Say Ebat nen Jehova ed Sakey ya Impapuson Pikakasi

“Pian saray totoo nakabatan da a sika, a say ngaran mo a bukbukor et Jehova, sankatageyan ka a manuna nen say amin a dalin.”​—SAL. 83:18.

1, 2. Anto so naeksperiensya na karaklan, tan antoray nitepet tayo?

 PIGARAN taon lay apalabas, walay sakey a bii a nagogonigon lapud agawan trahedya ed lugar da. Lapud nianak ed sakey a Katolikon pamilya, sikatoy linma’d sakey a pari pian onkerew na tulong, balet ta sikatoy ag-anggan kinatongtong na saya. Kanian sayan bii et nampikasi ed Dios: “Agta ka kabat . . . , balet amtak a wadtan ka. Ipangasim, abuloyan mo ak a nakabat ka!” Kabebekta, walaray Tasi nen Jehova a binmisita, sikatoy niligliwa tan binangatan da na kakabatan ya abayag to lan aanapen. Say manunan imbangat da ed sikato et walay personal a ngaran na Dios, salanti, Jehova. Say impakaamta ed satan et anenyeg a maong ed liknaan to. Inkuan to: “Nonot yo pa labat, saya so Dios a manlapu ni’d inkaugaw ko et pilpilalek ko lan nakabat!”

² Dakel so akaeksperiensya na miparan liket sanen akabatan da so ngaran na Dios. Diad kaslakan, pirprimero dan anengneng so ngaran a Jehova sanen abasa da ed Biblia so Salmo 83:18. Onia so nabasa tayo ed satan a teksto: “Pian saray totoo nakabatan da a sika, a say ngaran mo a bukbukor et Jehova, sankatageyan ka a manuna nen say amin a dalin.” Balet, naisip yo la kasi makasengeg no akin ya insulat so Salmo 83? Antoran ebento so mamuersa ed amin pian bidbiren a si Jehova et say alenleneg a tuan Dios? Antoy naaralan tayo’d sayan salmo? Ikonsidera tayo irayan tepet ed sayan artikulo. *

Pannononong Sumpad Totoo nen Jehova

3, 4. Siopa so nansulat na Salmo 83, tan antoran kapeligroan so dedeskribien to?

³ Unong ed superskripsion na Salmo 83, saya et “kanta nen Asaf.” Nayarin say anibukel ed sayan salmo et nanlapud kapolian na Levitan si Asaf, sakey a kabkabat a managtogtog legan na uley nen Arin David. Diad sayan salmo, akikasi so salmista ya onkiwas komon si Jehova pian nitandoro so inkasoberano To tan nipakabat so ngaran To. Sayan salmo et nayarin atibukel kayari na impatey nen Solomon. Akin? Lapud legan na uley nen David tan Solomon, say Israel et kaaro ni na ari ed Tiro. Balet sanen akompleto la so Salmo 83, saray taga Tiro et onsusumpa la tan dinmapag la ed saray kakabusol na Israel.

⁴ Binitla na salmista so samploran nasyon a nankokomplot pian deralen so totoo na Dios. Sarayan kakabusol et walad kaliberliber na Israel, salanti: “Saray tolda na saray Idumeos, tan saray Ismaelitas; Moab, tan saray Agarenos; Gebal tan Ammon, tan Amalek: Filistea a pati saray managayam ed Tiro. Say Asirya akitipon met ed sikara.” (Sal. 83:6-8) Anton maawaran ya ebento so tutukoyen na salmista? Isusuheri na arum a say  tutukoyen to et say inyataki ed Israel na nanuulop ya Ammon, Moab, tan saray manaayam ed Palandey Seir, diad saray agew nen Jehosapat. (2 Awa. 20:1-26) Papanisiaan met na arum a say natutukoy dia et say kaslakan a panamairap a nasasagmak na Israel ed lima na saray kabangibang ton nasyon.

