Tulongan Iran Ompawil a Tampol!
Tulongan Iran Ompawil a Tampol!
“Siopa so laen mi? Wala ed sika so saray salita na maando a bilay.”—JUAN 6:68.
1. Anto so imbaga nen Pedro sanen tinaynan na dakel a babangatan si Jesus?
DIAD sakey a pankanawnawa, si Jesu-Kristo et tinaynan na dakel a babangatan to lapud agda naawat so sakey ed saray bangat to. Kanian oniay intepet to ed saray apostol: “Labay yo met so ontaynan?” Inmebat si Pedro: “Katawan, siopa so laen mi? Wala ed sika so saray salita na maando a bilay.” (Juan 6:51-69) Talagan anggapo lay arum a laen da. Diad saman, “saray salita na maando a bilay” et agnaromog ed Judaismo, tan natan et seguradon agmet iratan naromog ed Babilonia a Baleg, say sankamundoan ya empiryo na palson relihyon. Parad siopaman a nisian ed pulok na Dios, balet ta labay ton napaliket lamet si Jehova et ‘panaon la ya onliing ed ugip’ tan ompawil ed pulok.—Roma 13:11.
2. No nipaakar ed saray kompidensyal odino hudisyal a pamaakaran, anto so lawas tayon nonoten?
2 Impatnag nen Jehova so panangiyansakit to’d saray abalang a karnero na Israel. (Basaen so Ezequiel 34:15, 16.) Mipadpara, saray Kristianon mamatatken et walaay pilalek tan responsabilidad ya ontulong ed sakey a kinmarneron nisian ed pulok na Dios. No inyuksoy da a sakey a manangipalapag so mangiyaral ed sakey ya inaktibon pirawat toy natulongan, anto so nepeg a gawaen na manangipalapag no naamtaan ton akagawa na ambelat a kasalanan imay inaktibo? Imbes a mangiter na simbawa nipaakar ed hudisyal odino kompidensyal iran pamaakaran, nepeg ya isuheri na manangipalapag a mitongtong imay inaktibo ed saray mamatatken. No agto itan gawaen, say mismon manangipalapag so mangipaamta ed saray mamatatken.—Lev. 5:1; Gal. 6:1.
3. Anto so reaksion na sakey a lakin walaay 100 a karnero sanen nalmo to imay sakey ya abalang?
3 Diad akaunan artikulo, apantongtongan so ilustrasyon nen Jesus nipaakar ed sakey a lakin walaay 100 a karnero. Sanen nisian so sakey ed pulok, tinaynan to so 99 tan inanap to so abalang a karnero. Talagan sikatoy aliketan sanen aromog to itan! (Luc. 15:4-7) Ontan met a liket so nalikna tayo no walay ompawil ya inaktibo ed pulok na Dios. Lapud apakiwas na panangaro, saray mamatatken tan arum ni ran membro na kongregasyon et nayarin binmisita la ed satan ya inaktibo. Labay da met a nanengneng iyan inaktibo ya ompawil ed pulok tan gamoran toy suporta, proteksion, tan panamendisyon na Dios. (Deu. 33:27; Sal. 91:14; Uli. 10:22) No walaan na pankanawnawa iray mamatatken tan manangipalapag ya ontulong pian makapawil so sakey ed kongregasyon, anto kasi gawaen da?
4. Anto so naaralan tayo ed Galacia 6:2, 5?
4 Nayarin napaseseg dan ompawil so indibidual ed kongregasyon diad maaron pangipamoria ra’d sikato ya inaro nen Jehova iray karnero To tan say kekerewen To et saraman labat so sarag tayon iter. Kaiba’d saraya so panaral na Kasulatan, iyatendi ed saray Kristianon pantitipon, tan pangipulong na maong a balita na Panarian. Nayarin matukoy met no basaen so Galacia 6:2, 5 tan salambiten a makatulong iray Kristiano ed panlibit na pakakabelatan na arum, balet “balang sakey taroken to naani so awit ton dili,” salanti, say mismon responsabilidad to’d si Jehova. Kanian, say panmatoor tayo ed Dios et agnagawaan na arum parad sikatayo.
