‘Sumpaen so Diablo’ a Singa Ginawa nen Jesus

“Sumpaen yo so Diablo, et sikatoy onarawi ed sikayo.”​—SANT. 4:7, NW.

1. Anton isusumpa so amta nen Jesus a sagmaken to legan a wadiad dalin, tan anto so resulta?

 AMTA nen Jesu-Kristo a sikatoy makasagmak na isusumpa manlapud Diablo. Napatnagan iyan katuaan ed samay balikas na Dios ed mauges a rebelden espiritu, a nansalita panamegley na uleg: “Mangiyan ak na gulaan ed sika tan say bii [say mangatatawen a kabiangan na organisasyon nen Jehova], tan gulaan ed saray ilalak mo tan ilalak to, sikato [Jesu-Kristo] sugaten to so ulom, et sika sugaten mo so mukor to.” (Gen. 3:14, 15; Apo. 12:9) Say kabaliksan na pakasugat nen Jesus ed mukor et say temporaryon ipatey to legan a sikatoy wadiad dalin, lapud ta sikatoy paolien nen Jehova ed mangatatawen a gloria. Balet say pakasugat ed ulo na uleg et kabaliksan toy andi-anggaan ya ipapatey na Diablo.​—Basaen so Gawa 2:31, 32; Hebreos 2:14.

2. Akin a matalek si Jehova ya ontalona si Jesus sumpad Diablo?

² Matalek si Jehova a sarag nen Jesus a sumpalen so asainmin to tan sumpaen so Diablo legan a sikatoy wadiad dalin. Akin et ontanlay talek nen Jehova? Lapud abayag lan pinalsay Jesus diad tawen, naobserbaan toy anak to, tan amta to a sayan “uloen a komikimey” tan “panguloan ed amin a pinalsa” et matulok tan matoor. (Uli. 8:22-31; Col. 1:15) Kanian, sanen nibaki si Jesus ed dalin tan naabuloyan so Diablo a manubok ed sikato anggad ipapatey, matalek so Dios a say bogbogtong ya Anak To et magmaliw a matalona.​—Juan 3:16.

 Ililiktar nen Jehova Iray Lingkor To

3. Panon a tratratoen na Diablo iray lingkor nen Jehova?

³ Tinukoy nen Jesus so Diablo a “manuley na sayan mundo” tan pinasakbayan To iray babangatan To a napasegsegang ira, a singa sikato. (Juan 12:31, NW; 15:20) Say mundo a walad pakayari nen Satanas a Diablo et mamubusol ed saray tuan Kristiano lapud panlilingkoran day Jehova tan sikaray managpulong na inkatunong. (Mat. 24:9; 1 Juan 5:19) Say manunan puntirya na Diablo et saray alanaan a wadia ni’d dalin, a diad arapen et manuley a kaiba nen Kristo diad mangatatawen a Panarian to. Kabiangan met ed puntirya nen Satanas iray dakel a Tasi nen Jehova a walaan na ilalo a manbilay na maando diad paraison dalin. Oniay impasakbay na Salitay Dios ed sikatayo: “Say kabusol yo, say Diablo, wala ed kaliberliber yo a singa omoang a leon a mananap na buagen to.”​—1 Ped. 5:8.

4. Diad panaon tayo, anto so mamaneknek a saray totoo na Dios et akatalona la ed Diablo?

⁴ Bilang sakey ya organisasyon a susuportaan nen Jehova a Dios, atalonaan tayo la so Diablo. Imanoen pa irayan katuaan: Diad inlabas na 100 a taon, sinali na saray sankasibegan a diktador ed awaran a pagiten iray Tasi nen Jehova. Ingen say bilang na saray Tasi et mantutultuloy ya ondarakel, a natan et ngalngali la 7,000,000, diad masulok a 100,000 a kongregasyon ed interon mundo. Saraman balet so maruksan diktador ya amairap ed saray totoo nen Jehova et inaatey la!

