“Saya so Petepeteg a Sankasantosan tan Baleg a Ngaran na Dios”
“Saya so Petepeteg a Sankasantosan tan Baleg a Ngaran na Dios”
Ontan so imbaga nen Nicholas na Cusa diad sermon to nen 1430. * Sikatoy interesado ed dakel a bengatla, singa bilang, say panagaral na Griego, Hebreo, pilosopiya, teolohiya, matematika, tan astronomya. Sanen manedad na 22, sikatoy eksperto la’d saray ganggan na Romano Katoliko. Tan sanen 1448, sikatoy aturo bilang kardinal.
Ngalngali 550 taon lay apalabas, si Nicholas na Cusa et angipaalagey na nursing home parad saray maedad la diad Kues, a natan et kabkabat bilang Bernkastel-Kues, say baley a walad manga 130 kilometro diad abalaten na Bonn, Alemanya. Sayan bilding so kawalaan la natan na librarya nen Cusa, ya akasimpenan na masulok a 310 iran manuskrito. Sakey ed saratan et say Codex Cusanus 220, a pakaromogan ed samay sermon nen Cusa nen 1430. Diad satan a sermon ya In principio erat verbum (Dia ed Gapo Wala so Verbo), inusar nen Nicholas na Cusa so salitan Latin a Iehoua parad Jehova. * Nipaakar ed ngaran na Dios, oniay nabasa ed Folio 56: “Inter iya na Dios. Saya so Tetragrammaton, salanti, say ngaran a tugyopen na apatiran letra. . . . Saya so petepeteg a sankasantosan tan baleg a ngaran na Dios.” Say imbaga nen Nicholas na Cusa so mitunosan ed katuaan, a say ngaran na Dios et naromogan ed saray orihinal a teksto na Hebreon Kasulatan.—Exo. 6:3.
Sayan codex a sani nen asasakbay a koma-15 siglo et sakey ed saray sankadaanan a dokumento, a no iner say Tetragrammaton et imbalikas ya “Iehoua.” Sayan nisulat a testimonya et kaaruman nin ebidensia a say impangipatalos ed ngaran na Dios a mipadpara ed “Jehova” et abayag lan kabkabat ya inkisulat na ngaray Dios diad saray kopya na manuskrito ed apalabas iran siglo.
[Saray paimano ed leksab]
^ par. 2 Si Nicholas na Cusa et kabkabat met bilang Nikolaus Cryfts (Krebs), Nicolaus Cusanus, tan Nikolaus von Kues. Say Kues et ngaran na baley ed Alemanya a nianakan nen Nicholas.
^ par. 3 Say gagala na sayan sermon et pian suportaay bangat a Trinidad.
[Litrato ed pahina 16]
Librarya nen Cusa