Kaunongan so Mabulos Yon Isakripisyo Pian Nagamoran so Andi-anggaan a Bilay?

“Anto kasi iter na too ya isandi to’d bilay to?”​—MAT. 16:26.

1. Akin ya impulisay nen Jesus so pamabano nen Pedro?

 ABIGBIGLA si apostol Pedro ed nadngel to. Say inad-aro ton Lider, si Jesu-Kristo, so diretsaan ya angibaga a Sikatoy magano lan manirap tan ompatey! Inmebat si Pedro, a walaan na maabig ya intension, diad pamabano ed si Jesus, a kuan to: “[“Katawan, kasian moy inkasika,” NW] saya agkomon nagawa anggan kapigan ed sika.” Imbeneg nen Jesus si Pedro tan ninengneng to ray arum a babangatan to. Nayarin onman met so lingon opinyon da. Insan inkuan to ed si Pedro: “Ekal ka’d arap ko, Satanas. Sikay sakey a makapagapol ed siak; ta agmo nononoten iray bengatlan nipaakar ed Dios, noag saray bengatlan nipaakar ed saray totoo.”​—Mar. 8:32, 33; Mat. 16:21-23.

2. Panon ya impabitar nen Jesus iray kakaukolanen ed sakey a tuan babangatan?

² Nayarin atebek nen Pedro ed saray tinmumbok a salita nen Jesus no akin ya ontan lay reaksion nen Jesus ed pamabano to. “Tinawag [nen Jesus] so karaklan a pati saray babangatan to” tan inkuan to: “No siopaman a too labay toy ontumbok ed siak, iburi to so inkasikato, et awiten to so [“panamairapan a kiew to,” NW], tan [mantultuloy a] tumboken to ak. Ta siopaman a mangilaban na bilay to, sikato so nabalang to naani; tan siopaman a makabalang na bilay to nisengeg ed siak tan say ebanghelyo sikato naani nilaban to.” (Mar. 8:34, 35) Malinew, agto labat la ibagat so bilay to noagta inilaloan to met a saramay ontumbok ed sikato et kaukolan ya akaparaan met a mangisakripisyo ed bilay da diad panaglingkor ed Dios. No gawaen da itan, naawat da so daakan a tumang.​—Basaen so Mateo 16:27.

3. (a) Antoray intepet nen Jesus ed saray patumbok to? (b) Anto so nayarin anonotan na saray dumerengel nen Jesus ed komaduan tepet to?

³ Diad saman met lanlamang a bekta, angitepet  si Jesus na duaran makapainteres a tepet: “Anto so pinabangan na sakey a too, a makagamor na sankamundoan, tan nabalang to so bilay to?” tan, “Anto tay niiter na too ya isandi ed bilay to?” (Mar. 8:36, 37) Mabitabitar la so ebat ed unonan tepet. Anggapoy gunggona na sakey a too anggan nagamoran toy interon mundo no nabalang toy bilay to. Mausar labat iray materyal a kayarian no mabilay so sakey pian panliketan iratan. Say komaduan tepet nen Jesus ya, “Anto tay niiter na too ya isandi ed bilay to?” so nayarin angipanonot ed saray dumerengel to ed akusasyon nen Satanas ed panaon nen Job: “Amin a say too wala ed sikato iter to nipaakar ed bilay to.” (Job 2:4) Parad arum ya agmandadayew ed si Jehova, nayarin tua iray akusasyon nen Satanas. Dakel a totoo et gawaen day antokaman pian labat mansiansian manbilay, anggano nasumlang la iray prinsipyo. Duma balet so panmoria na saray Kristiano ed saray pamaakaran.

