Kasin Idadaulo Yoy Pangipanengneng na Galang?

“Dia ed galang manpapalabian kayo.”​—ROMA 12:10.

1. Anto so mataltalag lan nipapatnag ed dakel a parte na mundo?

 DIAD arum a parte na mundo, say kaugalian na kalangweran nin ananak a panangigalang ed saray matatken la et diad marespeton italimukor da. Diad ontan et abeba iran nengnengen nen saramay matatken la. Diad sarayan komunidad, ipapasen met ya agmarespeto so ugaw no ibeneg toy matatken la. Anggaman nandurumay paraan a panangipanengneng na respeto ed nanduruman kultura, saratan a panangipanengneng na respeto so mangipanonot ed sikatayo ed Mosaikon Ganggan. Kalaktip ed saya so ganggan ya: “Onalagey ka naani ed arapan na ubanan ya ulo [bilang respeto], et pagalangan mo naani lupa na masiken.” (Lev. 19:32) Makapaermen, diad dakel a pasen et mataltalag lay pangipapanengneng na galang ed arum. Diad tua, say naiimano la natan et say agpanagrespeto.

2. Sioparay ibabaga na Biblia ya igalang tayo?

² Papablien a maong na Biblia so panangipanengneng na galang. Ibabaga na satan ed sikatayo ya igalang tayoy Jehova tan si Jesus. (Juan 5:23) Igaganggan itayo met a mangipanengneng na galang ed saray kapamilyaan tan saray kapananisiaan ontan met ed saray arum ed paway na kongregasyon. (Roma 12:10; Efe. 6:1, 2; 1 Ped. 2:17) Antoray pigaran paraan a nipanengneng tayon igagalang tayoy Jehova? Panon tayon ipanengneng so galang, odino aralem a respeto, ed saray kaagian tayo? Pantongtongan tayo iraya tan saray pigaran mitukoyan a tepet.

Igalang Tayoy Jehova tan say Ngaran To

3. Antoy sakey ya importantin paraan a pangigalang ed si Jehova?

³ Say sakey ya importantin paraan a nigalang tayoy Jehova et diad pangipanengneng na dugan respeto ed ngaran to. Nagkalautla et sikatayoy “totoo a nipaakar ed ngaran to.” (Gawa 15:14) Peteg a sakey a kagalangan so pakatawag ed ngaran na makapanyarin amin a Dios, si Jehova. Inkuan nen propeta Miqueas: “Saray amin a baley manakar ira balang sakey ed ngaran na dios to; et manakar itayo naani dia ed ngaran nen Jehova a Dios tayo ed ando lan ando lawas.” (Miq. 4:5) Sikatayoy ‘manakar ed ngaran nen Jehova’ diad panggunaet tayon isindag itan a ngaran ed kabibilay tayo kada agew. Unong ed panonot nen Pablo ed saray Kristiano ed Roma, no agtayo iyaplika ed kabibilay tayo so maong a balita ya ipupulong tayo, say ngaran na Dios so “naayew,” odino agnarespeto.​—Roma 2:21-24.

4. Panoy panmoria yo ed pribilehyo a mantasi ed ngaran nen Jehova?

⁴ Igagalang tayo met si Jehova diad panagtasin kimey tayo. Nensaman, inimbitaan nen Jehova so nasyon na Israel a magmaliw a tasi to, balet agda agawaan itan a betang. (Isa. 43:1-12) Mabetbet dan imbeneg si Jehova tan “pinasanok da so Santo na Israel.” (Sal. 78:40, 41) Diad kaunoran, sigpot a naandi na nasyon so pabor nen Jehova. Balet, misalsalamat tayo natan ed pribilehyon mantasi nipaakar ed si Jehova tan ipakabat so ngaran to. Gagawaen tayo itan lapud sikatoy inaro tayo tan pirawat tayon napasanto so ngaran to. Agta labalabay tayon ipulong so amta tayon katuaan nipaakar ed mangatatawen ya Ama tayo tan saray gagala to? Nalilikna tayo met so singa alikna nen apostol Pablo sanen inkuan to: “Say kapilitan sikato so amasoot ed siak; et abagey ak la no agko ipulong so ebanghelyo.”​—1 Cor. 9:16.

