Pansiansiaen Mo Kasi so Integridad Mo?

“Angga ed ompatey ak agko ekalen so inkaskey [“integridad,” NW] ko a manlapu ed siak!”​—JOB 27:5.

1, 2. Anto so nepeg tayon bayuboan ed inkasikatayo, tan antoran tepet so pantongtongan tayo?

 ISIPEN pan nenengnengen moy sakey a plano na abung. Pandinayewan moy inkapraktikal na desinyo na satan, tan malikeliket ka met lan mannononot no panon kayon nagunggonaan a sankapamilyaan ed satan ya abung. Balet, agta onabobon ka ya anggapo met lanlamang so gunggona na satan a plano tan say antokaman ya inisip mo nipaakar ed satan no agyo itan ipaalagey, panayaman, tan mintinaen?

² Mipadpara, say integridad et nayarin isipen tayon importantin tuloy a kualidad a pakagunggonaan tayoy baleg, ontan met na saray inaro tayo. Balet, anggano pandinayewan tayo so integridad, agtayo met lanlamang nagunggonaan ed satan no agtayo itan bayuboan tan pansiansiaen ed inkasikatayon mismo. Natan, say panagpaalagey na abung et mabetbet lan mankaukolan na dakel a panaon tan sagpot. (Luc. 14:28, 29) Ontan to met ed panamayubo na integridad. Balet antokaman ya igana tayon panaon tan sagpot parad satan et talagan nabawbawi tayo. Pantongtongan tayo pa natan sirin iyan taloran tepet: Panon itayon magmaliw a totoon walaan na integridad? Panon tayon napansiansia so Kristianon integridad tayo? Antoy nagawaan na sakey no walay panaon ya agto apansiansia so integridad to?

Panon Itayon Magmaliw a Totoon Walaan na Integridad?

3, 4. (a) Diad antoran dalan itayo tutulongan nen Jehova pian nabayuboan tayoy integridad? (b) Base ed ehemplo nen Jesus, panon tayon nabayuboan so integridad?

³ Singa nipabitar la ed akaunan artikulo, pinagamoran itayo nen Jehova na kagalangan diad impangiter to’d sikatayo na pribilehyon mandesidi no kasin pilien tayoy magmaliw a totoon walaan na integridad. Say makapaliket et agto itayo basta pinaulyan a mankarapkarap nipaakar ed saya. Ibabangat to itayo no panon tayon nabayuboan iyan makanakanan kualidad, tan mabunbunlok ton ipapagamor so masanton espiritu to ya ontutulong ed sikatayon mangiyaplika ed saray ibabangat to. (Luc. 11:13) Sasalimbengan to ni ingen ed espiritual iramay manggugunaet a mamasiansia na integridad da.​—Uli. 2:7.

⁴ Panon itayon imbangat nen Jehova a magmaliw a totoon walaan na integridad? Say sankaimportantian a paraan et diad impangibaki to’d Anak ton si Jesus diad dalin. Sanlegan na impanbilay nen Jesus diad dalin et lawas ton impatnag so naspot a katutulok. Sikatoy ‘nagmaliw a matulok anggad patey.’ (Fil. 2:8) Diad amin a ginawa to, tinulok toy mangatatawen ya Ama to, anggan sanen mair-irap itan a gawaen. Say kuan to ed si Jehova et “aliwa a say linawak noag say linawam so nasumpal.” (Luc. 22:42) Kanian  nepeg tayo sirin ya itepet ed inkasikatayo, ‘Ontan ak met kasi’d si Jesus katulok?’ No mantultuloy tayon panggunaetan so magmaliw a matulok tekep na dugan motibo, lawas tayon nipatnag so integridad. Imanoen pa so pigaran pamaakaran ed bilay a nagkalautlan kaukolan so pagmaliw a matulok.

5, 6. (a) Panon ya impabitar nen David so kaimportantian na pamasiansia ed integridad anggan sano anggapoy toon makakanengneng ed sikatayo? (b) Antoray pakakasubokan na integridad na saray Kristiano natan sano manbukbukor ira?

⁵ Kaukolan tayon tuloken si Jehova anggan sano manbukbukor itayo. Amta nen salmistan David ya importante so pangipatnag ed integridad anggan diad saray pankanawnawa a nayarin sikatoy manbukbukor. (Basaen so Salmo 101:2.) Bilang ari, mabetbet a walaray kakaiba nen David a totoo. Seguradon dakel so pankanawnawan sikatoy walad imaton na nilasus, anggan nilibo ni ingen. (Ikompara so Salmo 26:12.) Diad saratan et importante a pansiansiaen to so integridad to, lapud say ari et kaukolan a mangipanengneng na maabig ya ehemplo ed nasasakopan to. (Deu. 17:18, 19) Balet, naaralan nen David ya anggan diad saray panaon a nayarin sikatoy manbukbukor​—sano sikatoy ‘walad loob na abung’​—siansian kaukolan ton itultuloy ya ipatnag so integridad. Komusta itayo balet ey?