4. Akin a walaan na mas aralem a kabaliksan iray tepet nen Jesus parad saray Kristiano?

⁴ Amta tayo ya aglinma diad dalin si Jesus pian pagamoran itayo na bunigas, kayamanan, tan andukey a bilay ed sayan mundo. Linma’d dia pian ilukas so pankanawnawan manbilay ya andi-anggaan diad balon mundo, tan papablien tayon maong itan ya ilalo. (Juan 3:16) Natalosan na sakey a Kristiano so kabaliksan na unonan tepet nen Jesus, “Anto so pinabangan na sakey a too, a makagamor na sankamundoan, tan nabalang to so bilay to?” Siempre, say ebat et, Anggapon balot so nagunggona. (1 Juan 2:15-17) Pian natulongan itayon ebatan so komaduan tepet nen Jesus, tepetan tayoy inkasikatayo, ‘Kaunongan so mabulos kon isakripisyo natan pian segurado so ilalok a manbilay ed balon mundo?’ Say ebat tayo ed satan a tepet, a napatnagan ed kabibilay tayo, so mangiparungtal ed biskeg na satan ya ilalo ed kapusoan tayo.​—Ikompara so Juan 12:25.

5. Panon tayon nagamoran so regalon andi-anggaan a bilay?

⁵ Siempre, ag-ibabaga nen Jesus a say andi-anggaan a bilay et naanap diad pantrabaho. Say bilay​—anggan say antiktikey a bilay ed sayan sistema na bengabengatla​—et sakey a regalo. Agtayo nasaliw itan nisay nagawaan so antokaman pian naawat itan. Say alenleneg a paraan pian nagamoran so regalon andi-anggaan a bilay et say “pananisia ed si Jesu-Kristo” tan ed si Jehova, “a mananumang ed saray mananap ed sikato.” (Gal. 2:16; Heb. 11:6) Balet, nepeg tayon paneknekan so pananisia tayo panamegley na saray gawa, lapud “say pananisia ya andi gawa inatey.” (Sant. 2:26) Kanian, no lalo tayon dadalepdepen so tepet nen Jesus, namotektek tayon maong no kaunongan so mabulos tayon isakripisyo ed sayan sistema na bengabengatla tan no anto so mabulos tayon gawaen diad panaglingkor ed si Jehova, pian paneknekan a talagan mabilabilay so pananisia tayo.

‘Si Kristo Agto Pinaliket so Inkasikaton Dili’

6. Antoy prayuridad nen Jesus?

⁶ Imbes a say imanoen nen Jesus et say niyopresi na mundo ed panaon to, say angiyapasakeyan toy imano et diad saray importantin bengatla tan impulisay toy tukson materyal iran pankaabigan.  Say kabibilay to et pakapatnagay panagsakripisyo tan katutulok ed Dios. Imbes a paliketen so inkasikato, inkuan to: “Gawaen ko lawas so saray bengatla a makapaliket ed [Dios].” (Juan 8:29) Kaunongan so insakripisyo nen Jesus pian napaliket so Dios?

7, 8. (a) Anton sakripisyo so ginawa nen Jesus, tan panon ya atumangan? (b) Anto so nepeg tayon itepet ed inkasikatayo?

⁷ Diad aminsan ya inkagawa, inkuan nen Jesus ed saray babangatan to: “Say Anak na too ya agdia linma a panlingkoran, noag say manlingkor, tan iter toy bilay to a panondon ed amayamay.” (Mat. 20:28) Antis na satan, sanen papasakbayan la nen Jesus iray papatumbok to a magano to lan ‘iter so bilay to,’ inkuan nen Pedro ed sikato a kasian toy inkasikato. Balet, nansiansian mapekder si Jesus. Mabulos ton insakripisyoy bilay to, salanti, say ayadyarin bilay to bilang too, parad katooan. Lapud satan a masakripisyon ginawa nen Jesus, segurado so dilin arapen to. Sikatoy apaoli tan ‘nitandoro ed nikawanan na Dios.’ (Gawa 2:32, 33) Diad ontan et sikatoy nagmaliw ya alay abig ya ehemplo tayo.

⁸ Sinimbawa nen apostol Pablo iray Kristiano ed Roma ya ‘agda paliketen’ so inkasikara tan impanonot to ed sikara ya anggan “si Kristo met agto pinaliket so inkasikaton dili.” (Roma 15:1-3) Kanian, kaunongan kalaknab so pangiyaplika tayo ed simbawa na apostol tan kaunongan so mabulos tayon isakripisyo bilang panangalig ed si Kristo?

