Anton Inkatoo so Labay Mon Pagmaliwan?

SAY hepe na pulis ed sakey a baley dia ed Pilipinas so tinmepet ed payunir, “Antoy ginawam akin et anguman so ugali na saman a too?” Inturo na pulis so akasalansan a papel ed lamisaan to, insan to inkuan: “Antam no anto iraya? Amin na saraya et rekord na saray kaso to. Lapud ginawam et nakal so sakey ed saray sakit na ulo mi ed sayan baley.” Say lakin pantotongtongan da et sakey a buanges, a mabetbet a mangigagapoy gulo. Antoy amakiwas ed sikaton manggaway baleg a pananguman ed bilay to? Satan et say pinuyanan a mensahe ed Salita na Dios, say Biblia.

Dakel so angipapuso ed simbawa nen apostol Pablo ya ‘ipulisay so abangonan a panagbilay, say toon daan tan isulong so too a balo a sikato so pinalsay Dios.’ (Efe. 4:22-24) Baleg man odino melag so pananguman a kaukolan, say pangisulong na balon personalidad odino ‘balon too’ et kabiangan ed pagmaliw tayon Kristiano.

Anggaman ontan, say gagawaen tayon pananguman tan iyaaligwas pian onkualipika ed bautismo et gapoan ni labat. Sanen impresenta tayoy inkasikatayo diad bautismo, niyaliling itayo ed sakey a kiew ya inukitan. Napatnagan lay uhas na satan ya eskultura, balet ta dakel ni so kaukolan a gawaen. Nepeg a pinoen ni itan na manag-ukit pian ondakep. Diad inkabautismoan tayo, wala la’d sikatayo iray manunan kalidad a kaukolan pian magmaliw a lingkor na Dios. Anggaman ontan, siansia nin kaukolan tayon paaligwasen so balon personalidad tayo. Itultuloy tayo sirin a paaligwasen iya diad panggawa na saray pananguman.

Anggan si Pablo et amoria ton walaray papaaligwasen to, kanian oniay inaksobi to: “Say mauges wala ed siak nen labay ko a gawaen so maong.” (Roma 7:21) Kabat nen Pablo so inkasikato tan amta to no antoy labay ton pagmaliwan. Komusta tayo balet ey? Nepeg tayo met a tepetan so inkasikatayo: ‘Anton talagay walad akindalem ko? Antoy personalidad ko? Tan, anton inkatoo so labay kon pagmaliwan?’

Anton Talagay Walad Akindalem Ko?

Sano apigeren tayo so daan lan abung, agmagenap so basta labat panpintora ed paway anta  namimigmig la ray biga. No ibaliwala irayan depekto, agmanbayag et onloor iray problema. Mipadpara, agmagenap so basta mapalaway a kaptekan. Nepeg tayon usisaen no anton talagay walad akindalem tayo tan amtaen iray kakapuyan a papaaligwasen. Ta no andi, samay daan a personalidad odino inkatoo tayo et ompawil. Kaukolan sirin so dilin-panangusisa. (2 Cor. 13:5) Importante a nabidbiran tayo irayan makapuy ya ugali pian nipetek iratan. Pian nagawaan iya, angiter si Jehova na tulong a nakaukolan tayo.

Insulat nen Pablo: “Say salita na Dios sikatoy mabilay tan mabiskeg, tan makdem nen say anggan dinan a kampilan a duaray tarem, tan ontalos ya angga ed pansianan na kamarerwa tan espiritu, tan angga ed saray langolangoan tan saray utek, tan masiglat a mangibiig ed saray nonot tan saray getma na puso.” (Heb. 4:12) Say mensahe na nisulat a Salita na Dios, say Biblia, et walaan na mabiskeg ya impluensya ed bilay tayo. Ontalos itan ed akindalem tayo, anggan diad utek na pukepukel tayo, a singa panangibaga. Iparungtal na satan iray kanonotan tan intension tayo, salanti, no anton talaga so inkatoo tayo, ya ikokompara ed no antoy nanenengneng ya ugali tayo odino no antoy pakaamta tayo ed inkasikatayo. Agaylan abig itan a tulong a nagawaan na Salita na Dios pian nabidbir tayo iray kakapuyan tan problema ed personalidad tayo!

Sano apigeren tayo so daan ya abung, agmagenap so panalat labat ed materyales ya aderal. Say pakaamta’d sengegay depekto so makatulong ed sikatayon makagaway kundang pian agla pawilpawil iratan a problema. Mipadpara, agtayo labat nepeg ya amtaen iray makapuy a tendensia tayo, noagta ibiig met no antoy sengegan odino amaloor ed saratan. Diad ontan et natulongan itayon nakontrol iray kakapuyan tayo. Dakel so makakaimpluensya ed inkatoo tayo. Kabiangan ed saraya so kipapasen ed sosyedad tan panagbilay tayo, say kaliberliber, kultura, atateng, saray nakakaulop tayo, tan say abangonan tayon relihyon. Anggan saray programa ed telebisyon tan babantayan tayon palabas, pati ed arum nin klase na panagligliwaan, so makapangapekta ed inkatoo tayo. Say pamidbir ed saray bengatlan walay makapuy ya impluensya ed personalidad tayo, et makatulong pian nabawasay epekto na saratan.

Kayari na dilin-panangusisa, ompan ikuan tayo, ‘Onia lan talagay inkatook.’ Saya et lingon panagkatunongan. Diad panutukoy ed saramay walad kongregasyon ed Corinto, a datin milalawanan, binabai, managbuanges, tan arum ni ran miulibayan a kagagawa, inkuan nen Pablo: “Ontan so saray arum ed sikayo nensaman. Balet naurasan kayo la . . . dia ed espiritu na Dios tayo.” (1 Cor. 6:9-11) Diad tulong na masanton espiritu nen Jehova, ontalona tayo met ed panggagawa na nakaukolan iran pananguman.