⁶ Diad Salmo 101:3, oniay inkuan nen David: “Agak mangigaton na bengatla a kabaglan ed arap na saray matak.” Natan, dakdakel so pankanawnawa a sarag tayoy mangiyan ed arap na mata tayo na saray bengatlan kabaglan, lalo la no manbukbukor itayo. Dakdakel so nasusubok ed sayan pamaakaran lapud panag-Internet. Magmainomay so pakaingganyon onnengneng ed agmatukoy, odino pornograpiko ni ingen a materyal. No ontan so gawaen na sakey, sikato kasi ontutulok ed Dios ya angipuyan ed si David ya isulat iratan a salita? Say pornograpiya et makaderal lapud liingen na satan so mauges tan maagum iran pilalek, dutakan toy konsiensia, deralen toy panamaley, tan pabandayen to so siopaman a nalalanor.​—Uli. 4:23; 2 Cor. 7:1; 1 Tes. 4:3-5.

7. Anton prinsipyo so ontulong ed sikatayon pansiansiaen so integridad tayo sano manbukbukor itayo?

⁷ Siempre, anggapo ita’y panaon a say sakey a lingkor nen Jehova et talagan manbukbukor. Ta maaro itayon babantayan na Ama tayo. (Basaen so Salmo 11:4.) Seguradon malikeliket si Jehova sano nanenengneng ton lalabanan mo so tukso! Diad panggagawam ed satan, dedengelen mo imay pasakbay ya ipapabitar na saramay salita nen Jesus a walad Mateo 5:28. Sirin, anggan antoy nagawa, magmaliw kan determinado ya ag-onnengneng ed antokaman a pakatuksoan mon manggawa na aliwa. Agmo isasalat so mabmablin integridad mo ed mabanbanday a gawa ya inengneng odino pambasa ed pornograpiya!

8, 9. (a) Anto so akasubokay integridad nen Daniel tan saray taloran kakaiba to? (b) Panon a napapaliket na saray kalangweran a Kristiano natan si Jehova tan saray kapara ran Kristiano?

⁸ Nipatnag tayo met so integridad no itultuloy tayon unoren si Jehova anggan sano wala itayo’d limog na saray agmananisia. Nonoten pa si Daniel tan saramay taloran kakaiba to. Sanen wala ni ra’d kalangweran, sikaray akautibo ed Babilonia. Ditan, a  wala ra’d limog na saray agmananisia a samet labat odino sigpot ni ingen ya agmakapikabat ed si Jehova, sarayan apatiran Hebreo et niiyan ed desdes a mangan na saray isesebel na Ganggan na Dios. Sarayan kalangweran et magmainomay da komoy manggawa na baraan pian mikompromiso. Lautla ta agmet nanengneng na saray ateng da, saray arum a matatken a Judio, tan saray saserdote, no antoy gagawaen dan apat. Siopa sirin so makaamta? Si Jehova a mismo. Kanian, anggaman ed desdes tan peligro, nansiansia iran mapekder tan tinulok day Jehova.​—Dan. 1:3-9.

⁹ Diad interon mundo, ontan met so gagawaen na saray kalangweran a Tasi nen Jehova, a mapekder iran mansiasiansia ed saray estandarte na Dios parad saray Kristiano. Ag-ira unor-unor ed makapuy ya impluensya tan desdes na saray kapara ran kalangweran. Sikayoran kalangweran, no pipilien yo so agmibiang ed panagdruga, karawalan, panag-ayew, imoralidad, tan arum ni ran makapuy a gawa, tutuloken yo si Jehova. Tan sirin et pansiasiansiaen yo so integridad yo. Gugunggonaan yoy inkasikayo, tan papaliketen yo si Jehova tan saray kapara yon Kristiano!​—Sal. 110:3

10. (a) Anton lingon panmoria nipaakar ed pilalawanan so angitonton ed pigaran kalangweran a mangikompromiso ed integridad da? (b) No walaan itayo na integridad, anto so magmaliw ya awawey odino kiwas tayo no nipaakar ed kapeligroan na pilalawanan?

