Kasin Inmatalek ed Sika so Agnaparaan a Kaabigan na Dios?

“Nipaakar ed aroan na sanaagi, matamoy komon so aroan na sakey tan sakey, dia ed galang manpapalabian kayo.”​—ROMA 12:10.

1. Antoran panamaseguro so iiter na Salita na Dios?

NAYNAY ya ipapaseguro ed sikatayo na Salita na Dios a si Jehova et ontulong sano nadidismaya odino nagogonigon itayon maong. Singa bilang, imanoen irayan makapaligliwan salita: “Si Jehova sampaten to so saray amin a niparukol, tan itagey to so saray amin a naruknot.” “Paabigen to so saray binmetag ed puso, tan bedberen to so sugasugat da.” (Sal. 145:14; 147:3) Kaaruman ni, oniay imbagan mismo na mangatatawen ya Ama tayo: “Siak, si Jehova a Dios mo, a mangitagey na kawanan a limam, a kuan ko ed sika, Agka antakot; tulongan ta ka naani.”​—Isa. 41:13.

2. Panoy panutulong nen Jehova ed saray lingkor to?

² Balet, panon ya ‘iyaatagey nen Jehova so lima tayo’ anta sikatoy walad agnanengneng a katawenan? Panon to itayon ‘iyatagey no sikatayoy naruknot’ ed pirmin paneermen? Si Jehova a Dios et ontutulong ed nanduruman paraan. Alimbawa, iikdan to ray totoo to na “sankatagyan ya inkabaleg na pakayari” panamegley na masanton espiritu to. (2 Cor. 4:7; Juan 14:16, 17) Nalilikna met na saray ariripen na Dios so panamabiskeg na pinuyanan a Salita na Dios, say Biblia. (Heb. 4:12) Wala ta ni arum a paraan a papabiskegen itayo nen Jehova? Naromog tayoy ebat diad libro ya Unonan Pedro.

Nipapatnag ed Nanduruman Paraan so Agnaparaan a Kaabigan na Dios

3. (a) Anto so imbaga nen apostol Pedro nipaakar ed saray subok? (b) Anto so siningbat ed kaunoran a kabiangan na Unonan Pedro?

³ Sanen sinulat nen apostol Pedro iramay Kristianon alanaan, imbaga ton walaan iray maabig a rason pian manliket lapud daakan a tumang so manaalagar ed sikara. Insan to inyarum: “Anggaman nagogonigon kayo la ni natan na saray nambabangil a katuksoan [odino subsubok], no ontan so nakaukolan.” (1 Ped. 1:1-6) Imanoen so salitan “nambabangil.” Isusuheri na saya a saray subsubok et nanduruma. Balet, ag-angangga ditan so sulat nen Pedro, a pinaulyanan to la ran mannonot no panon dan sungdoan so nanduruman subsubok. Imbes, ipapabitar to a makaseguro iray Kristiano a tulongan ira nen Jehova pian nasungdoan da so kada subok ed sikara, antokaman iraya. Satan a panamaseguro et walad kaunoran a kabiangan na sulat nen apostol Pedro, a no iner et siningbat to iray pamaakaran nipaakar ed “anggaan na ganaganay bengatla.”​—1 Ped. 4:7.

4. Akin a say balikas ed 1 Pedro 4:10 et makapaligliwa ed sikatayo?

⁴ Inkuan nen Pedro: “Sakey tan sakey unong na agamoran to a pamalangkap ipagamor to met ed saray arum ta ontan so maong a panangimatalkan na daakan a grasya [odino agnaparaan a kaabigan] na Dios.” (1 Ped. 4:10) Diad orihinal a lenguahe, parehon salita so inusar nen Pedro parad “daakan” ya abitla ed sayan parapo, tan “nambabangil” ya atukoy ed apalabas a parapo. Singa to ibabagan, ‘Nanduruman subok so onsabi, balet say agnaparaan a kaabigan so ipapatnag na Dios ed nanduruma met a paraan.’ Akin a makapaligliwa itan a balikas? Ipapalinew na saya ya antokaman a klase na subok so onsabi ed sikatayo, walan walay kapetekan ton balikas na agnaparaan a kaabigan na Dios. Balet, kasin naimano yo’d imbaga nen Pedro no panon ya ipapagamor  ed sikatayo so agnaparaan a kaabigan nen Jehova? Diad panamegley na saray kaparan Kristiano.

‘Ipagamor ed Sakey tan Sakey’

5. (a) Anto so nepeg a gawaen na kada Kristiano? (b) Antoray apalesan tepetepet?