Kasin ‘Saray Kapagaan ed Bilay’ so Makasengeg no Akin a Nisian Ira?
5, 6. (a) Akin ya importantin ondengel itayon maong ed saray inaktibon kapananisian sano ibabalikas day liknaan da? (b) Panon mon natulongan iray inaktibon natalosan a say agda la pakapipilimog ed saray totoo na Dios et mameligro ed espiritualidad da?
5 Pian naamtaan no panon a natulongan iray inaktibon kapananisiaan, saray elder tan arum nin matatken la’d espiritual a manangipalapag so kaukolan ya ondengel a maong legan ya ibabalikas na sarayan indibidual so nalilikna ra. Alimbawa, sakey kan elder ya ondadalaw ed sanasawan agmakakaatendi ed saray pantitipon tan nagmaliw lan inaktibo lapud ‘saray kapagaan ed bilay.’ (Luc. 21:34) Nayarin kalkalna dan intunda iray Kristianon aktibidad lapud saray problema ed pinansyal odino naaruman so responsabilidad da ed pamilya. Nayarin ibaga ran kaukolan day manpainawa manlapud saray Kristianon responsabilidad, balet nayarin ipamoriam ed sikara ya aliwan solusyon so pangisian day inkasikara. (Basaen so Uliran 18:1.) Nayarin oniay itepet mo ed sikara diad mataktikan paraan: “Mas maliket kayo kasi nen tinmunda kayo lan mimiaral? Mas maabig kasi bilay na pamilya yo? Nalilikna yo ni kasi liket a resulta na panagmatalek ed si Jehova?”—Neh. 8:10.
6 Say pandalepdep ed saratan a tepet so nayarin makatulong pian natalosan na saray inaktibo a lapud agla ra makapipilimog ed kongregasyon, kinmapuy so espiritualidad da tan bilang resulta et aliwa la ran maliket a singa nensaman. (Mat. 5:3; Heb. 10:24, 25) Nayari met a tulongan iran moriaen a say agda la pakapanpupulong so makasengeg no akin ya aliwa la ran maliket. (Mat. 28:19, 20) Kanian, anton makabat a kundang sirin so nepeg dan gawaen?
7. Anto so nayari tayon ipaseseg a gawaen na saramay nisian ed pulok na Dios?
7 Oniay inkuan nen Jesus: “Manlikas kayo ed inkasikayo ompan saray puso yo napano ed inkasiba, tan panagbuek, tan saray kapagaan ed sayan bilay . . . Balet manbantay kayo ed amin a panaon, a mikasi kayo, pian ontalona kayo a nilaban ed sarayan amin a bengatlan nagawa.” (Luc. 21:34-36) Saramay nisian ed pulok na Dios, balet ta labay da lamet a nalikna imay liket ya alikna ra nensaman so nayarin pasesegen a manpikasi parad masanton espiritu tan tulong na Dios tan onkiwas unong ed pikakasi ra.—Luc. 11:13.
Kasin Agapol Ira?
8, 9. Anto so nayarin ipaliwawa na sakey a matatken ed samay agapol?
8 Lapud ag-inkayadyari, walaray onlesan agpantatalosan, tan saya so nayarin makagapol ed sakey ya indibidual. Arum so agapol lapud kinmiwas a sumlang ed prinsipyo na Biblia so sakey a respetadon agi ed kongregasyon. No satan so rason no akin a nagmaliw ya inaktibo so sakey, nayarin ipaliwawa na samay ondadalaw a matatken a si Jehova et agbalot pansesengegay pakagapolan na anggan siopa. Kanian, akin et pultoten na sakey so relasyon to ed Dios tan ed totoo To? Imbes, agta nepeg ya itultuloy to so panlingkor ed Dios, a manmamatalek ya amta na “Ukom na [interon] dalin” no anton talagay agawa tan asikasoen To iray pamaakaran ed dugan paraan? (Gen. 18:25; Col. 3:23-25) No literal ya atiror tan atumba so sakey a too, alangan met ya agla ombangon.