¹⁰ Kaukolan tayo met so magmaliw a matulok sano midedeneng tayo ed saray agtayo kaparay sekso. Kabat tayo lan isesebel na Salita na Dios so pilalawanan. Balet, magmainomay a nasalatan na inkalukak so inkamatulok. Alimbawa, walaray kalangweran ya akibiang ed oral sex (pisekso diad pangusar na sangi ed kayarian), anal sex (pisekso diad pangusar na kayarian ed ebet), tan panag-masturbate ed sakey tan sakey. Ikakatunongan dan saraya et aliwa met ya ontan kauges ta aliwa kunon mismon pisesekso so gagawaen da. Alingwanan la na sarayan kalangweran, odino ompan talagan gagagalaen dan ibaliwala so katuaan a samay salita ed Biblia parad pilalawanan et sakopen to irayan amin a makapuy a kagagawa, a nayarin pakadispelosipan na sakey. * Balet, say mas alodloor ni, agda insengansengan so kaimportantian na pakawalaay integridad. Lapud manggugunaet tayon mamasiansia na integridad, agtayo manaanap na nibaraan tan pakalusotan tayo. Agtayo sasalien ya asinggeran so aliling toy sankatambiban la na kasalanan, ya iisipen tayon ag-itayo nadusa. Aliwa labat a say hudisyal a disiplinan resulta na mauges a kagagawa so pangiteteenan tayoy imano. Imbes, akateen so imano tayo ed panggawa ed no antoy makapaliket ed si Jehova, a papaliisan tayo iray makasakit ed liknaan to. Imbes a salien tayon asinggeran so kasalanan, mansiasiansia itayon arawi ed satan, tan ‘ibabatikan tayo so pilalawanan.’ (1 Cor. 6:18) Diad ontan et ipapanengneng tayon say integridad tayo et petepeteg.

Panon Tayon Napansiansia so Integridad Tayo?

11. Akin et importante so balang gawa na katutulok? Iyilustra.

¹¹ Nabayuboan tayo so integridad diad katutulok, kanian napansiansia tayo so integridad tayo no mantultuloy tayon panggunaetan so pagmaliw a matulok. Say saksakey labat a gawa na katutulok et nayarin singa anggapoy kana odino  belat to. Ingen, diad ilalabas na panaon, saratan a sansakey a gawan katutulok et manaaruman lan manaaruman. Bilang panangiyilustra, say sakey a piraso na laryo et nayarin singa anggapoy kana to, balet no apipigeren tayon pansasalansanan so amayamay a laryo, makagawa itayo na marakep ya abung. Kanian, no mantultuloy tayon aruman lan aruman iray gawa na katutulok tayo, napansiansia tayo so integridad tayo.​—Luc. 16:10.

12. Panon ya angipanengneng si David na ehemplo ed panamasiansiay integridad anggan sanen sikatoy mamaltratoen tan manasagmak na ag-inkahustisya?

¹² Nagkalautlan nipatnag tayo so integridad no mansungdo itayo sano ondadalan itayo ed irap, panagmaltrato, odino ag-inkahustisya. Imanoen pa so ehemplo nen David. Sanen wala ni’d kalangweran, sinungdoan toy panamasegsegang na arin nepeg komon a mangirepresenta ed autoridad nen Jehova. Balet si Arin Saul et naandi la’d sikatoy panangabobon nen Jehova tan pinasyay panimon to ed kinen David, a walad sikatoy panangabobon na Dios. Anggaman kuan, nansiansia ni ed pakayari si Saul diad loob na pigaran panaon tan inusar to so armada na Israel pian anapen tan erelen si David. Inabuloyan nen Jehova a mantultuloy iyan ag-inkahustisya diad loob na pigaran taon. Natan, nanimbel ta si David ed Dios? Inisip to kasin anggapo lanlamang so gunggona na pansusungdo to? Andi. Pinansiansia to ingen so baleg a respeto to ed posisyon nen Saul bilang nilanaan na Dios, ya agto binmales ed si Saul anggan sanen pankanawnawa to la komon.​—1 Sam. 24:2-7.

