpel a mangipulong ed maong a balita. (Basaen so Efeso 6:18-20.) Panon tayon naalig so alimbawa nen Pablo?
5. Anto so sakey a paraan pian makapanpakpel tayon manpulong?
5 Say sakey a paraan pian makapanpakpel itayon manpulong et panamegley na pikakasi. Inkuan na sakey a payunir: “Ipipikasik a makapansalita ak komon a walaay kompiyansa, komon ta nasabik so kapusoan na totoo, tan komon ta panliketan koy ministeryok. Diad tua, agtayo iya kimey, noagta kimey nen Jehova, kanian anggapoy nagawaan tayo no anggapoy tulong to.” (1 Tes. 5:17) Nakaukolan tayon amin so pantultuloy a pampikasi, a kerewen so tulong na masanton espiritu na Dios pian makapanpakpel a manpulong.—Luc. 11:9-13.
6, 7. (a) Anton pasingawey so naawat nen Ezequiel, tan antoy kabaliksan na satan? (b) Anton leksion so naaralan na saray lingkor na Dios natan ed pasingawey nen Ezequiel?
6 Wala ni imparungtal ed libron Ezequiel a makatulong ed sikatayo a mansalitan makpel. Diad sakey a pasingawey, inikdan nen Jehova si Ezequiel na lukot a diad biek tan biek et akasulat iray “tagleey, tan agogol, tan ey-ey.” Nepeg ton kanen itan, ta oniay inkuan nen Jehova ed sikato: “Anak na too, gawaen mo a say eges mo mangan komon, tan peselen mo ray pait mo ed saya a lukot ya iter ko ed sika.” Antoy kabaliksan na sayan pasingawey? Kaukolan a talo-talosan nen Ezequiel so mensahen ipulong to. Aliling toy magmaliw itan a kabiangan nen Ezequiel, a mangapekta’d utel na puso to. Oniay impangituloy na propeta: “Saman sikato so kinan ko, et wala ed sangik a singa dilo so samit to.” Parad si Ezequiel, say pangiyabawag na mensahe na Dios ed publiko et agusgustoan to, a singa kasamit na dilo. Impasen ton baleg a pribilehyo so pangirepresenta ed si Jehova tan panumpal ed sayan asainmin a nanlapud Dios, anggaman say pangipasabian to na mapuersan mensahe et saray totoon ag-ondengel.—Basaen so Ezequiel 2:8–3:4, 7-9.
7 Walay importantin leksion a naaralan na saray lingkor na Dios natan ed sayan pasingawey. Natan, ipupulong tayo met so mapuersan mensahe anggaman karaklan a totoo et agmangaapresya ed sagpot tayo. Pian napansiansia tayo so panmoria a say ministeryo et pribilehyon inter na Dios, kaukolan a pansiansiaen tayon mabunigas so espiritualidad tayo. Agmagenap so ataptapew odino aliwan regular a panagaral, ta no ontan, agtayo sigpot a natalosan so Salita na Dios. Kasin napaaligwas mo ni so kalidad na personal a panagbasam tan panagaral mo na Biblia? Odino napagmaliw mo kasin regular itan? Kasin nagawaan mon mas mabetbet so pandalepdep mo ed saray nababasam?—Sal. 1:2, 3.
Pangigapo na Saray Tongtongan Nipaakar ed Biblia
8. Diad panagkabkaabungan, antoran paraan so akatulong ed arum a manangipalapag na Panarian pian nigapo so tongtongan nipaakar ed Biblia?