Pilalek nen Jehova ya Iter Tayoy Sankaabigan Tayo

9. Anto so talagan gagawaen na sakey a Kristiano sanen indedika toy inkasikato ed Dios?

⁹ Diad Israel nensaman, impakseb na Mosaikon Ganggan a saray Hebreon ariripen so nepeg a bulosan diad komapiton taon a panseserbi ra odino legan na taon na Jubileo. Balet, wala ni napampilian da. No say sakey ya aripen et agustoan to lay manayam ed sankaabungan na akankayarian ed sikato, nayari ton pilien so mansiansian aripen ditan legay bilay to. (Basaen so Deuteronomio 15:12, 16, 17.) Mipadpara met so ginawa tayo sanen indedika tayoy inkasikatayo ed Dios. Mabulos tayon inmabobon a gawaen so linawa na Dios, ya agtayo gawaen so dilin panlabayan tayo. Diad panggawa tayo ed satan, ipapatnag tayoy aralem a panangaro tayo ed si Jehova tan ed pilalek tayon manlingkor ed sikato ed andi-anggaan.

10. Diad anton paraan a kayarian itayo na Dios, tan panon a satan a katuaan et mangapekta ed nonot tan saray kiwas tayo?

¹⁰ No diad kaplesan et iyaaralan ka na saray Tasi nen Jehova tan mibibiang ka met la ed panangipulong ed maong a balita tan onaatendi la ed saray pantitipon na Kristiano, nakomendaan ka. Ilaloan mi ya agmabayag et napakiwas kan idedika so inkasika ed si Jehova tan nitepet mo met so singa intepet na sakey ya Etiope ed si Felipe: “Anto so makasbel a nabinyagan ak?” (Gawa 8:35, 36) Say relasyon mo ed Dios et singa met ed saramay Kristiano a sinulat nen Pablo: “Aliwa a sikayo so makankien ed sikayon dili; ta sikayo, asaliw kayo na sakey a bili.” (1 Cor. 6:19, 20) Balanglan say ilalo tayo et manbilay diad tawen odino diad dalin, no indedika tayo lay inkasikatayo ed si Jehova, sikato lay Akankayarian ed sikatayo. Agaylan importante sirin ya amperen tayo iray dilin pilalek tan ‘agla magmaliw ya aripen na totoo’! (1 Cor. 7:23) Alay abig a pribilehyo so pagmaliw a matoor a lingkor nen Jehova pian pausar ed sikato ed paraan a panliketan to!

11. Anton bagat so ipapaseseg ed saray Kristiano ya iyapay da, tan anto so peteg a kabaliksan na satan, unong ya inyilustra na saray bagat ed silong na Mosaikon Ganggan?

¹¹ Pinaseseg nen Pablo iray kapananisiaan to: “Ipatnag yo so saray laman yo a mabilay a bagat, masantos, makapaliket ed Dios, ta sikato so maespiritu a lingkor yo.” (Roma 12:1) Diad saratan a salita et nayarin anonotan na saray Judion Kristiano iray bagat a kabiangan na panagdayew da antis iran nagmaliw a papatumbok nen Jesus. Seguradon amta ra ya unong ed Mosaikon Ganggan, kaukolan a say iyapay ed altar nen Jehova et saramay sankaabigan ya ayayep. Dinanman a makapuy a klase et ag-awaten. (Mal. 1:8, 13) Mipadpara, sano iyapay tayo iray laman tayo bilang “mabilay a bagat,” iter tayo ed si Jehova so sankaabigan tayo, aliwan say kerakera kayari tayon pinenek iray amin a dilin pilalek tayo. Sanen indedika tayoy inkasikatayo ed Dios, mabulos tayon inter so “bilay” tayo​—pati say biskeg, materyal a kaykayarian, tan saray abilidad tayo. (Col. 3:23) Panon tayon iyaplika itan ed bilay tayo?

