‘Tumboken Iray Bengatlan Manggawa na Kareenan’

SAY balon sementadon dalan so ompatnag a matibay tan agnaderal. Balet, diad ilalabas na panaon et nayarin onlesa iray letak tan abot. Kanian, kaukolan so pangapiger pian ombayag so karsada tan anggapoy nadisgrasya.

Ontan met so nayarin nagawa no nipaakar ed relasyon tayo’d arum. Walaray panaon ya onlesay problema, tan nayarin naderal odino onletak ni ingen itan, a singa panangibaga. Amta nen apostol Pablo a mandurumaan so panmoria na saramay Kristianon walad Roma. Kanian sinimbawa to irayan kaagian: “Tumboken tayo so saray bengatla a manggawa na kareenan, tan saray bengatla a kipaalageyan na sakey tan sakey ed sikatayo.” (Roma 14:13, 19) Akin ya importantin ‘tumboken iray bengatlan manggawa na kareenan’? Panon tayon panggunaetan a nagamoran so kareenan?

Akin a Gegemtanen so Kareenan?

No agnaapiger iray angkekelag a letak na karsada, nayarin onloor iraya ya anggad magmaliw a mapeligron abot. Ontan met, mapeligro no paulyanan tayon agnaresolbe iray agpantatalosan. Oniay insulat nen apostol Juan: “No wala so mankuan, Aroen ko so Dios, tan busolen to so agi to, sikato so matila. Ta say agmangaro ed agi to, anta anengneng to, agto nayarian ya aroen so Dios ya agto anengneng.” (1 Juan 4:20) Say ag-aresolbin agpantatalosan et nayarin manresulta’d pamusol na sakey a Kristiano ed agi to.

Impanengneng nen Jesu-Kristo a say panagdayew tayo et ag-awaten nen Jehova no ag-itayo mikareenan ed arum. Imbaga to’d saray babangatan to: “Kanian no isasaklang mo so bagat mo ed altar, et nanonotan mo’d man a say agim et walay bengatlan pamusolan to ed sika. Itilak mo’d man so panangarom ed arap na altar, et onla ka, ta mipulangan ka nin unona ed agim, insan ka ed satan onla tan isaklang mo so panangarom.” (Mat. 5:23, 24) On, say manunan rason no akin a gegemtanen tayoy kareenan et lapud labay tayon paliketen si Jehova a Dios. *

Say arum nin rason no akin a gegemtanen so kareenan et ipapabitar diad sakey a situasyon ya agawa ed kongregasyon na Filipos. Linmesa so agla asalambit a problema ed baetan na duaran agin bibii, di Euodias tan Sintique, tan mapatnag ya ameligro itan ed kareenan na interon kongregasyon. (Fil. 4:2, 3) Say ag-aresolbin  agpantatalosan et magangganon nakabatan na dakel. Say pankaliktan a napansiansia so aro tan pankakasakey ed kongregasyon so mamakiwas ed sikatayon gegemtanen so pikakareenan ed saray kapananisiaan.

“Mapalar iray managpadeen,” so inkuan nen Jesus. (Mat. 5:9.) Say pangegemtan na kareenan so manresulta’d inkapnek. Kaaruman ni, say kareenan so makatulong ed pagmaliw a mabunigas ed pisikal, ta “say mareen a puso sikato so bilay na laman.” (Uli. 14:30) Diad biek a dapag, say panem-em na sakit na linawa so nayarin manresulta’d pansakit tayo.

Anggaman say karaklan a Kristiano et onabobon a kaukolan a gegemtanen so kareenan, nayarin nononoten yo no panon a naresolbe iray agpantatalosan. Konsideraen tayo so Makasulatan iran prinsipyo a makapangigiya ed sikatayo.

