Kasin Nanonotan Yo?

Nanggayagaan mo ta so impamasa ed agano ni iran paway na Say Panag-Bantayan tan The Watchtower? Salim pa sirin ya ebatan iray onggendan a tepet:

• Panon tayon salitaen a marlas so “malinis a lenguahe,” say katuaan nipaakar ed Dios tan saray gagala to? (Sof. 3:9, NW)

Singa met ed arum a lenguahe, pian marlas a makapansalita na “malinis a lenguahe,” kaukolan tayoy ondengel a maong, aligen iramay marlas a mansalita, ipatlep iray kangaranan tan arum a bersikulo na Biblia, uliten iray bengatlan naaralan, manbasan maksil, analisaen so gramatika, odino inkaalasir na katuaan, pansagpotan so iyaligwas, mangiganay permanentin eskedyul na panagaral, tan ipasal a salitaen itan.​—8/15, pahina 21-25.

• Antoray pigaran nalalanor diad pakapikabat ed Dios?

“Jehova so ngaran to,” tan labay ton sikatoy nakabat tayo ed satan a ngaran. (Exo. 15:3) Sikatoy “Dios na aro tan kareenan.” (2 Cor. 13:11) Sikatoy “Dios na pikakabat” tan “kilalaban.” (1 Sam. 2:3; Sal. 25:5) Onapit sirin so Dios ed saramay makapikabat ed sikato.​—9/1-E, pahina 4-7.

• Panon ya onaplika ed panamaley so ideyan “tinalo a lubir”?

Say balikas a “tinalo a lubir” et piguratibo. (Ecl. 4:12) No iyaplika ed panamaley, samay unonan duaran lubir et say asawan laki tan asawan bii, insan samay pegley a lubir ya akapotipotan da et say Dios. No say sanasawa et akapotipot ed Dios, a singa panangibaga, sikaray nawalaan na biskeg a mangarap ed saray problema tan nagamoran day liket ed panamaley.​—9/15, pahina 16.

• Anto so tutukoyen na samay “panangitapew ed saray lima” ed Hebreos 6:2?

Imbes ya onaplika iya ed panuro ed saray mamatatken, nayarin say tutukoyen dia et say panangitapew na lima pian mangiter na saray mamilagron langkap na masanton espiritu. (Gawa 8:14-17; 19:6)​—9/15, pahina 32.

• Antoran pankaukolan na ananak so nepeg ya amta na sakey a maong ya ama?

Pigara ed saray pankaukolan da et say (1) panangaro to, (2) positibon alimbawa, (3) maliket a kaliberliber, (4) espiritual ya edukasyon, (5) disiplina, (6) tan proteksion.​—Okt.-Dis., pahina 18-21.

• Panon a nipatnag na saray mangidadaulo so respeto ed arum?

Say sakey a paraan a nagawaan iya na matatken et no agton balot pagawa ed saray agagi iray bengatlan agto labay a gawaen. Ontan met, nipanengneng toy respeto diad pangibaga toy rason ed espisipikon kerew odino no akin ya onman so inter ton panangiwanwan.​—10/15, pahina 22.

• Antoy pigaran makatulong pian napansiansia a malet so ulopan na sanasawa?

Say unona et iprayuridad yoy panamaley yo. Komadua, paliisan so amin a makabuyak na katooran yo ed asawa yo. Balanglan maligen odino magulo so ulopan yon sanasawa, nakaukolan na asawa yo a nakabatan a mansasagpot kayon gawaen a matalona so panamaley yo; sarayan duaran kundang et makatulong.​—11/1-E, pahina 18-21.

• Anto so naaralan na sakey a matatken ed samay panangusar na managpastol ya Israelita ed tayukor odino baston?

Say sakey a managpastol et manguusar ed tayukor odino baston pian igiya so pulok. Sano ompaway odino onloob iray karnero ed kulongan da, saraya et “onlabas ed silong na tayukor” pian nabilang ira na managpastol. (Lev. 27:32) Ontan met so kaukolan a gawaen na Kristianon managpastol, nepeg a kabkabat to so pulok na Dios a walad panangasikaso to tan amta to no antoy kipapasen na balang sakey ed sikara.​—11/15, pahina 9.

• Panon a nipanengneng na sakey ya ina ya importante ed sikato so kalinisan?

Say tagano et nayarin nadutakan ed nanduruman paraan, kanian urasan to ni lima to antis a mangegnay tagano tan seseguroen ton asakoban itan. Pansiasiansiaen ton malinis so abung pian agpanayaman na utot, bulilit, tan saray insekto. Say arum nin paraan et say panmantini a malinis so kawes tan regular a panagpesak tan panag-ames. Sarayan kundang et mitunosan ed Biblia.​—12/1-E, pahina 9-11.