Pablien so Nikabkabiig a Betang nen Jesus ed Gagala na Dios

“Siak so dalan, tan say katuaan, tan say bilay. Anggapo so ondateng ed Ama, noag dia ed panamegley ko.”​—JUAN 14:6.

1, 2. Akin et nepeg a magmaliw itayon interesado ya usisaen so nikabkabiig a betang nen Jesus ed gagala na Dios?

 MANLAPU la nensaman, panggugunaetan na dakel a totoo so magmaliw a duma ed saray akapaliber ed sikara, balet ta daiset labat so akapanggawa ed satan. Mas daiset ni ingen so talagan walaay kanepegan a mangibagan sikaray nikabkabiig ed importante iran pamaakaran. Balet si Jesu-Kristo, say Anak na Dios, et nikabkabiig ed dakel a paraan.

² Akin et nepeg a magmaliw itayon interesado ed nikabkabiig a betang nen Jesus? Lapud nalalanor so mismon relasyon tayo ed Ama tayon walad tawen a si Jehova! Oniay inkuan nen Jesus: “Siak so dalan, tan say katuaan, tan say bilay. Anggapo so ondateng ed Ama, noag dia ed panamegley ko.” (Juan 14:6; 17:3) Usisaen tayo pa so pigaran pamaakaran a diad saratan et nikabkabiig si Jesus. Say panggawa ed satan et mamaaralem na apresasyon tayo ed betang nen Jesus diad gagala na Dios.

“Bogbogtong ya Anak”

3, 4. (a) Akin a nibaga tayon si Jesus et nikabkabiig ed betang to bilang say bogbogtong ya Anak? (b) Panon a nagmaliw a nikabkabiig so betang nen Jesus ed impamalsa?

³ Si Jesus et aliwa labat a basta sakey ya anak na Dios. Sikato so “bogbogtong ya Anak na Dios.” (Juan 3:16, 18) Samay Griegon salitan nipatalos a “bogbogtong” et mankabaliksan met na “nikabkabiig.” Tan say labay ya ibaga na “nikabkabiig” et “bukbukor to diad sakey a klase.” Balet, nilasus milyon iray espiritun ananak nen Jehova. Diad anton pantalos sirin a si Jesus et “bukbukor to” odino “nikabkabiig”?

⁴ Si Jesus et nikabkabiig lapud sikato labat so direktan pinalsa na Ama to. Sikato so panguloan ya Anak. Diad tua, sikato so “panguloan ed amin a pinalsa.” (Col. 1:15) Sikato so “sengeg na pinalsa na Dios.” (Apo. 3:14) Say betang na sayan bogbogtong ya Anak ed impamalsa et nikabkabiig met. Aliwan sikato so Manamalsa, odino Lapuan na saray pinalsa. Balet sikato so inusar nen Jehova a pinagka-instrumento, odino diad panamegley to et apalsa so amin a bengatla. (Basaen so Juan 1:3.) Oniay insulat nen apostol Pablo: “No diad sikami wala so saksakey a Dios, say Ama, a sikato so panlapuan na ami ganagana, tan sikatayo dia ed sikato; tan saksakey a Katawan, si Jesu-Kristo, a diad panamegley to wala so ami ganagana, tan sikatayo diad panamegley to.”​—1 Cor. 8:6.

5. Panon ya impabitar na Kasulatan so inka-nikabkabiig nen Jesus?

⁵ Diad katuaan to, si Jesus et nikabkabiig ed dakel nin paraan. Say Kasulatan et angiter ed sikato na dakel a titulo odino pananawag a mangipapabitar ed nikabkabiig a betang to ed gagala na Dios. Pantongtongan tayo natan so limara ni ed sarayan titulo ya inyaplika ed si Jesus diad Kristianon Griegon Kasulatan. *

“Say Verbo”