13. Panon tayon napansiansia so integridad tayo no asakitan odino naopendi itayo?

¹³ Talagan dakel so naaralan tayon leksion natan ed ehemplo nen David! Kabiangan itayo na sankamundoan a kongregasyon na saray ag-ayadyarin totoo, tan ompan walay makapanggawa’d sikatayo na aliwa odino ontaynan ni ingen ed katuaan. Siempre, mapalar itayo ta manbibilay itayo la ed panaon ya aglan balot naderal na makasamal ya espiritu so totoo nen Jehova bilang grupo. (Isa. 54:17) Siansia ni, panon itayon onkiwas no walay anismaya odino akasakit ed liknaan tayo? No pinunuyan tayo so eem-eman tayon sakit na linawa ed sakey ya agi, ompan nikompromiso tayo so integridad tayo ed Dios. Agtayon balot nayarin ibaraan so kondukta na arum pian manimbel itayo ed Dios odino pian tundaan tayo lay panmamatoor tayo. (Sal. 119:165) No mansungdo itayo sano manasagmak na subsubok, natulongan itayon mamasiansia ed integridad tayo.

14. No walaray pananguman ed eksplinasyon na saray teksto’d Biblia tan ed saray uksoyan ed organisasyon, panoy ikikiwas na saramay walaan na integridad?

¹⁴ Napansiansia tayo met so integridad tayo no paliisan tayoy magmaliw a makuestion tan makritiko. Siempre, kaukolan ed satan so inkamatoor ed si Jehova. Natan nen say kapiganman, bebendisyonan nen Jehova iray totoo to. Agnin balot agawa nensaman a say tuan panagdayew et ontan lan nitandoro ed dalin. (Isa. 2:2-4) Sano walaray pananguman ed eksplinasyon na saray teksto ed Biblia odino ed saray uksoyan ed organisasyon, labay tayon awaten iratan. Panliliketan tayon nanengneng so ebidensya a lalo nin onmamasnag so espiritual a liwawa. (Uli. 4:18) No nanairapan tayon talosan so sakey a pananguman, manpapatulong itayo ed si Jehova pian narandan itan. Tan diad amin na saratan et mantutultuloy itayon magmaliw a matulok, a pansiasiansiaen tayoy integridad tayo.

 Panon Balet No Walay Agto Apansiansiay Integridad To?

15. Siopa lambengat so makapangekal ed integridad mo?

¹⁵ Talagan pannonoten itayo na satan a tepet, agta ontan? Singa naaralan tayo la ed akaunan artikulo, im-importante so integridad. No anggapoy integridad tayo, anggapoy relasyon tayo ed si Jehova tan anggapoy peteg ya ilalo tayo. Tandaan iya: Diad interon uniberso, saksakey labat so personan makapangekal ed integridad mo. Satan a persona et sika. Si Job et atalotalosan to iyan katuaan, ta oniay inkuan to: “Angga ed ompatey ak agko ekalen so inkaskey [“integridad,” NW] ko a manlapu ed siak!” (Job 27:5) No ontan met so determinasyon mo tan no mansiansia kan maapit ed si Jehova, ontulong itan ed sika pian lawas mon nabembenan a malet so integridad mo.​—Sant. 4:8.

16, 17. No walay naplag ed ambelat a kasalanan: (a) anto so agto nepeg a gawaen? (b) anto so nepeg ton gawaen?

¹⁶ Balet, walaray agda apansiansia so integridad da. Singa met nen mabilay ni ray apostoles, walaray napepelag natan ed ambelat a kasalanan. No bilang ta ontay agawa ed sika, anggapo la kasi ilalo na kipapasen mo? Andi met. Anto sirin so nagawaan mo ey? Unaen tayo nin pantongtongan no antoy agnepeg a gawaen. Say tendensia na too et iyamot ed saray ateng, kaparan Kristiano, odino diad saray mamatatken so kasalanan to. Balet, papanonotan itayo na Biblia: “Say manakbong ed saray impakalukso to ag-onaligwas; balet say mangipatua tan mangikaindan ed sikara makagamor na panangasi.” (Uli. 28:13) Saramay sasalien dan iyamot so kasalanan da et manggagawa na abalbaleg a lingo, ta anggapoy bengatlan niyamot ed Dios. (Basaen so Hebreos 4:13.) Wala ni ingen iramay doble estandarte na panagbilay da, a kunwari et manlilingkor ed si Jehova, ingen ta babansagan da itan na panaggaway ambelat a kasalanan. Say ontan a panagbilay et andian a balot na integridad, diad tua, satan so mismon kasunian na integridad. Agnaliliketan si Jehova ed panagdayew ya isasaklang na saramay totoon mangiyaamot na ambelat iran kasalanan. Diad tua, makapasanok ed sikato so ontan a pansimpisimpitan.​—Uli. 21:27; Isa. 1:11-16.