8 Parad dakel a manangipalapag, say sankairapan a parte na panagkabkaabungan et say pangigapo na pitotongtong ed akan-abung. Tua, diad arum a teritorya et aliwan mainomay so pangigapo na tongtongan. Arum a manangipalapag so mas naiinomayan a mitongtong ed saray akan-abung no gapoan day presentasyon da panamegley na antikey labat tan apili-pili iran balikas. Insan ira mangiter na tract, unong a nidatak ed katekep a kahon. Say paulo na tract odino say makolor a litrato na satan so nayarin managyat ed imano na akan-abung, diad ontan et nibaga tayon magano so gagala na imbisita tayo insan itayo mantepet. Sakey nin paraan et ipanengneng ed akan-abung so talora odino apatiran nanduruma a tract insan pampilien no dinay labay to. Siempre, say kalat tayo et aliwa labat lan mangipalima odino mangusar na tract ed kada nakatongtong tayo, noagta pian nigapo so tongtongan nipaakar ed Biblia a manresulta ed panangiyaral na Biblia.
9. Akin et importante so maabig a preparasyon?
9 Antokaman so usaren mon metodo, makatulong ed sika so maabig a preparasyon pian nawalaan kay kompiyansa tan inkaligsa sano mankakabkaabungan. Oniay naimano na sakey a payunir: “Mas maliket ak no akaparaan ak, ta labalabay kon usaren so presentasyon ya imparaan ko.” Imbaga met na sakey nin payunir: “Sano kabisadok so publikasyon ya iyopresik, agaylay ligsak a mangiyopresi ed saratan.” Anggaman walay pigaran gunggona no molimolien mo labat so ibagam, nalmoan na dakel a mas natulongan ira no ipasal dan maksil so presentasyon da. Diad panggawa na ontan, natutulongan iran niiter ed si Jehova so sankaabigan da.—Col. 3:23; 2 Tim. 2:15.
10. Anto so nagawaan pian magmaliw a praktikal tan makagunggona iray pantitipon parad lawak na kimeyan?
10 Saray praktikal a pantitipon parad lawak na kimeyan so makatulong pian magmaliw itayon epektibo tan maliket ed panagkabkaabungan. Sano say inagew-agew a teksto et direktan onaplika ed panagpulong a kimey, nayarin basaen itan tan pantongtongan a magano. Balet, say agin mangidadaulo na pantitipon parad lawak na kimeyan et kaukolan a mangigana na magenap a panaon pian pantongtongan odino idemostra so sakey a simplin presentasyon a matukoy ed teritorya odino mangiter na arum nin praktikal ya impormasyon a nausar ed ministeryo ed satan ya agew. Saya so mas makatulong ed saray agagi pian epektibon makapantasi. No walay maabig tan masakbay a preparasyon na saray mamatatken tan arum nin mangidadaulo, nagawaan iya tan siansia nin ag-onlampas ed oras.—Roma 12:8.
No Antoy Nagawaan na Idengel
11, 12. Panon a say talagan idengel tan pililikna so ontulong pian napasabian iray totoo na maong a balita? Mangiter na saray alimbawa.
11 Pian nigapo so tongtongan nipaakar ed Biblia tan nasabi so puso na totoo ed ministeryo, aliwa labat lan say maabig a preparasyon so makatulong noagta say pangipatnag a talagan interesado itayo ed arum. Say sakey a paraan pian nipatnag iya et say idengel ed sikara. Oniay naobserbaan na sakey ya ombiabiahen manangasikaso: “Sano maanos tan mabulos tayon dengelen iray totoo, nasasagyat ira ed maong a balita tan alay abig iyan pakapatnagan a talagan interesado tayo ed sikara.” No talagan ondengel tayo tan milikna itayo ed akan-abung, nayarin napakiwas iran ondengel ed mensahe tayo, a singa ipapanengneng na ontumbok ya eksperiensya.