6. Akin et matukoy a si Jesus et tinawag a “say Verbo”?

⁶ Basaen so Juan 1:14. Akin et tinawag si Jesus a “say Verbo,” odino Logos? Ipapabitar na sayan titulo no antoy kimey to manlapu la nen apawala so arum nin marunong a pinalsa. Inusar nen Jehova so Anak to pian mangipasabi na saray impormasyon tan instruksion ed arum ya espiritun ananak, ontan met ed pangipasabi na mensahe To ed katooan diad dalin. Pinekderan nen Jesus ed saray Judion dumerengel to a sikato so Verbo, odino Pinagkasangiyan na Dios, sanen inkuan to: “Say bangat ko agko kien, balet kien na angibaki ed siak.  No siopaman a too manlinawa a gawaen to so linawa to, nakabatan to so bangat ko, no nanlapu kasi ed Dios, ono mansalita ak kasi na manlapu ed inkasiak.” (Juan 7:16, 17) Si Jesus so nantultuloy a tinawag a “Say Verbo na Dios” anggan sanen kayari ton pinmawil ed maglorian kipapasen diad tawen.​—Apo. 19:11, 13, 16.

7. Panon tayon naalig so impanengneng nen Jesus a kapaabebaan diad impanumpal to ed betang to bilang “say Verbo”?

⁷ Isipen pa labat no antoy ipapatnag na sayan titulo. Anggaman si Jesus so sankarunongan ed amin a pinalsa nen Jehova, agto mandedepende ed dilin kakabatan to. Sasalitaen to no anto labat so imbaga na Ama to. Lawas ton ipapaarap so dayew ed kinen Jehova imbes a diad dili to. (Juan 12:50) Talagan alay abig ya ehemplo a nepeg tayon aligen! Inikdan itayo met na baleg a pribilehyon “mangitarok na saray magayaga a balita na saray maong a bengatla.” (Roma 10:15) Say apresasyon tayo ed maabig ya ehemplo nen Jesus ed inkamapaabeba so nepeg a mamakiwas ed sikatayon paliisan so pansalita manlapud dilin opinyon tayo. No nipaakar ed panangipakabat na manangiliktar-bilay a mensahen walad Kasulatan, agtayo labay a ‘pasulokan so nisulat.’​—1 Cor. 4:6, Maung a Balita.

Say “Amen”

8, 9. (a) Anto so kabaliksan na salitan “amen,” tan akin et tinawag si Jesus ya “Amen”? (b) Panon a sinumpal nen Jesus so betang to bilang “Amen”?

⁸ Basaen so Apocalipsis 3:14. Akin et tinawag si Jesus ya “Amen”? Say “amen” et letra-por-letran substitusyon na sakey a Hebreon salita a mankabaliksan na “ontan pa komon,” odino “segurado.” Sayan salita et inala ed sananey nin Hebreon salita a mankabaliksan na “magmaliw a matoor” odino “napanmatalkan,” tan inusar met iyan salita pian deskribien so inkamatoor nen Jehova. (Deu. 7:9; Isa. 49:7) Diad anton paraan sirin a si Jesus et nikabkabiig sanen sikatoy tinukoy bilang “Amen”? Imanoen so ebat a walad 2 Corinto 1:19, 20: “Say Anak na Dios, si Jesu-Kristo, a sikato so nipulong ed sikayo . . . , aliwa ya On tan Andi, balet dia ed sikato so On. Ta anggan dakel so saray sipan na Dios, dia ed sikato so kawalaan na On; kanian dia ed sikato met so kawalaan na Amen, [diad] gloria na Dios.”

⁹ Si Jesus so “Amen” no nipaakar ed amin a sipan na Dios. Lapud andiay kabalawan ya impanbilay to diad dalin, tan lapud impatey to bilang bagat, agarantiyaan tan nagmaliw a posible so pakasumpal na amin a sipan nen Jehova a Dios. Diad impansiansian matoor nen Jesus, pinaneknekan ton palso imay akusasyon nen Satanas, unong a nirekord ed libron Job, a sano saray lingkor na Dios et makasagmak na kakisiran, kairapan, tan subok, Sikatoy ikaindan da. (Job 1:6-12; 2:2-7) Diad amin a pinalsa na Dios, say panguloan ya Anak so makapangiter na sankabelatan tan agbalot nasuppiat ya ebat ed satan ya akusasyon. Kaaruman ni, inter nen Jesus so sankaabigan ya ebidensya a manusuporta ed dapag na Ama to dia ed mas baleg ya isyu nipaakar ed inka-makanepegan nen Jehova bilang sankatalbaan a soberano.

