Determinadon Sigpot a Manpulong

“Imbilin to ed sikami so pampulong mi ed baley, tan [“sigpot a,” NW] mantasi.”​—GAWA 10:42.

1. Anto so impabitar nen Pedro a ganggan sanen manpapaliwawa ed ulop di Cornelio?

 TINIPON na sakey ya Italyanon opisyal na armada iray kakanayon tan kakaaro to parad sakey a baleg a pananguman. Satan a toon walaay takot ed Dios et si Cornelio. Inkuan nen apostol Pedro ed ulop di Cornelio a saray apostol et ingganggan a ‘manpulong ed baley [odino totoo] tan sigpot a mantasi’ nipaakar ed si Jesus. Marakdakep iray resulta na impanpulong nen Pedro lapud saray ag-asegat a Gentil et akaawat na masanton espiritu na Dios, abautismoan, tan awalaan na ilalon manari a kaiba nen Jesus diad tawen. Agaylan abig iran resulta na sigpot ya impanpulong nen Pedro!​—Gawa 10:22, 34-48.

2. Panon tayon amta ya aliwa labat lan saray 12 apostol so ingganggan a manpulong?

² Agawa itan nen 36 C.E. Manga duay taon antis na satan, sakey a toon andi-tundan onsusumpa ed Inkakristiano so akaeksperiensya na bengatlan akapanguman ed bilay to. Sanen mamapaarap ed Damasco iyan too, a si Saulo na Tarso, pinmayawar si Jesus ed sikato tan inkuan to: “Onloob ka ed baley et nibaga naani ed sika so nakaukolan mo a gawaen.” Pinaseguroan nen Jesus si babangatan ya Ananias a si Saulo et manpulong ed “saray Gentiles, tan saray arari, tan saray anak na Israel.” (Basaen so Gawa 9:3-6, 13-20.) Et linma si Ananias ed si Saulo, tan oniay inkuan to: “Say Dios na saray atateng tayo tinuro to ka . . . ta sika naani so tasi to ed saray amin a totoo.” (Gawa 22:12-16) Talaga ta’n seneryoso nen Saulo, a diad kaunoran et akabkabat a Pablo, so asainmin a pantasi odino pampulong?

Talagan Sikatoy Sigpot a Nampulong!

3. (a) Anton salaysay so pangiyapasakeyan tayoy imano tayo? (b) Antoy reaksion na saray mamatatken ed Efeso ed mensahe nen Pablo, a mangiiter na anton maabig ya ehemplo?

³ Marakdakep no detalyado tayon aralen so amin a ginawa nen Pablo kayari na satan, balet ta say pangiyapasakeyan tayoy imano tayo natan et samay paliwawa to nen manga 56 C.E., a walad Gawa kapitulo 20. Agawa itan diad pansamposampot na komatlon impanbaroy to bilang misionero. Sikatoy dinmaong ed Mileto, a pier ed Dayat Aegean, tan impatawag to iray mamatatken ed kongregasyon na Efeso. Say Efeso et manga 50 kilometro kaarawi, balet mas andukey a biahien ta pakurba-kurba so dalan. Seguradon manlikliket iramay mamatatken ed Efeso sanen akasabi’d sikaray  mensahe nen Pablo. (Ikompara so Uliran 10:28.) Balet, kaukolan da nin uksoyen iray bengabengatla pian makaonla ra’d Mileto. Wala ta’y arum ed sikaran kinmerew na bakasyon ed pantratrabahoan da odino angikapot ed lakoan da? Ontan so gagawaen na dakel ya agagi natan pian naseguro ran agda nasaew so anggan sakey a sesyon ed tinaon a distriton kombension da.