Imanoen pay kipapasen na sakey a lakin manngaran na Marcos, * a taga dia ed Pilipinas. Oniay inkuan nen Marcos nipaakar ed binalegan ton pamilya: “Saray ateng ko et naynay a mansasangsangan. Kanian nen manedad ak na 19 et nanrebelde ak.” Si Marcos et nagmaliw a balitadon masugal, matakew, tan sakey a holdaper. Sikato tan saray kakaiba to et namplano ni ingen a man-hijack ed sakey ya eroplano, balet ag-itan atuloy. Anggan sanen wala lay asawa nen Marcos et nantultuloy ni’d mauges iran gagawaen to. Abalang to lanlamang so amin a walad sikato lapud panagsugal. Agnambayag, sikatoy akiiba ed asawa to a manaral na Biblia ya ikokondukta na saray Tasi nen Jehova. Diad gapo et alikna ton sikatoy agmakanepegan a magmaliw a Tasi. Anggaman ontan, diad impangiyaplika nen Marcos  ed saray naaralan to tan say iyaatendi to’d saray miting, sikatoy atulongan pian naekal iray datin kagagawa to. Natan et sikato lay bautismadon Kristiano tan regular lan manbabangat ed arum no panon met iran manguman.

Anto so Labay Mon Pagmaliwan?

Antoran pananguman so nakaukolan tayon gawaen pian napaaligwas ni iray Kristianon kalidad tayo? Sinimbawa nen Pablo iray Kristiano: “Iyarawi yo met so saratan ya amin, pasnok, ingongot, mauges a nonot, inkalabir a makapabaing a salita ya ompaway ed sangi yo. Agkayo mantitilaan, bangta nilakseb yo so toon daan a pati saray gawa to.” Tan inkuan ni na apostol: “Wala so insulong yo a balon too, a sikato so pinasimbalo nipaakar ed kakabatan a nipara ed talintao na amalsa ed sikato.”​—Col. 3:8-10.

Say manunan kalat tayo sirin, et lakseben so daan a personalidad tan isulong so balo. Pian nagawaan itan, antoran kalidad so nakaukolan tayon bayuboan? Inkuan nen Pablo: ‘Manpales kayo la sirin na sakey a puso a maabagey, maong a linawa, kauyamoan, kareenan, kasungdoan. Mantetepelan so sakey tan sakey, tan manpeperdonaan so balang sakey, no say siopaman a too wala so pangidaleman to ed siopaman. Unong ed impamerdona na Katawan ed sikayo, ontan met so gawaen yo. Tan lalo la ed saraya ya amin a bengatla ikawes yo so aro, a sikato so singer ed inkayadyari.’ (Col. 3:12-14) Say pambanikel a maong pian nabayuboan irayan kalidad so ontulong pian magmaliw itayon mas labalabay, “nampadpara ed Jehova, tan dia met ed saray lalaki.” (1 Sam. 2:26) Sanen wadiad dalin si Jesus, matalonggaring ton impatnag irayan maridios a kalidad. Diad panaral tan pangalig ed ehemplo to, mas magmaliw itayon singa si Kristo ya ‘umaalig ed Dios.’​—Efe. 5:1, 2.

Say sakey nin paraan pian natebek tayo no antoray papaaligwasen et diad panaral ed nanduruman ugali na saray karakter ed Biblia, tan imanoen no antoray makapasagyat tan makapuy ya ugali ra. Singa bilang, nonoten pa si Jose, say anak na patriarkan si Jacob. Anggaman akasagmak na saray ag-inkahustisya, apansiansia toy positibon espiritu tan akindalem a kalimgasan. (Gen. 45:1-15) Diad kasunian, say anak nen Arin David a si Absalom et nankunwarin baleg so panangiyansakit to ed saray totoo tan nidaydayew lapud inka-guapo to. Anta diad tua balet et sikatoy traidor tan manamatey. (2 Sam. 13:28, 29; 14:25; 15:1-12) Say pansimpisimpitan tan say maong ya indengan et agmanggawa ed sakey a peteg a makapasagyat.

Napaaligwas Tayoy Personalidad Tayo

Pian napaaligwas so personalidad tan magmaliw a makaroyroyo ed arapan na Dios, nepeg tayon imanoen a maong so akindalem ya inkatoo tayo. (1 Ped. 3:3, 4) Pian makagawa na saray pananguman ed personalidad, kaukolan tayon nibiig iray makapuy ya ugali tayo tan saray bengatlan mamapaloor ed saratan, ontan met ed pamayubo’d maridios iran kalidad. Kasin matalek itayon ontalona so sagpot tayon umanen iray makapuy ya ugali?

On, diad tulong nen Aman Jehova, sarag tayoy manguman. Singa say salmista, nipikasi tayo met: “Palsaen mo dia ed loob ko so sakey a malinis a puso, O Dios, tan mamasimbalo ka na matunong ya espiritu dia ed loob ko.” (Sal. 51:10) Nayarian tayon ipikasi so espiritu na Dios ya onkiwas komon ed inkatoo tayo, pian napabiskeg so pilalek tayon lalon nitunos so bilay tayo ed linawa na Dios. On, sarasarag tayoy onaligwas pian lalon malimgas ed pakanengneng nen Jehova!

[Paimano ed leksab]

[Litrato ed pahina 4]

Magenap la kasi panpintora labat ed paway na sayan abung a dineral na bagyo?

[Litrato ed pahina 5]

Kasin mipara la ed si Kristo so personalidad yo?