9 Pian natulongan iran makapawil, nayarin salambiten na sakey a matatken a diad inlabas na panaon, nalmoan na arum ya agmet la manaya masyadon importante ed sikara imay akagapolan da. Diad tua, ompan samay situasyon ya akagapolan da et anggapo la natan. No samay inaktibo et agapol lapud sikatoy adisiplina, say pandalepdep tekep na pikakasi so nayarin makatulong pian namoria to ya anggan panon et wala met so lingo to, tan agto komon inabuloyan so impakadisiplina to a makagapol ed sikato.—Sal. 119:165; Heb. 12:5-13.
Kasin say Makasengeg et say Makasulatan a Bangat?
10, 11. Pian natulongan so sakey a walaay duman pakatalos ed arum a bangat na Biblia, anton panagkatunongan so nayarin magmaliw ya epektibo?
10 Nayarin tinaynan na arum so pulok na Dios lapud walaray Makasulatan a bangat ya agda naawat. Saramay Israelitan imbulos ed panangaripen na saray Ehipsio et ‘alingwanan da so ginawa na Dios’ parad sikara, tan “agla ra nanalagar na panamilin to.” (Sal. 106:13) Nayarin makatulong so pangipanonot ed inaktibo a say “matoor tan makabat ya aripen” et mangitatarya na sankaabigan ya espiritual a tagano. (Mat. 24:45) Satan so akaaralan toy katuaan. Kanian, akin et agto lamet magmaliw a determinadon manakar ed katuaan?—2 Juan 4.
11 Pian natulongan iramay nisian ed pulok na Dios, nayarin ipanonot na matatken iramay babangatan ya anaynan ed kinen Jesus lapud agda naawat so sakey ed saray bangat to. (Juan 6:53, 66) Lapud pinultot day relasyon da ed si Kristo tan saray matoor a papatumbok to, abalang da so apresasyon ed espiritual iran bengatla, tan say liket da. Kasin saramay tinmunda lan milimog ed Kristianon kongregasyon et akaromog na arum a pasen a walaay daakan ya espiritual a tagano? Andi, ta anggapo lay arum ya ontan a pasen!
Kasin Walay Nalalanor ya Ambelat a Kasalanan?
12, 13. No inaksobi na sakey a toon nisian ed pulok na Dios a walay agawaan ton ambelat a kasalanan, antoy nayarin gawaen pian sikatoy natulongan?
12 Arum ya indibidual so tinmunda lan manpulong tan miaral lapud akagawa ira na ambelat a kasalanan. Ompan iisipen da a no ipatua day kasalanan da ed saray mamatatken et nadispelosip ira. Balet, no intunda da la iyan agmakasulatan a kagagawa tan talagan nagbabawi la ra, ag-ira nadispelosip. (2 Cor. 7:10, 11) Imbes, naabrasa ira, tan saray mamatatken et mangiter ed sikara na nakaukolan dan espiritual a tulong.
13 No sakey kan matatken la’d espiritual a manangipalapag tan ontutulong ka’d sakey ya inaktibo, anto so nepeg mon gawaen no bilang ta imbaga to’d sika a walay agawa ton ambelat a kasalanan? Singa asalambit la, imbes ya ibiang mo ni inkasika ed satan a situasyon, isuherim ed sikaton mitongtong ed saray mamatatken. No agto labay a gawaen itan, nipatnag moy panangiyansakit ed ngaran nen Jehova tan say espiritual a pankaabigan na kongregasyon no onkiwas ka unong ed panangigiya na Dios nipaakar ed ontan iran pamaakaran. (Basaen so Levitico 5:1.) Amta na saray mamatatken no panon a natulongan so siopaman a malabay ya ompawil tan manbilay unong ed linawa na Dios. Ompan kaukolan so maaron disiplina. (Heb. 12:7-11) Sano binidbir la na indibidual a sikatoy nankasalanan ed Dios, intunda to lay mauges a kagagawa, tan talagan magbabawi la, sikatoy tulongan na saray mamatatken, tan makaawat na panamerdonay Dios.—Isa. 1:18; 55:7; Sant. 5:13-16.
