Uusisaen nen Jehova ya Amin

“Saray mata [nen Jehova] et uusisaen to iray anak na totoo.”​—SAL. 11:4, NW

1. Labalabay tayoy napaapit ed antoran klase na totoo?

 ANTO so naliliknam ed saray totoon talagan interesado ed pankaabigan mo? Ibaga ray tua ed sika no bilang ta tepetan mo ra. Mabulos tan maaro iran mangiter na tulong tan simbawa no bilang ta kaukolan mo. (Sal. 141:5; Gal. 6:1) Agta labalabay moy napaapit ed ontan iran totoo? Diad tua, ontan si Jehova tan say Anak to. Mas ni ingen so impatnag dan interes nen say siopaman a too, tan say motibo ra et agbalot alaokan na inkasiblet. Labay da kan tulongan pian ‘nabembenan mo so peteg a bilay.’​—1 Tim. 6:19; Apo. 3:19.

2. Panon kainteresado si Jehova ed saray lingkor to?

² Imbesngaw nen salmistan David a si Jehova et interesadon maong ed pankaabigan tayo sanen inkuan to: “Saray mata [nen Jehova] et mangiimaton, saray mata to et uusisaen to iray anak na totoo.” (Sal. 11:4, NW) On, ag-itayo labat nenengnengen na Dios; noagta uusisaen to itayo met. Onia ni insulat nen David: ‘Sika sinalim so pusok, sika dinalaw mo ak ed labi, tan anggapon balot so aromog mo.’ (Sal. 17:3) Malinew ya amta nen David a si Jehova et interesadon maong ed pankaabigan to. Amta ton si Jehova et nasakitan tan agto napaliket, no agto ipulisay iray makasalanan a panagnonot tan mauges a puso. Kasin tudtua ed sika si Jehova a singa ed panmoria nen David?

Onnenengneng si Jehova ed Puso

3. Panon ya impanengneng nen Jehova so inkabalanse to ed saray kakapuyan tayo?

³ Say importante ed si Jehova et say inkatoo tayo, salanti, no anton talagay walad puso tayo. (Sal. 19:14; 26:2) Agto iteteen so imano to ed saray angkekelag a lingo tayo lapud panangaro to. Singa bilang, sanen say asawa nen Abraham a si Sara et imburi toy ginawa to ed sakey ya anghel, anengneng na anghel a sikatoy natatakot tan nababaingan, kanian sinimbawa to labat si Sara. (Gen. 18:12-15) Sanen imbaga na patriarkan si Job a ‘sikatoy mas magmaong ni nen say Dios,’ siansia nin sikatoy benendisyonan nen Jehova lapud amta Ton grabe so impamairap nen Satanas ed si Job. (Job 32:2; 42:12) Ontan met, ag-asakitan si Jehova ed imbaga na samay balo ed Sarepta, anggano diniretsa toy propeta Elias. Atalosan na Dios a sikatoy maer-ermen lapud inkaandi na saksakey ya anak to.​—1 Ara. 17:8-24.

4, 5. Panon ya angipanengneng si Jehova na maaron konsiderasyon ed kinen Abimelek?

⁴ Lapud say uusisaen nen Jehova et say puso, sikatoy angipanengneng na konsiderasyon anggan diad saray agmananisia. Nonoten pa so agawa’d si Abimelek, ari ed syudad na saray Filisteo diad Gerar. Lapud ag-amta nen Abimelek a sanasaway Abraham tan Sara, inala toy Sara pian magmaliw ya asawa to. Balet, sakbay ton nadiwit si Sara, oniay imbaga nen Jehova ed sikato diad sakey a kugip: “On, amtak a dia ed inkatua na pusom ginawam so saya, et siak met baaten ta ka a mankasalanan ed siak, kanian agta ka pinaulyan a maniwit ed sikato. Natan a tuloy ipulang mo so bii ya asawa na sakey a laki, ta saman a laki et sakey a propeta, sikato pikaskasi to ka naani et nabilay ka.”​—Gen. 20:1-7.