10. Panon tayon naalig si Jesus no nipaakar ed nikabkabiig a betang to bilang “Amen”?

¹⁰ Panon tayon naalig si Jesus no nipaakar ed nikabkabiig a betang to bilang “Amen”? Diad pansiansia tayon matoor ed si Jehova tan diad panuporta tayo ed sankatalbaan a soberanya to. No ontan so gawaen tayo, positibo so ikiwas tayo ed samay kerew a naromog ed Uliran 27:11: “Ana’ko, onkabat ka, tan paliketen mo so pusok, pian naebatan ko so mamalaw ed siak.”

“Manamegley na Balon Sipan”

11, 12. Panon a nibagan nikabkabiig so betang nen Jesus bilang Manamegley?

¹¹ Basaen so 1 Timoteo 2:5, 6. Si Jesus so ‘saksakey a Manamegley ed Dios tan ed saray totoo.’ Sikato so “manamegley na balon sipan.” (Heb. 9:15; 12:24) Balet, si Moises et tinawag met a manamegley​—say manamegley na Ganggan a sipanan. (Gal. 3:19) No ontan sirin, panon a nibagan nikabkabiig so betang nen Jesus bilang Manamegley?

¹² Diad orihinal a lenguahe, samay salitan nipatalos a “manamegley” et sakey a terminon uusaren ed legal iran pamaakaran. Ontutukoy itan ed si Jesus bilang say legal a Manamegley (odino, diad sakey a pantalos et abogado) na balon sipanan, tan lapud satan et nagmaliw a posible so inkiletneg na sakey a balon nasyon, salanti, say “Israel na Dios.” (Gal. 6:16) Sayan nasyon et tugyopen na saray Kristianon nilanaan na espiritu, a kabiangan na “peteg ya inkasaserdote” ed tawen. (1 Ped. 2:9; Exo. 19:6)  Samay Ganggan a sipanan, a diad satan et si Moises so manamegley, et ag-akapangiletneg na ontan a nasyon.

13. Anto so nalalanor ed betang nen Jesus bilang Manamegley?

¹³ Anto so nalalanor ed betang nen Jesus bilang Manamegley? Bueno, inkana nen Jehova so balor na dala nen Jesus ed saramay magmaliw a kabiangan na balon sipanan. Diad onian paraan et legal so impangiyabawag ed sikara nen Jehova bilang matunong. (Roma 3:24; Heb. 9:15) Insan, sarag la ran ipasen nen Jehova a makanepegan ya onloob ed balon sipanan tekep na ilalon magmaliw ya arin-saserdote ed tawen! Bilang Manamegley da, tutulongan ira nen Jesus pian napansiansia ray malinis a talindeg ed arapan na Dios.​—Heb. 2:16.

14. Antokaman so ilalo ra, akin et kaukolan a talagan pablien na amin a Kristiano so betang nen Jesus bilang Manamegley?

¹⁴ Komusta balet iramay agkabiangan na balon sipanan, saramay say ilalo ra et manbilay ya andi-anggaan diad dalin, aliwan diad tawen? Anggaman ag-ira kabiangan na balon sipanan, nagunggonaan ira ed satan. Naperdona ira ed saray kasalanan da tan niyabawag met iran matunong bilang kakaaro na Dios. (Sant. 2:23; 1 Juan 2:1, 2) Balanglan say ilalo tayo et diad tawen odino diad dalin, balang sakey ed sikatayo et walaay maabig a rason pian pablien so betang nen Jesus bilang Manamegley na balon sipanan.

‘Atagey a Saserdote’

15. Panon a say betang nen Jesus bilang Atagey a Saserdote et nidumaduma ed amin na saramay lalakin nanlingkor bilang atagey a saserdote?

