Pansiansiaen so “Tinalo a Lubir” ed Panamaley

“Say tinalo a lubir sikato so agmaganggano a napultot.”​—ECL. 4:12.

1. Siopa so angasal ed inmunan laki tan bii?

 KAYARIN pinalsa nen Jehova iray tanaman tan ayayep, ginawa to so inmunan too, si Adan. Diad saginonor, pinaugip na Dios si Adan na araldalem ya ugip, insan anguyos na sakey a taglang nen Adan pian igawaan Toy perpekton katulongan. Sanen anengneng nen Adan iyan bii, oniay inkuan to: “Saya so pukel na saray pukepukel ko, tan laman na laman ko.” (Gen. 1:27; 2:18, 21-23) Insan To kinasal irayan inmunan laki tan bii, tan benendisyonan to ra, a mangipapanengneng labat a nanliketan to so resulta na impamalsa to ed unaan a bii.​—Gen. 1:28; 2:24.

2. Panon ya angiyan si Satanas na problema ed panamaley di Adan tan Eva?

² Balet, makapaermen ta agni abayagan, sayan panangasawan inyuksoy na Dios et asubok. Panon? Sakey a marelmeng ya espiritu, a diad saginonor et atawag a Satanas, so amalikdo ed si Eva a mangan ed bunga na samay alenleneg a kiew ya insebel ed sanasawa. Agnambayag, akinonong met si Adan ed asawa ton si Eva, tan diad impanggawa ra ed satan, sikaray nanrebelde ed makanepegan ya uley na Dios tan ed maabig a panangiwanwan to. (Gen. 3:1-7) Sanen tinepetan nen Jehova iyan sanasawa no antoy ginawa ra, mapatpatnag la’d saman a wala lay problema ed relasyon dan sanasawa. Tinetel nen Adan so asawa to, a kuan to: “Say bii ya inter mo ya ibak, initdan to ak na bunga, et angan ak.”​—Gen. 3:11-13.

3. Say arum a Judio et awalaan na anton lingon panmoria?

³ Manlapu la’d satan, manguusar lay Satanas na nanduruman masilib iran paraan pian deralen so ulopan na sanasawa. No maminsan et uusaren to ray lider na relihyon pian mangikayat na agmakasulatan iran panmoria ed panamaley. Alimbawa, nileglemew na arum a Judion lider iray estandarte na Dios, ya inabuloyan dan idiborsyo na kaasawaan a lalaki iray kaasawaan da ed anggan melmelag labat a rason a singa say sobran panag-asin ed luto. Balet, oniay imbaga nen Jesus: “Siopaman a lakin mangidiborsyo ed asawa to, ya aliwan makasengeg ed pilalawanan, tan mangasawa na sananey so mankasalanan na pikakalugoran.”​—Mat. 19:9, NW.

4. Panon a nasusubok natan so uksoyan na panamaley?

⁴ Agni tinmunday Satanas ed pamapasya ton maneral ed uksoyan na panamaley. Natan, diad arum iran pasen et legal lay pankasal na parehon laki odino bii, naabuloyan lay panamong na ag-kasal, tan main-inomay so pakalay diborsyo. Ipapanengneng labat na saya a talagan ontatalonay Satanas ed sayan pamaakaran. (Basaen so Hebreos 13:4.) Bilang Kristiano, anto so nayarin gawaen tayo pian agtayo naimpluensyaan na sayan kasmak lan pikewet a panmoria ed panangasawa? Balet, pantongtongan tayo pa ni no antoray nepeg a niwala ed sakey a panamaley pian magmaliw itan a matalona.

Pansiansiaen si Jehova ed Panamaley

5. No iyaplika ed panamaley, anto so kabaliksan na samay balikas a “tinalo a lubir”?

⁵ Pian magmaliw a matalona so panamaley, kaukolan a magmaliw a kabiangan na satan si Jehova. Oniay inkuan na Salita to: “Say tinalo a lubir sikato so agmaganggano a napultot.” (Ecl. 4:12) Sayan balikas a “tinalo a lubir” et piguratibo. No iyaplika ed panamaley, samay unonan duaran lubir et say asawan laki tan asawan bii, insan samay pegley a lubir ya akapotipotan da et si Jehova a Dios. No say sanasawa et akapotipot ed si Jehova, a singa panangibaga, sikaray nawalaan na biskeg a mangarap ed saray problema, tan satan so sankaimportantian pian nagamoran so sankabalegan a liket ed panamaley.