⁵ Segsegurado a no nilabay labat nen Jehova et sarag ton duksaen si Abimelek, sakey a managdayew ed palson dirios. Balet, anengneng na Dios a diad sayan pankanawnawa et matua so inkiwas na sayan too. Saya et maaron inkonsidera nen Jehova tan imbaga to’d ari no panon ton nagamoran so panamerdona tan mansiansian ‘mabilay.’ Agta saya so Dios a labay mon dayewen?

6. Diad antoran paraan ya inalig nen Jesus so Ama to?

⁶ Perpektoy impangalig nen Jesus ed kinen Ama to, a say iimanoen to et saray maong a kalidad na saray babangatan to tan mabulos ton peperdonaen iray lingo ra. (Mar. 10:35-45; 14:66-72; Luc. 22:31, 32; Juan 15:15) Say awawey nen Jesus  et mitunosan ed saray salitan naromog ed Juan 3:17: “Say Dios agto imbaki so Anak ed mundo a mangukom ed mundo, noag ingen pian say mundo nilaban ed panamegley to.” On, say panangaro nen Jehova tan Jesus ed sikatayo et aralem tan agmanguman-uman. Napatnagan itan ed pilalek dan nagamoran tayo so bilay. (Job 14:15) Say ontan a panangaro so mangipapaliwawa no akin ya uusisaen itayo nen Jehova, no panon to itayon momoriaen, tan no panoy ikikiwas to unong ed saray nanenengneng to.​—Basaen so 1 Juan 4:8, 19.

Inusisa Diad Maaron Paraan

7. Anto so motibo nen Jehova ed panguusisa to’d sikatayo?

⁷ Talagan agmanepeg sirin ya isipen a si Jehova et singa pulis a manbabantay manlapud tawen pian erelen itayo legan na panggagawa tayoy kasalanan! Diad tua, si Satanas so mangaakusa ed sikatayo, tan ipipilit ton say iisipen tayo labat et say dilin pankaabigan tayo. (Apo. 12:10) Papalsaan to itayo ni ingen a walaray makapuy a motibo tayo, anta anggapo met! (Job 1:9-11; 2:4, 5) Nipaakar ed Dios, oniay insulat na salmista: “No sika, Jehova, et uninengen mo so saray kasulitan, O Katawan, siopa kasi naani makaalagey?” (Sal. 130:3) Siempre say ebat ed satan a tepet et, Anggapo! (Ecl. 7:20) Imbes, maaro tan mapangasi itayon babantayan nen Jehova, a singa gagawaen na sakey a manangiyansakit ya ateng, a labay ton protektaan iray pinabpablin ton ananak manlapud peligro. Lapud agtayo ayadyari tan walaray kakapuyan tayo, lanang To itayon papanonotan pian agtayo nasakitay inkasikatayo.​—Sal. 103:10-14; Mat. 26:41.

8. Panon ya ibabangat tan didisiplinaen nen Jehova iray lingkor to?

⁸ Nipapanengneng na Dios so panangaro to diad saray instruksion tan disiplina a walad Kasulatan tan diad espiritual iran tagano ya itatarya na “matoor tan makabat ya aripen.” (Mat. 24:45; Heb. 12:5, 6) Iyiiter met nen Jehova so tulong to panamegley na Kristianon kongregasyon tan saray “langkap ed totoo.” (Efe. 4:8) Ontan met, nenengnengen nen Jehova no panoy ikiwas tayo sano ipapasal to itayo bilang ama. Iikdan to itayo met na kaaruman a tulong, ta oniay inkuan to ed Salmo 32:8: “Bilinen ta ka tan ibangat ta ka ed dalan a nepeg mo a laen. Simbawaen ta ka a sinenengneng so matak ed sika.” Talagan importante sirin a lawas tayon ontalineng ed si Jehova! Nepeg itayon mansiansian mapaabeba ed arap to, a bidbiren tayon sikatoy maaron Managbangat tan Ama tayo.​—Basaen so Mateo 18:4.