5. Panon ya apaneknekan a say Isaias 54:17 et peteg a tinmua ed biang na saray lingkor nen Jehova?

⁵ Diad panutukoy ed nasyon na Israel bilang say simbolikon asawan bii, insipan na Dios: “Anggapo so ayura ya agawa a sumpa ed sika ya onaligwas naani, tan balang sakey a dila ya onsumpa ed sika ed pangukom dusaen mo naani. Saya sikato so tawir na saray ariripen nen Jehova, tan say inkatunong da a manlapu ed siak.” (Isa. 54:11, 17) Apaneknekan a napanmatalkan iyan sipan diad biang na saray totoo nen Jehova diad interon mundo legan na sarayan “kaunoran ya agew.” (2 Tim. 3:1-5, 13) Itultuloy tayon sumpaen so Diablo, tan ag-ontalona so anggan anton armas ya usaren to sumpad saray totoo na Dios, lapud wala’d dapag tayo si Jehova.​—Sal. 118:6, 7.

6. Anto so ibabaga ed sikatayo na propesiya nen Daniel nipaakar ed pansumpalan na uley na Diablo?

⁶ Legan a mapmaples a manasingger so pangangga na sayan marelmeng a sistema, amin ya aspekto na uley nen Satanas et naderal. Onia so apuyanan ya insulat nen propeta Daniel: “Dia ed saray agew naani na saratan ya ar-ari [saray manuley ed panaon tayo], say Dios na tawen mamaalagey naani na sakey a panarian [diad tawen] ya anggan kapigan agnaani naderal tan say pananguley to agnaani niiter ed sananey a baley. Balet buybuyaken to naani tan upoten to naani so saraya ya amin a panarian [a walad panaon tayo], et sikato so mansiansia lawas.” (Dan. 2:44) Sano nagawa itan, namparan say uley nen Satanas tan say uley na saray ag-ayadyarin totoo et naandi la. Sigpot a mangangga so amin ya aspekto na sistema na Diablo, tan anggapo so onsumlang ed pananguley na Panariay Dios diad interon dalin.​—Basaen so 2 Pedro 3:7, 13.

7. Panon tayon naamtaan a sarag a daegen na saray indibidual a lingkor nen Jehova so Diablo?

⁷ Seguradon mansiansia lawas so organisasyon nen Jehova tan nawalaan na espiritual ya ibubulaslas. (Basaen so Salmo 125:1, 2.) Komusta itayo? Ibabaga na Biblia a sarag tayon daegen so Diablo, a singa ginawa nen Jesus. Diad katuaan to, say propesiya ya inter nen Kristo panamegley nen apostol Juan et mangipapabitar ya anggaman wala so satanikon isusumpa, sakey a “baleg ya ulop” na saramay walaan na mangaraldalin ya ilalo so makaliktar ed anggaan na sayan sistema. Unong ed Kasulatan et ikekelyaw da: “Say inkilaban [et utang tayo] ed Dios tayo a wala a manyurong ed trono, tan dia ed Kordero [si Jesu-Kristo].” (Apo. 7:9-14) Tutukoyen iray alanaan a manadaeg ed si Satanas, tan say kakaiba ran ‘arum a karnero’ et matalona met a sinmumpa ed sikato. (Juan 10:16; Apo. 12:10, 11) Balet saya et mankaukolan na inkaseet tan impasyan panagpikasi pian ‘nilaban itayo ed mauges.’​—Mat. 6:13.

 Say Ayadyarin Ehemplo na Isusumpa ed Diablo

8. Anto so sankaunaan a nirekord a tukso ya inusar na Diablo sumpad si Jesus diad kalawakan, tan anto so ginawa nen Kristo?

