Inad-aro nen Jehova Iray Maedad lan Lingkor To

“Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to.”​—HEB. 6:10.

1, 2. (a) Anto so nayarin nanonotan yo no makanengneng kayo na agin amputi lay buek to? (b) Antoy pangipapasen nen Jehova ed saray maedad lan Kristiano?

 SANO nanenengneng yo iray maedad la ed kongregasyon ya amputi lay buek da, kasin nanonotan yo so salaysay na Biblia a walad libron Daniel? Diad pasingawey ed si Daniel et imparungtal nen Jehova a Dios ya amputi so buek To. Oniay insulat nen Daniel: “Ninengneng ko angga ed nipasen so saray yurongan, et sakey a Masiken na saray Ag-agew so imyurong. Say kawes to amputi a singa niebe, et say buek na ulo to, singa malinis a bago na karnero.”​—Dan. 7:9.

² Kaslakan lan amputi so kolor na malinis a bagoy karnero. Kanian, say amputi a buek tan say titulon “Masiken na saray Ag-agew” so mangipapaimano ed lawas a kiwawala na Dios tan ed inkalaknab na karunongan to, a makanepegan ed pirmin respeto tayo. Anto kasi pangipapasen na Masiken na saray Ag-agew, a si Jehova, ed saray matoor a mamasiken tan akukulaw? Inkuan na Salita na Dios a “say ubanan ya ulo sikato so balanget na gayaga [sano] naromog ed dalan na inkatunong.” (Uli. 16:31) On, no pinmuti lay buek odino ubanan la so sakey a matoor a Kristiano, satan ya itsura et marakep ed imaton na Dios. Mipara ta ed si Jehova so panmoria yo ed saray agagin mamasiken tan akukulaw?

Akin a Pinabpabli Ira?

3. Akin a pinabpabli tayo iray kaagian a maedad la?

³ Kabiangan ed saray inad-aron maedad lan lingkor na Dios et saray membro na Mananguley ya Ulop na saray Tasi nen Jehova, saray ombiabiahen manangasikaso natan tan nensaman, saray maseseg a payunir, tan saray manangipalapag na Panarian ya abayag lan matoor a manlilingkor ed kongregasyon tayo. Nayarin walaray kabat yon piga-pigay taon lan maseseg a manpupulong na maong a balita, tan say maabig ya ehemplo ra so amakiwas ed saray mas ug-ugaw ni tan angimpluensya ed kabibilay da. Arum ed saray maedad lan kaagian et awalaay importante iran responsabilidad tan nansungdo ed saray panamasegsegang nisesengeg ed maong a balita. Papablien a maong nen Jehova tan say “matoor tan makabat ya aripen” so amin ya agawaan da tan say siansia nin gagawaen da parad Panarian.​—Mat. 24:45.

4. Akin a nepeg tayon igalang tan ipikasi iray maedad lan Kristiano?

⁴ Kanepegan na saray matoor a maedad lan agagi so apresasyon tan respeto na arum niran lingkor nen Jehova a Dios. Diad tua, diad Mosaikon Ganggan, say konsiderasyon tan panamagalang ed saray maedad la et insiglaot ed takot ed si Jehova. (Lev. 19:32) Nepeg a regular tayon ipikasi irayan matoor ya agagi tan pisalamatan so Dios ed saray maaron sagpot da. Impikasi nen apostol Pablo iray pinabli ton kakimeyan, matatken man odino kalangweran ni.​—Basaen so 1 Tesalonica 1:2, 3.

5. Panon itayon nagunggonaan diad pililimog ed maedad la ran managdayew nen Jehova?

⁵ Niarum ni, nagunggonaan so amin ed kongregasyon diad pilimog ed saray matoor a maedad lan agagi. Diad saray naaralan, naobserbaan, tan naeksperiensya na sarayan maedad lan managdayew nen Jehova, awalaan ira na mabmablin kakabatan. Naaral day mananos tan misimpatiya. Tan no inanabang da so naaralan da  ed onsublay a henerasyon, sikaray naliliketan tan napepenek. (Sal. 71:18) Kanian sikayoran mas ug-ugaw, komon ta onkabat kayo tan anamot yo iyan subol na kakabatan a singa ed pangasol yo na danum ed aralem a bobon.​—Uli. 20:5.