9. Antoran ugali so nepeg tayon paliisan, tan akin?

⁹ Diad biek a dapag, komon ta agtayo magmaliw a benger lapud inkamapaatagey, kakulangay pananisia, odino lapud “panamalingo na kasalanan.” (Heb. 3:13; Sant. 4:6) Kaslakan ya onggagapo irayan ugali no babayuboan na sakey iray makapuy a panagnonot odino pilpilalek. Nayarin onsabi ni ingen ed punto ya ipulisay to lay matukoy iran Makasulatan a simbawa. Mas grabe ni et nayarin napasalan to la iray mauges ya ugali odino lingon paraan, kanian gawaen to lay inkasikato a kabusol na Dios. Talagan makapataktakot iyan situasyon! (Uli. 1:22-31) Nonoten pa so alimbawa nen Cain, say panguloan ya anak nen Adan tan Eva.

Amin et Nanenengneng nen Jehova tan Onkikiwas Unong ed Satan

10. Akin a say bagat nen Cain et ag-inabobonan nen Jehova, tan panoy inkiwas nen Cain?

¹⁰ Sanen angiyapay si Cain tan si Abel ed kinen Jehova, Sikatoy interesado ed motibo ra, aliwa labat  lan diad samay imbagat da. Bilang resulta, imbalikas na Dios so panangabobon to ed bagat nen Abel, ya insaklang tekep na pananisia. Balet, agto inabobonan so bagat nen Cain, ya akanengnengan toy kakulangan na pananisia. (Gen. 4:4, 5; Heb. 11:4) Imbes a makaaral ed sayan inkagawa tan umanen toy ugali to, si Cain et nampadaeg laingen ed pasnok to’d agi to.​—Gen. 4:6.

11. Panon ya angipatnag si Cain na manamalingon puso, tan anto so naaralan tayo ed saya?

¹¹ Naobserbaan nen Jehova a mapeligro so ugali nen Cain. Kanian sikatoy makonsideran akitongtong ed kinen Cain, ya inkuan To a no gawaen toy maong et sikatoy naabobonan. Balet makapaermen ta imbaliwala nen Cain so simbawa na Manamalsa to tan pinatey toy agi to. Mas apatnagan so mauges a puso nen Cain diad matangas ya impangebat to’d tepet na Dios: “Iner so kawalaan nen Abel ya agim?” Oniay inkuan nen Cain: “Agko amta. Siak ta so managkomis ed kinen agik?” (Gen. 4:7-9) Talagan nayarin magmaliw a manamalingo so puso, ya anggad punton ibaliwala to lay direktan simbawa na Dios! (Jer. 17:9) Kanian, makaaral tayo komon ed sarayan inkagawa tan tamtampol ya ipulisay iray makapuy a kanonotan tan pilpilalek. (Basaen so Santiago 1:14, 15.) No makaawat tayoy Makasulatan a simbawa, komon ta misalsalamat tayo tan ipasen itan bilang ebidensya na panangaro nen Jehova.

Anggapoy Nisekreton Kasalanan

12. Panon so ikikiwas nen Jehova ed saramay manggagawa na kasalanan?

¹² Nayarin nononoten na arum a no anggapoy makanengneng ed sikara ed gagawaen dan kasalanan, natakasan da itan. (Sal. 19:12) Balet, diad tua et anggapoy nisekreton kasalanan. “Saray amin a bengatla wala ra a lakseb tan mapatnag ed saray mata na pangikdan tayo na bilang.” (Heb. 4:13) Si Jehova et sakey ya Ukom a manguusisa ed no anton talaga iray motibo tayo, tan say ikikiwas to ed saramay manggagawa na kasalanan et pakapatnagan na perpekton hustisya. Sikatoy “Dios a mapangasi tan mapaaro, mapalna ya onsanok tan daakan ed maaro ya abig na linawa tan katuaan.” Ingen, diad saray agmagbabawi, ‘anggan anton pamaakaran et agto ra ibilang a malinis’ sano ‘mankasalanan ira manlapud linawa,’ odino no magmaliw iran mauges tan mapalikdo. (Exo. 34:6, 7; Heb. 10:26) Nanengneng iya ed paraan na impideneng nen Jehova ed si Acan tan ed sanasawan Ananias tan Safira.