4. Antoy ginawa nen Pablo sanen pigay taon a walad Efeso?

⁴ Antoy padesir yon ginawa nen Pablo diad Mileto sanlegan ton aalagaren iray mamatatken ed loob na talora odino apatiran agew? No sikayo, anto komoy ginawa yo? (Ikompara so Gawa 17:16, 17.) Naamtaan tayoy ginawa nen Pablo diad samay imbaga to ed saray mamatatken ed Efeso. Deneskribe to so paraan na kabibilay to diad inlalabas na saray taon, pati samay nen sikatoy walad Efeso. (Basaen so Gawa 20:18-21.) Lapud amta ton anggapoy onsuppiat, oniay inkuan to: “Sikayo a dili amta yo, nanlapu ed inmunan agew ya inloob ko ed Asia . . . a pinatuak [“sigpot ak a nantasi,” NW].” On, sikatoy determinadon anumpal ed ganggan nen Jesus ed sikato. Panon ton ginawa itan diad Efeso? Say sakey a paraan et say impanpulong to ed saray Judio, a pinegdat to so amayamay ed sikara, inerman a kawalaan da. Inkuan nen Lucas a sanen walad Efeso si Pablo nen manga 52-55 C.E., sikatoy ‘nankakalar tan akieb-ebatan’ odino nantatangguyor diad sinagoga. Sanen ‘nampaawet tan ag-anisia’ iray Judio, inteen la nen Pablo so imano to’d arum, tan sikatoy inmalis ed arum a parte na syudad balet ta siansia nin nampulong. Sikato siri’ akapantasi ed saray Judio tan Griego diad satan a baleg a syudad.​—Gawa 19:1, 8, 9.

5, 6. Akin a segurado itayon say pinulongan nen Pablo ed kaabungan et saray agmananisia?

⁵ Arum ed saramay nagmaliw a Kristiano et kinmualipikan mamatatken ed saginonor, tan saraya iramay kinatongtong nen Pablo diad Mileto. Pinanonotan to ira ed metodon inusar to: “Anggapo so antokaman a pakapinabangan yo a pinaulyan ko ya impaliwawa ed sikayo tan imbangat ko ed sikayo a lapag, tan dia ed saray kaabungan.” Diad panaon tayo, walaray mangibabaga a say tutukoyen labat dia nen Pablo et say panagpastol ed saray mananisia. Balet ta andi. Say balikas a ‘panagbangat ed lapag tan ed kaabungan’ et manunan ontutukoy ed panag-ebanghelyo ed saray agmananisia. Malinew itan ed sinmublay a balikas nen Pablo. Inkuan ton sikatoy nampulong ed “saray Judios tan saray Griegos [nipaakar ed] pampataoli ed Dios, tan say pananisia ed Katawan tayo a Jesu-Kristo.” Mabitar, pinulongan nen Pablo iray agmananisia a mankaukolan a manpataoli tan nawalaay pananisia ed si Jesus.​—Gawa 20:20, 21.

⁶ Diad malaknab ya impanaral na sakey ya iskolar ed Kristianon Griegon Kasulatan, oniay inkuan to nipaakar ed Gawa 20:20: “Taloy taon nen Pablo ed Efeso. Pinulongan toy amin a totoo, odino nayarin inalutor to ray kaabungan (bersikulo 26). Saya so makasulatan a basiyan na panag-ebanghelyo ed kaabungan tan ed arap na dakel a  totoo.” Balang lan literal a nila to so amin a kaabungan, unong a kuan na sayan iskolar, odino andi, aglabay nen Pablo a nalingwanan na saray mamatatken ed Efeso no panoy impanpulong to tan no antoy resulta na satan. Oniay inkuan nen Lucas: “Amin a manaayam ed Asia, saray Judios tan saray Griegos, nadngel da so salita na Katawan.” (Gawa 19:10) Balet panon itan a nadngel na “amin” diad distrito na Asia, tan antoy ipapabitar na satan nipaakar ed panagpulong tayo?

