Igloriay Jehova Diad Pagmaliw a Kagalgalang

“Say gawa [nen Jehova] galgalangen tan katagyan.”​—SAL. 111:3.

1, 2. (a) Antoy nikuan mon kabaliksan na “kagalangan”? (b) Antoran tepet so pantongtongan tayo ed sayan artikulo?

 SANEN atepetan so sakey a samploy taon ya ugaw a manngaran na Madison no antoy pakatalos to ed “kagalgalang,” say tampol ya ebat to et samay “akasulong na desente.” Say ag-amta na sayan ugaw et diad Biblia, say Dios et nikuan ya ‘akawesan na kagalangan.’ (Sal. 104:1) Diad sikatayo ran totoo, no maminsan et say kabaliksan na pagmaliw a kagalgalang et say pankawes na desente. Alimbawa, binilin nen apostol Pablo iray Kristianon bibii a “manpales ira [komon] na masimpit, a manparakep ira na mabinta tan madangka; aleg ed saray buek a nilaga, tan balitok odino perlas odino kawes ya angkabli.” (1 Tim. 2:9) Balet, say kagalgalang a konduktan makapangitandoro ed ‘kagalangan tan katagyan’ nen Jehova et aliwa labat ya ontan so lalanoren to.​—Sal. 111:3.

² Diad Biblia, say Hebreon salita parad “kagalangan” et nayari met ya ipatalos a “katagyan,” “kablian,” “gloria,” tan “galang.” Unong ed sakey a diksionaryo, say “kagalangan” et mankabaliksan na “pagmaliw a papablien, rerespetoen, odino dederlengen.” Siempre, anggapo lay arum a makanepegan na babaleg nin panamagalang tan panamabli nen say si Jehova. Kanian, bilang dedikado iran lingkor to, nepeg a mansalita tan onkiwas tayo diad paraan a kigalangan to. Balet, akin a nibaga tayon sarag na saray totoo so onkiwas ed paraan a kagalgalang odino walaan na dignidad? Panon a nipabitar so kagalangan tan katagyan nen Jehova? Anto so nepeg ya epekto ed sikatayo na kagalangan tan katagyan nen Jehova? Anto so naaralan tayo ed kinen Jesu-Kristo nipaakar ed panangipatnag na kagalangan? Tan panon itayon makapandayew ed Dios diad paraan a kagalgalang odino walaan na dignidad?

No Akin a Sarag Tayoy Onkiwas Diad Kagalgalang a Paraan

3, 4. (a) Panon tayon balesen so nipagamor ed sikatayon kagalangan? (b) Siopa so tutukoyen na propesiyan nirekord ed Salmo 8:5-9? (Nengnengen so paimano’d leksab.) (c) Nensaman, sioparay pinagamoran nen Jehova na kagalangan?

³ Amin a too et ginawa ed indengan na Dios, kanian sarag da so onkiwas diad kagalgalang a paraan. Pinagamoran nen Jehova na kagalangan so inmunan too sanen impudir To ed sikatoy pangasikaso ed dalin. (Gen. 1:26, 27) Anggan sanen nagmaliw lan makasalanan iray totoo, siansia nin ag-inekal nen Jehova itan a kagalangan a ‘pinagka-balanget’ da lapud imbaga to lamet so nipaakar ed satan a responsabilidad na too. (Basaen so Salmo 8:5-9.) * Sayan niiter ed sikatayon kagalangan et nepeg tayon balesen ed kagalgalang a paraan, panamegley na pangidayew tayo’d maglorian ngaran nen Jehova tekep na baleg a respeto tan panamagalang.