 Usar Yoy Panaon Yo ed Makabat a Paraan

12, 13. Antoy sakey a paraan a niiter tayoy sankaabigan tayo ed si Jehova?

¹² Say sakey a paraan a niiter tayoy sankaabigan tayo ed si Jehova et say pangusar ed panaon tayo ed makabat a paraan. (Basaen so Efeso 5:15, 16.) Mankaukolan iya na disiplina ed sarili. Saray impluensya ed mundo pati say atawir ya ag-inkayadyari so managyat ed sikatayon mangusar ed panaon tayo para labat ed dilin panliketan tayo odino parad pakagunggonaan tayon dili. Tua, ‘amin a bengatla wala so panaon’ to, pati lay makapaliket a panagrelaks tan sekular a trabaho pian nagawaan tayo iray obligasyon tayo bilang Kristiano. (Ecl. 3:1) Balet, kaukolan a mansiansian balanse so sakey a dedikadon Kristiano tan usaren toy panaon to ed makabat a paraan.

¹³ Sanen binmisita si Pablo ed Atenas, naimano to ya “amin [a] taga Atenas tan saray sankaili a manaayam diman, anggapo so arum ya aarapen da noag mansalita odino ondengel na balo a bengatla.” (Gawa 17:21) Natan, dakel met so mamipirdi na panaon. Kaiba ed saray modernon pakasbelan so panagbantay na TV, video games, tan panangusar na dakel a panaon ed Internet. Lalon ondarakel iray pakasbelan a mamirdi na panaon tayo. No agtayo talonaan iratan, nayarin nibaliwala tayo la iray espiritual a pankaukolan tayo. Nayarin ipasen tayo ni ingen ya anggapoy panaon tayo parad “bengatla ran sankaabigan,” salanti, saray pamaakaran nipaakar ed panaglingkor tayo ed si Jehova.​—Fil. 1:9, 10.

14. Antoran tepet so kaukolan tayon motekteken?

¹⁴ Kanian, bilang dedikadon lingkor nen Jehova, tepetan tayoy inkasikatayo, ‘Kasin kabiangan ed inagew-agew ya eskedyul ko so panagbasa ed Biblia, panagdalepdep, tan panagpikasi?’ (Sal. 77:12; 119:97; 1 Tes. 5:17) ‘Kasin mangigagana ak na panaon parad panagparaan ed saray pantitipon na Kristiano? Kasin papasesegen koy arum diad pankokomentok legan na saray pantitipon?’ (Sal. 122:1; Heb. 2:12) Ibabaga na Biblia a si Pablo tan si Bernabe so angusar na “andukey a panaon, a nansalita ra a makmakpel ed Katawan.” (Gawa 14:3) Kasin nayarian yon umanen iray sirkumstansya yo pian makapangusar kayo na malaglaem a panaon, anggan “andukey a panaon,” diad panagpulong a kimey, singa bilang panlingkor bilang sakey a payunir?​—Basaen so Hebreos 13:15.

15. Panon ya uusaren na saray mamatatken so panaon da ed makabat a paraan?

¹⁵ Sanen binmisita si apostol Pablo tan si Bernabe ed Kristianon kongregasyon diad Antioquia, “nanayam irad man, ed saray binangatan ed aliwan daiset a panaon” pian pasesegen ira. (Gawa 14:28) Saray maaron mamatatken met natan so manguusar na dakel ed panaon da pian pabiskegen iray arum. Likud ed pampupulong da, mansasakripisyo iray mamatatken pian pastolan so pulok, anapen iray abalang a karnero, tulongan iray walay sakit, tan asikasoen so dakel niran responsabilidad ed loob na kongregasyon. No sakey kan bautismadon agin laki, kasin iyabuloy na saray sirkumstansyam a dampoten irayan kaaruman a pribilehyo ed serbisyo?

