Tepetepet na Saray Manbabasa

Diad Nehemias 8:10 et imbaga ed saray Judio a “kanen [da] so taba,” balet ta diad Levitico 3:17 et oniay inkuan na Ganggan: “Agyo . . . kakanen so taba.” Panon a napantunosan irayan balikas?

Diad orihinal a lenguahe, saramay salitan nipatalos a “taba” ed Nehemias 8:10 tan ed Levitico 3:17 et mandumaan. Samay Hebreon salita a nipatalos a “taba” ed Levitico 3:17 et cheʹlev, a manutukoy ed taba na ayayep odino totoo. (Lev. 3:3; Uko. 3:22) Ipapanengneng na konteksto na Levitico 3:17 ya agnepeg a kanen na saray Israelita iramay makapal a taba a mamabalkot ed pait tan bato na ayayep a parad bagat, pati saramay taba a walad banel, lapud say “amin a taba kien nen Jehova.” (Lev. 3:14-16) Kanian saramay taba na ayayep ya ibagat ed si Jehova et agnepeg a kanen.

Diad biek a dapag, samay salitan nipatalos a “taba” diad Nehemias 8:10 et mash·man·nimʹ, tan aminpinsan iyan inusar ed interon Hebreon Kasulatan. Inala itan ed salitan sha·menʹ, a mankabaliksan na “manpataba, magmaliw a mataba.” Ompatnag a saramay salitan misiglaotan ed sha·menʹ  et manunan mangipapasabi ed ideyan inkadaakan, ontan met ed maong a bunigas. (Ikompara so Isaias 25:6.) Sakey ed saray salitan kaslakan ya aalaen ed sha·menʹ  et say sheʹmen, a mabetbet a nipapatalos a “larak,” a kalaktip ed samay balikas a ‘larak na olibo.’ (Deu. 8:8, NW; Lev. 24:2) Unong ed impakausar ed Nehemias 8:10, say mash·man·nimʹ  et ompatnag a manutukoy ed saray tagano a nilaokan odino inusaran na dakel a larak tan nayarin nanlaok met na karnen nantaba na daiset, balet ta aliwan samay makapal a puron taba na ayep.

Anggaman sinebelan iray Israelita a mangan na makapal a puron taba na ayep, sarag day mangan na mananam tan malarak odino mataba iran naakan. Wala iramay kakanen, a singa say tinapay odino bibingka a gawa’d trigo odino sebada, ya ag-inluto’d taba na ayep, noag diad larak na tanaman, a maslak et larak na olibo. (Lev. 2:7) Kanian, impaliwawa na Insight on the Scriptures a say salitan “taba” ed Nehemias 8:10 et “manutukoy ed saray malarak odino mataba iran tagano, aliwan saramay amagan naakan, noagta saramay makapaganas, a laktipen to ray manananam iran naakan a nilaokay larak na tanaman.”

Siempre, amta na saray Kristiano a say panangisebel ed pangan na taba et kabiangan na Mosaikon Ganggan. Agla ra sakop na Ganggan, ontan met ed saray kakaukolanen na satan nipaakar ed panagbagat na ayayep.​—Roma 3:20; 7:4, 6; 10:4; Col. 2:16, 17.