5. Panon a say pananisia ed si Jehova et mitukoyan ed panagrespeto ed sikato?

⁵ Inkuan na salmistan si David: “Saray mikabat na ngaran mo, iyan da so panmatalek da ed  sika; ta sika, Jehova, agmo inkaindan so saray mananap ed sika.” (Sal. 9:10) No peteg a kabat tayo si Jehova tan ipatnag so respeto ed kabaliksan na ngaran to, manmatalek itayo ed sikato a singa ginawa na saray matoor a lingkor to nensaman. Sayan talek tan pananisia tayo ed si Jehova et sananey nin paraan a nipanengneng tayoy galang ed sikato. Imanoen no panon a diad Biblia et mantukoyan so panagmatalek ed si Jehova tan panagrespeto ed sikato. Sanen sinmaew so Israel nensaman a manmatalek ed Sikato, intepet nen Jehova ed si Moises: “Kaunongan kabayag so pambalaw [odino agpanrespeto] da’d siak na sayan katooan? Panon kabayag so agda panisia ed siak, lapu ed saray amin a tanda a ginawak ed saray nanleleetan da?” (Num. 14:11) Tua met so kasunian. Diad panmatalek ed si Jehova a manprotekta tan ontulong ed sikatayo a nasungdoan iray subok, ipapanengneng tayon sikatoy rerespetoen tayo.

6. Antoy mamakiwas ed sikatayon ipanengneng so aralem a respeto ed si Jehova?

⁶ Impabitar nen Jesus a say panrespeto ed si Jehova et nepeg a manlapud puso. Sanen tutukoyen nen Jesus iramay say panagdayew da et aliwan masimoon, inaon toy imbaga nen Jehova a kuan to: “Sayan baley igalang to ak ed saray bibil da; say puso ra balet arawi’d siak.” (Mat. 15:8) Say masimoon a respeto ed si Jehova et manlalapud impapuson panangaro ed sikato. (1 Juan 5:3) Tan lawas tayo met a sankanonot so sipan nen Jehova: “Saray mangigalang ed siak igalang ko.”​—1 Sam. 2:30.

Saramay Mangidadaulo so Mangipanengneng na Respeto ed Arum

7. (a) Akin a saray agagin lalaki a walaan na responsablin posisyon so nepeg a mangipanengneng na galang ed saramay walad silong na panangasikaso ra? (b) Panon ya impanengneng nen Pablo so respeto ed saray kapananisiaan?

⁷ Binilin nen apostol Pablo iray kapananisiaan to: “Dia ed galang manpapalabian [“mangidaulo,” NW] kayo.” (Roma 12:10) Saray agagin walaan na responsablin posisyon ed kongregasyon so nepeg a mangipanengneng na ehemplo​—“mangidaulo”​—diad pangipanengneng na galang ed saramay walad silong na panangasikaso ra. Diad satan a pamaakaran, saray walaan na ambelat a responsabilidad so nepeg a manumbok ed ehemplon impanengneng nen Pablo. (Basaen so 1 Tesalonica 2:7, 8.) Amta na saray agagi ed saray kongregasyon a binisita nen Pablo ya agton balot pagawa ed sikara iray bengatlan agto labay a gawaen. Impanengneng nen Pablo so respeto ed saray kapananisiaan to, tan alikna to met itan a respeto. Sanen inkuan nen Pablo a, “kanian pikasik ed sikayo ta sikayo komon so manangalig ed siak,” makaseguro tayon dakel so mabulos ya angalig ed sikato lapud maabig ya ehemplo to.​—1 Cor. 4:16.

8. (a) Antoy sakey ya importantin paraan ya impanengneng nen Jesus so respeto ed saray babangatan to? (b) Panon a natumbok na saray manangasikaso natan so ehemplo nen Jesus?

⁸ Say sananey nin paraan a nipanengneng na responsablin agin laki so respeto ed saramay walad silong na panangasikaso to et say pangibaga toy rason ed espisipikon kerew odino no akin ya onman so inter ton panangiwanwan ed sikara. Diad panggawa to ed satan, aaligen toy Jesus. Singa bilang, sanen bibilinen to ray babangatan to a mangipikasi na dakel nin komikimey ya ibaki ed panag-ani, imbaga nen Jesus so rason ed sikara. Inkuan to: “Dakel a tua so aaniyen, daiset ira balet so manani. Pikasi yo sirin ed Katawan na aaniyen, pian mangibaki na saray manani ed aaniyen to.” (Mat. 9:37, 38) Mipadpara, sanen binilin to ray babangatan to a “manpuyat,” imbaga toy rason ed sikara. Inkuan to: “Ta agyo amta no anton agew so isabi Katawan yo.” (Mat. 24:42) Mabetbet, aglabat imbaga nen Jesus ed saray babangatan to no anto so nepeg dan gawaen, noagta no akin a gawaen da itan. Diad ontan, impanengneng toy respeto tan dignidad ed sikara. Agaylan maabig ya ehemplon tumboken na saray Kristianon manangasikaso!

Respetoen so Kongregasyon nen Jehova tan say Panangiwanwan na Satan

9. Siopa met so igagalang tayo sano ipapanengneng tayoy respeto ed sankamundoan a Kristianon kongregasyon tan saray representanti na satan? Ipaliwawa.