6. Panon yon nipanengneng ed saray maedad la a talagan papablien yo ra?

⁶ Kasin ipapaamta yo ed saray maedad la a papablien yo ra a singa ed panamabli nen Jehova? Nagawaan yo iya no ibaga yo ed sikara ya inad-aro yo ra lapud inkamatoor da tan im-importante ed sikayo iray opinyon da. Niarum ni, no tuloken yo iray simbawa ra, ipapanengneng yo a talagan rerespetoen yo ra. Nanonotan ni na dakel a maedad lan agagi natan iray makabat a simbawa met ed sikara nensaman na saray matoor a mas matatken nen say sikara, ontan met ed say impakagunggonaan na interon bilay da lapud intulok da ed saratan. *

Ipanengneng so Panangaro Yo Diad Praktikal Iran Paraan

7. Siopa so manunan pangiiteran nen Jehova na responsabilidad a mangasikaso ed saray maedad la?

⁷ Say manunan pangiiteran nen Jehova na responsabilidad a mangitarya ed pankaukolan na saray maedad la et say mismon pamilya ra. (Basaen so 1 Timoteo 5:4, 8.) Naliliketan si Jehova sano totooren na saray pamilya so obligasyon da ed saray kanayon dan maedad la. Diad ontan et nipapanengneng dan inaro ra iray maedad la, a singa met ed panangaro na Dios. Tutulongan tan bebendisyonan na Dios irayan pamilya lapud sagpot tan sakripisyo ra. *

8. Akin a nepeg ya iyansakit na saray kongregasyon iray maedad lan Kristiano?

⁸ Ontan met, naliliketan si Jehova sano tutulongan na saray kongregasyon iray matoor a maedad la a mankaukolan, lalo la no anggapoy kapamilyaan dan walad katuaan odino anggapoy malabay a mangasikaso ed sikara. (1 Tim. 5:3, 5, 9, 10) Diad ontan et nipapanengneng na saray kongregasyon a ‘maabagey tan maaro ira’ ed saray maedad la. (1 Ped. 3:8) Say panangiyansakit da ed saray maedad lan kakongregasyon da so marakdakep ya inyilustra nen Pablo sanen inkuan to a no say sakey a kabiangan na laman et  nairapan, “amin a kabiangan miirap ira ed sikato.” (1 Cor. 12:26) No mangiiter ira na praktikal tan mapangasin tulong ed saray maedad la, nipapanengneng da so prinsipyon walad simbawa nen Pablo: “Mantatarokan kayo na awit na sinansakey, tan sumpalen yo ya ontan so ganggan nen Kristo.”​—Gal. 6:2.

9. Antoran “awit” odino problema so nasagmak na sakey sano maedad la?

⁹ Anto ta iray “awit” odino probleman susungdoan na saray maedad la? Maslak ed sikara et mikekesaw la. Nayarin nalilikna ran agda la nayarian iray nakaukolan dan gawaen a singa say pampadoktor, pambayar na kuryente, panlinis ed abung, odino panluto. Lapud kaslakan ed saray maedad et anggapo lay ganas dan mangan tan oninum, ompan ipasen dan agda la tanton kaukolan itan. Nayarin ontan met so nagawa no nipaakar ed espiritual a pankaukolan da. Lapud kapuy la na mata tan layag, nairapan la ran manbasa, ondengel diad saray pantitipon, tan ompan anggan say manparaan pian makapiaral. Anto sirin so nitulong na arum ed saratan a maedad la?

Antoy Nitulong Yo?

10. Antoy nayarin gawaen na saray elder pian naseguron makaawat na praktikal a tulong iray maedad la?

¹⁰ Diad dakel a kongregasyon, makapadinayew so pangaasikaso na saray maaron agagi ed saray maedad la. Ititindaanan, ilulutoan, tan ililinisan da ra. Tutulongan da iran manaral, manparaan parad saray pantitipon, tan mansiansian regular ed lawak na kimeyan. Saray mas ug-ugaw a Tasi so mangiiba tan mangilulugan ed sikara. No agla makaalis ed abung so sakey a maedad la, saray aral so ikokonekta panamegley na telepono odino irerekord iratan parad sikara. Anggad posible, seseguroen na saray elder a niiiter so praktikal a tulong pian napenek iray pankaukolan na saray maedad la ed kongregasyon. *