Aliketan ed Impawil na Anak
14. Diad dili yon salita, isalaysay yo pa so ilustrasyon nen Jesus nipaakar ed managdarak ya anak.
14 Pian natulongan so sakey a karneron nisian ed pulok, samay inyasain ya ontulong so nayarin manukoy ed ilustrasyon nen Jesus a walad Lucas 15:11-24. Diad satan a parabolo, dinarak na sakey a kalangweran so tawir to ed imoral a kabibilay. Balet diad saginonor et ginula to met lanlamang so mauges a kabibilay to. Anggapo lay naakan to, makakailiw la, diad satan et denesidi ton onsempet la ed abung da! Sikatoy anengneng na ama to anggan arawi ni, kanian binatik tan nilakap to’d beklew so anak to, insan to maaron inangoban. Talagan agaylay liket na sayan ama! No dalepdepen iya na samay tinmaynan ed pulok na Dios, nayarin sikatoy napakiwas ya ompawil. Lapud maganggano lan naderal iyan sistema na bengabengatla, sikatoy nepeg ya ‘onsempet ed abung’ a tamtampol.
15. Akin et kalkalnan niaarawi so arum ed kongregasyon?
15 Maslak ed saramay niarawi ed kongregasyon et agmet talagan kapara na samay managdarak ya anak. Arum et kalkalnan niyarawi, a singa sakey a baloton kalkalnan niyanor. Walaray abelatan a maong ed saray kapagaan ed bilay kanian nibaliwala ray relasyon da ed si Jehova. Wala ra met so arum ya inabuloyan day inkasikaran nigapol na kakongregasyonan da, odino tinmaynan ira lapud walaray Makasulatan a bangat ya agda naawat. Pigara met so akibiang ed agmakasulatan iran kagagawa. Anggaman ontan, saray punto ya apantongtongan nipaakar ed sarayan pamaakaran so nayarin ontulong ed sika pian naasistian mo iramay tinmaynan ed pulok makasengeg ed saraya odino arum ni ran rason, sakbay ya atrasado la iray bengabengatla.
“Maliket Ak Ana’ko ta Pinmawil Ka La!”
16-18. (a) Panon ya atulongan na sakey a matatken so agin laki a pigaran taon lan inaktibo? (b) Akin a nagmaliw ya inaktibo iyan agi, panon a sikatoy atulongan, tan panon so impangawat na kongregasyon ed sikato?
16 Onia so imbaga na sakey a Kristianon matatken: “Panggugunaetan na say ulop na mamatatken mi a bisitaen iramay inaktibo. Anonotan ko imay agin laki ya inyaralan ko tan atulongan kon makaamta na katuaan. Sikatoy nagmaliw ya inaktibo ed loob na manga 25 a taon tan ondadalan ed mairap a kipapasen, kanian impaliwawak no panon a makatulong ed sikato so pangiyaplika ed saray prinsipyo na Biblia. Ag-abayag, ginapoan to lay onatendi ed Kingdom Hall tan inawat toy panagaral na Biblia pian natulongan ya ombiskeg so determinasyon ton ompawil ed pulok na Dios.”
17 Akin a nagmaliw ya inaktibo iyan agi? Inamin to: “Ginapoan kon mas ikdan na atension iray bengatlan walad mundo nen saray espiritual a bengatla. Insan intundak so panagaral, panagpulong, tan pati say iyaatendi ed saray pantitipon. Agko aliklikas ya agak la manaya kabiangan na Kristianon kongregasyon. Balet, say personal tan masimoon ya interes ya impatnag na saray mamatatken so akatulong ed siak ya ompawil.” Kalkalnan abawasan so problema na sayan agi kayari ton inawat so panagaral na Biblia. Inkuan ton, “Amoriak a say kulang manaya ed bilay ko et say panangaro tan panangiwanwan nen Jehova tan say organisasyon to.”
