Mansiansian Matoor Tekep na Naspot a Puso

“Manakar ak ed katuaan mo: ipasakey mo so pusok ya ontakot ed ngaran mo.”​—Sal. 86:11.

1, 2. (a) Unong ed Salmo 86:2, 11, anto so makatulong pian makapansiansia itayon matoor ed si Jehova sano onsabi subok odino tukso? (b) Kapigan nepeg a bayuboan so impapuson katooran?

 AKIN et walaray Kristiano a nansiansian matoor ed pigapigay taon anggano impripriso odino pinapasegsegang ira, balet diad kaunoran et naplag lanlamang ed materyalismo? Say ebat et mikonektaan ed piguratibon puso tayo​—no antoy walad utel na puso tayo. Diad koma-86 a Salmo, say katooran et nisiglaot ed niyapasakey a puso, odino sakey a naspot a puso, salanti, agnankadua. “Yapiger mo so kamarerwak ta masimpit [“matoor,” NW] ak,” so impikasi na salmistan David. “Ilaban mo so aripen mo a manmatalek ed sika.” Onia ni inyarum to: “Ibangat mo ak ed dalan mo, O Jehova; manakar ak ed katuaan mo: ipasakey mo so pusok ya ontakot ed ngaran mo.”​—Sal. 86:2, 11.

² No agtayo sigpot-puson manmatalek ed si Jehova, pakapuyen na arum a kapagaan tan pakakasagyatan tayo so katooran tayo ed tuan Dios. Saray sinisiblet a pilalek et aliling toy sakey a klase na akatabon a bomba a sano nagatinan et onsabog. Nayarin nansiansia itayon matoor ed si Jehova anggan mairap iray kipapasen, balet agto labay ya ibagan ag-itayo la napatitan nen Satanas. Kanian talagan importante sirin a natan ni labat et bayuboan tayo la so impapuson katooran ed si Jehova, sakbay ya onsabi iray subok tan tukso! Oniay inkuan na Biblia: “Yatol [odino alwaran] mo so pusom ed amin a seet.” (Uli. 4:23)  Nipaakar ed saya et makaaral tayo na makana iran leksion diad eksperiensya na sakey a propeta a nanlapud Juda, ya imbaki nen Jehova ed si Jeroboam ya ari na Israel.

‘Ikdan Ta Ka na Tumang’

3. Antoy reaksion nen Jeroboam ed samay mensahe na panangukom ya arengel to ed propeta na Dios?

³ Isipen pa iyan eksena. Si Arin Jeroboam, ya angiletneg na panagdayew ed kilaw a baka diad amianen a samploran tribu a panarian ed Israel, et agaylay pasnok to. Akin? Lapud ambelat so mensahen arengel to ed propeta na Dios. Ingganggan to ray totoo to ya erelen so propeta. Balet si Jehova et walad dapag na sayan lingkor to. Kabebekta, say lima na ari ya inyunat to lapud pasnok et mamilagron kinmebet, tan say altar ya uusaren parad palson panagdayew et apaldua. Biglan anguman so awawey nen Jeroboam. Sikatoy akikasi ed propeta na Dios: “Kerewen mo natan so pamalangkap nen Jehova a Dios mo, tan mikasi ka a nipaakar ed siak, pian say limak nipawil komon.” Nampikasi so propeta, tan inmabig so lima na ari.​—1 Ara. 13:1-6.

4. (a) Akin et talagan subok ed inkamatoor na propeta so imbitasyon na ari? (b) Anto so inyebat na propeta?

⁴ Kayari inyabig nen Jeroboam, oniay inkuan to’d propeta na Dios: ‘Mila ka ed siak diad abung, tan manalimasmas ka tan ikdan ta ka na tumang.’ (1 Ara. 13:7) Anto la kasi gawaen na propeta natan? Nepeg to kasin pagustoan so pamaparawes na ari anta kapkapangibaga to ni labat na mensahe na panangukom? (Sal. 119:113) Odino, kasin sarag to met lan awaten so imbitasyon ta singa magbabawi met la so ari? Mayaman si Jeroboam kanian sarasarag toy mangiter na dakdakel a regalo ed saray kakaaro to. No say propeta na Dios et walay iyaamot ton pilalek ed materyal iran bengatla, nayarin magmaliw a baleg a tukso’d sikato so imbitasyon na ari. Balet, oniay ingganggan nen Jehova ed sayan lingkor to: “Agka mangan na tinapay nisay oninum ka na danum, agka ompawil ed dalan a nanlapuan mo.” Kanian oniay mapekder tan malinew ya inyebat na propeta: “No iter mo ed siak so kapaldua na abung mo, agak mila ed sika, agak mangan na tinapay nisay oninum na danum dia ed saya a pasen.” Insan la tinmaynan ed Betel so propeta tan sananey lay dinalan to. (1 Ara. 13:8-10) Diad satan a desisyon to, anton leksion so naaralan tayo nipaakar ed impapuson katooran?​—Roma 15:4.