⁴ Lautlan papagamoran nen Jehova na kagalangan  iramay mangisasaklang ed sikato na sagradon panaglingkor. Alimbawa, pinagamoran nen Jehova na kagalangan si Abel diad impangawat To’d bagat to, bangta impulisay To so apay nen Cain. (Gen. 4:4, 5) Si Moises et niganggan met a ‘mangipasen na kagalangan to’ ed si Josue, say onsublay ed sikaton lider na Israel. (Num. 27:20) Tan oniay inkuan na Biblia nipaakar ed anak nen David a si Solomon: “Si Jehova impatagey to si Solomon ya alablabas dia ed pakanengneng na amin ya Israel, tan inkawes to ed sikato so ontan a maari ya inkatagey [odino kagalangan] a singa anggapo nen saman so arum ya ari ed unaan to ed Israel.” (1 Awa. 29:25) Balet, nikadkaduman kagalangan so ipagamor na Dios ed saray apaolin alanaan a Kristiano, a matoor ya angiyabawag ed “magloria a kabintaan na panarian to.” (Sal. 145:11-13) Sirin, alay abig tan kagalgalang met so betang na saray ondarakel ya ‘arum a karnero’ nen Jesus diad pangitatandoro ra ed si Jehova.​—Juan 10:16.

Nipabitar so Kagalangan tan Katagyan nen Jehova

5. Panoy impaneskribe ed kagalangan nen Jehova?

⁵ Diad sakey a salmo a pinandumaan toy kinabaleg na Dios tan kinamelag na too, oniay inkanta nen salmistan David: “O Jehova, Katawan mi, alay kablian na ngaran mo ed amin a dalin, ya angipasen na galang mo ed tagey na saray tawen!” (Sal. 8:1) Antis nin apalsa so ‘tawen tan dalin,’ ya anggad panaon ya agawa lay gagala na Dios a pagmaliwen a paraiso so dalin tan iyalangon so katooan ed inkaperpekto​—diad ando lan ando​—si Jehova so sankabalgan tan kagalgalang a Persona ed interon uniberso.​—Gen. 1:1; 1 Cor. 15:24-28; Apo. 21:1-5.

6. Akin et nikuan na samay salmista a si Jehova et akawesan na kagalangan?

⁶ Seguradon pinasyay pandinayew na samay matakot ed Dios a salmista sanen atangay to so alay dakep a katawenan ed labi, a naadornaan na kuan mo no mankirkirlap iran diamante! Diad agaylan pankelaw to no panon kasin ‘innatnat na Dios so katawenan a singa sakey a kurtina,’ imbaga ton akawesan na kagalangan si Jehova ta makapadindinayew so abilidad ton mamalsa. (Basaen so Salmo 104:1, 2.) Say kagalangan tan katagyan na agnanengneng a makapanyarin amin a Manamalsa tayo et mabitabitar ed saray nanengneng a gawa to.

7, 8. Anto so nanenengneng tayo ed katawenan ya ebidensya na kagalangan tan katagyan nen Jehova?

⁷ Alimbawa, imanoen tayo pa so Milky Way galaksi. No sayan maaw-awang a galaksi, a tugyopen na bibitewen, planeta, tan solar system et ikompara ed abalbaleg a dayat, say planetan Dalin et singa labat kamelanting na sakey a buer, singa anggapo. Tan say makapainteres ni, saya ni labat a galaksi et tugyopen lay 100 bilyon a bibitewen! Kanian no makabilang kayoy sakey a bitewen kada segundo diad loob na 24 oras ya anggapoy tundaan, nasabi yoy 3,000 a taon antis kayon makabilang na 100 bilyon.

⁸ No say Milky Way galaksi ni labat et tugyopen lay 100 bilyon a bibitewen, panon to ni kasi interon uniberso? Unong ed kalkulasyon na saray astronomo, sakey labat so Milky Way ed manga 50 anggad 125 bilyon a galaksi. Agayla! Kaunongan karakel sirin so bitewen ed interon uniberso? Seguradon agtayo la narandan itan. Ingen ta ‘bibilangen ni nen Jehova iray bibitewen; tan tatawagen to ni ra ya amin ed kangaranan da.’ (Sal. 147:4) Natan ta nipabitar la ed sikatayo so agaylan kagalangan nen Jehova lapud makapadindinayew ya abilidad ton mamalsa, agta napapakiwas tayo met lan mangitandoro ed maglorian ngaran to?

9, 10. Panon a nipabitar so karunongan na Manamalsa ed probisyon ton tinapay?

