Aligen si Jesus​—Mandayew Diad Paraan a Makapaliket ed Dios

Saray totoo “a nanlapu ed balang nasyon tan amin na saray kailalakan tan binaleybaley, tan salita” et maaron iimbitaan na Dios a mandayew ed sikato. (Apo. 7:9, 10; 15:3, 4) Saramay mangawat ed sayan imbitasyon so makaimaton na “karakpan nen Jehova.” (Sal. 27:4; 90:17) Singa say salmista, ikelyaw day panangidayew da ed Dios, a kuan da: “Mangigalang tan ondakmomo itayo; ontalimukor itayo ed arap nen Jehova ya Amalsa ed sikatayo.”​—Sal. 95:6.

Panagdayew a Pinabpablin Maong

Bilang bogbogtong ya Anak na Dios, dakel so pankanawnawa nen Jesus ya aralen iray kanonotan, prinsipyo, tan estandarte na Ama to. Kanian, walay kompiyansa nen Jesus a mangibaga’d arum no antoy dugan paraan na tuan panagdayew. Inkuan to: “Siak so dalan, tan say katuaan, tan say bilay. Anggapo so ondateng ed Ama, noag dia ed panamegley ko.”​—Juan 1:14; 14:6.

Impanengneng nen Jesus so naspot ya alimbawa na mapaabeban panagpasakop ed Ama to. Inkuan to: “Anggapo so gawaen ko ed inkasiak, noag unong na imbangat na Ama ed siak, salitaen ko so sarayan bengatla.” Insan to inyarum: “Gawaen ko lawas so saray bengatla a makapaliket ed sikato.” (Juan 8:28, 29) Diad antoran paraan a pinaliket nen Jesus so Ama to?

Say sakey a paraan et diad sigpot ya impangiter nen Jesus na debosyon to ed kinen Ama to, tan satan so manunan kabaliksan na panagdayew ed Dios. Impanengneng nen Jesus a maapit so relasyon  to ed Ama to diad impagmaliw ton matulok, tan diad impanumpal to ed linawa To, anggan nalalanor ni pirmin panirap to. (Fil. 2:7, 8) Say importantin aspekto na panagdayew nen Jesus et say ontan lan inkakuli to’d panaggaway babangatan, a sikato ni ingey tinawag a Managbangat, unong ed saray mananisia tan anggan saray agmananisia. (Mat. 22:23, 24; Juan 3:2) Niarum ni, intalaga nen Jesus so inkasikato parad pankaabigan na arum. Lapud inkamasakripisyo to et daiset labat lay akeran panaon to parad inkasikato, balet sikatoy maliket a nanlingkor ed arum. (Mat. 14:13, 14; 20:28) Anggano okupado, naynay a mangigagana si Jesus na panaon pian mitongtong ed Ama to panamegley na pikakasi. (Luc. 6:12) Talagan pinabpabli na Dios so panagdayew nen Jesus!

Akipuligesgesan Pian Napaliket so Dios

Inimano nen Jehova so impankurang na Anak to tan imbalikas Toy panangabobon To. (Mat. 17:5) Balet, naimano met nen Satanas a Diablo so inkamatoor nen Jesus, kanian sikatoy nagmaliw a manunan puntirya to. Akin? Makasengeg ta anggapo ni too ya akapangiter ed Dios na naspot a katooran, salanti, say klase na panagdayew a kanepegan tan labay na Dios. Kanian labay na Diablo a patundaen si Jesus a mangiter na panagdayew a makanepegan lambengat ed si Jehova.​—Apo. 4:11.

Pian deralen so katooran nen Jesus, si Satanas so inmasingger ed sikato tekep na makapaayat ya opresi. Inyakar to si Jesus ed “sakey a sankatagyan a palandey, [pian] ipanengneng to ed sikato so saray amin a panarian na mundo, tan say dayew da.” Insan inkuan nen Satanas: “Amin dara nia iter ko ra naani ed sika, no ondakmomo ka tan igalang mo ak.” Panoy inkiwas nen Jesus? Oniay inyebat to: “Arawi ka dia, Satanas: ta walan nisulat, Sika igalang mo naani so Dios a Katawan mo, tan sikato labat so panlingkoran mo.” (Mat. 4:8-10) On, kabat nen Jesus a say idakmomo ed si Satanas et sakey a gawan panagtalintao, anggano singa ompatnag a walaray gunggona na satan. Agto labay so ondakmomo ed siopaman anggan maminsan labat, nilikud ed si Jehova.

Nayarin agmet iyopresi nen Satanas ed sikatayo so amin a panarian na mundo tan say gloria na saratan pian sikatoy dakmomoan tayo. Balet anggad natan et sasalien ton isuawi so panagdayew na saray Kristiano ed Dios. Say labay na Diablo et mandayew tayo’d arum, persona man odino bengatla.​—2 Cor. 4:4.