11. Isalaysay no panon a tinulongan na sakey a pamilya so agin masiken.

¹¹ Sarag met na saray indibidual a Kristiano so mamarawes tan magmaliw a mabunlok. Singa bilang, sanen inatey so asawa na sakey ya agin masiken, agto la nayarian a bayaran so abang na abung lapud apultot lay pension na asawa to. Walay pamilya​—ama, ina, tan duaran anak a bibii​—ya inyaralan dan sanasawa nensaman, tan baleg so abung na satan a pamilya. Sayan masiken so inikdan da na duaran kuarto a napanayaman to. Diad loob na 15 taon, sikatoy karungo ra ed panangan tan impasen dan kabiangan lay pamilya ra. Baleg so agunggona ra lapud pananisia tan laknab na eksperiensya to, tan sikatoy agunggonaan met ed maliket a pililimog. Nanayam iyan agi ed sikara anggad impatey to diad edad ya 89. Siansia nin pisasalamatan na sayan pamilya so Dios lapud dakel a bendisyon a naawat da diad impilimog da ed sikato. Agda ‘abalang so tumang da’ diad impanulong ed kapara ran babangatan nen Jesu-Kristo.​—Mat. 10:42. *

12. Antoy nayari yon gawaen pian nipanengneng yoy panangaro ed saray agagin akukulaw tan mamasiken?

¹² Nayari pa lagin anggapo kayo ed kipapasen ya ontulong ed agin masiken odino akulaw a singa ed samay paraan na intulong na sayan pamilya. Balet, ompan nayarian yon tulongan iray agagin maedad la a makapiaral odino makapanpulong. Nayari yo met iran imbitaan ed abung yo tan ipilan manpasyar. Nayarian yo ran bisitaen, lalo la no mansasakit ira odino no agda la sarag so onalis ed abung. Niarum ni, nepeg ya agyo ira tratratoen a singa ugaw. Anggad malinew ni panagnonot na saray maedad lan Kristiano, nepeg ya ipila iran mandesisyon ed amin a bengatlan mangapekta ed sikara. Anggan saramay mankabaw la et nalikas da no kasin sikaray rerespetoen na arum.

Aglingwanan nen Jehova so Gawa Yo

13. Akin et importantin ipanengneng so konsiderasyon ed liknaan na saray maedad lan agagi?

¹³ Importante so pangipanengneng na konsiderasyon ed liknaan na saray maedad la. Kaslakan a naeermenan a maong iray maedad la lapud agda la nagawaan so amin a datin nagagawaan da  sanen maksil tan ugaw ni ra. Singa bilang, sakey ya agin akulaw a datin regular payunir, ya aktibon nanlingkor ed si Jehova ed loob na 50 taon, so kinmakkapuy lapud impansakit to tan mair-irap to lay onlan miaral. Sanen inkompara toy datin nagagawaan to ed ministeryo ed saray agto la nagagawaan natan, sikatoy manakis. Mantedter so lua ton tinmuek, ya oniay inkuan to: “Anggapo lan balot so kakanaan na nagagawaan ko natan.”

14. Anto so panamaseseg na salmos ed saray maedad lan lingkor nen Jehova?

¹⁴ Kasin ontan met so nalilikna yo, agagi mi ran maedad la? Kasin no maminsan et ipapasen yon pinaulyan kayo la nen Jehova? Nibagan ontan met so alikna na salmista sanen masiken la lapud oniay inkerew to ed si Jehova: “Agmo ak ipulisay naani no panaon na inkamasiken la; agmo ak ikaindan naani no say biskeg ko et onkulang la. Natan met nen masiken ak la tan ubanan la so ulok, O Dios, agmo ak ikaindan.” (Sal. 71:9, 18) Siempre, agbalot inkaindan nen Jehova iman a salmista, tan agto kayo met ikaindan. Diad sananey a salmo et imbalikas nen David so kompiyansa to ed suporta na Dios. (Basaen so Salmo 68:19.) Segurado a no sakey kayon matoor a maedad lan Kristiano, agkayo ikaindan nen Jehova tan itultuloy to kayon tulongan ed inagew-agew.

