Nia! Say Naabobonan a Lingkor nen Jehova

“Nia! Say aripen [odino lingkor] ko, . . . sikato so ampayaen ko.”​—ISA. 42:1.

1. Anto so ipapaseseg a gawaen na saray totoo nen Jehova, nagkalautla ta manasingger lay Memoryal, tan akin?

LEGAN a manasingger so agew na panselebray impatey nen Kristo, saray totoo na Dios et papasesegen a tuloken da imay simbawa nen apostol Pablo ya ‘onnengneng ed si Jesus, say [“Manunan Ahente,” NW] tan Manamayadyari na pananisia tayo.’ Onia ni imbaga nen Pablo: “Motektek yo sirin so nansungdo ed ontan la ya insumlang na saray managkasalanan . . . pian agkayo komon nakesawan, ya onkapuy kayo ed saray kamarerwa yo.” (Heb. 12:2, 3) Say inengneng odino pangimanon maong ed matoor ya impanbilay nen Kristo, a nansumpal ed masakripisyon impatey to, so ontulong ed saray alanaan a Kristiano tan ed saray kaiba ran arum a karnero a makapantultuloy a manlingkor ed si Jehova tekep na katooran, ya ‘ag-ira onkapuy ed saray kamarerwa ra.’​—Ikompara so Galacia 6:9.

2. Anto so naaralan tayo ed saray propesiya nen Isaias a misiglaotan ed Anak na Dios?

² Pinuyanan nen Jehova si propetan Isaias a mangisulat na nantutumbokan iran propesiya a direktan misiglaotan ed Anak To. Sarayan propesiya et ontulong ed sikatayon ‘onnengneng ed [“Manunan Ahente,” NW] tan Manamayadyari na pananisia tayo,’ salanti, si Kristo Jesus. * Mangiiter iraya na detalye ed personalidad, panirap, tan kitandoro to bilang Ari tan Mananondon tayo. Paaralemen na saraya so pakatalos tayo ed Memoryal, a selebraan tayo diad sayan taon no Huebes, Abril 9, kaselek na agew.

Akabatan No Siopa so Lingkor

3, 4. (a) Diad anto ontutukoy imay salitan “aripen” odino lingkor diad libro na Isaias? (b) Panon ya impaamtan mismo na Biblia no siopa imay Lingkor a sinalambit ed Isaias kapitulo 42, 49, 50, 52, tan 53?

³ Say salitan “aripen” odino lingkor et aminpigapigan nausar ed libron Isaias. No maminsan et ontutukoy iya ed si Isaias a mismo. (Isa. 20:3; 44:26) No maminsan et ontutukoy met iya ed interon nasyon na Israel, odino ed si Jacob. (Isa. 41:8, 9; 44:1, 2, 21) Komusta balet iramay nikadkaduman propesiya nipaakar ed Lingkor a nirekord ed Isaias kapitulo 42, 49, 50, 52, tan 53? Malinlinew ya ipapaamta na Kristianon Griegon Kasulatan no siopa iyan Lingkor nen Jehova a deniskribe na saratan a kapitulo. Makapainteres ta sakey ed saratan a propesiya et babasaen to’may Etiopen opisyal ya abitla ed libro na Gawa, sanen sikatoy nila nen Felipe diad panangiwanwan na espiritu. Nen abasa na opisyal imay kabiangan na libron Isaias a naromog tayo natan ed Isaias 53:7, 8, intepet to’d Felipe: “Kerewen ko ed sika, siopa so pansalitaan na propeta na onia? Sikaton dili odino  wala so arum?” Tampol ya impaliwawa nen Felipe a say tutukoyen nen Isaias et say Mesias, salanti, si Jesus.​—Gawa 8:26-35.