7. Panon a nibagan aliwa labat a saramay direktan pinulongan nen Pablo so naapektoan na mensahe to?

⁷ Lapud impanpulong nen Pablo ed saray publikon pasen tan ed kaabungan, dakel so akadngel ed mensahe to. Diad padesir yo, nansiansia labat kasi ed Efeso so amin a pinulongan to? Anggapo ra kasi linma’d arum a lugar pian mannegosyo, manayam ed kawalaan na saray kanayon da, odino pian taynan so okupadon bilay diad baleg a syudad? Imposible met. Dakel natan so inmaalis ed arum a lugar lapud ontan iran rason, ompan sakey kayo ed sikara. Ontan met, diad saman a panaon et ompapasyar odino mannenegosyo ed Efeso iray dayo. Legan dan wadtan, nayarin apitongtongan day Pablo odino nadngel day impanpulong to. Antoy nagawa kapawil da’d lugar da? Saramay angawat ed katuaan et manpulong met. Nayarin saray arum et agnagmaliw a mananisia, balet ta ompan naistorya ra so nadngelan da legan a sikaray walad Efeso. Kanian, nadngel na saray kakanayon, kakaabay, odino saray kustomer da so katuaan, tan nayarin arum ed sikara so angawat ed satan. (Ikompara so Marcos 5:14.) Antoy ipapabitar na saya nipaakar ed epekto na sigpot yon pampupulong?

8. Panon a nayarin nadngel na interon distrito na Asia so katuaan?

⁸ Nipaakar ed samay apalabas ya impanministeryo nen Pablo ed Efeso, insulat to a walay ‘sakey a baleg a kapot ya alukasan ed sikato.’ (1 Cor. 16:8, 9) Anto itan a kapot, tan panon itan ya alukasan ed sikato? Say tuloy-tuloy ya impanministeryo to ed Efeso et nanresulta ed inkayat na maong a balita. Imanoen pay Colosas, Laodicea, tan Hierapoles, taloran syudad a walad pegley manlapud Efeso. Agbalot nakar nen Pablo iratan a lugar, ingen ta akasabi ditan so maong a balita. Taga ditan si Epafras. (Col. 2:1; 4:12, 13) Kasin nadngel nen Epafras so impanpulong nen Pablo diad Efeso tan nagmaliw a Kristiano? Ag-itan sinalambit na Biblia. Balet sanen inwakawak nen Epafras so katuaan diad lugar da, nayarin irerepresenta toy Pablo. (Col. 1:7) Ompatnag met ya akasabi so katuaan ed saray syudad a singa say Filadelfia, Sardis, tan Tiatira, legan na saramay taon a nampulong si Pablo ed Efeso.

9. (a) Antoy masimoon a pinilalek nen Pablo? (b) Anto so teksto ed taon 2009?

 ⁹ Bilang resulta, dakel so rason na saray mamatatken ed Efeso a panisiaan so inkuan nen Pablo: “Agko ipapasen so kamarerwak a walaay antokaman a kakanaan, a singa mabmabli itan ed siak, nasumpal ko labat so babatiken ko tan say ministeryo ya inawat ko ed Katawan a Jesus, a sigpot kon ipulong so maong a balita na agnaparaan a kaabigan na Dios.” Walad satan a bersikulo so makapaseseg tan makapakiwas a teksto parad taon 2009: ‘Sigpot ya ipulong so maong a balita.’​—Gawa 20:24, NW.

Sigpot a Manpupulong Natan

10. Panon tayon amta a pati sikatayo et kaukolan met a sigpot a manpulong?

¹⁰ Aliwa labat lan saray apostol so ingganggan a ‘manpulong ed totoo, tan sigpot a mantasi.’ Sanen akitongtong so pinaoli’d bilay a si Jesus ed manga 500 a babangatan a nantitipon diad Galilea, oniay ingganggan to: “Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo.” Satan a ganggan et onaplika met ed amin a Kristiano natan, unong ya ipapabitar na saray salita nen Jesus: “Nia, wala ak a naynay ed sikayo, ya angga ed kasampotan na [sistema na] mundo.”​—Mat. 28:19, 20.