5. Panon a nagunggonaan iray Kristiano natan ed Salmo 83?

⁵ Antokaman so kipapasen, mapatpatnag a pinuyanan nen Jehova a Dios so inkisulat na sayan salmo diad panaon a say nasyon to et walad kaatapan. Sayan salmo et mamapaseseg met ed saray lingkor na Dios natan, a diad interon awaran et akaeksperiensya la na nantutumbokan a panangataki manlapud saray kakabusol a determinadon maneral ed sikara. Tan saya et seguradon mamabiskeg ed sikatayo diad asingger lan arapen, sano si Gog na Magog et manugyop la’d saray alyado to pian gawaen so sampot a panangataki to diad getman deralen so amin a mandadayew ed Dios diad espiritu tan katuaan.​—Basaen so Ezequiel 38:2, 8, 9, 16.

Sankaimportantian a Bengatla Parad Salmista

6, 7. (a) Diad gapo na Salmo 83, antoray manunan bengatla ya impikasi na salmista? (b) Anto so sankaimportantian a bengatla parad salmista?

⁶ Dengelen pa so salmista legan ton ibebesngaw so liknaan to diad pikakasi: “Aleg ya andi-esel mo, O Dios, agmo bembenan so kareenan mo, tan aleg ya agka onggalagalaw, O Dios. Ta, nia saray kakabusol mo manggawa ra na sakey a dalamurom; tan saray manggugula ed sika intangwa ra so ulo ra. Sikara nanggawa ra na sakey a masilib a singbatan a makapauges ed baley mo . . . Ta nanpapanonan ira ya amin a tekep na sakey ya abuloyan; sikara nansisipan ira ya onsumpa ed sika.”​—Sal. 83:1-3, 5.

⁷ Anto so sankaimportantian a bengatla parad salmista? Nayari pa lagin pampapagaan ton maong so seguridad to tan say mismon seguridad na pamilya to. Ingen, diad pikakasi to, say inikdan toy imano et say balaw a nitarok ed ngaran nen Jehova tan saray kapeligroan ed nasyon a mangaakbibit na satan a ngaran. Komon ta pansiansiaen tayon amin so ontan a balansin panmoria, legan tayon susungdoan iyan mairap a panaon diad kasampotan iran agew na sayan mauges a mundo.​—Basaen so Mateo 6:9, 10.

8. Anto so gagala na saray nan-alyansan nasyon sumpad Israel?

⁸ Oniay inkuan na salmista ya ibabaga na saray kakabusol na Israel: “Gali dia ta amperen ti ra [ed pagmaliw dan] sakey a nasyon. Pian say ngaran ya Israel et agkomon nanodnonotan.” (Sal. 83:4) Agaylay panagbusol na sarayan nasyon ed saray totoon pinili na Dios! Balet, wala ni arum a rason na impan-alyansa ra sumpad Israel. Pilalek dan gamgamen so dalin na Israel tan oniay inlastog da: “Alaen tayo a kayarianen so ayaman na Dios.” (Sal. 83:12) Kasin wala met so ontan a nagagawa ed panaon tayo? On!

Say “Ayaman Mo a Masanto”

9, 10. (a) Nensaman, anto so natutukoy a masanton ayaman na Dios? (b) Antoran bendisyon so panliliketan natan na saray alanaan a nakdaan tan saray ‘arum a karnero’?

⁹ Nensaman, say natutukoy a masanton ayaman na Dios et say Insipan a Dalin. Nonot yo pa imay kinansion na saray Israelita kayari inkiliktar da manlapud Ehipto: “Sika dia ed panangabagey mo imbasbas mo so saray katooan a dinondon mo. Dia ed biskeg mo indalan mo ra ya angga ed ayaman mo a masanto.” (Exo. 15:13) Diad saginonor, satan ya “ayaman” et walaay templo tan saserdote, pati kabisera na syudad, salanti, say Jerusalem, a ditan et saray ararin nanlapud poli nen David so akayurong ed trono nen Jehova. (1 Awa. 29:23) Kanian dugaruga so impanawag nen Jesus ed Jerusalem a “syudad na baleg ya Ari.”​—Mat. 5:35.