⁹ Iyalis tayo pa natan so imano tayo ed sakey ya ordinaryo labat a bengatla, salanti, say naakan. Si Jehova et aliwa labat a ‘managgawa na tawen tan dalin’ noagta ‘manangiter met na tagano ed saray narasan.’ (Sal. 146:6, 7) Say ‘galang tan katagyan’ na Dios et napatnagan ed saray makapakelaw a gawa to, a singa say tanaman a panlalapuay gagawaen a naakan, a singa say tinapay. (Basaen so Salmo 111:1-5.) Nensaman, tinapay so manunan kakanen na totoo, kaiba la ray Israelita. Satan so ipapasen ya ordinaryo labat a naakan, balet diad tua, antis itan a magmaliw a tinapay, ondalan ni’d komplikadon proseso iray manunan laok na satan.

¹⁰ Nen panaon ya isusulat ni labat so Biblia, uusaren na saray Israelita ed panaggaway tinapay so arinay trigo odino sebada, tan danum.  No maminsan, lalaokan da met itan na lebadura odino pampalebag. Natan, say makapakelkelaw et no sigpot a mankokombinasyonan irayan simsimplin substansia et magmaliw la ran sananey a bengatla. Tan anggapoy makapangipaliwawa no panon ya eksakton nagagawa itan. Et no pantongtongan tayo ni no panon a natutunaw so tinapay ed eges, sananey la lamet itan a makapakelkelaw tan komplikadon proseso. Kampega lan oniay inkanta na salmista: “O Jehova, agayla so kinaraklan na saray gawam! Dia ed karunongan so nanggawaan mo ed saraya ya amin”! (Sal. 104:24) Agta singa ontan met lay labay yon ikelyaw?

Antoy Nepeg ya Epekto ed Sika na Kagalangan tan Katagyan na Dios?

11, 12. Anto so epekto ed sikatayo na panagdalepdep ed saray palsa na Dios?

¹¹ Agla kaukolan a magmaliw itayo nin astronomo pian naapresya tayo so karakep na katawenan ed labi, nisay magmaliw a kemiko pian nananam tayoy tinapay. Balet, pian naapresya tayo so katagyan na Manamalsa, walay kaukolan tayon gawaen​—nepeg tayon mangiganay panaon pian morekdeken iray palsa to. Anto so epekto na satan ed sikatayo? Mipara lanlamang ed samay epekto na panagdalepdep tayo ed arum nin kimey nen Jehova.

¹² Oniay inkanta nen David nipaakar ed saray makapadinayew a bengatlan ginawa nen Jehova parad totoo To: “Dalepdepen ko so magloria a galang na inkaarim, tan saray pankelkelawan a gawagawam.” (Sal. 145:5) Singa si David, dadalepdepen tayo iratan a gawa panamegley na panagaral na Biblia tan panagmorekdek ed saray nababasa tayo. Et anto so resulta? Onaralem so apresasyon tayo ed kagalangan tan katagyan na Dios. Insan, seguradon napakiwas itayon mikasakey ed si David diad pangidayew ed si Jehova tan diad pangibagan: “Ipaamtak so kinabalgan mo.” (Sal. 145:6) No dalepdepen tayo iray alay abig a gawa na Dios a Jehova, onelet so relasyon tayo ed sikato. Napakiwas itayo met a mangitongtong nipaakar ed sikato tekep na ligsa tan determinasyon. Maseseg kayo kasin mangiyaabawag na maong a balita tan ontutulong ed arum pian naapresya da met so kagalangan, katagyan, tan karlangan nen Jehova a Dios?

Naspot ya Impatnag nen Jesus so Kagalangan na Dios

13. (a) Unong ed Daniel 7:13, 14, anto so impagamor nen Jehova ed Anak to? (b) Bilang Ari, panon so panagtrato nen Jesus ed saray sakop to?

¹³ Si Jesu-Kristo ya anak na Dios et maseseg ya angipulong ed maong a balita tan inggloria toy kagalgalang tan makapadindinayew ya Ama to ed tawen. Sayan bogbogtong ya anak et pinagamoran nen Jehova na espisyal a kagalangan diad impangiter To ed sikato na ‘panuley tan panarian.’ (Basaen so Daniel 7:13, 14.) Anggaman ontan, si Jesus et aliwan malastog odino aliwan ambetebetel so pidedeneng to. Imbes, sikatoy maabagey a Manuley, a makatalos ed limitasyon na saray sakop to tan makonsidera tan marespeton midedeneng ed sikara. Alimbawa, bilang Aturon Manari, imanoen pa no panoy impantrato nen Jesus ed saray totoo, lalo la iramay ipupungit-pungit tan agnaaaro.