Pinaneknekan nen Kristo Jesus so katooran to anggad patey. Diad lawas impanmatoor nen Jesus ed Dios, inggloria to si Jehova diad paraan ya agnin balot agawaan na anggan siopaman. Bilang tuan Kristiano natan, panggugunaetan tayon aligen so matoor ya impanbilay nen Jesus diad pangiyuuna tayo ed panagdayew tayo’d Manamalsa. On, say maabig a relasyon tayo ed Dios so sankablian a kayamanan tayo.

Saray Bendisyon a Resulta na Makapaliket ed Dios a Panagdayew

No suportaan tayoy “paraan na panagdayew a malinis tan ag-arutakan” ed pakanengneng na Dios, makagamor tayoy dakel a bendisyon. (Sant. 1:27, NW) Alimbawa, diad panaon a pambibilayan  tayo et ondarakel so totoon ‘maaro ed saray lamalaman da, maaro ed pilak, managpasirayew,’ tan “maingongot ed saray maabig.” (2 Tim. 3:1-5) Anggaman ontan, diad mismon sankaabungan odino kongregasyon na Dios, walay pribilehyo tayon makapilimog ed malinis tan matunong a totoon manggugunaet a mansiansia’d saray estandarte na Dios nipaakar ed panagdayew. Agta makaparepresko itan?

Say malinis a konsiensia et kaaruman nin bendisyon na pansiasiansia tayon ag-arutakan ed sayan mundo. Labay tayon pansiansiaen so malinis a konsiensia panamegley na pampapasakop tayo ed saray matunong iran prinsipyo na Dios tan itutulok tayo ed saray ganggan nen Cesar ya agsumlang ed saray ganggan na Dios.​—Mar. 12:17; Gawa 5:27-29.

Say interon kamarerwan panagdayew et makapangitarok na sananey nin bendisyon. No say pangisentroan tayoy imano et say panggawa na linaway Dios aliwan say panlabayan tayo, magmaliw a makapenek tan makabaliksan so bilay tayo. Agtayo ibabaga so “mangan itayo tan oninum itayo, sirin ta nabuas ompatey itayo,” lapud walaan itayoy napanmatalkan ya ilalon andi-anggaan a bilay diad paraison dalin.​—1 Cor. 15:32.

Ipapasakbay na Apocalipsis ya onsabi panaon, saramay apansiansia ran malinis so talindeg da ed arap nen Jehova et makaliktar ed “baleg ya irap.” Ibabaga na satan a “say wala a manyurong ed trono ibuskag to so tabernakulo to ed sikara.” (Apo. 7:13-15) Sayan akayurong ed trono et anggapoy arum noagta si Jehova, say sankagloriaan a Persona ed uniberso. Nonoten pay agaylan liket a naliknam sano aabrasaen to ka la bilang sankaili ed tabernakulo to, a proteksionan tan asikasoen to ka pian anggapoy onsabin pakasakitan mo! Balet, anggan natan ni labat et proproteksionan tan aasikasoen to itayo la.

Kaaruman ni, diad Apocalipsis et adeskribe met ya amin iramay mandadayew diad paraan a makapaliket ed Dios et igigiya ed “saray subol na danudanum na bilay.” Sarayan makarepreskon subol et mangirerepresenta ed amin a probisyon nen Jehova parad pakagamor tayoy andi-anggaan a bilay. On, diad panamegley na dondon nen Kristo, “say Dios punasen to so balang lua ed saray kamataan da.” (Apo. 7:17) Magmaliw met lan perpekto so katooan, tan satan so manresulta’d agnasabsabaan a liket parad saramay walaay ilalon manbilay ya andi-anggaan diad dalin. Anggan natan ni labat, saray maliket a managdayew ed Dios so magaygayagan mangikekelyaw na impapuson pisasalamat ed si Jehova, tan mandadayew ed sikato a kaiba na saramay walad tawen a mangikakanta: “Angkakabaleg tan makapakelaw so saray gawam, O Katawan a Dios, a Makapanyarin-amin; maptek tan tua so saray dalan mo, Ari na saray tinaon. Siopa so ag-ontakot ed sika, O Katawan, tan agmangigalang ed ngaran mo? Ta sika lambengat so Santo; kanian amin a nasyones ondago ra tan mangigalang ira ed arap mo; ta saray gawam a matunong sikara so nipatnag.”​—Apo. 15:3, 4.

[Litrato ed pahina 27]

Antoy iyoopresi nen Satanas pian isuawi tayoy panagdayew tayo manlapud si Jehova?