¹⁵ Diad apalabas, dakel a lalaki so nanlingkor bilang atagey a saserdote, ingen ta say betang nen Jesus bilang Atagey a Saserdote et talagan nikaduma. Panon? Impaliwawa nen Pablo: “Sikato agto nakaukolan ya agew-agew, a singa saray sankatageyan a saserdote, a mangisaklang ed saray bagat, unona lapud saray kasalanan ton dili, insan lapud saray kasalanan na baley; ta say ginawa to ed aminpinsan a nipaakar ed amin, sanen insaklang to so inkasikaton dili. Ta say ganggan yan to a sankatageyan a saserdote so saray totoon makabos; ingen say salita na samba, a sikato so onsabi ed kayari ganggan, yan to so Anak, a sikato so ayadyari ya andi-anggaan.”​—Heb. 7:27, 28. *

16. Akin et talagan nikabkabiig so bagat nen Jesus?

¹⁶ Si Jesus et nambilay bilang ayadyarin too, say eksakton kasimbangan nen Adan sakbay a nankasalanan. (1 Cor. 15:45) Kanian, si Jesus labat so toon walad kipapasen a makapangiyapay na kompleto tan ayadyarin bagat, salanti, say klase na bagat ya agla kaukolan ya uliten. Diad Mosaikon Ganggan, saray bagat et inagew-agew ya iyaapay. Balet, amin iratan a bagat tan panaglingkor na saserdote et representasyon labat na saray bengatlan sumpalen nen Jesus. (Heb. 8:5; 10:1) Sirin, lapud baleg so agawaan nen Jesus nen say arum a saserdote tan lapud permanente so panlingkor to, say betang to bilang Atagey a Saserdote et nikabkabiig.

17. Akin a nepeg tayon apresyaen so betang nen Jesus bilang Atagey a Saserdote tayo, tan panon tayon nagawaan itan?

¹⁷ Kaukolan tayo so serbisyo nen Jesus bilang Atagey a Saserdote pian natulongan itayon nawalaan na matunong a talindeg ed arapan na Dios. Tan talagan makapadinayew iyan Atagey a Saserdote tayo! Oniay insulat nen Pablo: “Walaan itayo na atagey a saserdote, ya aliwan sakey ya agmakapilikna ed saray kakapuyan tayo, noagta sakey ya asubok ed amin a pamaakaran a singa sikatayo, balet andian na kasalanan.” (Heb. 4:15, NW) On, say pangapresya ed saya so nepeg a mamakiwas ed sikatayon ‘agla manbilay parad inkasikatayo, noag diad samay inatey parad sikatayo.’​—2 Cor. 5:14, 15; Luc. 9:23.

Say Impasakbay a Bini

18. Anto so nipropesiya kayarin nankasalanan si Adan, tan anto so niparungtal diad saginonor nipaakar ed sayan propesiya?

¹⁸ Diad Eden, sanen ompatnag ya anggapo lay  ilalo na katooan, salanti, abalang da lay malinis a talindeg ed Dios, say andi-anggaan a bilay, gayaga, tan say Paraiso, et impasakbay nen Jehova a Dios so sakey a Manangiliktar. Saya so tinukoy bilang say “ilalak,” odino bini. (Gen. 3:15) Diad loob na abayag a panaon, sayan agni kabat a Bini et nagmaliw a tema na dakel a propesiya na Biblia. Sikatoy manlapud poli nen Abraham, Isaac, tan Jacob. Ontan met, sikatoy manlapud linya nen Arin David.​—Gen. 21:12; 22:16-18; 28:14; 2 Sam. 7:12-16.

19, 20. (a) Siopa so insipan a Bini? (b) Akin et nibagan say impasakbay a bini et aliwa labat a si Jesus?

¹⁹ Siopa iyan insipan a Bini? Say ebat ed sayan tepet et naromog ed Galacia 3:16. (Basaen.) Anggaman ontan, diad bandad sampot na satan met lanlamang a kapitulo, oniay imbaga nen apostol Pablo ed saray nilanaan a Kristiano: “Tan no sikayo kien kayo nen Kristo, ontan sirin ilalak [odino, bini] kayo nen Abraham, tan mananawir unong ed sipan.” (Gal. 3:29) No si Kristo manaya so insipan a Bini, panon ya agawan wala ni ray arum a kaiba to?