14. Nensaman, panoy panangipasen tan panagtrato ed saray akating diad Israel?

 ¹⁴ Nensaman, maslak ya akating et talagan pakaskasi ta kalkalna iran ompapatey, tan kankaninot a napopongpong so laman da. Diad saman et impasen ya agaylay irap a tambalen so kating, singa panagpaoli ed inatey. (Num. 12:12; 2 Ara. 5:7, 14) Saray akating et ipapasen a marutak, karimdimla, tan agla kabiangan na komunidad. Sano walaray nasasabat da, nepeg da ran pasakbayan diad pangikelyaw na: “Marumsis, marumsis!” (Lev. 13:43-46) Nensaman, say sakey ya akating et singa anggapo lay kana to. Unong ed bangat na saray rabbi, ag-ira nayarin onasingger ed totoo no say distansia et mas asingger ni nen say anemiran piye. Nikuan met a no walaray lider na relihyon a makanengneng na akating, anggano arawi ni et tupak-tupaken da la pian agmakaasingger.

15. Panon so impantrato nen Jesus ed sakey ya akating?

¹⁵ Say makapainteres balet et duma so reaksion nen Jesus sanen walay akating a sinmingger ed sikato tan akikasin manpatambal. (Basaen so Marcos 1:40-42.) Imbes ya ablogen nen Jesus, maabagey tan marespeto ton trinato iyan too ya impup-pulisay. Ta say anengneng to et sakey a toon pakaskasi tan kaukolan a natambal. Lapud atenyeg a maong so puso to, tampol ton impatnag ed gawa so alikna ton panangabagey. Inyunat toy lima to, diniwit to so akating tan tinambal to.

16. Anto so naaralan yo ed paraan na impideneng nen Jesus ed arum?

¹⁶ Bilang papatumbok nen Jesus, panon tayon naalig so paraan na panangipatnag nen Jesus ed kagalangan nen Ama to? Say sakey a paraan et no bidbiren tayon nepeg ya igalang tan respetoen so amin a totoo, antokaman so edad, kipapasen na bilay, odino bunigas da. (1 Ped. 2:17) Saramay walaay autoridad ed arum, a singa saray kaasawaan a lalaki, atateng, tan elder, so nagkalalo lan nepeg a mangipanengneng na konsiderasyon tan galang ed saramay walad panangasikaso ra pian ag-iratan naekalay respeto ed sarili. Indanet na Biblia a nepeg ya ontan so gawaen na amin a Kristiano: “Nipaakar ed aroan na sanaagi, matamoy komon so aroan na sakey tan sakey, dia ed galang manpapalabian kayo.”​—Rom. 12:10.

Panagdayew ed Paraan a Walaay Dignidad

17. Anto so naaralan tayo ed Kasulatan nipaakar ed panangipatnag na dignidad sano mangisasaklang na panangidayew ed si Jehova?

¹⁷ Nagkalautlan kaukolan so pagmaliw a kagalgalang odino pakawalaan na dignidad sano mangisasaklang itayo na panangidayew ed si Jehova. “Dangkaan mo so salim sano onla ka ed abung na Dios,” so inkuan na Ecclesiastes 5:1. Parehon naikdan na instruksion si Moises tan si Josue ya ekalen day sandalyas da sano walara’d masanton pasen. (Exo. 3:5; Jos. 5:15) Gawaen da itan bilang panangipanengneng na baleg a respeto. Anggan saray saserdoten Israelita et obligado met a mansulong na karsonsilyo “a manakbong na ibaing da a laman.” (Exo. 28:42, 43) Diad ontan et napaliisan so mabanday a kiparungtal na pribadon parte na laman da sano manlingkor ira ed altar. Amin a membro na pamilya na saserdote et nepeg a mangitandoro ed estandarte na Dios nipaakar ed kagalangan odino dignidad.