15. Panon a napansiansia na saray maedad la so positibon panmoria?

¹⁵ Sikayo ran maedad lan Tasi nen Jehova, amin ya agawaan yo tan siansia nin gagawaen yo a kirayewan na Dios et agton balot lingwanan. “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to,” kuan na Biblia. (Heb. 6:10) Kanian, agkayo maniisip na negatibo, agyo ibabagan lapud masiken odino akulaw kayo la et anggapo lay kana yo ed si Jehova. Saray positibo so nonot yo, tan panseetan ya ekalen ed nonot iray makapaermen tan negatibon panmoria. Panliketan iray bendisyon ed sikayo tan say ilalo yo ed arapen! Anggapo lay mas ondakep ed “arapen tan ilalo” a walad sikatayo tan gagarantiyaan iratan na Manamalsa tayo. (Jer. 29:11, 12, NW; Gawa 17:31; 1 Tim. 6:19) Dalepdep yoy ilalo yo, pansiansia yon maligsay puso tan nonot yo, tan agyon balot melmelagen so kakanaan na kiwawala yo ed kongregasyon! *

16. Akin ya inisip na sakey ya agin masiken a kaukolan to lan ikbanay pribilehyo to bilang elder, balet panoy impamaseseg ed sikato na saray kapara ton elder?

¹⁶ Imanoen pa si Johan, a diad edad ton 80 et aasikasoen toy matoor tan agla makabangon ya akulaw ton si Sannie. * Pian makapiaral tan makapanpulong si Johan, saray agagin bibii so mansusublayan a manbabantay ed si Sannie. Anggaman ontan, diad agano ni et alikna nen Johan a naksawan lay emosyon to kanian inisip ton ikbanan lay pribilehyo to bilang elder ed kongregasyon. Oniay intepet to legan a manag-agus so lua to: “Anto ni kana na pagmaliw kon elder? Anggapo met lay nagagawaan ko ed kongregasyon.” Sikatoy pinaseguroan na saray kapara ton elder ed kongregasyon a kakkaukolan da so eksperiensya tan karunongan to. Pinaseseg da si Johan a mansiansian manlingkor bilang elder, anggaman limitado la so nagawaan to. Lapud apaseseg a maong si Johan, intultuloy toy nanlingkor bilang elder, a nagmaliw a bendisyon ed kongregasyon da.

Talagan Mangiyaansakit si Jehova

17. Anto so ipapaseguro na Biblia ed saray maedad lan agagi?

¹⁷ Ipapanengneng na Kasulatan a nitultuloy nin napaaligwas na saray maedad la so espiritualidad da anggaman dakel so problema lapud itatatken. Oniay inkuan na salmista: “Sikara so  nitanem ed loob na abung nen Jehova, . . . manbunga ni ran siansia ed inkamasiken [odino inkaakulaw]; sikara makbol tan malangbot ira.” (Sal. 92:13, 14) Anggaman nayarin walay aanosan nen apostol Pablo a sakit to, ‘agto kinmapuy, anggano say too to ed paway et aderal’ odino onleletey.​—Basaen so 2 Corinto 4:16-18.

18. Akin a mankaukolan na tulong iray maedad lan kaagian tan saray mangaasikaso ed sikara?

¹⁸ Papaneknekan na dakel ya alimbawa ed panaon tayo a sarag na saray maedad la so “manbunga” odino onaligwas. Nayarin makapaaburido iray problema nipaakar ed sakit tan itatatken, anggan diad saramay walaan na maasikaso tan responsablin kapamilyaan. Anggan saray mangaasikaso et nakesawan met. Pribilehyo tan responsabilidad na kongregasyon ya ipanengneng so panangaro ra ed saray maedad la tan ed saray mangaasikaso ed sikara panamegley na gawa. (Gal. 6:10) Satan so mangipanengneng ya aliwa itayon angangga labat la’d salita, ya ikuan ya “naimengan tan napesel kayo komon” insan agtayo lanlamang mangiter na praktikal a tulong.​—Sant. 2:15-17.

19. Akin a positibo so panmoria na saray matoor ya agagin maedad la ed arapen?

¹⁹ Nayarin walay pangumanan na nagawaan na sakey a Kristiano lapud itatatken, balet say panangaro nen Jehova ed saray matoor a lingkor to a maedad la so ag-ontabang diad ilalabas na panaon. Imbes, pinabpabli to irayan matoor a Kristiano, tan agto ran balot ikaindan. (Sal. 37:28; Isa. 46:4) Tulongan tan iwanwan ira nen Jehova sanlegay itatatken da.​—Sal. 48:14.

[Saray paimano ed leksab]

Antoy Ebat Mo?

• Akin ya ipapasen yon pinabpabli iray matoor a maedad lan agagi?

• Panon tayon nipanengneng so panangaro ed saray maedad lan kaagian?

• Anto so makatulong ed saray maedad lan lingkor nen Jehova pian nawalaan na positibon panmoria?

[Tepetepet Parad Panagaral]

[Saray litrato ed pahina 18]

Inad-aro na saray membro na kongregasyon iray maedad la