18 Panon so impangawat na kongregasyon ed sayan agi? Inkuan to: “Aliknak a singa ak no samay managdarak ya anak a sinalambit nen Jesu-Kristo. Alimbawa, sakey ed saray akulaw lan agi a wadman, 30 a taon lay apalabas tan anggad natan et siansia nin manmamatoor, so angibaga’d siak, ‘Maliket ak Ana’ko ta pinmawil ka la!’ Satan so anenyeg a maong ed liknaan ko. On, talagan akapawil ak la ed sankaabigan a pasen parad siak. Tan labay kon ibalikas so masimoon ya apresasyon ko ed panangaro, panangiyansakit, anos, tan interes ya impanengneng ed siak na saray mamatatken tan say interon kongregasyon. Say panangaro ra ed si Jehova tan ed kapara ran too so talagan akatulong ed siak ya ompawil ed pulok na Dios.”
Pasesegen Iran Onkiwas la Natan!
19, 20. Panon yon napaseseg iray inaktibon ompawil a tamtampol ed pulok na Dios, tan panon yon nipanengneng ed sikaran aliwan alablabas so iilaloan na Dios ed sikatayo?
19 Manbibilay itayo la ed kaunoran iran agew, tan magano lan manampot iyan kaplesan a sistema na bengabengatla. Sirin, pasesegen iray inaktibo ya onatendi ed saray Kristianon pantitipon. Sagyaten iran gapoan a tamtampol so iyatendi. Ipanonot ed sikaran sasalien nen Satanas a deralen so relasyon da ed Dios tan ipapamoria to’d sikara a nainawaan ira labat ed saray pakakabelatan da no taynan da so tuan panagdayew. Ipaseguro ed sikaran nagamoran da labat so tuan pakarepreskoan diad pagmaliw dan matoor a papatumbok nen Jesus.—Basaen so Mateo 11:28-30.
20 Ipanonot ed saray inaktibo ya iilaloan na Dios a gawaen tayo so anggaay nayarian tayo. Sanen binalaw so agi nen Lazaro a si Maria lapud pinuyokan toy mabmablin ambalingit a larak so ulo nen Jesus sanen magano lan ompatey, oniay inkuan nen Jesus: “Paulyan yon bukor, . . . Ginawa to so ayarian to.” (Mar. 14:6-8) Sakey ni, kinomendaan nen Jesus imay pobrin balo ya angiter na melmelag a donasyon diad templo. Ginawa to met so anggaay nayarian to. (Luc. 21:1-4) Maslak ed sikatayo et nayarian tayoy onatendi ed Kristianon pantitipon tan mibiang ed panangipulong na Panarian. Diad tulong nen Jehova, dakel ed saray inaktibo natan et sarag da met a gawaen iratan.
21, 22. Anto so nipaseguro yo ed saramay ompawil ed si Jehova?
21 No say sakey ya inaktibo et natatakot a miarap lamet ed saray kaagian to, nayari yon ipanonot ed sikato so panliliket ya agawa sanen sinmempet ed abung so managdarak ya anak. Ontan met so nalikna na saray agagi no walaray ompawil ed kongregasyon. Pasesegen iran onkiwas la natan pian sumpaen so Diablo tan onapit ed Dios.—Sant. 4:7, 8.
22 Maliket a panangabrasa so manaalagar ed saramay ompawil ed kinen Jehova. (Tag. 3:40) Saray naeksperiensya ra’d apalabas diad panaglingkor ed Dios et seguradon akapangiter ed sikara na baleg a liket. Dakel a bendisyon so manaalagar ed saramay ompawil a tampol ed pulok!
Panon Mon Ebatan?
• Panon yon natulongan so sakey a Kristianon agapol insan nagmaliw ya inaktibo?
• Anton panagkatunongan so nayarin makatulong ed sakey a sinmian ed pulok na Dios lapud walay sarili ton panmoria ed sakey a bangat?
• Panon a posiblin natulongan so sakey no sikatoy masuyat ya ompawil ed kongregasyon?
[Tepetepet Parad Panagaral]
[Litrato ed pahina 13]
Ondengel a maong legan ya ibabalikas na inaktibon kapananisiaan so nalilikna to
[Litrato ed pahina 15]
Say pandalepdep ed ilustrasyon nen Jesus nipaakar ed managdarak ya anak so nayarin mamakiwas ed arum ya ompawil ed pulok na Dios