Say Mareen a Pantongtong so Makapangipawil na Kareenan

Saray angkekelag a letak na sementadon karsada et naapiger no tapalan iratan a tampol. Sarag tayo kasin perdonaen, odino tapalan la, a singa panangibaga, iray angkekelag a lingo na saray agagi tayo? Nayari pa lagin epektibo iya ed maslak a kaso na agpantatalosan, ta insulat nen apostol Pedro a “say aro [et] dakel so sakoban ton kasalanan.”​—1 Ped. 4:8.

Balet, walaray pankanawnawan say problema et ompatnag a seryoso, ya agtayo basta-basta nalingwanan odino nibaliwala. Konsideraen no antoy agawa ed saray Israelita sanen kalooloob da ni labat ed Insipan a Dalin. Sakbay ya ombeltang ed Ilog Jordan so “saray anak nen Ruben tan saray anak nen Gad tan say kapaldua a poli nen Manases,” angipaalagey ira na “altar a baleg so nengneng to.” Inisip na arum a tribu na Israel a say altar ya impaalagey et uusaren parad idolatroson panagdayew tan agda nibaliwala itan a problema. Kanian namparaan iran miguerra.​—Jos. 22:9-12.

Nayarin inisip na arum ya Israelita a wala lay magenap ya ebidensya na impankasalanan, tan no onataki iran agnaliklikas et daiset labat so ompatey ed sikara. Balet, imbes a tamtampol iran onlusob, sarayan tribun walad sagur na Jordan et angibaki ni delegado pian pantongtongan day problema. Oniay intepet da: “Anto ya impakalukso so saya a ginawa yo a sumpa ed Dios na Israel, pian onsian kayo ed sayan agew a manlapu ed itutumbok ed Jehova?” Pero diad katuaan to, saramay tribun angipaalagey na altar et agpa sinmumlang ed ganggan na Dios. Balet panon kasi so magmaliw a reaksion da ed satan ya akusasyon? Kasin onebat ira na ansakit a salita odino agla ra mitongtong? Kalmadon inmebat iramay naakusaan a tribu, tan impaliwawa dan say talagan rason na impangipaalagey day altar et lapud pilalek dan panlingkoran si Jehova. Say ebat da so amasiansia na relasyon da ed Dios tan angiliktar na dakel a bilay. Lapud mareen so impantongtong da, aresolbe so problema tan nipawil so kareenan.​—Jos. 22:13-34.

Sakbay a mangala na seryoson kundang iramay arum ya Israelita, makabat ni ran akitongtong ed tribu nen Ruben tan Gad tan ed kapaldua na tribu  nen Manases. “Agka mangganat ed pusom a manpasnok,” so ibabaga na Salita na Dios, “ta say sanok onteen ed akwalan na saray maatiw.” (Ecl. 7:9) Say Makasulatan a paraan pian naresolbe so seryoson agpantatalosan et diad mareen tan matuan pantotongtong. Nailaloan tayo kasi so panamendisyon nen Jehova no manem-em tayo na sakit na linawa tan agtayo mitongtong ed samay too a diad pakalikna tayo et akaopendi ed sikatayo?

Diad biek a dapag, anto kasi magmaliw a reaksion tayo no bilang ta walay agin inmasingger ed sikatayo lapud pakalikna to et sikatoy naopendi tayo, ompan aakusaan to itayo ni ingen? “Say mabanayar ya ebat ipaliis to so sanok,” so ibabaga na Biblia. (Uli. 15:1) Saramay naakusaan a tribu na Israelita so kalmadon inmebat, balet malinew dan impaliwawa so dapag da, kanian apaliisay baleg a problema. Balanglan sikatayoy unaan ya inmasingger ed agi odino sikatayoy inasinggeran pian pantongtongan so problema, maabig no tepetan tayoy inkasikatayo, ‘Antoran salita, tono na boses, tan kakikiwas so nayarin mamasiansia na kareenan?’