⁸ Sinali na Diablo a buyaken so integridad nen Jesus. Sanen wala ra’d kalawakan, angusar si Satanas na saray tukso pian nikompromiso nen Jesus so katutulok to ed si Jehova. Ingen, angiletneg si Jesus na ayadyarin alimbawa diad impanumpa to’d Diablo. Kayari na 40 ya agew tan 40 a labi na impan-ayunal to, nayarin labalabay lan talaga nen Jesus so mangan. Diad saman et inkuan nen Satanas: “No sika so Anak na Dios, iganggan mo a sarayan bato et magmaliw iran tinapay.” Balet ag-inmabuloy si Jesus a mangusar ed inter-Dios a pakayari to pian peneken iray pankaukolan to. Imbes, inkuan nen Jesus: “Walan nisulat, Aliwa a say tinapay labat so napambilay na too noag say amin a salitan ombesngaw ed sangi’ Dios.”​—Mat. 4:1-4; Deu. 8:3.

9. Akin a kaukolan tayon resistian so pangaanamot na Diablo ya usaren so natural a pilpilalek na laman tayo?

⁹ Diad panaon tayo, aanamoten na Diablo ya usaren so natural a pilpilalek na laman na saray lingkor nen Jehova. Kaukolan sirin a determinado tayon resistian iray tukson peneken so agmanepeg a seksual a pilpilalek, a magmamaliw lan normal ed sayan imoral a mundo. Onia so mapuersan ibabaga na Salitay Dios: “Agyo ta amta kasi a saray agmatunong agda natawir so panariay Dios? Agki patitilaan. Anggan saray managlawan, anggan saray manangigalang ed talintao, anggan saray managsingger ed agda asawa, anggan saray binabai, anggan saray milawanan ed kapara ra a laki . . . agda natawir so panariay Dios.” (1 Cor. 6:9, 10) Malinlinew sirin a saray totoon imoral so kabibilay da, tan agda labay so manguman et agnaabuloyan a manbilay ed balon mundo na Dios.

10. Unong ed Mateo 4:5, 6, anto ni so sananey a subok ya inusar nen Satanas pian deralen so integridad nen Jesus?

¹⁰ Onia so inkuan na Kasulatan nipaakar ed samay sakey a subok a naeksperiensya nen Jesus ed kalawakan: “Saman la say Diablo inyakar to ed masantos a syudad; tan impasen ed toktok na templo. Tan kuan to ed sikato, No Anak kay Dios, ontaboy ka; ta walan nisulat, Sikato bilinen to naani so saray angheles to nipaakar ed sika. Dia ed saray taklay da sampaten da ka naani, ompano nisapigar moy salim ed sakey a bato.” (Mat. 4:5, 6) Singa ibabaga nen Satanas a say panggawa ed saya et manresulta’d makapakelkelaw a panangidemostra ed inka-Mesias nen Jesus. Balet diad katuaan to, aliwan duga itan, sakey a mapangtan kiwas ya andian na abobon tan suporta na Dios. Kanian, apansiansia lamet nen Jesus so integridad to’d si Jehova, tan sikatoy inmebat panamegley na impangaon ed kasulatan. Inkuan to: “Wala met a nisulat, Sika agmo gawaen so panalsali ed Dios a Katawan mo.”​—Mat. 4:7; Deu. 6:16.

11. Panon so nayarin panukso nen Satanas ed sikatayo, tan antoy nayarin resulta?

¹¹ Nayarin tuksoen itayo nen Satanas ya igloria tayoy inkasikatayo ed nanduruman paraan.  Ompan ingganyoen to itayon aligen iray uso a panagkawes tan panag-ayos odino pibiangen to itayo ed saray kuestionablin panagligliwaan. Ingen, no ibaliwala tayo iray simbawa na Biblia tan aligen so mundo, nailaloan tayo kasi iray anghel a mangiyagel ed sikatayo manlapud saray mauges ya epekto na ginawa tayo? Anggaman nagbabawi si Arin David manlapud kasalanan a ginawa ra nen Batseba, sikatoy agniyagel manlapud saray resulta na ginawa to. (2 Sam. 12:9-12) Agtayo komon iiyan ed pakasubokan si Jehova diad panamegley na agmanepeg iran kiwas, a singa say pikakaaro ed sayan mundo.​—Basaen so Santiago 4:4; 1 Juan 2:15-17.