⁵ Oniay inkuan nen Pedro ed amin a membro na Kristianon kongregasyon: “Lalo la a tuloy, agkomon naumas so aro yo ed sakey tan sakey.” Insan to inyarum: “Sakey tan sakey unong na agamoran to a pamalangkap ipagamor to met ed saray arum.” (1 Ped. 4:8, 10) Kanian, balang sakey ed kongregasyon et walaan na betang a pasesegen iray kaagian. Walay nimatalek ed sikatayon mablin bengatla a kayarian nen Jehova, tan responsabilidad tayon inabang itan ed arum. Anto sirin itan a mablin bengatlan nimatalek ed sikatayo? Imbaga nen Pedro a satan et “pamalangkap.” Anto itan a pamalangkap odino regalo? Panon tayon ‘nipagamor itan ed sakey tan sakey’?

6. Anto so pigara ed saray langkap a nimatalek ed saray Kristiano?

⁶ Ibabaga na Salita na Dios: “Amin a maong a palangkap tan amin ya ayadyarin palangkap [et] manlapu ed tagey.” (Sant. 1:17) Sirin, amin a regalo ya imamatalek nen Jehova ed saray totoo to et balikas na agnaparaan a kaabigan to. Say sakey ya importantin regalo nen Jehova ed sikatayo et say masanton espiritu. Natulongan itayo na satan a regalo pian nabayuboan iray kalidad a makapaliket ed Dios a singa say aro, kaabigan, tan tayadno. Tan saratan a kalidad so mamakiwas ed sikatayon mangipanengneng na impapuson panangaro ed saray agagi tan magmaliw ya akaparaan ya ontulong ed sikara. Say tuan karunongan tan kakabatan so kabiangan met ed saray maong a palangkap a nagamoran tayo diad tulong na masanton espiritu. (1 Cor. 2:10-16; Gal. 5:22, 23) Diad katuaan to, say amin a biskeg, abilidad, tan dunong tayo et nayarin moriaen bilang langkap ya usaren parad kirayewan tan kigalangan na mangatatawen ya Ama tayo. Inikdan itayo na Dios na responsabilidad ya usaren iray abilidad tan kalidad tayo pian nipagamor so agnaparaan a kaabigan to ed saray kapananisiaan tayo.

Panon Tayon ‘Nipagamor Itan’?

7. (a) Anto so ipapanengneng na salitan “unong”? (b) Antoray nepeg tayon itepet ed inkasikatayo, tan akin?

⁷ Nipaakar ed saray langkap a naaawat tayo, inkuan met nen Pedro: “Sakey tan sakey unong na agamoran to a pamalangkap ipagamor to met.” Ipapanengneng na salitan “unong” ya aliwa labat lan nanduruma so klase noagta pati laknab na saray kalidad tan abilidad tayo. Sirin et papasesegen so balang sakey ya ‘ipagamor itan [salanti, antokaman a naawat ton palangkap] ed sakey tan sakey.’ Kaaruman ni, say balikas ya ‘ipagamor  itan bilang maong ya angimatalkan’ et sakey a ganggan. Kanian, nepeg tayon tepetan so inkasikatayo: ‘Kasin ipapagamor ko irayan palangkap a nimatalek ed siak pian pabiskegen iray kapananisiaan?’ (Ikompara so 1 Timoteo 5:9, 10.) ‘Odino, kasin susuloen ko irayan abilidad a naawat ko ed si Jehova parad dilin pankaabigan ko​—nayari pa lagin pian onyaman ak odino pian derlengen ak?’ (1 Cor. 4:7) No usaren tayoy palangkap a walad sikatayo pian ‘ipagamor itan ed sakey tan sakey’ bilang panaglingkor, napapaliket tayo si Jehova.​—Uli. 19:17; basaen so Hebreos 13:16.

8, 9. (a) Antoray pigaran paraan a saray Kristiano ed interon mundo et manlilingkor parad saray kapananisiaan? (b) Panon a makakapantulongan iray agagi ed kongregasyon yo?

⁸ Angisalaysay so Salita na Dios na nanduruman paraan a saray inmunan siglon Kristiano et nanlingkor ed balang sakey. (Basaen so Roma 15:25, 26; 2 Timoteo 1:16-18.) Ontan met natan, impapuson tutumboken na saray tuan Kristiano so ganggan ya ipagamor so antokaman a langkap a walad sikara parad pankaabigan na saray kapananisiaan. Konsideraen tayoy pigaran paraan a nagagawaan iya.