“Pasaragen” No Antoy Wala

5. Panon a magmaliw a pakasubokan na katooran tayo so materyalismo?

⁵ Anggaman singano aliwan makapasubok ed katooran tayo so materyalismo, diad tua et talagan makapasubok itan. No nipaakar ed saray talagan pankaukolan tayo, manmamatalek itayo kasi ed sipan nen Jehova ya itarya to iratan? (Mat. 6:33; Heb. 13:5) Imbes ya ipasoot tayon naala iray bengatlan mas pakainawaan ed bilay anggano walaray nisakripisyo tayo, sarag to kasin pankontentoan tayo la no antoy walad sikatayo? (Basaen so Filipos 4:11-13.) Natutukso itayo kasin isakripisyoy pankanawnawan napalaknab ni so panaglingkor tayo ed Dios pian labat naalay labay tayo natan? Kasin say matoor a panaglingkor tayo ed si Jehova so sankaimportantian ed bilay tayo? Saray ebat tayo et manunan akadepende ed no kasin sigpot-puso itayon manlilingkor ed Dios odino andi. Oniay insulat nen apostol Pablo: “Say kasimpitan sikato so baleg a gunggona no tooran na pamasarag. Ta anggapo so intarok tayo dia ed mundo, et agtayo met nayariay mangala na antokaman a bengatla. No wala siri’ pantagano tayo tan kawesen tayo pasaragen tayo komon iya.”​—1 Tim. 6:6-8.

6. Antoran “tumang” odino oportunidad so nayarin niyopresi ed sikatayo, tan antoy makatulong ed sikatayon mandesisyon no kasin awaten tayo iratan?

⁶ Bilang alimbawa, nayarin say amo tayo et opresian to itayoy mas atagey a posisyon, a mas baleg so sueldo tan benepisyo. Odino ompan naisip tayon ombaleg so naaalmo tayo no mantrabaho tayo ed arum a bansa. Diad gapo, sarayan oportunidad et nayarin ompatnag a bendisyon a manlalapud si Jehova. Balet sakbay tayon desisyonan iratan, agta maabig no usisaen tayo no antoray motibo tayo? Kaukolan a say manunan nonoten tayo et, “Panon a makaapekto’d relasyon ko ed si Jehova so desisyon ko?”

7. Akin et importante a sigpot tayon ekalen iray materyalistikon pilalek ed puso tayo?

⁷ Say sistema nen Satanas et ag-ontutundan mangisasagyat ed materyalismo. (Basaen so  1 Juan 2:15, 16.) Gagala nen Satanas a taneman na kaugsan so kapusoan tayo. Kanian, kaukolan a magmaliw itayon alerto pian nabidbir tan sigpot tayon naekal ed puso tayo iray materyalistikon pilalek. (Apo. 3:15-17) Si Jesus et magmainomay ton impulisay so amin a panarian ed mundo ya inyopresi nen Satanas. (Mat. 4:8-10) Impasakbay to: “Nengnengen yo, et manlikas kayo ed amin a kaagapan; ta say bilay na too andi ed karakel na saray bengatla a bebembenan to.” (Luc. 12:15) Say inkamatoor so ontulong ed sikatayon panmatalekan si Jehova imbes a say inkasikatayo.

‘Nantila’ so Masiken a Propeta

8. Panon ya asubok so inkamatoor na propeta na Dios?

⁸ No nantultuloy labat komon a sinmempet so propeta na Dios, balibali so nansumpalan na saray bengatla. Balet, biglan sinmabi so balon subok ed sikato. “Diman manaayam so sakey a masiken a pomaparles [odino propeta] ed Betel,” so ibabaga na Biblia, “et sakey ed saray anak to, sinmabi tan imbaga to ed sikato” so amin ya agawa ed satan ya agew. Sanen nadngel na masiken itan a balita, impaitarya toy sakey ya asnon luganan to pian naabotan to so propeta na Dios. Ag-abayag kayari na satan, aromog to so propeta na Dios a manpapainawa ed silong na sakey a baleg a kiew tan inkuan to: “Mila ka ed abung ed siak, tan mangan ka na tinapay.” Sanen ag-inawat na propeta na tuan Dios so imbitasyon, oniay imbaga na samay masiken: “Siak met [propeta] ak a singa sika: et sakey ya anghel so nansalita ed siak ed panamegley na salita nen Jehova, ya inkuan to, Ipawil mo pati sika ed abung mo, pian makapangan kay tinapay tan oninum na danum.” Balet ta say inkuan na Kasulatan et ‘sikatoy nantila.’​—1 Ara. 13:11-18.