11. Kabkabat iray Tasi nen Jehova lapud panggagawa ra na anton importantin kimey?

¹¹ Itutultuloy ya uunoren na saray maseseg a Kristiano itan a ganggan, a panseseetan dan ‘sigpot ya ipulong so maong a balita.’ Pian nagawaan itan, say manunan paraan et samay sinalambit nen Pablo ed saray mamatatken ed Efeso, say panagpulong ed kabkaabungan. Diad 2007 a libro nipaakar ed epektibon panagmisionero, oniay inkuan nen David G. Stewart, Jr: “Say metodo na saray Tasi nen Jehova a panangibangat ed kada indibidual ed no panon dan inabang so sisisiaen da ed arum et epektibon aminpigapiga nen say makilot, teorya labat [a panamilin ed saray plataporma]. Paboriton gawaen na dakel a Tasi nen Jehova so panginabang ed sisisiaen da ed arum.” Antoy resulta? “Nen 1999, 2 anggad 4 porsiento labat na totoon tinetepetan ko diad duaran kabisera na Mamabukig ya Europa so angibagan sikaray dinalaw na saray misionero na Latter-day Saints odino ‘Mormons.’ Masulok a 70 porsiento so angikuan a sikaray personal a nila na saray Tasi nen Jehova, a maslak et aminpigapiga ni ingen.”

12. (a) Akin et ‘maminpigapiga’ itayon oonla ed kaabungan diad saray teritorya tayo? (b) Wala ta’y nidalatdat yon eksperiensya ya anguman so panmoria na sakey a too ed mensahe tayo?

¹² Nayarin mipakna ed satan iray totoo ed lugar yo. Tan ompan sakey ka ed saray oonla ed sikara. Lapud “personal [mon] nila” so totoo diad panagkabkaabungan a ministeryom, akatongtong mo iray lalaki, bibii, tan kalangweran. Ompan ag-dinmengel so arum anggano ‘aminpigapigam’ la ran nila. Saray arum et nayarin dinmengel labat na agano sanen innabang moy sakey a teksto odino punto ed Biblia. Balet, walaray arum a talagan apulongan mo, tan angawat ed mensahe. Ontan iray kaslakan a nagagawa legan tayon ‘sigpot ya ipupulong so maong a balita.’ Nayari pa lagin dakel lay nadngel mon alimbawa na totoon agtanto interesado sanen “aminpigapiga” iran nila, balet ta anguman so kipapasen odino panmoria ra. Ompan walay agawa ed sikara, odino ed sakey ya inad-aro ra a sengegan no akin ya alukasan so nonot tan puso ra ed katuaan. Natan et kaagian tayo la ra. Kanian anggaman diad kaplesan et pigpigaray nalmom ya interesado, agka onsusuko. Agtayo iilaloan ya awaten na amin so katuaan. Balet say iilaloan na Dios ed sikatayo et say makuli, maseseg a pantultuloy tayon sigpot a pampulong.

 Saray Agtayo Amta a Resulta

13. Panon a say pampupulong tayo et nayarin mamawala na saray agtayo amta a resulta?

¹³ Aliwa labat lan saramay direktan tinulongan nen Pablo a magmaliw a Kristiano so naapektoan na ministeryo to. Tan ontan met so nagagawa ed panagpulong tayo natan. Seseguroen tayo a regular itayon makakapibiang ed panagkabkaabungan, a gagawaen so anggaay nayarian tayon pulongan so dakel. Itotongtong tayo so maong a balita ed saray kakaabay, katrabaho, kaeskuela, tan kakanayon. Kasin amta tayo so amin a resulta? Diad saray arum ya apulongan tayo, ompan sankaimanon tampol iray maabig a resulta. Balet diad arum, nayarin anggapoy nanengneng a resulta diad loob na pigaran panaon, ingen ta linmamut tan tinmubo lanlamang so bukel na katuaan ed puso ra. Anggan ag-itan nagawa, nayarin istoryaen na totoon nakakatongtong tayo so imbaga, sisisiaen, tan kakikiwas tayo. On, nayarin agda naam-amtaan a nitatanem da manaya iratan a bukel na katuaan ed saray totoon mangawat.

14, 15. Antoy resulta na impanpulong na sakey ya agin laki?