⁹ Dakel ya agagi so pigay oras a mangipaparaan ed saray betang da. Diad saray pantitipon, sano inanabang day pigaran espiritual ya impormasyon ya aromog da legan na panaaral day Biblia, saray makabat a salita ra so mamakiwas ed amin diad kongregasyon pian mansungdo. (1 Tim. 5:17) Kabkabat so dakel ya agagi ed panangipanengneng na panangaro tan panangabagey ed saray kapananisiaan. (Roma 12:15) Wala met iray regular ya ombibisita ed saray nagogonigon tan manpipikasin kaiba ra. (1 Tes. 5:14) Saray arum et ipapanaon day mansulat pian pasesegen iray kapananisiaan a manasagmak na subok. Maaron tutulongan met na arum iramay walaan na pisikal a limitasyon pian makaatendi ed saray pantitipon. Nilibon Tasi so ontutulong ed saray kapananisiaan pian ipaalagey lamet iray kaabungan a dineral na kalamidad. Say panangaro tan praktikal iran tulong na sarayan maaron agagi et talagan pakapatnagay “daakan a grasya na Dios.”​—Basaen so 1 Pedro 4:11.

Dinan so Mas Importante?

10. (a) Antoran duaran aspekto na serbisyo ed Dios so inikday imano nen Pablo? (b) Panon tayon aaligen si Pablo natan?

¹⁰ Saray lingkor na Dios et aglabat angimatalkan na langkap a nepeg ya ipagamor ed saray kapananisiaan, noagta impiya met ed sikara so mensahen nepeg ya inabang ed saray totoo. Amoria nen apostol Pablo irayan duaran aspekto na panaglingkor to’d si Jehova. Insulat to ed kongregasyon na Efeso ya ‘impiya ed sikato so grasya na Dios’ parad pakagunggonaan da. (Efe. 3:2) Ingen, imbaga to met: ‘Inabobonan kami na Dios a pangipiyaan na ebanghelyo.’ (1 Tes. 2:4) Singa si Pablo, bibidbiren tayo met ya impiya ed sikatayo so asainmin a manlingkor bilang manangipulong na Panarian na Dios. Panamegley na maseseg a pampulong, pansasagpotan tayon aaligen so alimbawa nen Pablo ya agkinmesaw ya angiyabawag na maong a balita. (Gawa 20:20, 21; 1 Cor. 11:1) Amta tayon say pangipulong ed mensahe na Panarian et makapangiliktar na bilay. Balet kabansag na satan, pampepelengan tayo met ya aligen si Pablo diad pananap na saray pankanawnawa pian ‘ninabang so maespiritual a palangkap’ ed saray kapananisiaan.​—Basaen so Roma 1:11, 12; 10:13-15.

11. Panoy nepeg tayon panmoria ed kimey a panagpulong tan ed pamabiskeg ed saray kapananisiaan?

¹¹ Dinan so mas importante ed sarayan duaran Kristianon aktibidad? Satan a tepet et mipadpara’d tepet nipaakar ed sakey a siwit, Dinan ed duaran payak na siwit so mas importante? Malinew so ebat. Kaukolan ya usaren na siwit so duaran payak to pian makatekkiab. Ontan met, kaukolan tayon pibiangan irayan duaran aspekto na panaglingkor ed Dios pian anggapoy pankulangan tayo bilang Kristiano. Sirin, imbes a moriaen ya aliwan saniba so kimey tayon panangipulong na maong a balita tan pamabiskeg ed saray kapananisiaan, nepeg tayon moriaen iraya unong ed panmoria di apostol Pedro tan Pablo​—bilang responsabilidad a naynay a sankaiba. Diad anton dalan?

12. Panon itayon onkakana bilang pinagka-instrumento nen Jehova?

¹² Bilang ebanghelisador, uusaren tayoy antokaman  ya abilidad tayon manbangat pian sabien so puso na totoo panamegley na makapaseseg a mensahe na Panarian na Dios. Diad ontan et natutulongan tayo ran magmaliw a babangatan nen Kristo. Anggaman ontan, uusaren tayo met so antokaman ya abilidad odino arum ni ran langkap a walad sikatayo pian pasesegen iray kapananisiaan panamegley na salita tan gawa​—bilang panangipatnag na agnaparaan a kaabigan na Dios. (Uli. 3:27; 12:25) Diad ontan et natutulongan tayo ran mansiansian babangatan nen Kristo. Namparan diad pampulong ed arum tan diad ‘pangipagamor ed sakey tan sakey’ na tulong tan panamaseseg, baleg so pribilehyo tayon onkana bilang pinagka-instrumento nen Jehova.​—Gal. 6:10.