⁴ Sanen ugaw ni Jesus, diad pakayari na masanton espiritu et inyabawag na sakey a matunong a lakin manngaran na Simeon a ‘sayan ugaw a Jesus’ et magmaliw a “silew na saray Gentil,” a singa nipropesiya ed Isaias 42:6 tan 49:6. (Luc. 2:25-32) Kaaruman ni, say impamabaing ya asagmak nen Jesus diad samay labi na impangusay ed sikato et nipropesiya la ed Isaias 50:6-9. (Mat. 26:67; Luc. 22:63) Kayari na Pentecostes 33 C.E., malinlinew ya impabidbir nen apostol Pedro a si Jesus imay “Aripen” odino Lingkor nen Jehova. (Isa. 52:13; 53:11; basaen so Gawa 3:13, 26.) Anto so naaralan tayo ed sarayan Mesianikon propesiya?

Impasal nen Jehova so Lingkor To

5. Anton panangipasal so naawat na Lingkor?

⁵ Sakey ed saray propesiya nen Isaias nipaakar ed Lingkor na Dios et mangipapaamta’d sikatayo ed maap-apit a relasyon nen Jehova tan say panguloan ya Anak to, sakbay a nagmaliw a too. (Basaen so Isaias 50:4-9.) Imbagan mismo na Lingkor a sikatoy lawas ya impasal nen Jehova, a kuanto: “Liingen to so layag ko a pandengel a singa pandengel na saray abangatan.” (Isa. 50:4) Kaleganan na saratan a panaon, say Lingkor nen Jehova et dinmengel tan akaaral ed Ama to, a nagmaliw a mapasakop a babangatan. Agaylan nikabkabiig a pribilehyo so paibangat ed Manamalsa na uniberso!

6. Panon ya impanengneng na Lingkor so nagnap a panagpasakop ed Ama to?

⁶ Diad sayan propesiya, tinawag na Lingkor so Ama to bilang say “[“Soberanon,” NW] Katawan a Jehova.” Ipapanengneng na saya a bibidbiren na Lingkor a si Jehova so sankatalbaan a Soberano. Diad panangipatnag na nagnap a panagpasakop ed Ama to et oniay inkuan to: “[“Say Soberanon,” NW] Katawan a Jehova nilukasan to so layag ko, et agak masunggay, tan agak met binmeneg.” (Isa. 50:5) Sikatoy ‘walad abay nen Jehova bilang uloen a komikimey’ diad impamalsa ed uniberso tan too. Sayan “uloen a komikimey” et “maliket lawas ed arap [nen Jehova], a malikeliket ed panag-ayaman a dalin to, et say panggayagaan [na Anak na Dios] wala nensaman ed saray anak na totoo.”​—Uli. 8:22-31.

7. Antoy mangipapatnag a say Lingkor et matalek a sikatoy tulongan nen Ama to legan na saray subsubok?

⁷ Sayan panangipasal ya agamoran na Lingkor tan say panangaro to ed katooan so akatulong ed sikato sanen linma diad dalin tan akasagmak na graben isusumpa. Nantultuloy ton nanliketan so impanggawa na linawa nen Ama to, anggaman nipaarap ed pinasyan panamasegsegang. (Sal. 40:8; Mat. 26:42; Juan 6:38) Diad amin a dinalan nen Jesus a subok, sikatoy matalek ed panangabobon tan suporta nen Ama to. Singa ed samay impropesiya nen Isaias, sarag ya ibaga nen Jesus so onia: “Wala ya asingger so mamatunong ed siak; siopa so misangsangan ed siak? . . . Nia, [“say Soberanon,” NW] Katawan a Jehova tulongan to ak.” (Isa. 50:8, 9) Petepeteg a tinulongan nen Jehova iyan matoor a Lingkor kaleganan na impanministeryo to diad dalin, a singa ipapanengneng na sananey nin propesiya nen Isaias.

