Panliketan so Panaggaway Babangatan

“Onla kayo sirin, tan manggawa kayo na saray babangatan.”​—MAT. 28:19.

1-3. (a) Anto so nalilikna na dakel no nipaakar ed panangiyaral na Biblia? (b) Antoran tepet so pantongtongan tayo?

“WALAY sakey a pamilyan nanlapud Pakistan a 11 a simbak lan iyaaralan,” so insulat na agin bii a manlilingkor ed grupon mansasalita na lenguahen Hindi diad Estados Unidos. “Siempre, nagmaliw kamin sankaaro,” so inyarum to. “Agko napokpokay makalua sano nanonotan ko a magano lan ompawil iyan pamilya ed Pakistan. Aliwa labat iyan lapud ermen ko ta agko la ra nakaiba, noagta ontan met ed liket a naliliknak legan ko ran ibabangat nipaakar ed si Jehova.”

² Singa sayan agi, nanliketan mo la kasi so panangiyaral na Biblia ed arum? Si Jesus tan saray inmunan siglon babangatan to et nanliketan dan maong so panaggaway babangatan. Sanen pinmawil iray 70 babangatan ya impasal nen Jesus tan maliket iran angisalaysay na resulta, mismon si Jesus et ‘linmiket ed masanton espiritu.’ (Luc. 10:17-21) Mipadpara, dakel so talagan naliliketan natan ed panaggaway babangatan. Diad tua, nen 2007, walay aberids ya anemira tan kapalduan milyon a panangiyaral na Biblia ed kada bulan ya inkondukta na saray makukuli tan maliket a manangipalapag!

³ Ingen, walaray manangipalapag ya anggapo ni iyaaralan day Biblia. Ompan say arum et pigay taon lan ag-akapangiyaral. Antoran angat so nayarin naeksperiensya tayo legan itayon  manggugunaet a mangiyaral na Biblia? Panon tayon natalonaan irayan angat? Tan antoray nagunggona tayo sano gawaen tayoy anggaay nayarian tayon tumboken so ganggan nen Jesus ya: “Onla kayo sirin, tan manggawa kayo na saray babangatan”?​—Mat. 28:19.

Saray Angat a Makapangekal na Liket Tayo

4, 5. (a) Diad arum a parte na mundo, panon so ikikiwas na dakel a totoo? (b) Antoran angat so naeeksperiensya na saray manangipalapag diad arum a pasen?

⁴ Diad arum a parte na mundo, labalabay na totoo ya awaten so literatura tayo tan interesado iran manaral na Biblia. Oniay insulat na sanasawan taga Australia a temporaryon manlilingkor ed Zambia: “Tua manaya so balita. Say Zambia et talagan mabungan teritorya. Marakdakep so manpulong ed karsada! Aasinggeran kami na totoo, wala ra ni ingey manaanap na espisipiko iran isyu na saray magasin.” Diad agano ni, saray agagi ed Zambia so akapangikondukta na masulok a 200,000 a panangiyaral na Biblia, a diad aberids et masulok a sakey a panangiyaral so nikondukta na kada manangipalapag.

⁵ Balet diad arum a pasen, nayarin nanairapan iray manangipalapag a mangipalima na literatura tan mangiyaral na Biblia a regular. Akin? Kaslakan lan agda nasasabian iray totoo no mankakabkaabungan ira, tan no wala bilang so nasabian da et ompan ag-interesado ed relihyon. Nayari pa lagin sarayan totoo et pinabaleg ed aliwan relihyoson sankaabungan odino kagula da so pansimpisimpitan na palson relihyon. Dakel ed sikara so pinaulyanan na saray palson pomapastol kanian maletey so espiritualidad da. (Mat. 9:36) Agpankelawan sirin a papaliisan dan pantongtongan so nipaakar ed Biblia.

6. Antoray nayarin makakalimita ed arum a manangipalapag?

⁶ Walaray matoor a manangipalapag a nipapaarap ed sananey nin angat a nayarin makapangekal na liket da. Anggaman aktibo iran maong nensaman ed panaggaway babangatan, natan et nalilimitaan la ira lapud sakit odino inkatatken. Sakey ni, nayarin nalilimitaan itayo met lapud saray iisipen tayon negatibon bengatla nipaakar ed inkasikatayo. Singa bilang, ipapasen mo kasin aliwa kan kualipikadon mangiyaral na Biblia? Nayarin mipara itan ed samay alikna nen Moises sanen sikatoy ingganggan nen Jehova a mitongtong ed si Faraon. Inkuan nen Moises: ‘O, Katawan, aliwa ak a toon maong a mansalita ya anggan nen panaon a linmabas.’ (Exo. 4:10) Say kapadpara na satan a liknaan et say takot ya ompan onsaew itayo. Ompan isipen tayon agmagmaliw a babangatan so sakey a too lapud aliwa itayon sankamaongan a managbangat. Kanian pian agtayo la itan naeksperiensya, nayarin pilien tayon agla mangiyaral. Panon tayon natalonaan irayan angat?