9. Antoy ibabaga na Kasulatan nipaakar ed saray managpalikdo, tan antoy ni-iiyan da’d kapeligroan?

⁹ Agtayo segurado no antoy motibo na masiken a propeta, basta say amta tayo et sikatoy nantila. Nayari pa lagin diad apalabas et sikatoy sakey a matoor a propeta nen Jehova. Balet, diad sayan pankanawnawa et sikatoy mamapalikdo. Mapuersan kokondenaen na Kasulatan iyan kagagawa. (Basaen so Uliran 6:16, 17.) Saray managpalikdo et agda labat dederaley relasyon da ed si Jehova, noagta diad kaslakan et pati say relasyon na arum ed Dios.

“Pinmawil” ya Akila ed Masiken

10. Panoy inkiwas na propeta na Dios sanen sikatoy inimbitaan na masiken a propeta, tan anto so resulta?

¹⁰ Nepeg komon ya atebek na propetan nanlapud Juda so taktikan inusar na masiken a propeta. Sarag to komon a tepetan ni inkasikato, ‘Akin et sananey a too so pangibakian nen Jehova na anghel to anta parad siak iratan a balon instruksion?’ Sarag to met komon a tepetan ni Jehova pian nalinewan to iray bengatla, balet anggapoy ibabaga na Biblia a ginawa to itan. Imbes, ‘sikatoy pinmawil a kaiba so masiken, tan angan na tinapay dia ed abung to, tan inminum na danum.’ Ag-aliketan si Jehova ed satan. Sanen say apalikdon  propeta et wala la’d dalan papawil ed Juda, walay leon ya asabat to, tan satan so amatey ed sikato. Talagan makapasinagem so impanampot na inkapropeta to!​—1 Ara. 13:19-25. *

11. Anton maabig ya ehemplo so impanengneng nen Ahias?

¹¹ Diad biek a dapag, si propeta Ahias, ya imbaki pian lanaan si Jeroboam, et nansiansian matoor anggan diad intatken to. Sanen si Ahias et bulag la lapud inkamasiken to, imbaki nen Jeroboam so asawa to pian tepetan so propeta no anto kasi pansumpalan na mansasakit ya anak dan laki. Makpel ya impasakbay nen Ahias a say anak nen Jeroboam et ompatey. (1 Ara. 14:1-18) Sakey ed saray dakel a bendisyon a naawat nen Ahias et say pribilehyon napilaktip iray sulat to ed apuyanan a Salita na Dios. Panon? Saray sulat to et inusar na saserdoten si Esdras bilang reperensya.​—2 Awa. 9:29.

12-14. (a) Anton leksion so naaralan tayo nipaakar ed samay agawa ed mas ug-ugaw a propeta? (b) Iyilustra no akin a kaukolan a motekteken tekep na pikakasi so simbawan nibase ed Biblia ya iiter na saray matatken.

¹² Anggapoy ibabaga na Biblia no akin ya agni kinmonsulta ed si Jehova imay mas ug-ugaw a propeta sakbay a pinmawil, insan angan tan inminum a kaiba imay masiken a propeta. Nayari kasin lapud nadngel to’d samay masiken so labay ton narengel? Anton leksion so naaralan tayo’d saya? Kaukolan a talagan kombinsido itayo a saray kakaukolanen nen Jehova et maptek. Tan nepeg a determinado itayon tumboken iratan, antokaman so nagawa.

¹³ No nipaakar ed simbawa, arum so ondedengel labat ed saray labay dan dengelen. Singa bilang, say sakey a manangipalapag et nayarin opresian na trabahon mamawas na panaon to parad pamilya to tan parad teokratiko iran aktibidad. Nayarin sikatoy pasimbawaan ed sakey a matatken. Bilang panangigapo et nayarin ibaga na matatken ya aliwan sikato so mandesisyon no panon a suportaan na agin laki so pamilya to. Insan nayarin repasoen na matatken ed agi no antoray peligro ed espiritualidad to no bilang ta awaten to so trabaho. Say tandaan labat kasi na agi et samay imbaga na matatken ed gapo, odino say motekteken to et saramay sinmaginonor iran balikas? Malinew a kaukolan ton pilien no antoy sankaabigan parad espiritualidad to.

¹⁴ Nonoten pa met so sakey nin posiblin situasyon. Nayarin mantepet so sakey ya agin bii ed sakey a matatken no kasin nepeg to lan isian so agmananisian asawa to. Seguradon ipaliwawa na matatken a say agin bii so mandesisyon no isian  to odino andi. Insan nayarin repasoen na matatken so simbawa na Biblia nipaakar ed satan a punto. (1 Cor. 7:10-16) Kasin ikonsidera na agin bii so imbaga na matatken? Odino diad tua et agto la labay ya umanen so kanonotan ton taynan so asawa to? Sakbay ton desisyonan itan, mas makabat no motekteken to ni tekep na pikakasi so simbawan nibase ed Biblia.