Say Ministeryo na Lingkor Diad Dalin

8. Antoy mamapaneknek a si Jesus imay ‘pinili’ nen Jehova a nipasakbay ed Isaias 42:1?

⁸ Ibabaga na rekord na Biblia imay agawa sanen si Jesus et binautismoan nen 29 C.E.: “Inmakseb ed sikato so [“masanton espiritu,” NW] . . . tan sakey a boses nanlapu ed tawen, a kuan to, Sika so Ana’ko ya inad-aro, dia ed sika napaliket ak a maong.” (Luc. 3:21, 22) Malinlinew sirin ya impakabat nen Jehova no siopa imay ‘pinili’ to ya asalambit ed propesiya nen Isaias. (Basaen so Isaias 42:1-7.) Diad makapadinayew a paraan et sinumpal nen Jesus iyan propesiya legan na ministeryo to diad dalin. Diad Ebanghelyon insulat nen Mateo et inaon to iramay salitan naromog ed Isaias 42:1-4 tan inyaplika to iratan ed si Jesus.​—Mat. 12:15-21.

9, 10. (a) Panon a sinumpal nen Jesus imay walad Isaias 42:3 legan na ministeryo to? (b) Panon a si Kristo et ‘pinapaway to so kaptekan’ legan a wadia ed dalin, tan kapigan to ‘ipasen so inkatunong ed dalin’?

⁹ Memelmelagen na saray Judion relihyoson  lider iray ordinaryon totoo a walad limog da. (Juan 7:47-49) Anggapoy panangiyansakit da ed saray totoon niyaliling ed “kawayan ya abalbal” odino ‘pabilon makuyep’ a ngalngali la naerep. Diad biek a dapag, naabagey nen Jesus iray duka tan nalalames a totoo. (Mat. 9:35, 36) Onia so maaron imbitasyon to’d sikara: “Dago kayo’d siak, amin yon nasasagpotan tan nabebelatan, et ikdan ta kayoy pampainawa.” (Mat. 11:28) Kaaruman ni, ‘pinapaway toy kaptekan’ diad impangibangat to ed saray estandarte nen Jehova ed no antoy maong tan mauges. (Isa. 42:3) Impanengneng ton say Ganggan na Dios et kaukolan ya ipaakseb tekep na inkamakatunongan tan panangasi. (Mat. 23:23) Impatnag to met so kaptekan odino hustisya diad impanpulong to’d pobri tan mayaman, ya anggapoy lalabien to.​—Mat. 11:5; Luc. 18:18-23.

¹⁰ Impropesiya met nen Isaias a sayan ‘pinili’ nen Jehova et ‘ipasen to so inkatunong ed dalin.’ (Isa 42:4) Bilang Ari na Mesianikon Panarian, maganggano to lan sumpalen iyan propesiya sano deralen to lan amin so gobiernoy too tan say mismon matunong ya uley to so onsalat ed saratan. Insan to la’d satan itarok so sakey a balon mundo, a ‘panayaman na inkatunong.’​—2 Ped. 3:13; Dan. 2:44.

“Silew” tan “Sipan”

11. Diad anton pantalos a si Jesus et “silew na saray Gentil” nen inmunan siglo, tan akin a nibagan sikatoy “silew na saray Gentil” anggad sayan panaon?

¹¹ Bilang kasumpalan na Isaias 42:6, si Jesus et peteg a nagmaliw a “silew na saray Gentil [“nasyon,” NW].” Legan na ministeryo to diad dalin, sikatoy angitarok na espiritual a liwawa, a manunan parad saray Judio. (Mat. 15:24; Gawa 3:26) Ingen ta oniay imbaga to: “Siak so silew na mundo.” (Juan 8:12) On, sikatoy nagmaliw a silew ed saray Judio tan ontan met ed saray nasyon, aliwan diad impangiter to labat na espiritual a liwawa, noagta diad impangibagat to met ed ayadyarin bilay to ya onkanan dondon parad katooan. (Mat. 20:28) Kayari na inkioli to, ingganggan to iray babangatan to a sikatoy tasian da “angga ed kasampotan na dalin.” (Gawa 1:8) Legan na ministeryo di Pablo tan Bernabe et inaon da imay balikas a “silew na saray Gentil,” tan inyaplika da itan ed gagawaen dan panagpulong a kimey ed saray aliwan Judio. (Gawa 13:46-48; ikompara so Isaias 49:6.) Satan a kimey et siansia nin itutultuloy na saray alanaan ya agagi nen Jesus tan saray kakaiba ra, diad pangikakayat da na espiritual a liwawa tan panutulong da’d totoo a manisia ed si Jesus, say “silew na saray Gentil.”