¹⁰ Komusta met ed panaon tayo? Nen 33 C.E., nianak so sakey a balon nasyon, say “Israel na Dios.” (Gal. 6:16) Satan a nasyon a tutugyopen na saray alanaan ya agagi nen Jesu-Kristo et anumpal ed samay kimey ya ag-agawaan na literal ya Israel, salanti, say panagtasi ed ngaran na Dios. (Isa. 43:10; 1 Ped. 2:9) Insipan met nen Jehova ed sikara imay insipan to ed kadaanan ya Israel: “Siak so Dios da, tan sikara so baley ko.”  (2 Cor. 6:16; Lev. 26:12) Nen 1919, saray nakdaan ed “Israel na Dios” et awalaan na espisyal a relasyon ed Dios. Tan diad satan a panaon et kinayarian da iyan “dalin,” ya ontutukoy ed espiritual a dalin, salanti, say lawak na kimey, a ditan et nanliketan da so espiritual a paraiso. (Isa. 66:8) Manlapu la’d dekada 1930, minilyon ya ‘arum a karnero’ so dinmapag ed sikara. (Juan 10:16) Say liket tan espiritual ya iyaaligwas na sarayan Kristiano ed modernon panaon et mabiskeg ya ebidensya ed kanepegan na inkasoberano nen Jehova. (Basaen so Salmo 91:1, 2.) Talagan amasanok itan ed si Satanas!

11. Anto so mantutultuloy a manunan gagala na saray kakabusol na Dios?

¹¹ Diad interon panaon na anggaan, sinugsogan nen Satanas iray taga-suporta to ed dalin pian sumpaen iray alanaan a nakdaan tan saray kaiba ran arum a karnero. Agawa iratan ya isusumpa diad bandad sagur ya Europa ya uuleyan na saray Nazi, tan diad bandad bukig ya Europa ya uuleyan na Komunistan gobierno na Unyon Sobyet. Agawa met iratan ed dakel nin lugar tan nagawa lamet iratan diad arapen, nagkalalo la diad sankasampotan ya iyataki nen Gog na Magog. Diad satan ya iyataki, maagum a kompiskaen na saray kakabusol iray kagawaan tan kaykayarian na saray totoo nen Jehova, a singa ginawa na saray kakabusol ed apalabas. Balet, say abayag lan manunan gagala nen Satanas et say pamuyak to ed sikatayo bilang grupo, pian agla nanonotan so inter na Dios a ngaran tayon “Tasi nen Jehova.” Panon so ikiwas nen Jehova ed sayan isusumlang ed inkasoberano to? Ikonsidera tayo pa lamet iray salita na salmista.

Sakey a Paneknek ya Ontalona si Jehova

12-14. Anton duaran agnalinglingwanan ya impanalo so agawa’d asingger ed syudad na Megido ya insulat na salmista?

¹² Imanoen pa so mabiskeg a pananisia na salmista ed abilidad nen Jehova ya amperen so antokaman a plano na saray kabusol a nasyon. Inlaktip to so duaran agnalinglingwanan ya impanalo na Israel sumpad saray kakabusol ya agawa diad asingger ed kadaanan a syudad na Megido, a manlapud satan et sankabantag tan sakop toy sakey a patar a manngaran met na Megido. Legan na tiagew, say amagan dantal na Ilog Kison et sankanengneng ya onlilikoliko ed patar diad leet na saray pukdol. Balet kayari na maksil ya uran ed panaoy ambetel, say ilog et manelap ed satan a patar. Nayarin saya so makasengeg no akin a satan ya ilog et tinawag met a “saray danum na Megido.”​—Uko. 4:13; 5:19.