6, 7. (a) Anto so nayarin gawaen na saray Kristiano pian naseguro ran say Dios et walad panamaley da? (b) Anto so aapresyaen a maong na sakey ya agin bii ed kinen masiken to?

 ⁶ Balet, anto so nayarin gawaen na sanasawa pian naseguro ran say panamaley da et singa tinalo a lubir? Oniay inkuan nen salmistan David: “Makaliket ak a mangunor na linawam, O Dios ko; on, say ganggan mo wala ed dalem na pusok.” (Sal. 40:8) Diad biang tayo, say panangaro met ed Dios so mamakiwas pian sigpot puso tayon makapanlingkor ed sikato. Kanian, nepeg a bayuboan na balang sakey ed sanasawa so maapit tan personal a siglaotan ed si Jehova, tan nepeg dan panliketan so panggaway linawa to. Nepeg met a panseetan na saray kaasawaan a pabiskegen so panangaro na kapareha ra ed Dios.​—Uli. 27:17.

⁷ No say ganggan na Dios et talagan walad utel na puso tayo, napatnagan ed sikatayo iray kalidad a singa say pananisia, ilalo, tan panangaro, tan ontulong iraya pian onelet so relasyon na sanasawa. (1 Cor. 13:13) Oniay inkuan na sakey a Kristianon manngaran na Sandra, a 50 taon lan kasal: “Say aapresyaen kon maong ed kinen masiken ko et saramay bilibilin tan simbawa ton nibase’d Biblia. Sakey ni, mas inaro toy Jehova nen say siak.” Sikayoran kaasawaan a lalaki, ontan met kasi nibaga na kaasawaan yo nipaakar ed sikayo?

8. Anto so kaukolan pian nagamoran so “maong a tumang” diad panamaley?

⁸ Bilang sanasawa, kasin iyuuna yo ed bilay yo so relasyon yo ed si Jehova tan saray Kristianon aktibidad? Sakey ni, talaga kasin ipapasen yon say asawa yo so kapareha yo ed panaglingkor ed si Jehova? (Gen. 2:24) Oniay insulat nen makabat ya Arin Solomon: “Say duara sikara so magmaong nen [say] sakey, lapu ed walaan ira na maong a tumang nipaakar ed kimey da.” (Ecl. 4:9) On, talagan nepeg a mansagpot a maong so sanasawa pian nagamoran da so “maong a tumang,” salanti, say ulopan a napnoy aroan, agnabuyak, tan aabobonan nen Jehova.

9. (a) Antoray responsabilidad na kaasawaan a lalaki? (b) Unong ed Colosas 3:19, panon so nepeg a pantrato na asawan laki ed asawa to?

⁹ Say pakanengnengan no kasin say Dios et walad panamaley et no panggugunaetan na sanasawa a kapeten iray kakaukolanen To. Say manunan obligasyon na kaasawaan a lalaki et say pangitarya na materyal tan espiritual a pankaukolan na pamilya ra. (1 Tim. 5:8) Papasesegen met iran magmaliw a manonot ed emosyonal iran pankaukolan na asawa ra. Diad Colosas 3:19 et oniay nabasa tayo: “Asawan lalaki, aro yo so saray kaasawaan yo, tan agkayo magmaliw ya ampait ed sikara.” Unong ed eksplinasyon na sakey ya iskolar na Biblia, sayay balikas a “magmaliw ya ampait” et kabaliksan toy “pansalita ed sikara na ansasakit, odino pangabil, tan pangikibot ed sikara na panangaro, panangasikaso, materyal a pankaukolan, proteksion, tan tulong.” Seguradon agmanepeg ed sakey a pamilyan Kristiano so ontan a kagagawa. No say asawan laki et maaro so pangipapanengneng toy inkaulo to, labalabay na asawa to so manpasakop ed sikato.