Iparaan so Puso Yo

7. Anto so amakiwas ed si Jesus diad ministeryo to?

⁷ Say unonan kundang et say pangiparaan ed mismon puso tayo. Oniay imbaga nen Jesus: “Dia ed inkadaakan na puso say sangi [et] mansalita.” (Luc. 6:45) Say amakiwas ed si Jesus diad ministeryo to et say impapuson panangiyansakit ed pankaabigan na arum. Alimbawa, sanen naimatonan to so makapuy ya espiritual a kipapasen na saray kapara ton Judio, “inabagey to ra.” Inkuan to’d saray babangatan to: “Dakel a tua so aanien . . . Pikasi yo sirin ed Katawan na aanien, pian mangibaki na saray manani ed aanien to.”​—Mat. 9:36-38.

8. (a) Anto so kaukolan tayon isipen? (b) Anto so naaralan tayo ed inkomento na sakey ya iyaaralan na Biblia?

⁸ Legan itayon mibibiang ed panaggaway babangatan, maabig no isipen tayon maong no panon itayon sigpot ya agunggonaan lapud walay angiganay panaon ya angiyaral na Biblia ed sikatayo. Isipen met iray totoo a napulongan tayo tan no panon iran nagunggonaan no narengel day mensahe tayo. Oniay insulat na sakey a bii ed sangan opisina diad bansa to: “Labay kon ibalikas ed sikayo so baleg a pisasalamat ko ed saray Tasi a nambangat ed siak diad abung. Amtak a no maminsan et ompan nadidismaya ira lapud dakdakel so tepet ko tan lanang ya ondudukey so oras da’d siak. Balet aanosan da ak kalamor tan labalabay dan inabang no antoy naaralan da. Misalsalamat ak ed si Jehova tan si Jesus ta sinmabi irayan totoo ed bilay ko.”

9. Anto so angisentroan nen Jesus na imano to, tan panon tayon naalig si Jesus?

 ⁹ Siempre, aliwan amin et angawat ed saray bangat nen Jesus. (Mat. 23:37) Arum so tinmumbok ya agano insan sinuppiat da lanlamang iray imbabangat to tan “agla ra akila ed sikato.” (Juan 6:66) Anggaman ontan, ag-inabuloyan nen Jesus a say negatibon reaksion na arum so magmaliw a rason pian liknaen ton anggapoy kakanaan na mensahe to. Anggano dakel ed saramay intatanem to et agnambunga, say angisentroan toy imano to et samay maabig a gagawaen to. Anengneng ton say kaumaan et amputi la parad panagani tan nanliketan toy ontulong ed satan a kimey. (Basaen so Juan 4:35, 36.) Imbes a nengnengen labat so naklangan a dalin a walad baetan na saray pagey, akin ta no ikdan tayo met na imano so aanien ed niasain a teritorya tayo? Usisaen tayo no panon tayon napansiansia so ontan a positibon panmoria.

Mantanem Diad Ilalon Makapan-ani

10, 11. Anto so nagawaan mo pian napansiansiam so liket mo?

¹⁰ Say dumaralos et mantatanem diad ilalon makapan-ani. Ontan met, kaukolan tayoy manpulong diad ilalon makapangigapo na panangiyaral na Biblia. Panon balet no regular kan mibibiang ed panagkabkaabungan ingen ta daiset labat so nakakatongtong mo, odino pigpigara labat so nasasabim ed saray papawilen mo? Nayarin nadismaya ka. Onsuko ka la kasin mankabkaabungan? Siempre andi! Dakel nin siansia so primeron nakakatongtong panamegley na sayan asubok lan epektibon metodo.

¹¹ Balet pian napansiansiam so liket mo, kasin napalaknab mo ni ray metodom ed panagpulong, a nayarin ilaktip moy arum a paraan pian nasabim iray totoo? Singa bilang, asalim ta lay nampulong ed karsada odino diad lugar a pantratrabahoan na totoo? Nayarim kasi iran tawagan, odino laen so numeroy telepono na  saramay apulongan mo la pian natawagan ira? No manseet ka tan itukoy moy ministeryom, panliketan mo so pakaromog na saray totoo a positiboy ikiwas da ed mensahe na Panarian.