²⁰ Minilyon so mangibabagan nanlapu ira’d poli nen Abraham, say arum ni ingen ed sikara et inmakton propeta. Walaray relihyon ya ontan lan importansia so iiter da ed pananisia ran saray propeta ra et nanlapud poli nen Abraham. Balet kasin saraya imay insipan a Bini? Andi. Singa imbaga na pinuyanan a si apostol Pablo, aliwan amin a nanlapud poli nen Abraham et insipan a Bini. Samay binin makapangitarok na bendisyon ed katooan et agmanlapud poli na arum ya anak nen Abraham noag diad kinen Isaac labat. (Heb. 11:18) Diad katuaan to, saksakey labat a too, si Jesu-Kristo, a say detalye na impanlapu to ed kapolian nen Abraham et nirekord ed Biblia, so manunan kabiangan na satan ya impasakbay a bini. * Diad saginonor, walaray nagmaliw ya onkokomaduan kabiangan na bini nen Abraham lapud ta ‘kien ira na Kristo.’ On, say betang nen Jesus ed  pakasumpal na sayan propesiya et talagan nikabkabiig.

21. Anto so pandinayewan mo diad paraan na impakasumpal nen Jesus ed nikabkabiig a betang to ed gagala nen Jehova?

²¹ Anto so naaralan tayo manlapud antikey ya impanrepaso ed nikabkabiig a betang nen Jesus ed gagala nen Jehova? Manlapud la’d inkapalsa to, say bogbogtong ya Anak na Dios et talagan nikabkabiig, anggapoy kapara to. Anggaman ontan, sayan nikabkabiig ya Anak na Dios a nagmaliw a si Jesus et lawas mapaabeban nanlingkor a mitunosan ed linawa na Ama to, ya agton balot inanap so dilin kigloriaan to. (Juan 5:41; 8:50) Talagan sankaabigan ya ehemplo parad sikatayo natan! Singa si Jesus, komon ta panggunaetan tayon ‘gawaen so amin parad kigloriaan na Dios.’​—1 Cor. 10:31.

[Saray paimano ed leksab]

Kasin Nanonotan Mo?

• Anto so naaralan mo nipaakar ed nikabkabiig a betang nen Jesus manlapud saray titulo odino pananawag ed sikato? (Nengnengen so kahon.)

• Panon mon naalig so ehemplo na nikabkabiig ya Anak nen Jehova?

[Tepetepet Parad Panagaral]

[Kahon/Litrato ed pahina 15]

Saray Pigaran Titulo a Mangipapabitar ed Nikabkabiig a Betang nen Jesus ed Gagala na Dios

◼ Say Bogbogtong ya Anak. (Juan 1:3) Si Jesus labat so direktan pinalsa na Ama to.

◼ Say Verbo. (Juan 1:14) Inusar nen Jehova so Anak to bilang Pinagkasangiyan pian mangipasabi na saray impormasyon tan instruksion ed arum a pinalsa.

◼ Say Amen. (Apo. 3:14) Lapud andiay kabalawan ya impanbilay nen Jesus diad dalin, tan lapud impatey to bilang bagat, agarantiyaan tan nagmaliw a posible so pakasumpal na saray sipan nen Jehova a Dios.

◼ Say Manamegley na Balon Sipan. (1 Tim. 2:5, 6) Bilang legal a Manamegley, pinagmaliw nen Jesus a posible so kiletneg na balon nasyon, salanti, say “Israel na Dios,” a tugyopen na saray Kristiano a magmaliw a kabiangan na “peteg ya inkasaserdote” ed tawen.​—Gal. 6:16; 1 Ped. 2:9.

◼ Say Atagey a Saserdote. (Heb. 7:27, 28) Si Jesus labat so toon walad kipapasen a makapangiyapay na sakey ya ayadyarin bagat, salanti, say klase na bagat ya agla kaukolan ya uliten. Sarag to itayon linisan manlapud kasalanan tan ibulos manlapud ipapatey a resulta na satan.

◼ Say Insipan a Bini. (Gen. 3:15) Saksakey labat a too, salanti, si Jesu-Kristo, so manunan kabiangan na impasakbay a bini. Amin na saramay nagmaliw ya onkokomaduan kabiangan na bini nen Abraham et ‘kien nen Kristo.’​—Gal. 3:29.