18. Panon tayon nipatnag so dignidad diad panagdayew tayo ed si Jehova?

 ¹⁸ Sirin no kasabi’d panagdayew, say pakawalaan na dignidad et mangilalanor ed galang tan respeto. Pian magmaliw itayon makanepegan ed saratan, nepeg a marespeto itayon onkiwas. Say ipatnag tayon kagalangan et nepeg ya aliwan angangga labat ed nanengneng na mata, a singano kawes labat ya insulong. Noagta, nepeg a nanengneng met na Dios itan ed puso tayo. (1 Sam. 16:7; Uli. 21:2) Kaukolan a magmaliw a kabiangan na inkatoo tayo so pagmaliw a kagalgalang, a napatnagan itan ed kakikiwas, awawey, tan pidedeneng tayo ed arum, tan anggan diad panangipasen tayo’d inkasikatayon mismo. On, nepeg a magmaliw itayon kagalgalang ed amin a panaon, tan diad kada ibaga tan gawaen tayo. Diad kondukta, ugali, panangawes tan panag-ayos tayo, ipapapuso tayo imay imbaga nen apostol Pablo: “Agkami mangiter na bengatlan kagapolan pian say panangasikaso mi agnabalaw. Et dia ed balang bengatla imamatalek mi inkasikamin dili, a singa ministros na Dios.” (2 Cor. 6:3, 4) ‘Paparakepen tayo so bangat na Dios a Manangilaban tayo dia ed amin’ a bengatla.​—Tito 2:10.

Mantultuloy ya Ipatnag so Kagalangan Diad Panagdayew ed Dios

19, 20. (a) Anto so maabig a paraan pian nipanengneng tayoy galang tan respeto ed arum? (b) No nipaakar ed kagalangan, anto so nepeg a determinasyon tayo?

¹⁹ Kagalgalang iray alanaan a Kristiano ya “embahador ya onsasandi parad si Kristo.” (2 Cor. 5:20, NW) Say ‘arum a karnero’ a matoor a manusuporta ed sikara et kagalgalang met iran representanti na Mesianikon Panarian. Say sakey ya embahador odino representanti et mansasalita ed biang na gobiernon irerepresenta to, tan gagawaen to itan tekep na pakpel tan diad paraan a walaan na dignidad. Kanian nepeg ya ontan met so paraan na panangitongtong tayo nipaakar ed Panarian, a gobierno na Dios, bilang pananuporta ed satan. (Efe. 6:19, 20) Tan no ipapasabi tayo ed arum so “maong a balita na kaabigan,” agta papanengnengan tayo ira na galang tan respeto?​—Isa. 52:7.

²⁰ Nepeg a determinado tayon igloria so Dios diad pambilay tayo ed paraan a makanepegan ed kagalangan to. (1 Ped. 2:12) Komon ta lawas tayon ipatnag so baleg a respeto ed si Jehova, ed say panagdayew tayo, tan ed saray kapara tayon managdayew. Tan diad panamegley na kagalgalang tan atekepan na dignidad a panagdayew tayo et napaliket tayo komon si Jehova, a kinawesan toy inkasikato na kagalangan tan katagyan.

[Paimano ed leksab]

Panon Yon Ebatan?

• Anto so nepeg ya epekto ed sikatayo na impakamoria ed kinabaleg na kagalangan nen Jehova?

• Antoy naaralan tayo nipaakar ed panamagalang diad samay paraan na inkiwas nen Jesus ed sakey ya akating?

• Panon tayon napagalangan tan nigloria si Jehova diad paraan a walaay dignidad?

[Tepetepet Parad Panagaral]

[Litrato ed pahina 12]

Panon a pinagamoran nen Jehova na kagalangan si Abel?

[Litrato ed pahina 14]

Anggan diad probisyon nen Jehova a tinapay et mabitabitar so makapadindinayew iran gawa to

[Litrato ed pahina 15]

Anto so naaralan yo nipaakar ed panangipatnag na galang tan respeto diad samay impantrato nen Jesus ed sakey ya akating?

[Litrato ed pahina 16]

Pian makapandayew itayo ed paraan a walaay dignidad, nepeg ya igalang tayoy Jehova