Solusyon ed Kaandiay Interes

12. Anto so nayarin gawaen tayo no dakel so ag-interesadon totoo diad teritorya tayo?

¹² Panon to no diad teritorya yo et dakel so totoon ag-interesado ed relihyon? Sarag mo kasin itukoy so introduksion mo pian naalam so interes da? Oniay insulat nen apostol Pablo ed saray kapananisiaan to ed Corinto: “Dia ed saray Judio, nagmaliw ak a singa Judio . . . Dia ed saray anggapo so ganggan, singa anggapo [ak ed] ganggan, aliwa ya anggapo ak ed ganggan na Dios.” Antoy amakiwas ed kinen Pablo? “Nagmaliw ak ya ami ganagana ed amin day totoo, ta pian dia ed ami gawa nilaban ko so saray arum,” so inkuan to. (1 Cor. 9:20-22) Kasin makaromog itayo met na saray punto a makasagyat ed interes na saramay walad teritorya tayo? Dakel ed saramay aliwan relihyoson totoo et labay dan naparakep so ulopan na pamilya ra. Nayarin labay da met a naamtaan no antoy gagala na bilay. Nipresenta tayo kasi so mensahe na Panarian ed saratan a totoo diad paraan a nasagyat so interes da?

13, 14. Panon itayon magmaliw a mas maliket ed kimey a panaggaway babangatan?

¹³ Ondarakel iray manangipalapag a nagmaliw a mas maliket ed kimey a panaggaway babangatan, anggan diad saray pasen a singa ag-interesado iray totoo. Antoy ginawa ra? Nanaral ira na arum a lenguahe. Alimbawa, nalmoan na sakey a sanasawan manedad lay masulok a 60, a nilibon estudyanten Tsino tan saray kapamilyaan da so manaayam ed teritorya na kongregasyon da. “Lapud saya, asagyat kamin manaral na lenguahen Tsino,” so imbaga na asawan laki. “Anggaman diad inagew-agew et kaukolan min ipanaon so panaral na lenguahe,” so intuloy to, “nanresulta itan ed dakel a panangiyaral na Biblia ed saray Tsino diad lugar mi.”

¹⁴ Anggano agka makapanaral na arum a lenguahe, sarag mon usaren so bokletan Good News for People of All Nations sano walaray nakatongtong mon duma so lenguahe ra. Ontan met, nayari kan mangala na literatura ed lenguahe ra. Tua, nakaukolan so mas baleg a panaon tan sagpot pian makapitalosan ed saramay sananey so lenguahe tan kultura ra. Balet tandaan mo iyan prinsipyon walad Salita na Dios: “Say mantanem na daakan, manani met na daakan.”​—2 Cor. 9:6.

Makatulong so Interon Kongregasyon

15, 16. (a) Akin a makatulong so interon kongregasyon ed panaggaway babangatan? (b) Anton betang so susumpalen na saray maedad la?

¹⁵ Balet, say panaggaway babangatan et aglabat akadepende ed pansasagpot na sakey ya indibidual. Imbes, makatulong so interon kongregasyon. Akin et ontan so nibaga tayo? Oniay inkuan nen Jesus: “Lapu ed saya amin a too nabidbiran da a sikayo ray babangatan ko, no wala so aro yo ed sakey tan sakey.” (Juan 13:35) On, sano onaatendi iray iyaaralan na Biblia ed saray pantitipon, kaslakan a pandinayewan da so panaaroan a nanenengneng da ditan. Insulat na sakey ya iyaaralan na Biblia: “Panliliketan kon maong so iyaatendi ed saray pantitipon. Talagan makaaro iray totoo ditan!” Imbaga nen Jesus a saramay magmaliw a patumbok to et nayarin sumpaen na mismon pamilya ra. (Basaen so Mateo 10:35-37.) Anggaman ontan, insipan to a diad kongregasyon et makalmo ira na amayamay ya espiritual ya “agagin lalaki, tan agagin bibii, tan saray ina, tan saray anak.”​—Mar. 10:30.

¹⁶ Nagkalalo lan importante so betang a susumpalen na saray maedad lan agagi tayo pian natulongan ya onaligwas iray iyaaralan na Biblia. Diad anton paraan? Anggano arum ed sikara et agda la nasarag so mangiyaral na Biblia, napapabiskeg so pananisia na amin kapagno narerengel da iray makapaseseg a komento na saray maedad la diad saray pantitipon ed kongregasyon. Lapud abayag lan panmamatoor da “ed dalan na inkatunong,” napaparakep odino magmamaliw a mas magayaga so kongregasyon tan nasasagyat iray matuan-impanpuson totoo ed organisasyon na Dios.​—Uli. 16:31.