10. Anton awawey so nepeg ya ipatnag na saray Kristianon kaasawaan a bibii?

¹⁰ Saray kaasawaan a bibii a kaliktan dan pansiansiaen si Jehova diad panamaley da et nepeg met a mangapet ed saray kakaukolanen To. Oniay insulat nen apostol Pablo: “Sikayo ya asawan bibii, pauleyan kayo ed saray kaasawaan yo a dili, a singa met ed Katawan. Ta say asawan laki sikato so ulo na asawan bii, a singa si Kristo met sikato so ulo na iglesia [odino kongregasyon].” (Efe. 5:22, 23) Pinalikdo nen Satanas si Eva diad impangisugsog toy katilaan a mas maliket so bilay no agmanpasakop ed Dios. Natan et sankapatnagan so agmapasakop ya awawey ed dakel iran panamaley. Balet, parad saray matakot ed Dios a bibii, say panagpasakop ed maaron ulo ra et aliwan makapaingongot. Agda lilingwanan ya intalaga nen Jehova si Eva a magmaliw a “katulongan” nen masiken to, sakey a betang a mapatpatnag ya impasen na Dios bilang mapagalang. (Gen. 2:18) Say asawan bii a mabulbulos a manpapasakop ed sayan uksoyan et petepeteg a sakey a “balanget” ed kinen masiken to.​—Uli. 12:4.

11. Anto so imbaga na sakey ya agin laki ya akatulong ed panamaley to?

¹¹ Makatulong met ed sanasawa so saniban panaral ed Biblia pian napansiansia ra so Dios ed panamaley da. Oniay inkuan nen Gerald, a maliket ed panamaley ton 55 taon la, “Pian magmaliw a matalona so panamaley, sankaimportantian so saniban pambasa tan panaral ed Biblia.” Inyarum to ni, “No saniba yon gagawaen iray bengatla, lalo la iray espiritual a bengatla, lalo kayon onapit ed sakey tan sakey, tan ed si Jehova.” Say saniiban panaral ed Biblia et ontulong met ed pamilya pian napansiansia  ran mabitabitar ed kanonotan da iray estandarte nen Jehova, onaralem so espiritualidad da, tan mantultuloy iran onaligwas ed espiritual.

12, 13. (a) Akin ya importantin tuloy a saniban manpikasi so sanasawa? (b) Anto ni ray arum ya espiritual a kimey a mamabiskeg ed panamaley?

¹² Saray sanasawan maliket ed panamaley da et saniba met a manpipikasi. No say asawan laki et ‘ipaway toy puso to,’ ya espisipikon ton bitlaen iray kerew to nipaakar ed kipapasen dan sanasawa, segseguradon ombiskeg so relasyon da. (Sal. 62:8) Alimbawa, agta kayari yon saniban sinmingger ed Makapanyarin-amin pian onkerew na panangiwanwan et mas mainomay lan palampasen iray agyo pantatalosan? (Mat. 6:14, 15) Bilang pitunosan ed pikakasi yo, manepeg labat a gawaen a determinasyon na balang sakey ed sikayo a tulongan so asawa yo, tan mantultuloy ya ‘itepel tan perdonaen so sakey tan sakey.’ (Col. 3:13) Tandaan yon no manpikasi kayo, ipapanengneng yon manmamatalek kayo ed Dios. Inkuan nen Arin David: “Saray mata na amin mantalaran ira ed sika.” (Sal. 145:15) No onasingger itayo ed Dios diad pikakasi, ya ag-itayo man-nenegatibo, mas daiset iray kapagaan tayo, lapud amta tayon ‘aasikasoen to itayo.’​—1 Ped. 5:7.

¹³ Importante met so iyatendi ed saray pantitipon na kongregasyon tan panulop na sanasawa ed ministeryo pian napansiansia ra si Jehova ed panamaley da. Diad saray pantitipon et naaralan na saray sanasawa no panon dan nalabanan iray “pangalot” ya uusaren nen Satanas pian buyaken so pamilya. (Efe. 6:11) Tan say sanasawan regular a sankaiban mankikimey ed ministeryo et naaralan day ‘mansiansian malet, agnagiing.’​—1 Cor. 15:58.