12. Panon a nibagan inter nen Jehova so Lingkor to bilang “sakey a sipan ed saray totoo”?

¹² Diad satan met lanlamang a propesiya et oniay inkuan nen Jehova ed pinili ton Lingkor: “Kawaloen [odino salimbengan] ta ka naani tan iter ta ka naani a nipaakar a sakey a sipan ed saray totoo.” (Isa. 42:6) Si Satanas et talagan nanggunaetan ton pateyen si Jesus tan nanggaway paraan pian agnasumpal nen Jesus so ministeryo to diad dalin. Balet ta sinalimbengan nen Jehova si Jesus ya anggad sinmabi so aturon panaon a sikatoy ompatey. (Mat. 2:13; Juan 7:30) Insan sikatoy pinaoli nen Jehova tan inter to bilang “sakey a sipan,” odino garantiya ed saray totoo. Satan a masimoon a sipan et mangagarantiya a say matoor a Lingkor na Dios et mantultuloy a magmaliw a “silew na saray Gentil,” a mangibulos ed saramay  walad espiritual a kabilungetan.​—Basaen so Isaias 49:8, 9. *

13. Diad anton paraan ya imbulos nen Jesus iramay ‘manyurong ed kabilungetan’ legan na ministeryo to diad dalin, tan panon ton itutultuloy a gagawaen itan?

¹³ Mitunosan ed sayan garantiya, say pinilin Lingkor nen Jehova et ‘lukasan to so saray bulag a mata,’ ‘ipaway to so saray pinangaw,’ tan ibulos to iray ‘manyurong ed kabilungetan.’ (Isa. 42:7) Kaleganan na ministeryo nen Jesus diad dalin et sinumpal to iyan propesiya diad impangiwalwal to’d saray tradisyon na palson relihyon tan diad impangipulong to ed maong a balita na Panarian. (Mat. 15:3; Luc. 8:1) Sirin, saramay nagmaliw a babangatan to et imbulos to manlapud espiritual a panangaripen na palson relihyon. (Juan 8:31, 32) Ontan met, diad espiritual a paraan et imbulos nen Jesus so minilyon ya aliwan Judio. Inganggan to’ray papatumbok to ya ‘onla tan manggawa na saray babangatan ed amin a nasyones,’ tan insipan ton suportaan to ra “angga ed kasampotan [na sistema] na mundo.” (Mat. 28:19, 20) Manlapud mangatatawen a posisyon to et idadaulo nen Kristo Jesus so sankamundoan a panagpulong a kimey.

Intandoro nen Jehova so Lingkor

14, 15. Akin tan panon ya intandoro nen Jehova so Lingkor to?

¹⁴ Diad sananey nin propesiya nipaakar ed Mesianikon Lingkor et oniay imbaga nen Jehova: “Nia, say aripen ko managamil a makabkabat, nitandoro tan nipaatagey.” (Isa. 52:13) Lapud lawas a mapasakop so Anak ed Soberanya nen Ama to tan nagmaliw a matoor anggaman ed saray sankairapan lan subok, sikatoy intandoro nen Jehova.