Usaren so Dila ed Makabat a Paraan

Natatalosan nen Jehova a kaukolan tayon ibesngaw iray kapagaan tayo. Balet, no agtayo naresolbe so personal ya agpantatalosan, nayarin natukso itayon iyistorya itan ed arum. Say panem-em ed sakit na linawa so main-inomay a manresulta’d makritikon panagsalita. Oniay ibabaga na Uliran 11:11 nipaakar ed agsuston panangusar na dila: “[Say syudad] so nabagbag lapu ed sangi na marelmeng.” Ontan met, say ag-abanlongan a panagsalita nipaakar ed kaagian so nayarin mangekal na kareenan ed kongregasyon a niyaliling ed syudad.

Anggaman ontan, say pangegemtan na kareenan so agmankabaliksan ya agtayo lan balot pantongtongan iray agagi tayo. Oniay simbawa nen apostol Pablo ed saray kapananisiaan: “Anggapo komon so salita a mabanday ya ompaway ed sangi yo.” Balet inyarum to: “Say maabig lawas a nipaakar ed pakapansimpit unong na nakaukolan, pian mangiter na gayaga ed saray ondengel. . . . Manaanosan kayo ed sakey tan sakey, mapangasi, manpeperdonaan so sakey tan sakey.” (Efe. 4:29-32) No inasinggeran kayo na sakey ya agi ta naopendi yo’d impansalita odino inkiwas yo, agta mas mainomay yoy onkerew na perdona tan mikareenan no dati et positiboy iistoryaen to’d arum nipaakar ed sikayo? Ontan met, no kabkabat itayon naynay a mangibabaga na makapaseseg iran salita nipaakar ed saray agagi, mas mainomay tayon napapawil so kareenan no bilang ta walay nagawan agpantatalosan.​—Luc. 6:31.

Manlingkor ed Dios a “Benebenek”

Lapud ag-inkayadyari, walaan itayoy tendensian onarawi ed saramay akaopendi ed sikatayo, ya isian tayo ni ingey inkasikatayo. Balet agmakabat so ontan a kurang. (Uli. 18:1) Bilang nankakasakey a totoo ya ontatawag ed ngaran nen Jehova, determinado itayon “manlingkor . . . ed sikato a benebenek.”​—Sof. 3:9.

Say agdugan panagsalita odino kondukta na arum a too et agtayon balot aabuloyan a mamaletey ed seseg tayo’d puron panagdayew. Manga pigaran agew sakbay a salatan na bagat nen Jesus so pangiyaapay ed templo tan diad saman et kapkapankondena ni labat nen Jesus ed saray eskriba, naimano toy sakey a pobri a balon bii ya angiter na “amin a pantagano a wala ed sikato” diad panagpelagan na donasyon ed templo. Sinali kasi nen Jesus a patundaen iman a bii? Andi. Diad tua, maabig so imbaga to ed matoor ya impanuporta na saman a bii ed kongregasyon nen Jehova ed saman a panaon. (Luc. 21:1-4) Say agmatunong ya ikikiwas na arum so agnagmaliw a rason pian agla gawaen na saman a bii so obligasyon ton suportaan so panagdayew ed si Jehova.

Anggano parad sikatayo et akagaway aliwa odino agmakatunongan ni ingen so sakey a Kristianon agi, panon kasi ikiwas tayo? Abuloyan tayo kasin mangapekta iya’d sigpot-kamarerwan panaglingkor tayo ed si Jehova? Odino akaparaan tayo kasin resolbien iray agpantatalosan pian napansiansiay kareenan ed kongregasyon na Dios natan?

“No nayari,” so simbawa ed sikatayo na Kasulatan, “dia ed anganggaan na nayarian yo, manayam kayo ed kareenan ed ganaganay totoo.” (Roma 12:18) Determinado tayo komon a gawaen iya, diad ontan et mansiansia itayon maligen ed dalan na bilay.

[Paimano ed leksab]

[Litrato ed pahina 17]

Kaukolan nen Euodias tan Sintique a gegemtanen so kareenan

[Litrato ed pahina 18]

Antoran salita, tono na boses, tan kakikiwas so nayarin mamasiansia na kareenan?