¹⁷ No walay Kristianon akagaway ambelat a kasalanan, malinlinew no antoy nepeg ton gawaen. Panaon la pian sikatoy patulongan ed saray Kristianon mamatatken. Angiletneg si Jehova na uksoyan no panon ya asikasoen iray pamaakaran a mangilalanor ed grabe iran sakit ed espiritual. (Basaen so Santiago 5:14.) Agmo aabuloyan a napaulyan moy espiritual a bunigas mo lapu labat ta natatakot kan ompan nadisiplina odino nabaat ka. Diad tua, agta say toon makabat et anggapo’d sikato ita’y sakit na indyeksion odino anggan operasyon ni ingen, napatambal to labat so sakit a pakakapeligroan lay bilay to?​—Heb. 12:11.

18, 19. (a) Panon ya impanengneng na ehemplo nen David a say integridad et sarag a napapawil? (b) Anto so determinasyon mo nipaakar ed integridad mo?

¹⁸ Wala ni kasi ilalon sigpot ya onabig so sakey a mansasakit ed espiritual? Napapawil ni kasi so integridad no abalang la itan? Nonoten pa lamet si David. Si David et akapankasalanan na ambelat. Tekep na maagum a pilalek, nilimgis toy asawa na arum a laki, akikalugoran, tan nanggaway pakana pian napapatey imay inosentin asawa. Diad saratan a ginawa to, agta singa mairap ya isipen a sikatoy walaan na integridad? Balet, anggapo la kasi ilalo na kipapasen to? Kaukolan nen David so disiplina, tan talagan akaawat na disiplina. Tan lapud petepeteg a nagbabawi, sikatoy kinasian na Dios. Sikatoy akaaral ed satan a disiplina, tan apapawil toy integridad to diad intulok to ed Dios, tan diad impantultuloy ton intulok antokaman ni agawa. Ililitrato na impanbilay nen David imay nabasa tayo ed Uliran 24:16: “Say maptek a too nipasag a maminpito, tan ombangon lamet.” Antoy resulta ey? Imanoen pa no anto imay imbaga nen Jehova ed si Solomon nipaakar ed si David sanen inatey la. (Basaen so 1 Arari 9:4.) Ninodnonot na Dios si David bilang toon walaan na integridad. On, petepeteg a sarag nen Jehova a linisen so kasalanan na saramay magbabawi, anggan saramay singa kinmetket lan mantsa na ambelat a kasalanan.​—Isa. 1:18.

¹⁹ On, magmaliw kan too a walaan na integridad panamegley na katutulok mon pinakiwas na aro. Pansiansiam so matoor a pansusungdom, tan no walay agawam ya ambelat a kasalanan, ipatnag moy peteg a pagbabawi. Talagan mabmablin kayamanan so integridad! Komon ta say determinasyon na balang sakey ed sikatayo et mipara ed samay determinasyon nen David: “No parad say siak, manakar ak ed integridad ko.”​—Sal. 26:11, NW.

[Paimano ed leksab]

Panon Mon Ebatan?

• Panon kan magmaliw a toon walaan na integridad?

• Diad antoran dalan a napansiansiam so integridad mo?

• Panon a napapawil so integridad?

[Tepetepet Parad Panagaral]

[Kahon ed pahina 8]

‘TALAGAN ALAY ABIG SO GINAWA TO’

Ontan so inkuan na sakey a biin limay bulan lan malukon nipaakar ed kamaongan tan integridad na toon agto kabat. Sayan bii et nanlapud coffee shop. Bangnen kien et naimano ton atilak to manaya ditan so pitaka ton mankargay $2,000, balet ta pigara lan oras so linmabas. Agto bastabasta mangaawit na ontan kabaleg a kantidad. “Talagan nalmay ak,” so inkuan to ed saginonor diad sakey a lokal a peryodiko. Balet, sakey a kalangweran a bii so akalmo ed samay pitaka tan tampol ton inanap so makanggawa ed satan. Nen agto aromog, inyakar to itan ed istasyon na pulis, tan inanap na saray pulis imay malukon a bii. “Talagan alay abig a maong so ginawa to,” so kuan na sayan misalsalamat a makanpitaka. Akin et ontan lay impansagpot na sayan kalangweran a bii, nipawil labat imay kuartan aromog to? Inkuan na samay peryodiko a bilang sakey a Tasi nen Jehova, “impatnag to so ontan ya integridad lapud relihyon to.”

[Litrato ed pahina 9]

Sarag na saray kalangweran a pansiansiaen so integridad da anggan sano nasusubok ira

[Litrato ed pahina 10]

Walay panaon ya ag-apansiansia nen David so integridad to, balet ta apapawil to itan