¹⁵ Oniay insulat nen apostol Pedro nipaakar ed si Jesus: “[Sikatoy] manayam ed kawanan na Dios, nen katokotok to ed saray tawen; wala ra ed silong na pakauley to so saray angheles, tan pakauley tan pakayari.” (1 Ped. 3:22) Onia met so miparan insulat nen apostol Pablo: “[Sikatoy] nampaabeba a nagmaliw a matulok ya anggad say ipapatey, on, say ipapatey ed [“panamairapan a kiew,” NW]. Kanian say Dios met sankatageyan so impangidayew to ed sikato, tan inter to ed sikato so ngaran ya analonggaring ed ami-amin a ngaran; a dia ed ngaran a Jesus so talimukoran na amin a pueg, na saray wala ed tawen, tan wala ed dalin tan wala ed dalem na dalin, tan pian ganagana a dila nepeg da a patuaen a si Jesu-Kristo sikato  so Katawan, a kidayewan na Dios Ama.”​—Fil. 2:8-11.

16. Panon a “nipaatagey” si Jesus nen 1914, tan anto la ray agawaan to nanlapu la’d saman?

¹⁶ Nen 1914, nagkalalo nin intandoro nen Jehova si Jesus. Sikatoy “nipaatagey” sanen introno nen Jehova bilang Ari na Mesianikon Panarian. (Sal. 2:6; Dan. 7:13, 14) Nanlapu la’d saman, si Kristo et ‘manuley la’d pegley na saray kakabusol to.’ (Sal. 110:2) Unona et tinalo toy Satanas tan saray demonyo, tan imbantak to ra’d dalin. (Apo. 12:7-12) Insan, bilang say Babaleg a Ciro, inliktar nen Kristo iray nakekeraan ya alanaan ya agagi to diad dalin manlapud panangaripen na “Babilonia a Baleg.” (Apo. 18:2; Isa. 44:28) Idadaulo toy sankamundoan a panagpulong a kimey a nanresulta ed impakatipon ed “nakdaan” na saray espiritual ya agagi to insan ed minilyon ya ‘arum a karnero,’ salanti, saray matoor a kakaiba na “melag a pulok.”​—Apo. 12:17; Juan 10:16; Luc. 12:32.

17. Anto la so naaralan tayo nipaakar ed lingkor diad impaningbat tayo ed saray propesiya nen Isaias?

¹⁷ Say impanaral tayo ed sarayan propesiya ed libro na Isaias et seguradon amaaralem na panamabli tayo ed Ari tan Mananondon tayo, si Kristo Jesus. Say impanpasakop to bilang anak legan na ministeryo to diad dalin et mangipapatnag ed impangipasal nen Ama to ed sikato antis ya onla’d dalin. Pinaneknekan toy inkasikato bilang say “silew na saray Gentil” diad mismon ministeryo to tan diad panagpulong a kimey ya idadaulo to anggad sayan panaon. Diad onsublay ya artikulo, pantongtongan tayo so sakey nin propesiya a mangiparungtal a say Mesianikon Lingkor et managmak na panamairap tan iter toy bilay to pian nagunggonaan itayo. Nepeg tayon ‘nengnengen’ odino imanoen a maong irayan bengatla legan a manasingger so Memoryal na impatey to.​—Heb. 12:2, 3.

[Saray paimano ed leksab]

Bilang Repaso

• Siopa imay lingkor a sinalambit ed propesiya nen Isaias, tan panon tayon napaneknekan itan?

• Panon ya impasal nen Jehova so Lingkor to?

• Akin a nibagan si Jesus et “silew na saray Gentil”?

• Panon a nitandoro so Lingkor?

[Tepetepet Parad Panagaral]

[Litrato ed pahina 21]

Malinlinew ya impakabat nen Felipe a samay lingkor a sinalambit nen Isaias et si Jesus, say Mesias

[Litrato ed pahina 23]

Bilang say pinilin Lingkor nen Jehova, naabagey nen Jesus iray duka tan nalalames a totoo

[Litrato ed pahina 24]

Si Jesus et intandoro nen Ama to tan nitrono bilang Ari na Mesianikon Panarian