Magmaliw a Mapaabeba

15. Anto so naaralan tayo ed lingo na propeta na Dios?

¹⁵ Anto ni kasi naaralan tayo ed lingo na samay propetan nanlapud Juda? Ibabaga na Uliran 3:5: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo.” Imbes ya intultuloy to komoy manmatalek ed si Jehova a singa ginawa to ed apalabas, diad sayan inkagawa et say nanmatalekan to et say dilin panmoria to. Lapud satan a lingo et naandi so bilay to pati say maabig a ngaran to ed Dios. Talagan ipapabitar na eksperiensya to so kaimportantian na inkamapaabeba tan inkamatoor diad panaglingkor tayo ed si Jehova!

16, 17. Anto so makatulong pian makapansiansia itayon matoor ed si Jehova?

¹⁶ Lapud walay sinisiblet ya inklinasyon na puso tayo, walay tendensian makapanggawa itayoy lingo. “Say puso manamalingo alabas nen saray amin a bengatla, et sikato so mapalalo a mauges.” (Jer. 17:9) Pian makapansiansia itayon matoor ed si Jehova, nepeg tayon itultuloy ya ekalen so datin personalidad tayo, a walaay tendensian manmatalek ed dili odino magmaliw a mapalakbat. Tan nepeg tayon isulong so balon personalidad, “a sikato so pinalsay Dios ed loob na kaptekan tan matuan kasantosan.”​—Basaen so Efeso 4:22-24.

¹⁷ Diad “saray mapaabeba wala so kakabatan,” so ibabaga na Uliran 11:2. No mapaabeba itayon manmatalek ed si Jehova, napaliisan tayoy pakagawa na saray seryoson kalilingoan. Alimbawa, no nadidismaya itayo, magmainomay a napikewet so panagdesisyon tayo. (Uli. 24:10) Nayarin nakekesawan tayo la’d pigaran aspekto na sagradon serbisyo tan liknaen tayon magenap la iramay agawgawaan tayo’d apalabas iran taon, kanian ompan isipen tayon onsublay met la ray arum. Odino ompan pirawaten tayo la imay kuan dan mas “normal” a bilay. Anggaman ontan, no ‘pampilitan’ tan ‘lawas tayon padaaken so kimey ed Katawan,’ naalwaran tayoy puso tayo.​—Luc. 13:24; 1 Cor. 15:58.

18. Antoy gawaen tayo no bilang ta nanairapan itayon mandesisyon?

¹⁸ No maminsan, kaukolan tayon manggawa na mairap iran desisyon, tan nayarin aliwan malinew no antoy nepeg tayon gawaen. Natukso itayo kasin uleyan lan bukor iray bengatla? Kapagno nipapaarap itayo ed ontan iran situasyon, makabat so ikerew na tulong ed kinen Jehova. “No siopaman ed sikayo so makulang na kakabatan,” so ibabaga na Santiago 1:5, “pakerewen ed Dios; a mangiter na mabunlok ed amin a too.” Say Ama tayon walad tawen so mangiter na masanton espiritu a nakaukolan tayo pian makapanggawa itayoy maabig iran desisyon.​—Basaen so Lucas 11:9, 13.

Magmaliw a Determinadon Manmatoor

19, 20. Anto so nepeg a determinado tayon gawaen?

¹⁹ Diad saramay magulon taon kayari impanaynan nen Solomon ed tuan panagdayew, asubok a maong so inkamatoor na saray lingkor na Dios. Tua, dakel so akikompromiso ed nanduruman paraan. Anggaman ontan, walaray talagan nansiansian matoor ed si Jehova.

²⁰ Kada agew, nipapaarap itayo ed saray desisyon a pakakasubokay katooran tayo. Balet sarag tayon paneknekan a matoor itayo met. Komon ta mansiansia itayon matoor ed si Jehova, tekep na naspot a puso, tan sigpot tayon manmatalek a “diad sakey a matoor et onkiwas [si Jehova] a walay katooran.”​—2 Sam. 22:26, NW.

[Paimano ed leksab]

Panon Mon Ebatan?

• Akin et kaukolan tayon sigpot ya ekalen ed puso tayo iray materyalistikon pilalek?

• Anto so ontulong pian makapansiansia itayon matoor ed si Jehova?

• Panon a makatulong so inkamapaabeba pian makapansiansia itayon matoor ed Dios?

[Tepetepet Parad Panagaral]

[Saray litrato ed pahina 9]

Mairap mo kasin labanan iray tukso?

[Saray litrato ed pahina 10]

Kasin motekteken yo tekep na pikakasi iray simbawan nibase ed Biblia?