¹³ No beltangen so lawak manlapud Megido ed distansian ngalngali 15 kilometro et naromog so pukdol na Moret, a diad panaon nen Ukom Gideon et nantitiponan na saray sundalon Midianita, Amalekita, tan saray taga Bukig pian milaban. (Uko. 7:1, 12) Diad kaunoran et nagmaliw a dagdaiset so sundalo nen Gideon, a tugyopen labat na 300, balet diad tulong nen Jehova et tinalo ray baleg a puersa na kakabusol. Panon? Tinulok da so ganggan na Dios a no labi la et paliberan da so interon kampo na kakabusol, ya akaawit ira na buyog ya angiyamotan da ed saray banuot, odino silesilew. Sanen anengneng day sinyas nen Gideon, binetag dan amin so buyog, tan saray akaamot a silesilew et tamtampol a niparungtal. Imbansag dan pinaknol so tambuyog, tan inkelyaw da: “Say kampilan nen Jehova tan si Gideon!” Atalagnaw iray kakabusol, kanian nampapateyan ira. Balet, saray arum ya akaliktar et binmatik ed Ilog Jordan. Kaleganan to, dakel ya Israelita so angiban angusil ed saray kakabusol. Ami-amin, say bilang na sundalon kakabusol a pinatey et asabi toy 120,000.​—Uko. 7:19-25; 8:10.

¹⁴ Asingger ed Megido et naromog so Palandey  Tabor a manga anemiran kilometro manlapud pukdol na Moret. Diad sayan lugar so aniponan nen Ukom Barak na 10,000 a sundalon Israelita pian milaban ed armada nen Jabin, say Canaanitan ari na Hazor, diad impangidaulo na heneral ton si Sisera. Sayan armada na Canaanita et walaan na 900 a karwahen pangguerra, a saray dalig na saratan et walaay andukey a tarem a makapatey. Lapud biskeg na puersa na armada nen Sisera, makompiyansa iran natalo da iray Israelita kanian linma ra’d patar sanen nantitipon iray Israelitan sundalo ed Palandey Tabor. Kabebekta, ‘si Jehova binagbag to si Sisera, tan amin a luganan to, tan amin ya ehersito to.’ Nayari pa lagin say biglan inyuran toy makmaksil so sengegay inlepwa na Ilog Kison ya angikutep ed saray karwahe. Kanian say interon armada nen Sisera et pinatey na saray Israelita.​—Uko. 4:13-16; 5:19-21.

15. (a) Anto so impikasi na salmista a gawaen nen Jehova? (b) Anto so ipapanonot ed sikatayo na samay tawag ed unor a bakal na Dios?

¹⁵ Mikakasi so salmistan gawaen met nen Jehova so ontan ed saray bansan mankaliktan a maneral ed Israel diad panaon to. Impikasi ton: ‘Gawam ed sikara a singa dia ed Midian, singa dia ed Sisera, singa dia ed Jabin ed ilog Kison. Ya inatey ira ed En-dor, sikara nagmaliw ira a singa dutak ed dalin.” (Sal. 83:9, 10) Matukotukoy sirin a say unor a pibakal na Dios ed sayan mundo nen Satanas et tinawag ya Armagedon (a mankabaliksay “Palandey na Megido”). Satan a ngaran et mangipapanonot ed sikatayo na saramay makatantandan bakal ya agawa diad asingger ed Megido. Saray impanalo nen Jehova ed saraman a bakal et mamaseguro’d sikatayo a peteg so italona to ed bakal na Armagedon.​—Apo. 16:13-16.

Ipikasi so Kiyalangon na Inkasoberano nen Jehova

16. Panon ya apano na kababaingan so kalupaan na saray onsusumpa natan?

¹⁶ Diad sarayan “kaunoran ya agew,” inamper nen Jehova so amin a sagpot na saray kakabusol a maneral ed saray totoo to. (2 Tim. 3:1) Bilang resulta et apabpabaingan a tuloy iray sumusumpa. Saya so ipapatnag na Salmo 83:16 sanen inkuan to: “Panom so luplupa ra na [“kababaingan,” NW], pian [anapen da] so ngaran mo, O Jehova.” Diad nanduruman bansa, saray onsusumlang et talagan agtinmalona ed saray sagpot dan patundaen iray Tasi nen Jehova. Diad saratan a lugar, say inkapekder tan impansungdo na saray managdayew ed alenleneg a tuan Dios et nagmaliw a pantasi ed saray maptek-impanpuson totoo, kanian dakel so nananap ed ngaran nen Jehova. Diad saramay pigaran bansa a dati et maruksan pinairap iray Tasi, wala la natan so nilibo-libo, anggad nilasus nilibo ni ingen, a malikeliket a mangidadayew ed si Jehova. Talagan tinmalona si Jehova! Tan apabpabaingan a maong iray kakabusol to!​—Basaen so Jeremias 1:19.