12 Diad sakey a sulat ya impalapag ed peryodiko a Le Progrès diad Saint-Étienne, Pransya, deneskribe na sakey a bii so imbisita na duaran totoo ed abung to, ag-abayag kayari na makapabiglan impatey na taloy bulan ya anak ton bii. “Abidbir kon tampol a Tasi nen Jehova ira,” so insulat to. “Sanen paalisen ko la ra komon, naimanok so sakey a brosyur ya iyoopresi da. Nipaakar itan ed no akin ya aabuloyan na Dios so paniirap. Kanian, pinaloob ko ra ta say intension ko et suppiaten iray argumento ra. . . . Masulok a sakey oras da’d abung. Agaylay anos dan dinmengel ed siak, et nen onalis la ra, talagan alemewan ak la kanian inmabobon ak ed ontumbok ya ibisita ra.” (Roma 12:15) Ag-abayag, impaiyaralan na Biblia so bii. Ipaparungtal na sayan eksperiensya a say atandaan na bii ed samay unaan ya imbisita na saray Tasi et aliwan say imbaga ra, noagta say indengel da.
13. Panon tayon nitukoy so presentasyon tayo ed saray indibidual a nakakatongtong tayo?
13 Sano ondengel tan milikna itayo ed saray totoo, aliling toy aabuloyan tayo ran mangibaga’d sikatayo no akin a kaukolan day Panarian. No ontan et mainomay tayon inabang ed sikara so maong a balita. Nayarin naimanom a saray epektibon manangipulong et kaslakan a maong ya ondengel. (Uli. 20:5) Ipapanengneng da a talagan interesado ira’d totoon nakakatongtong da ed ministeryo. Agda labat ililista so kangaranan tan panaayaman na saray akan-abung noagta iimanoen da iray paniinteresan tan pankaukolan na totoo. Sano walay mangibalikas na kapapagaan to, mansukimat ira insan ira ompawil pian inabang so naamtaan da. Singa si apostol Pablo, say presentasyon da ed mensahe na Panarian et itutukoy da ed saray nakakatongtong da. (Basaen so 1 Corinto 9:19-23.) Lapud satan a panangipatnag na masimoon ya interes, nasasagyat iray totoo ed maong a balita tan satan et alay abig a mangipapatnag ed “matamoy a panangasi Dios tayo.”—Luc. 1:78.
Pansiansiaen so Positibon Panmoria
14. Legan tayon susumpalen so ministeryo tayo, panon tayon nipatnag iray kalidad nen Jehova?
14 Impanengneng nen Jehova a papablien to itayo sanen inikdan to itayo na bulos a panagdesisyon. Anggaman sikatoy Makapanyarin-amin a Dios, agto pipiliten iray totoo a manlingkor ed sikato noagta papakiwasen to ra base ed aro, tan bebendisyonan to iramay mangaapresya ed saray alay abig a probisyon to. (Roma 2:4) Bilang miministro to, kapagno manpupulong itayo et nepeg ya akaparaan itayon mangipresenta ed maong a balita diad paraan a nipatnag tayoy panangasi na Dios. (2 Cor. 5:20, 21; 6:3-6) Pian nagawaan itan, kaukolan tayon pansiansiaen so positibon panmoria ed saray totoo ed teritorya tayo. Anto so makatulong ed sikatayo pian natalonaan iyan angat?
15. (a) Anto so imbilin nen Jesus a gawaen na saray apostol to no walaray agmangawat na mensahe? (b) Anto so makatulong pian nisentro so imano tayo ed pananap ed makanepegan iran totoo?
15 Binilin nen Jesus iray papatumbok to ya agda la masyadon iimanoen no walaray agmangawat na mensahe, imbes et isentro day imano ra ed pananap na saray makana odino makanepegan a totoo. (Basaen so Mateo 10:11-15.) Pian posible iya, makatulong ed sika so panggawa na simpli tan mainomay a nadampot a kalat. Inyaliling na sakey ya agi so inkasikato ed sakey a minero. Oniay ibabaga to ed inkasikato: “Komon ta makaromog ak na balitok ed sayan agew.” Kalat met na sakey nin agi a “kada simba et makaromog na sakey ya interesadon too tan pawilen to kalabas na pigaran agew pian nabayuboan so interes to.” Arum a manangipalapag so manggugunaet a mangibasa na anggan sakey a teksto ed kada akan-abung no posible. Anton makatunongan a kalat so nayarian mon dampoten parad inkasika?