12. Anton subok so asalambit ed Mateo 4:8, 9, tan panon so inkiwas na Anak na Dios?

¹² Say sananey nin inusar na Diablo pian tuksoen si Jesus ed kalawakan et say impangiyopresi toy politikal a pakayari. Impanengneng nen Satanas ed si Jesus so amin a panarian na mundo tan saray gloria ra, insan to inkuan: “Amin da ra nia iter ko ra naani ed sika, no ondakmomo ka tan igalang mo ak.” (Mat. 4:8, 9) Talagan andian na baing si Satanas ed panasalin alaen so dayew a parad si Jehova lambengat, tan panagyat ed si Jesus ya agmanmatoor ed Dios! Lapud impamayubo ed pilalek ton nadayew, saman a datin matoor ya anghel et nagmaliw a makasalanan, maagum, tan alablabas a mauges a managpalikdo ya atawag a Satanas a Diablo. (Sant. 1:14, 15) Balet diad mabitabitar a pisunian, si Jesus et determinadon mansiansian matoor ed mangatatawen ya Ama to. Kanian onia so inkuan to: “Arawi ka dia, Satanas, ta walan nisulat, Sika igalang mo naani so Dios a Katawan mo, tan sikato labat so panlingkoran mo.” Kanian diad sayan pankanawnawa et sinumpa lamet nen Jesus so Diablo tekep na mabitabitar tan diretsaan iran salita. Agnilabay na Anak na Dios so magmaliw a kabiangan na mundo nen Satanas tan agton balot nilabay so mandayew ed satan a marelmeng!​—Mat. 4:10; Deu. 6:13; 10:20.

“Sumpaen Yo so Diablo, et Sikatoy Onarawi ed Sikayo”

13, 14. (a) Diad impangipanengneng na Diablo ed amin a panarian na mundo, anto so iyoopresi to’d si Jesus? (b) Panon a sasalien nen Satanas a gawaen itayon marelmeng?

¹³ Diad impangipanengneng ed si Jesus na amin a panarian na mundo, say Diablo et mangiyoopresi ed sikato na pakayarin agbalot agamoran na anggan siopaman a too. Iilaloan nen Satanas a say impanengneng to et managyat tan mangombinse ed si Jesus a magmaliw a sankamakapanyarian a lider ed dalin. Diad panaon tayo, ag-iyoopresi na Diablo ed sikatayo iray panarian, balet dudutakan toy puso tayo panamegley na saray nanenengneng, narerengel, tan nononoten tayo.

¹⁴ Say Diablo so mangokontrol ed sayan mundo. Kanian, sikato so mangokontrol ed media. Agsirin pankelawan a say iyoopresi na sayan mundo a babantayan, dedengelen, tan babasaen a materyal et napnoy imoralidad tan karawalan. Saray patalastas ed sayan mundo et mamapawala ed sikatayo na pankaliktan a mangaliw ed saray bengatlan agtayo nakaukolan. Lapud saraya, maparanay itayon tatangguyoren na Diablo panamegley na materyal iran bengatla a mangalay atension na mata, layag, tan say kanonotan tayo. Balet no ipulisay tayon bantayan, dengelen, tan basaen irayan agmakasulatan a bengatla, singa tayo ibabagan: “Arawi ka dia, Satanas!” No gawaen tayo itan, naalig tayo si Jesus diad impagmaliw ton desidido tan mapekder diad pangipulisay tayo ed sayan marutak a mundo nen Satanas. Say katuaan ya agtayo kabiangan na sayan mundo nen Satanas et mabitar met ed makpel a pangikakabat tayoy inkasikatayo bilang Tasi nen Jehova tan papatumbok nen Kristo diad pantratrabahoan, diad eskuelaan, diad saray kakaabay tayo, tan diad limog na saray kakanayon tayo.​—Basaen so Marcos 8:38.