Sano Walaray Problema

14. Antoray nayarin mangarum ed pakakadesdesay panamaley?

¹⁴ Tua ya aliwa lan balo iray asalambit a suhestion, balet ta akin et agsalien ya itongtong iraya ed asawam, ya ibesngaw yon amin so walad liknaan yo? Nengneng yo, ompan walaray punto dia a kaukolan yon mas paaligwasen diad panamaley yo. Anggaman ontan, bibidbiren na Biblia ya anggan saramay walad panamaley da so Dios et makasagmak met na ‘irap ed laman.’ (1 Cor. 7:28) Lapud agtayo inkayadyari, say impluensya na sayan mauges a mundo, tan saray pakana na Diablo, anggan saray panamaley na matoor a lingkor na Dios et nayarin pinasyan nadetdet. (2 Cor. 2:11) Balet ta tulongan itayo nen Jehova a manalona ed saratan. On, nasarag tayo itan. Say matoor a lakin si Job et naandin amin so ayep to, ariripen to, tan anggan  saray anak to. Ingen ta oniay inkuan na Biblia: “Dia ed saya ya amin si Job agnankasalanan, agto met inpaakar a maatiw [so] Dios.”​—Job 1:13-22.

15. Anto so nayarin ikiwas na sakey sano nadedesdes, tan antoy sankaabigan a gawaen na sakey a de-asawa no bilang ta ontan so inkiwas na asawa to?

¹⁵ Onia balet so inkuan na asawa nen Job: “Matoor ka nin siansia anto? Akin et agmo la isambay Dios, pian ompatey ka la?” (Job 2:9, Maung a Balita) On, no walaray trahedya odino arum ni ran mairap a kipapasen, saray kapagaan a tarok na satan et nayarin manresulta ed agmakatunongan ya ikiwas na sakey. Oniay naobserbaan na sakey a makabat a too: “Peteg a say pampalalo [“desdes,” NW] gawaen to so makabat a too a maatiw.” (Ecl. 7:7) No bilang ta akapansalitay ansakit so asawam lapud nasasagmak yon problema odino “desdes,” mankalmado ka labat. Ta no ombawi ka, ompan walad sikayoy makapangibaga laingen na aliwa, a mamaloor labat ed situasyon. (Basaen so Salmo 37:8.) Kanian, palampas mo la iray ‘salitan agninonot’ a nayarin nibaga labat lapud inkadesperado odino inkadismaya.​—Sal. 106:33.

16. (a) Panon ya onaplika ed panamaley iramay imbaga nen Jesus a naromog ed Mateo 7:1-5? (b) Akin et importantin maong ed panamaley so pagmaliw a balanse?

¹⁶ Nepeg a magmaliw a realistiko iray sanasawa ed saray iilaloan da. Alimbawa, nayarin naobserbaan na sakey a walaray duman kagagawa na asawa to, tan ikuan ton, ‘Napanguman ko lanlamang ya’y asawak.’ Nayari lagin tekep na aro tan anos et sikatoy natulongan mon kalkalnan manguman. Balet, agmo komon lilingwanan imay inkuan nen Jesus a say toon naiimano toy anggan melmelag labat iran lingo na arum et mipara ed samay toon anengneng toy “taep” ed mata na agi to, balet say “pagsen” a walad mismon mata to et agto naimano. Oniay bilin nen Jesus ed sikatayo: “Agkayo mangukom, pian agkayo naukom.” (Basaen so Mateo 7:1-5.) Anggaman kuan, agmet labay ya ibaga na saya a paulyanan tayo la iramay talagan nepeg ya ipepetek. Oniay inkuan nen Robert ya 40 taon lan kasal: “No matua tan prangkaan kayon mantongtong tan mabulos yon awaten iray makatunongan met ya obserbasyon, nayarin manresulta itan ed panggawa yo na saray pananguman.” Kanian, magmaliw kayon balanse. Tan imbes a pansakitay ulo iramay ugalin labay yo komon a nanengneng ed asawa yo, aral yon awaten tan apresyaen no antoray positibon kalidad a wala la’d sikato natan.​—Ecl. 9:9.

17, 18. No agla nasabaan iray problema, iner so pakaromogan tayo na tulong?