⁹ Pian napagalangan si Jehova, kaukolan tayo  met ya igalang so sankamundoan a Kristianon kongregasyon, pati saray representanti na satan. Sano tatalinengen tayo so Makasulatan a simbawa manlapud matoor ya aripen a klase, ipapanengneng tayoy respeto ed uksoyan nen Jehova. Diad Kristianon kongregasyon nen inmunan siglo, atebek nen apostol Juan a kaukolan ton ibalikas so agpanangabobon ed saramay ag-angipanengneng na respeto ed saray tinuron lalaki. (Basaen so 3 Juan 9-11.) Unong ed saray salita nen Juan, napatnagan a walaray ag-angipanengneng na respeto, aliwa labat ed saray indibidual a manangasikaso noagta ontan met ed saray bangat tan panangiwanwan da. Makapaliket ta maslak a Kristiano et aliwan ontan. Legan a mabilay ni iray apostol, say impanaagi bilang intero so angipanengneng na aralem a respeto ed saramay mangidadaulo.​—Fil. 2:12.

10, 11. Ipaliwawa manlapud Kasulatan no akin a manepeg a walaray naikdan na autoridad ed Kristianon kongregasyon.

¹⁰ Irarason na arum ya anggapoy siopaman a walaay autoridad diad Kristianon kongregasyon lapud inkuan nen Jesus ed saray babangatan ton ‘amin yo et sanaagi.’ (Mat. 23:8) Balet, diad Hebreo tan Griegon Kasulatan et dakel iray alimbawan lalaki ya inikdan na Dios na autoridad. Say awaran na saray patriarka, uko-ukom, tan arari ed limog na saray Hebreo nensaman et baleg a paneknek a mangiiter si Jehova na panangiwanwan panamegley na too iran representanti. Sanen ag-angipanengneng na manepeg a respeto iray totoo ed saray tinuro na Dios, sikaray dinisiplina nen Jehova.​—2 Ara. 1:2-17; 2:19, 23, 24.

¹¹ Mipadpara, binidbir na saray Kristiano nen inmunan siglo so autoridad na saray apostol. (Gawa 2:42) Alimbawa, angiter si Pablo na panangiwanwan ed saray agagi to. (1 Cor. 16:1; 1 Tes. 4:2) Balet, sikato met so mabulos a nampasakop ed saramay walaan na autoridad ed sikato. (Gawa 15:22; Gal. 2:9, 10) On, walaan sirin si Pablo na dugan panmoria ed autoridad diad Kristianon kongregasyon.

12. Anton duaran leksion nipaakar ed autoridad so naaralan tayo manlapud saray alimbawa ed Biblia?

¹² Duara so naaralan tayon leksion. Unona, Makasulatan parad “matoor tan makabat ya aripen” panamegley na say Mananguley ya Ulop na satan so panuro ed saray lalaki ed responsablin posisyon, tan arum a lalaki so aturo a walaan na autoridad ed arum ya aturon lalaki. (Mat. 24:45-47; 1 Ped. 5:1-3) Komadua, amin tayo, pati saray aturon lalaki, so nepeg a mangigalang ed saramay walaan na autoridad ed sikatayo. Anto sirin so pigaran praktikal a paraan a nipanengneng tayoy galang ed saramay walaan na posisyon a mangasikaso ed sankamundoan a Kristianon kongregasyon?

Ipanengneng so Respeto ed Saray Ombiabiahen Manangasikaso

13. Panon tayon nipanengneng so respeto ed saray representanti na Kristianon kongregasyon natan?

¹³ Inkuan nen Pablo: “Pikasi mi ed sikayo, agagi, a kabaten yo so saray misasagpot ed leet yo, tan mangiu-uley ed sikayo dia ed Katawan, tan manbilin ed sikayo; tan pablien yo’ra na sankatageyan ya aro lapu ed gawa’ra. Wala kayo komon ed kareenan dia ed inkasikayon dili.” (1 Tes. 5:12, 13) Saray ombiabiahen manangasikaso so talagan nibilang a kaiba ed saray ‘mansasagpot.’ Kanian, ipatnag tayo sirin so ‘sankatagyan a panamabli,’ odino konsiderasyon ed sikara. Say sakey  a paraan a nagawaan tayo iya et diad panamegley na interon puson panumbok ed simbawa tan panamaseseg da. Sano ipasabi na ombiabiahen manangasikaso ed sikatayo so panangiwanwan manlapud matoor ya aripen a klase, say ‘kakabatan ed tagey’ so mamakiwas ed sikatayon “mainomay ya [“ontulok,” NW].”​—Sant. 3:17.