16. Antoray pigaran paraan a ‘makapanggawa itayo na maabig ed saray kapananisiaan’?

¹⁶ Dakel natan so naliliketan diad pambubulontaryo ed pangitaryay tulong ed saramay adalan na gaway toon desyang odino natural iran kalamidad. Singa bilang, sakey ya agin bii a manedad na masulok lan 60 a manlilingkor ed  Bethel so aminpigan nambiahe na andukey pian manbulontaryo ed pangitarya na tulong. Akin ya inusar toy atipon ton bakasyon ed ontan a paraan? Inkuan to: “Anggaman anggapoy nikaduma iran dunong ko, sakey a pribilihyo parad siak so panggawa na antokaman a nakaukolan. Apaseseg ak a maong ed impakanengneng ko ed mabiskeg a pananisia na saray agagi anggaman apirdi iray materyal a kayarian da.” Sakey ni, nilibo ed sankamundoan so ontutulong ed panagpaalagey na saray Kingdom Hall tan Assembly Hall. Diad pibibiang tayo ed sarayan kimey, masakripisyo tayon ‘manggawa na maabig ed saray kapananisiaan.’​—Gal. 6:10.

“Wala Ak a Naynay ed Sikayo”

17. Anto so mabulos mon isakripisyo parad andi-anggaan a bilay?

¹⁷ Say sosyedad na katooan a sian ed Dios so magano lan manampot. Agtayo amta so eksakton pakagawa na satan. Balet, amta tayo a “say panaon apatikeyan la” tan say “[kipapasen] na sayan mundo nanaebas.” (Basaen so 1 Corinto 7:29-31.) Mangiiter itan na kaaruman a kabaliksan ed tepet nen Jesus: “Anto tay niiter na too ya isandi ed bilay to?” Seguradon gawaen tayoy antokaman iran panagsakripisyo a kekerewen nen Jehova ed sikatayo pian nagamoran so “bilay a peteg.” (1 Tim. 6:19) On, kapilitan a talinengen tayo so bilin nen Jesus a mantultuloy ya ‘ontumbok ed sikato’ tan ‘unaen so panarian.’​—Mat. 6:31-33; 24:13.

18. Anton kompiyansa so walad sikatayo, tan akin?

¹⁸ Tua, aliwan naynay a mainomay so panumbok ed si Jesus, tan unong ed impasakbay to, parad arum et mankabaliksan itan na pangisakripisyo ray bilay da ed sayan sistema na bengabengatla. Anggaman ontan, singa si Jesus, papaliisan tayoy tukson ‘kasian so inkasikatayo.’ Walaan itayo na pananisia ed impaseguro to ed saray alanaan a papatumbok to nen inmunan siglo: “Wala ak a naynay ed sikayo, ya angga ed kasampotan na mundo.” (Mat. 28:20) Usaren tayo sirin a sigpot so panaon tan saray abilidad tayo diad sagradon serbisyo. No gawaen tayo itan, ipapanengneng tayoy talek tayo ya iliktar itayo nen Jehova ed baleg a kairapan odino paolien to itayo ed balon mundo. (Heb. 6:10) Diad ontan et nipanengneng tayoy panamabli ed regalon bilay.

Anto Iray Ebat Yo?

• Panon ya impatnag nen Jesus so matalonggaring ya inkamabulos ed panaglingkor ed Dios tan too?

• Akin a nepeg ya iburi na sakey so inkasikato, tan panon iyan nagawaan?

• Diad Israel nensaman, anto lambengat iran klase na bagat so awaten nen Jehova, tan panon a mangigiya itan ed sikatayo natan?

• Diad antoran paraan a nausar tayoy panaon tayo ed makabat a paraan?

[Tepetepet Parad Panagaral]

[Saray litrato ed pahina 26]

Lawas a ginawa nen Jesus iray bengatlan makapaliket ed Dios

[Litrato ed pahina 28]

Saray maapresyan Israelita so angiter na sankaabigan da pian suportaan so tuan panagdayew

[Saray litrato ed pahina 29]

Napaliket tayoy Dios panamegley na makabat a pangusar tayo ed panaon tayo