16. Antoray rason no akin a mantutultuloy itayon manpupulong?
16 Say itatalona na panagkabkaabungan a ministeryo et aglabat akadepende ed reaksion na totoo ed teritorya. Tua, importante so panagpulong pian niliktar iray matuan-impanpuso, balet wala ni arum a gagala na saya. Mangiiter iya na pankanawnawa pian nipatnag tayo so panangaro tayo ed si Jehova. (1 Juan 5:3) Makatulong iya pian ag-itayo mankasalanan ed dala. (Gawa 20:26, 27) Lapud saya et napapasakbayan iray mauges a “say oras na pangukom [na Dios] sinmabi la.” (Apo. 14:6, 7) Manuna ed amin, panamegley na panagpulong ed maong a balita et nirayew so ngaran nen Jehova ed interon mundo. (Sal. 113:3) Kanian, ondengel man odino andi iray totoo, nepeg tayon iyabawag so mensahe na Panarian. On, amin a pansasagpot tayon ipulong so maong a balita et marakdakep ed pakanengneng nen Jehova.—Roma 10:13-15.
17. Anto so magano lan napilitan a bidbiren na totoo?
17 Anggaman dakel natan so mangibabaliwala ed panagpulong tayo, magano lan manguman so panmoria ra. (Mat. 24:37-39) Impaseguro nen Jehova ed si Ezequiel a sano nagawa iray inyabawag ton panangukom, say rebelyoson sankaabungan na Israel et ‘naamtaan da naani a wala nensaman so propeta ed sikara.’ (Eze. 2:5) Mipadpara, sano ipaakseb la na Dios so panangukom to ed sayan sistema na bengabengatla, napilitan iray totoo a mamidbir a say mensahen impulong na saray Tasi nen Jehova ed publiko tan diad kaabungan et talagan nanlapud saksakey a tuan Dios, a si Jehova, tan saray Tasi et peteg a nanlingkor bilang representanti to. Baleg a pribilehyo tayon akbibiten so ngaran to tan iyabawag so mensahe to ed sarayan importantin panaon! Diad tulong to, komon ta itultuloy tayon talonaan iray subok ed panagkabkaabungan.
Anto so Ebat Mo?
• Panon itayon makapanpakpel a manpulong?
• Anto so makatulong ed sikatayon makapangigapo na saray tongtongan nipaakar ed Biblia diad panagkabkaabungan?
• Panon tayon nipatnag a talagan interesado itayo ed arum?
• Anto so makatulong ed sikatayon napansiansia so positibon panmoria ed saray totoo ed teritorya tayo?
[Tepetepet Parad Panagaral]
[Kahon/Litrato ed pahina 9]
Sakey a Paraan Pian Nigapo Iray Tongtongan Nipaakar ed Biblia
Pian makapangigapo:
◼ Kayarim ya ibano so akan-abung, nayarin ikdan mo na tract tan ibaga, “Linma ak dia ta labay kon inabang ed sikayo so balibali tan importantin mensahe.”
◼ Odino nayarin iyopresim so sakey a tract tan ibaga, “Binmisita ak a magano natan ta labay kon naamtaan no antoy nikuan yo ed saya.”
No inawat na akan-abung so tract:
◼ Ontundan magano, insan tepetan so akan-abung no antoy nikuan to ed paulo na tract.
◼ Ondengel a maong ed akan-abung pian natalosan iray panmoria to. Misalamat ed saray komento to tan ikonsidera iratan legan na tongtongan.
Pian nituloy so tongtongan:
◼ Basaen tan ipaliwawa so sakey odino pigaran teksto, insan itukoy so presentasyon mo unong ed saray interes tan pankaukolan na akan-abung.
◼ No interesado so katongtong mo, opresian na literatura tan idemostra so panagaral na Biblia no posible. Iyuksoy so ipawil.