14. Panon ya ipapatnag na kongregasyon so impapuson respeto ed saray ombiabiahen manangasikaso, tan anto so resulta?

¹⁴ Komusta balet no niwanwan itayon gawaen iray bengatla a miduma ed nipasal tayon paraan? No maminsan, nipanengneng tayoy respeto diad agtayo pangibaga na, “Aliwan ontan so paraan mi dia” odino, “Epektibo itan ed arum iran pasen balet agnayari itan ed kongregasyon mi.” Imbes, panggunaetan tayoy ontulok. Pian nagawaan iya, makatulong so lawas pannodnonot a say kongregasyon et kayarian nen Jehova, tan si Jesus so Ulo na kongregasyon. Sano inawat tekep na gayaga tan tinumbok na kongregasyon so panangiwanwan manlapud ombiabiahen manangasikaso, pakapatnagan itan na impapuson respeto. Kinomendaan nen apostol Pablo iray agagi ed Corinto lapud marespeton katutulok da ed panangiwanwan ya inter na binmisitan matatken a si Tito. (2 Cor. 7:13-16) Natan, makaseguro itayo met a no mabulos tayon iyaplika so panangiwanwan a manlalapud ombiabiahe iran manangasikaso, lalo tayon panggayagaan so panagpulong a kimey tayo.​—Basaen so 2 Corinto 13:11.

“Igalang Yo so Amin a Totoo”

15. Antoray pigaran paraan a nipanengneng tayoy respeto ed saray kapananisiaan?

¹⁵ Insulat nen Pablo: “Agmo banoen so sakey a masiken, noag ingen sikato so simbawaen mo a singa ama; saray tobonbalo simbawam ira a singa agagi. Saray akukulaw singa’ra say ina, saray mamarikit singa ra agagi, dia ed amin a kasimpitan. Pagalangan mo so saray bibii a babalo a sikara so peteg a balo.” (1 Tim. 5:1-3) On, bibilinen itayo na Salita na Dios ya igalang so amin ed Kristianon kongregasyon. Komusta balet no agyo napibagayan so sakey ya agi? Kasin sengegan la itan na agyo panrespeto ed satan a kaparan Kristiano? Odino nayari yon umanen so awawey yo diad pangimano ed saray maabig a kalidad na satan a lingkor na Dios? Saramay walaan na autoridad so nagkalalo lan mamasiansia ed marespeton panangipasen ed saray agagi ra, ya agbalot ‘pakatawan ed pulok.’ (1 Ped. 5:3) On, diad Kristianon kongregasyon, a nabidbiran ed impapuson panaaroan na saray kabiangan na satan, walaan itayo na dakel a pankanawnawan igalang so sakey tan sakey.​—Basaen so Juan 13:34, 35.

16, 17. (a) Akin ya importante so panrespeto ya aliwa labat lan diad saray pupulongan tayo noagta ontan met ed saray onsusumpa? (b) Panon tayon “igalang so amin a totoo”?

 ¹⁶ Siempre, aliwan saramay kabiangan labat na Kristianon kongregasyon so pangipanengnengan tayo na respeto. Onia so insulat nen Pablo ed saray Kristiano ed panaon to: “Unong a wala so kiambegya manggawa itayo na maabig ed saray amin.” (Gal. 6:10) Tua, nayarin mairap so pangiyaplika ed satan a prinsipyo no say katrabahoan odino kaeskuelaan tayo et makapuy so panagtrato ra ed sikatayo. Diad saratan a bekta, kaukolan tayon nonoten iray salitan: “Agmo gonigonen so inkasika [“agka manpapetang,” NW] nisengeg ed saray managgawa na mauges.” (Sal. 37:1) Say pangiyaplika ed satan a simbawa so ontulong ed sikatayon lawas onkiwas a marespeto anggan ed saramay onsusumpa. Mipadpara, legan itayon manpupulong, say mapaabeban pangipasen ed inkasikatayo so ontulong ed sikatayon onebat ed amin a tinekepay ‘mauyamo tan [“aralem a respeto,” NW].’ (1 Ped. 3:15) Anggan say itsura tan panangawes tayo so pakapatnagan a rerespetoen tayo iramay pupulongan tayo.

¹⁷ On, balanglan midedeneng itayo ed saray kapananisiaan tayo odino ed saray walad paway na kongregasyon, labay tayon panggunaetan ya iyaplika iyan bilin: “Igalang yo so amin a totoo. Aroen yo so impanaagi, takotan yo so Dios. Igalang yo so ari.”​—1 Ped. 2:17.

Panon Yon Ebatan?

Panon yon nipanengneng so manepeg a respeto ed:

• Si Jehova?

• Saray mamatatken ed kongregasyon tan saray ombiabiahen manangasikaso?

• Kada membro na kongregasyon?

• Saramay pupulongan yo?

[Tepetepet Parad Panagaral]

[Litrato ed pahina 23]

Nirespeto na saray Kristiano nen inmunan siglo so panangasikaso na mananguley ya ulop

[Litrato ed pahina 24]

Saray mamatatken ed amin a dalin so mangigagalang ed saray ombiabiahen manangasikaso, a tinuro na Mananguley ya Ulop