15. Akin a say isusumpa ed Diablo et kabaliksan toy pantultuloy tayon alerto?

¹⁵ Kayari na mikatlon danay ya insaew na Diablo a palikdoen si Jesus pian nabalang To so integridad To ed Dios, “saman la tinaynan na Diablo.” (Mat. 4:11) Bangbalet, anggapo so plano nen Satanas ya ontunda lan manubok ed si Jesus, lapud oniay nabasa tayo: “Kanian, say Diablo, sanen asumpal ed sayan amin ya impanukso to [diad kalawakan], so inmarawi ed sikato tan nanalagar na arum a maabig a pankanawnawa.” (Luc. 4:13, NW) Sano ontalona itayo ed isusumpa’d Diablo, kaukolan a misalamat tayo’d si Jehova.  Bangbalet, kaukolan tayon kerewen so tuloytuloy a tulong na Dios, lapud say Diablo et ompawil lamet a manubok ed sikatayo diad dilin panaon to, aliwan diad panaon ya iilaloan tayo. Kanian, kaukolan ya alerto itayon naynay, akaparaan a mansungdo diad sagradon panaglingkor ed si Jehova, antokaman a subok so naabet tayo.

16. Anto so iiter nen Jehova ed sikatayon makapanyarin puersa, tan akin a kaukolan tayon kerewen iya ed pikakasi?

¹⁶ Pian natulongan itayo’d pansasagpot a sumpaen so Diablo, kaukolan tayoy manpikasi pian makaawat na sankamakapanyarian a puersa ed uniberso, say masanton espiritu na Dios. Ontulong iya ed sikatayon gawaen iray bengatlan imposiblin nasumpal panamegley na dilin biskeg tayo. Pinaseguroan nen Jesus iray babangatan to nipaakar ed pakawalaan na sayan espiritu na Dios diad impangibagan: “No sikayo sirin, anta [ag-ayadyari tan talagan] mauges kayo, amta yo so mangiter na saray maong a panangaro ed saray anak yo, ag kasi nagkalalo a say Ama yo a mangatatawen mangiter na espiritu santo ed saray onkerew ed sikato?” (Luc. 11:13) Itultuloy tayon kerewen so masanton espiritu nen Jehova panamegley na pikakasi. Tekep na sayan sankamakapanyarian a puersa ya ontutulong ed determinasyon tayon sumpaen so Diablo, magmaliw itayon matalona. Kaaruman ni’d regular tan masimoon a pikakasi tayo, kaukolan tayon isulong so kompleton kinlong a manlapud Dios pian “ontalindeg ya onsumpa ed saray pangalot na Diablo.”​—Efe. 6:11-18.

17. Anton gayaga so tinmulong ed si Jesus pian naresistian so Diablo?

¹⁷ Wala ni tinmulong ed si Jesus pian naresistian so Diablo, a makatulong met iya ed sikatayo. Oniay inkuan na Biblia: “Lapud gayaga a niyan ed arap to [si Jesus] sinungdoan to so [panamairapan a kiew], ya imbantak to so baing, et imyurong ed kawanan na trono na Dios.” (Heb. 12:2) Nawalaan tayo met na ontan a gayaga diad pangitandoro ed inkasoberano nen Jehova, pangidayew ed masanton ngaran to, tan lawas a pannonot ed tumang ya andi-anggaan a bilay a niwala ed sikatayo. Agaylan liket so naeksperiensya tayo sano si Satanas tan amin a gawagawa to et sigpot lan naderal tan “saray mauyamo tawiren da naani dalin, tan manliket ira a dili ed inkadaakan na kareenan”! (Sal. 37:11) Kanian, itultuloy tayo sirin a sumpaen so Diablo, a singa ginawa nen Jesus.​—Basaen so Santiago 4:7, 8.

Panon Mon Ebatan?

• Antoy paneknek ya iliktar nen Jehova iray totoo to?

• Panon ya angiletneg si Jesus na ehemplo diad panumpa ed Diablo?

• Diad antoran paraan a nasumpa tayo so Diablo?

[Tepetepet Parad Panagaral]

[Litrato ed pahina 29]

No mikaaro itayo ed mundo, magmaliw itayon kabusol na Dios

[Litrato ed pahina 31]

Impulisay nen Jesus so opresi nen Satanas ya amin a panarian na mundo