13. Panon a say mauges a panagnonot so talagan rason no akin a nagmaliw a mauges si Acan?

¹³ Diad impangala nen Acan na saray asamsam ed syudad na Jerico tan diad impangiyamot to’d saratan ed tolda to, a mapatnag a diad impinonong na pamilya to, nibaga tayon direkta ton sinumlang so ganggan na Dios. Sanen niwalwal so kasalanan to, impanengneng nen Acan ya amoria ton ambelat manayay ginawa to, lapud inkuan to: “Nankasalanan ak na sumpa ed Jehova.” (Jos. 7:20) Singa si Cain, nagmaliw a mauges so puso nen Acan. Diad kaso nen Acan, say inkaagum so manunan rason no akin a sikatoy nagmaliw a mapalikdo. Lapud kayarian nen Jehova iramay asamsam ed Jerico, nibagan tinakewan nen Acan so Dios, tan nanresulta itan ed impakabalang na bilay to tan say bilay na pamilya to.​—Jos. 7:25.

14, 15. Akin et makanepegan a naandi so panangabobon na Dios ed si Ananias tan Safira, tan antoy naaralan tayo ed saya?

¹⁴ Si Ananias tan say asawa ton si Safira et membro na Kristianon kongregasyon ed Jerusalem nensaman. Kayari Pentecostes 33 C.E., walay pundon nigana parad pangasikaso na materyal a pankaukolan na saray balon mananisia manlapud ararawin pasen a wala ni’d Jerusalem. Sayan pundo et manlalapud saray boluntaryon kontribusyon. Angilako si Ananias na dalin, tan amta nen asawa ton indonasyon to ed satan a pundo so arum a kuartan nanlakoan to. Balet,  imbaga nen Acan ya indonasyon to so amin a nanlakoan. Seguradon labay na sayan sanasawa a pandinayewan ira ed kongregasyon. Balet mapalikdo so inkiwas da. Diad mamilagron paraan, inwalwal nen Jehova iyan katilaan ed si apostol Pedro, a nantepet ed kinen Ananias no akin a ginawa to iyan kasalanan. Kayari na satan, abaktar si Ananias tan inatey. Ag-abayag et inatey met si Safira.​—Gawa 5:1-11.

¹⁵ Ginawa itan nen Ananias tan Safira, aliwan lapud atukso labat ira ed saman a bekta. Implano ra itan, tan nantila ira lapud labay dan palikdoen iray apostol. Tan mas grabe ni, ‘nantila ra ed masanton espiritu tan ed Dios.’ Malinlinew ed inkiwas nen Jehova a sikatoy akaparaan a manprotekta ed kongregasyon manlapud saray mansimpisimpitan. On, talagan “makapataktakot a pamaakaran so napelag ed saray lima na Dios a mabilay”!​—Heb. 10:31.

Pansiansiaen so Katooran ed Amin a Panaon

16. (a) Panon a sasalien nen Satanas ya impluensyaan iray totoo na Dios pian magmaliw iran mauges? (b) Antoran paraan so uusaren nen Satanas pian impluensyaan iray totoo ed lugar yo?

¹⁶ Gagawaen nen Satanas so anggaay nayarian to pian impluensyaan itayo, diad ontan et makapanggawa tayoy mauges tan nabalang tayoy panangabobon nen Jehova. (Apo. 12:12, 17) Say mauges ya intension na Diablo et mabitabitar ed sayan mundo, ya anggapo lay pinonot to noagta say imoral a sekso tan karawalan. Magmainomay la so makabantay na pornograpiya ed saray kompyuter odino ed arum ni ran elektronikon kagawaan. Komon ta agtayon balot padadaeg ed saray panangataki nen Satanas. Imbes, say nalikna tayo komon et singa say alikna nen salmistan David, ya oniay insulat to: “Yunor ko so inkasiak a mankalkalakal ed sakey a nagnap a kagagawa. . . . Manakar ak ed loob na abung ko a nagnap so pusok.”​—Sal. 101:2.

17. (a) Akin et iwalwal nen Jehova iray inyamot a kasalanan diad dugan panaon? (b) Anto so nepeg a determinasyon tayo?

