Kasin Nanonotan Yo?

Nanggayagaan mo ta so impamasa ed agano niran paway na Say Panag-Bantayan tan The Watchtower? Salim pa sirin ya ebatan iray onggendan a tepet:

• Anton seryoson problema so naeksperiensya na arum a Kristiano kayari na kasal, tan anto so nepeg a panggunaetan dan gawaen?

Nayarin namoria na arum a Kristiano a nandumaan manaya so panlabayan dan sanasawa. Amta ran say agmakasulatan a pandiborsyo et aliwan sikatoy solusyon, kanian kaukolan a sikaray mansagpot pian napansiansia ra so panamaley da.​—4/15, pahina 17.

• Antoran problema so nayarin nasagmak na saray Kristianon manaayam ed panagkumponian?

Nayarin say kawalaan na panagkumponian et diad teritorya na arum a kongregasyon ya agda kabisado. Maslak ed saray kalimog da ditan et walaan na duman sisisiaen tan nayarin kombinsien da ran mibiang ed saray misa odino relihyoson selebrasyon. Nepeg ya amtaen na saray Kristianon kakanayon tan membro na lokal a kongregasyon irayan problema, tan nepeg ya akaparaan iran ontulong tan mangasikaso.​—4/15, pahina 25-27.

• Anto so apatiran kundang a makatulong ed sanasawa pian naresolbe da iray problema?

Mangiganay panaon pian pantongtongan iray problema. (Ecl. 3:1, 7) Ibalikas so opinyon mo diad matua tan magalang a paraan. (Efe. 4:25) Ontalineng tan ipanengneng mon natatalosan moy liknaan na asawam. (Mat. 7:12) Manpakna ed sakey a solusyon, tan mantulongan pian naresolbe so problema. (Ecl. 4:9, 10)​—5/1-E, pahina 10-12.

• Antoran utang so tutukoyen nen Jesus sanen pinaseseg to itayon ipikasi so kaperdona na saray utang tayo?

No ikompara tayo so ibabaga na Mateo 6:12 ed Lucas 11:4, malinew ya aliwan pinansyal ya utang so tutukoyen nen Jesus. Say tutukoyen to et saray kasalanan tayo. Nepeg tayon aligen so Dios diad pagmaliw ya akaparaan a mamerdona.​—5/15, pahina 9.

• Antoran komite so panlilingkoran na saray membro na Mananguley ya Ulop?

Coordinators’ Committee; Personnel Committee; Publishing Committee; Service Committee; Teaching Committee; Writing Committee.​—5/15, pahina 29.

• Panon tayon makaseguro a samay Delap ed panaon nen Noe et sankamundoan?

Anisia si Jesus a say Delap et peteg ya agawa tan sankamundoan. Saray pasakbay a walad Biblia et paneknek a talagan agawa so sankamundoan a Delap.​—6/1-E, pahina 8.

• Kasin say kondukta ya adeskribe’d Roma 1:24-32 et manutukoy ed saray Judio odino ed saray Gentil?

Onaplika ed parehon grupo iyan deskripsion, balet say espisipikon tutukoyen dia nen Pablo et saray Israelita nensaman a piga-pigay siglon ag-angunor ed Ganggan. Amta ra so maptek iran ganggan na Dios balet ta agda iratan inunor.​—6/15, pahina 29.

• Iner so kawalaan na Tel Arad, tan akin et importante iyan syudad?

Sayan pukdol ed Israel, a pakalmoan ed syudad nensaman na Arad et walad sagur na Dead Sea. Aromog na saray arkeologo ed sayan pukdol so dakerakel a langan inusar a panagsulatan. Arum ed saraya et akasulatan na kangaranan a walad Biblia, tan mamapaneknek a say ngaran na Dios et inusar ed saray dokumenton agmisiglaotan ed relihyon.​—7/1, pahina 23-24.

• Akin et magmaliw itayon lalon magayaga no makatunongan iray iilaloan tayo?

No ipilit tayon dampoten so agmakatunongan iran kalat, papairapen tayo labat so inkasikatayo.Balet, nepeg itayon manalwar ompan masyadon abebbeba met lay iilaloan tayo ed inkasikatayo, ya uusaren so ipapasen tayon limitasyon bilang baraan ed no akin a matalag itayo lan mibiang ed ministeryo.​—7/15, pahina 29.

• Antoray nayarin makasbel ed komunikasyon na atateng tan anak dan tin-edyer?

Nayarin makasbel ed maong a komunikasyon so inkamabaing na tin-edyer, ontan met ed say pilalek ton manbukbukor tan magmaliw ya independente. Makatulong no salien na atateng so pitongtong ed anak dan tin-edyer diad agtanton pormal iran pankanawnawa. Aliwan saray salita labat so panggunaetan dan talosan, noagta pati say liknaan a labay ya ibalikas na anak da.​—8/1-E, pahina 10-11.