17. Anton pankanawnawa parad saray sumusumpa so asingger lan mangangga, tan anto iran balikas na salmista so maganggano tayo lan nanonotan?

¹⁷ Siempre, amta tayon mantultuloy ni iyan panamasegsegang. Tan siansia nin ipulong tayo so maong a balita, anggan diad saray sumusumpa. (Mat. 24:14, 21) Anggaman ontan, sayan pankanawnawa a niiter ed sarayan sumusumpa pian magbabawi tan makagamor ira na kilalaban et asingger lan mangangga. Say pamasantos ed ngaran nen Jehova et mas importante ni nen say kiliktar na totoo. (Basaen so Ezequiel 38:23.) Sano nagawa la so nipasakbay a paniiba na saray nasyon pian deralen iray lingkor na Dios, nanonotan tayo irayan salita na salmista ed pikakasi to: “Nabaingan tan  napunaw ira lawas komon, on, nabaingan tan natawtaw ira komon.”​—Sal. 83:17.

18, 19. (a) Anto so manatalaran ed saray determinadon onsumlang ed inkasoberano nen Jehova? (b) Panon a say manasingger lan sankasampotan a kiyalangon ed inkasoberano nen Jehova et mangapekta ed sika?

¹⁸ Sakey a mabanbanday a kadederal so manaalagar ed saray determinadon onsumlang ed inkasoberano nen Jehova. Ipaparungtal na Salitay Dios a ‘saramay ag-ontulok ed ebanghelyo,’​—a makasengeg ed saya et naderal ira ed Armagedon​—so makasagmak na “andi-anggaan a kabalang,” odino kadederal. (2 Tes. 1:7-9) Say kaderal da tan say kiliktar na saray mandadayew ed si Jehova et sakey a makakombinsin paneknek a si Jehova labat so alenleneg a tuan Dios. Diad balon mundo, sayan baleg ya impanbiktorya et agbalot nalingwanan. Saray kaiba ed “kioli ed bilay na saray matunong tan agmatunong” so makaaral ed sayan alay abig a ginawa nen Jehova. (Gawa 24:15) Diad balon mundo et nanengneng da a talagan makabat so pambilay a sakop na inkasoberano nen Jehova. Tan saray mauyamo ed limog da et mainomay a nakombinsin si Jehova et say alenleneg a tuan Dios.

¹⁹ Talagan makapadinayew ya arapen so ipaparaan na maaron mangatatawen ya Ama tayo parad saray matoor a managdayew to! Agta apakiwas kayon ipikasi ya ebatan la komon a tampol nen Jehova so kerew na salmista: “Nabaingan tan natawtaw ira komon [so kakabusol]. Pian saray totoo nakabatan da a sika, a say ngaran mo a bukbukor et Jehova, sankatageyan ka a manuna nen say amin a dalin”?​—Sal. 83:17, 18.

[Paimano ed leksab]

Kasin Nipaliwawa Yo?

• Anton kipapasen so asagmak na Israel sanen nisulat so Salmo 83?

• Anto so sankaimportantian a bengatla ed samay nansulat na Salmo 83?

• Siopay manunan puntirya na sanok nen Satanas natan?

• Diad saginonor, panon ya ebatan nen Jehova imay pikakasin walad Salmo 83:18?

[Tepetepet Parad Panagaral]

[Mapa ed pahina 15]

(Parad aktual a format, nengnengen so publikasyon)

Panon a saray bakal ya agawa diad asingger ed kadaanan a Megido et mikonektaan ed arapen tayo?

Ilog Kison

Haroset

Palandey Carmelo

Patar na Jezreel

Megido

Taanac

Palandey Gilboa

Subol na Harod

Moret

En-dor

Palandey Tabor

Dayat na Galilea

Ilog Jordan

[Litrato ed pahina 12]

Anto so amakiwas ed sayan salmista a manibukel na sakey ya impapuson pikakasi?