¹⁴ Alaen pan sakey ya alimbawa si Ryan tan say asawa ton si Mandi, a taga’d Florida, U.S.A. Diad pantratrabahoan nen Ryan, pinulongan to so sakey a lakin katrabaho to. Satan a laki, a sakey ya Hindu, et mandindinayew ed panangawes tan pananalita nen Ryan. Diad aminpigan impantongtong da, impaliwawa nen Ryan so nipaakar ed kikioli tan kipapasen na inaatey. Aminsan a labi na Enero, tinepetan na laki so asawa to, a si Jodi, no antoy amta to ed saray Tasi nen Jehova. Si Jodi et Katoliko, tan inkuan ton say amta to labat ed saray Tasi et say “pampupulong da ed kaabungan.” Kanian, in-type nen Jodi ed Internet so “Jehovah’s Witnesses,” tan nalmo toy Web site tayo a www.watchtower.org. Pigay bulan a binasa nen Jodi iray materyal a walad satan a site, pati say Biblia tan saray artikulon agusgustoan to.

¹⁵ Asabi panaon, akapankabat si Jodi tan Mandi, ta pareho iran nars. Malikeliket si Mandi ya angebat ed saray tepet nen Jodi. Kalabas na pigaran panaon, unong ed si Jodi et apantongtongan da so manlapud si “Adan anggad Armagedon.” Impaiyaralan na Biblia si Jodi. Ag-abayag, sikato lay ginmapon akiaral ed Kingdom Hall. Kasabi Oktubre, sikatoy nagmaliw lan agbautismadon manangipalapag, tan sikatoy abautismoan na Pebrero. Oniay insulat to: “Natan ta amtak la so katuaan, malikeliket tan napnapnek so bilay ko.”

16. Anto so ipapanengneng na eksperiensya na agin taga Florida nipaakar ed panggugunaet tayon sigpot a manpulong?

¹⁶ Ag-inilaloan nen Ryan a say impanpulong to ed samay laki et manresulta ed ikamang na sakey ed katuaan. Tua, diad kaso to et naamtaan to so epekto na impagmaliw ton determinado a ‘sigpot a manpulong.’ Ingen ta nayari met a sano manpupulong ka ed kaabungan, trabaho, eskuelaan, odino diad impormal a paraan et agmo naam-amtaan a satan manayay sengegan a narengel na arum so maong a balita. Singa si Pablo, ya agto naamtaan so amin a resulta na impantasi to diad distrito na “Asia,” nayarin agmo met naamtaan so amin a maabig a resulta na sigpot mon pampupulong. (Basaen so Gawa 23:11; 28:23.) Balet, makanakanan itultuloy mon gawaen itan!

17. Determinado kan gawaen so anto legan na 2009?

¹⁷ Diad sayan taon 2009, komon ta seryosoen tayon amin so ingganggan ed sikatayo a pantasi ed kaabungan tan ed arum ni ran paraan. Diad ontan et nibaga tayo met imay imbalikas nen Pablo: “Agko ipapasen so kamarerwak a walaay antokaman a kakanaan, a singa mabmabli itan ed siak, nasumpal ko labat so babatiken ko tan say ministeryo ya inawat ko ed Katawan a Jesus, a sigpot kon ipulong so maong a balita na agnaparaan a kaabigan na Dios.”

Anto so Ebat Mo?

• Panon a sigpot a nampulong si apostol Pedro tan Pablo tan saray arum ni nen inmunan siglo?

• Akin a nayarin say epekto na pampupulong tayo et mas malaknab ni nen say amta tayo?

• Anto so teksto ed taon 2009, tan parad sika, akin et matukoy itan?

[Tepetepet Parad Panagaral]

[Blurb ed pahina 19]

Say teksto ed taon 2009 et: ‘Sigpot ya ipulong so maong a balita.’​—Gawa 20:24, NW.

[Litrato ed pahina 17]

Amta na mamatatken ed Efeso a kabiangan lay bilay nen Pablo so manpulong ed kabkaabungan

[Litrato ed pahina 18]

Kaunongan kalaknab so magmaliw ya epekto na sigpot mon pampupulong?