¹⁷ Nayarin onsabi iray subsubok no manguman iray kipapasen ed bilay. Alimbawa, nayarin walaray onlesan problema no nanilalak la ray sanasawa. Ompan mansakit na grabe so sakey ya asawa odino anak. Nayarin kaukolan na ontatatken la ran ateng so nikadkaduman panangasikaso. Ontan met, nayarin onalis tan manpirmi la’d arawin pasen iray angkabaleg lan anak. Nayari met a nauman iray situasyon no walaray aasikasoen a responsabilidad diad kongregasyon odino diad organisasyon. Amin na sarayan pananguman et nayarin mangitarok na desdes tan kapagaan ed sakey a relasyon.

¹⁸ Natan no liknaen yon sinmabi la’d punton agyo la nitepel so pinasyan pakakadetdetan na panamaley yo, antoy gawaen yo? (Uli. 24:10) Agkayo onsusuko! Si Satanas et labalabay to no walay sakey a lingkor na Dios a manaynan ed tuan panagdayew. Kanian seguradon agaylay panliket to no sanasawa so manggawa ed satan. Kanian, gawa yoy anggaay nayarian yo pian naseguron mansiansian tinalo a lubir so panamaley yo. Diad Biblia et amayamay so salaysay nipaakar ed saray nansiansian matoor anggano dinmadalan ira’d pinasyan subok. Alimbawa, aminsan et imbesngaw nen David ed si Jehova so amin a walad puso to, tan oniay inkuan to: “Mapangasi ka ed siak, O Dios ta say too . . . imermer to ak.” (Sal. 56:1) Asali yo ta lay inmedmer na sakey a “too”? Balang lan say manedesdes ed sikayo et sakey a toon anggapon balot so pirelasyonan yo odino samay mismon maap-apit ed sikayo, tandaan yon si David et akagamor na biskeg pian makapansungdo, kanian nasarag yo met itan. “Inanap ko si Jehova, et sikato inebatan  to ak,” so kuan nen David. “Inliktar to ak ed amin a pagpagak.”​—Sal. 34:4.

Kaaruman nin Bendisyon

19. Panon tayon nipulisay iray panangataki nen Satanas?

¹⁹ Diad sayan panaon na anggaan, nepeg a “mantultuloy a ligliwaen tan pabiskegen” na sanasawa so sakey tan sakey. (1 Tes. 5:11, NW) Aglilingwanan ya anggad natan et ibabaga ni nen Satanas a manmamatoor itayo labat ed Dios lapud sinisiblet iran rason. Gagawaen ton amin so paraan, laktip lay panaggulo ed panamaley, pian naderal so katooran tayo. Pian nipulisay tayo iray panangataki nen Satanas, kaukolan a sigpot itayon manmatalek ed si Jehova. (Uli. 3:5, 6) Oniay insulat nen Pablo: “Nayarian ko a gawaen so ganagana ed saman so mamabiskeg ed siak.”​—Fil. 4:13.

20. Antoray bendisyon no pansiansiaen so Dios ed panamaley?

²⁰ Dakel iray bendisyon a nagamoran no say Dios et walad panamaley. Ontan so apaneknekan nen Joel tan say asawa to ed 51 taon lan impaniba ra. Inkuan nen Joel: “Pisalsalamatan kon naynay si Jehova lapud si asawak, tan say maliket ya ulopan mi. Talagan akalmo ak na maong a kapareha.” Anto so sekreto ra? “Lawas min panggugunaetan a panengnengan na kaabigan, pasensia, tan panangaro so sakey tan sakey.” Siempre, no diad sayan sistema na bengabengatla, anggapo ed sikatayo so naspot a makapanggawa ed satan. Balet, siansian nepeg a panggunaetan tayon iyaplika ed panamaley tayo iray prinsipyo ed Biblia tan pansiansiaen tayo si Jehova ed panamaley. No ontan so gawaen tayo, say panamaley tayo et magmaliw a singa ‘tinalo a lubir ya agmagangganon napultot.’​—Ecl. 4:12.

Kasin Nanonotan Yo?

• Anto so kabaliksan na pagmaliw nen Jehova a kabiangan na panamaley?

• Anto so nepeg a gawaen na sanasawa no walaray onsabin problema?

• Panon tayon naamtaan no say Dios et walad panamaley?

[Tepetepet Parad Panagaral]

[Saray litrato ed pahina 18]

Ontulong ed sanasawa so saniban pampikasi pian natalonaan iray mairap a kipapasen