“Matamoy Komon so Aroan na Sakey tan Sakey”

13. Anto so nagawa sano naamper so panaglingkor tayo ed balang sakey?

¹³ Pinaseseg nen Pablo iray kapananisiaan: “Nipaakar ed aroan na sanaagi, matamoy komon so aroan na sakey tan sakey, dia ed galang manpapalabian [odino mangidaulo] kayo.” (Roma 12:10) Sirin, say pakawalaan tayoy matamoy ya aro ed saray agagi so mamakiwas ed sikatayon manlingkor a sigpot-puso bilang angimatalkan na agnaparaan a kaabigan na Dios. Amta tayo a sano naamper nen Satanas so panaglingkor tayo ed balang sakey, nabawasay pankakasakey tayo. (Col. 3:14) Insan no kulang lay pankakasakey, nabawasan met lay seseg tayo ed panagpulong a kimey. Diad piguratibon panangibaga, amta nen Satanas ya anggan sakey labat ed saray payak tayo so sakitan to et agtayo la makatekkiab.

14. Sioparay nagunggonaan diad panaglingkor ed arum? Mangiter na alimbawa.

¹⁴ Say panlingkor ed sakey tan sakey et aglabat mangunggona ed saramay makakagamor noag pati ed saramay mangipapagamor ed agnaparaan a kaabigan na Dios. (Uli. 11:25) Bilang alimbawa, imanoen pay sanasawan Ryan tan Roni, a taga Illinois, U.S.A. Nen abalitaan dan nilasus a kaabungan na saray kaparan Tasi so dineral na Bagyon Katrina, pinakiwas ira na aro ra ed kaagian pian onekal ed trabaho tan taynan so apartment a panaayaman da. Insan, angaliw ira na segunda-manon luganan a napanayaman, inapiger da iya, tan linma ra’d Louisiana a 1,400 kilometro kaarawi. Nansiansia ira ditan ed masulok a sakey taon, ya inter day panaon, biskeg, tan kaykayarian da pian tulongan iray agagi. Oniay inkuan na 29 años a si Ryan: “Lapud impanulong ed saray agagi, apaapit ak ed Dios. Anengneng koy panangasikaso nen Jehova ed saray totoo to.”  Insan to inyarum: “Diad impikimey ko ed saray mas maedad lan agagi, dakel so naaralan ko ed no panon so pangasikaso ed saray agagi. Naaralan ko met a sikami ran mas ug-ugaw et dakel ni nagawaan mi ed organisasyon nen Jehova.” Onia met so inkomento nen Roni a mantaon na 25: “Pisalamatan koy impanulong ko ed saray agagi. Natan ko labat alikna so onian klase na liket. Amtak ya anggan diad arapen et walan wala ni nagunggonak ed sayan marakdakep ya eksperiensya.”

15. Antoray maabig a rason pian itultuloy tayoy manlingkor bilang angimatalkan na daakan a grasya na Dios?

¹⁵ Sirin, say pangunor ed saray ganggan ya ipulong so maong a balita tan pabiskegen iray kapananisiaan et pakabendisyonan na amin. Mientras napapaseseg ed espiritual iramay atulongan tayo, lalo tayon naliliknay manlapud puson liket a nipagamor labat na panangiter. (Gawa 20:35) Mas onelet so aroan na interon kongregasyon legan a kada membro et mangipapanengneng na maaron interes ed arum. Kaaruman ni, say panangaro tan panamabli tayo’d balang sakey et malinew a mangipabidbir ed sikatayo bilang tuan Kristiano. Oniay inkuan nen Jesus: “Lapu ed saya amin a too nabidbiran da a sikayo ray babangatan ko, no wala so aro yo ed sakey tan sakey.” (Juan 13:35) Manuna ed amin, nirarayew so maaron Ama tayo, si Jehova, legan ya ipapatnag na saray ariripen to diad dalin so pilalek ton pabiskegen iramay mankaukolan. Agaylan abig a rason sirin ya usaren iray palangkap ed sikatayo pian ‘nipagamor ed sakey tan sakey so inmatalek ed sikatayo a daakan a grasya na Dios’! Itultuloy mo kasin gawaen iya?​—Basaen so Hebreos 6:10.

Kasin Nanonotan Mo?

• Diad antoran paraan a papabiskegen nen Jehova iray lingkor to?

• Anto so inmatalek ed sikatayo?

• Antoray pigaran paraan a napanlingkoran tayo ray kapananisiaan?

• Anto so mamakiwas ed sikatayo pian nitultuloy a ‘nipagamor ed sakey tan sakey’ so langkap ed sikatayo?

[Tepetepet Parad Panagaral]

[Saray litrato ed pahina 13]

Kasin say “pamalangkap” ed sika et uusaren mo pian panlingkoray arum, odino pian paliketey inkasika?

[Saray litrato ed pahina 15]

Ipupulong tayo’d arum so maong a balita tan tutulongan tayo ray kaparan Kristiano

[Litrato ed pahina 16]

Nakomendaan iramay ontutulong ed arum lapud dilin-panagsakripisyo ra