¹⁷ Natan, agla mamilagron iwawalwal nen Jehova iray graben kasalanan tan mapalikdon kondukta a singa ginawa to ed apalabas. Balet, siansia nin nanenengneng ton amin, tan diad panaon tan paraan to et iwalwal to iray niyamot a bengatla. Oniay inkuan nen Pablo: “Mabatabatar a nengnengen iray kasalanan na saray arum, tan makakauna ed sentensia ray kasalanan da. Saray kasalanay arum balet, naunor a nakabatan.” (1 Tim. 5:24, Maung a Balita) Say manunan rason nen Jehova no akin ya iwawalwal to ray mauges a kagagawa et say aro. Inaro toy kongregasyon tan labay ton protektaan so kalinisan na satan. Ontan met, ipapanengneng toy panangasi to ed saramay nankasalanan a natan et talagan magbabawi la ra. (Uli. 28:13) Kanian panseetan tayo komon a pansiansiaen so nagnap a puso ed Dios tan ipulisay iray mauges ya impluensya.

 Pansiansiaen so Ayadyarin Puso

18. Anto so labay nen Arin David a nalikna na anak to parad Dios?

¹⁸ Oniay imbaga nen David ed anak ton si Solomon: “Amtaen mo so Dios na amam, tan manlingkor ka ed sikato ed ayadyari a puso [“tekep na interon puso,” NW] tan ed maunor a kanonotan, ta si Jehova usisaen to so saray amin a puso, tan natalosan to so saray amin a panisip na saray nonot.” (1 Awa. 28:9) Say labay nen David a gawaen na anak to et aliwa labat lan say panisia ed Dios. Labay ton naapresya nen Solomon so katuaan a si Jehova et interesadon maong ed pankaabigan na saray lingkor To. Kasin pisasalamatan moy Jehova lapud ontan so ipapanengneng to ed saray lingkor to?

19, 20. Unong ed Salmo 19:7-11, anto so akatulong ed si David pian napaapit ed Dios, tan panon tayon naalig si David?

¹⁹ Amta nen Jehova a sikatoy labalabay a kabaten na saramay totoon walaay dugan awawey, tan sano naamtaan da iray balibalin kalidad to et napaapit ira ed sikato. No ontan sirin, labay nen Jehova a sikatoy kabaten tayo tan amtaen so marakdakep a personalidad to. Panon tayon nagawaan itan? Diad panaral na Salita to tan diad personal a pakaeksperiensya na saray bendisyon to.​—Uli. 10:22; Juan 14:9.

²⁰ Inagew-agew mo ta’n babasaen so Salita na Dios, a bibidbiren mon nanlapu itan ed Dios? Ipipikasim kasi a natulongan ka komon ya iyaplika itan? Natatalosan mo kasi kaimportantian na pambilay mo unong ed saray prinsipyo na Biblia? (Basaen so Salmo 19:7-11.) No ontan, say pananisiam tan say arom ed si Jehova et mantultuloy ya onaligwas. Ontan met, sikatoy talagan napaapit ed sika, tan legan kayon manaakar et eg-egnaan toy limam, a singa panangibaga. (Isa. 42:6; Sant. 4:8) On, paneknekan nen Jehova so panangaro to diad pamendisyon tan panulong to’d sika pian napansiansiam so maapit a relasyon ed sikato legan kan manaakar ed mainget a dalan a mamaarap ed bilay.​—Sal. 91:1, 2; Mat. 7:13, 14.

Panon Mon Ebatan?

• Akin et uusisaen itayo nen Jehova?

• Antoy makasengeg no akin a walaray totoon nagmaliw a kabusol na Dios?

• Panon tayon nipanengneng a tudtua ed sikatayo si Jehova?

• Panon tayon napansiansiay ayadyarin puso ed Dios?

[Tepetepet Parad Panagaral]

[Litrato ed pahina 4]

Panon itayon babantayan nen Jehova a singa sakey a manangiyansakit ya ateng?

[Litrato ed pahina 5]

Antoy naaralan tayo ed samay agawa’d si Ananias?

[Litrato ed pahina 6]

Anto so ontulong ed sikatayo pian napansiansiay interon puson panaglingkor ed si Jehova?