Talonaan Iray Nalilikna Tayon Takot

17. Anto so gawaen tayo pian natalonaan so pakaliknan agtayo sarag so mangiyaral na Biblia?

¹⁷ Anto so gawaen mo no liknaen mon agmo sarag so mangiyaral na Biblia? Tandaan a tinulongan  nen Jehova si Moises diad impangiter Toy masanton espiritu, tan sakey a kaiba, say kuya ton si Aaron. (Exo. 4:10-17) Insipan nen Jesus a mangawat itayoy tulong na masanton espiritu na Dios ed panagpulong a kimey. (Gawa 1:8) Niarum ni, sanderwa iramay komikimey ya imbaki nen Jesus a manpulong. (Luc. 10:1) Kanian no nanairapan kan mangiyaral na Biblia, manpikasi parad espiritu na Dios pian naikdan ka na karunongan, insan mi-partner ed sakey ya agin makapangiter ed sika na kompiyansa tan makatulong ed sika so eksperiensya to. Napabiskeg so pananisia tayo no nodnonoten tayon pinili nen Jehova iray ordinaryon totoo, salanti, “saray bengatla a makapuy na mundo,” pian sumpalen iyan espisyal a kimey.​—1 Cor. 1:26-29.

18. No natatakot tayo ta ompan agtayo natulongan so iyaaralan a magmaliw a babangatan, panon tayon talonaan itan a liknaan?

¹⁸ No natatakot tayo ta ompan agtayo natulongan so iyaaralan a magmaliw a babangatan, panon tayon talonaan itan a liknaan? Maabig no tandaan tayon say panaggaway babangatan et aliwan singano panagluto a say resulta et manunan akadepende ed sakey a too​—say kusinero. Imbes, nakaukolan so pantutulongan na talora. Susumpalen nen Jehova so sankaimportantian a betang, salanti, iyaasingger to so indibidual ed sikato. (Juan 6:44) Sikatayo tan arum ni ra ed kongregasyon so manggugunaet ya usaren so dunong tayo’d panagbangat pian natulongan ya onaligwas so iyaaralan tayo. (Basaen so 2 Timoteo 2:15.) Tan say estudyante so kaukolan ya onkiwas unong ed naaaralan to. (Mat. 7:24-27) Nayarin nadismaya itayo no ipaitunda to lay panangiyaral na Biblia. Anggaman pilalek tayo a gawaen na saray iyaaralan tayo so dugan desisyon, kada indibidual et kaukolan a “mangiyosaosa [odino mikuentaan] naani nipaakar ed inkasikaton dili ed arap na Dios.”​—Roma 14:12.

Anto Iray Gunggona?

19-21. (a) Antoray nagunggona tayo ed panangiyaral na Biblia? (b) Panon a momoriaen nen Jehova so amin a mibibiang ed panagpulong a kimey?

¹⁹ No mangiyaaral itayo na Biblia, ontulong itan pian lawas akasentroy imano tayo ed pananap nin unona ed Panarian. Ontan met, nipapaslep na satan so katuaan na Salitay Dios ed nonot tan puso tayo. Panon? Oniay impaliwawa na payunir a manngaray Barak: “No walaray iyaaralan mo na Biblia, napilitan kan magmaliw a mas maong ya estudyante na Salitay Dios. Naamtaan ko a nepeg ko ni magmaliw a kombinsido ed saray papanisiaan ko pian epektibo ak a makapanbangat.”

²⁰ No anggapo ni iyaaralan moy Biblia, kabaliksan to kasi a say panaglingkor mo et anggapoy kakanaan ed Dios? Siempre andi! Papablien a maong nen Jehova iray pansasagpot tayon mangidayew ed sikato. Amin a mibibiang ed panagpulong et “kakimeyan na Dios.” Anggaman ontan, no mangiyaaral itayo na Biblia, naarumay liket tayo legan tayon nanenengneng no panon a pababalegen nen Jehova iramay intatanem tayon bini. (1 Cor. 3:6, 9) Oniay inkuan na sakey a payunir a manngaray Amy: “Legan mon nanenengneng so iyaaligwas na iyaaralan mo na Biblia, naliknam so baleg a pisasalamat ed si Jehova ta inusar to ka pian naikdan so sakey a too na alay abig a regalo​—say pankanawnawan nakabat si Jehova tan makaawat na andi-anggaan a bilay.”

²¹ No gawaen tayoy anggaay nayarian tayon mangigapo tan mangikondukta na panangiyaral na Biblia, napansiansia tayoy imano tayo diad panaglingkor ed Dios natan tan napabiskeg so ilalo tayon makaloob ed balon mundo. Diad tulong nen Jehova, natulongan tayo met iramay ondedengel ed sikatayo pian nisalba ira. (Basaen so 1 Timoteo 4:16.) Seguradon manresulta itan ed liket!

Kasin Nanonotan Mo?

• Antoran angat so nayarin makaamper ed arum diad panangiyaral na Biblia?

• Anto so nayarin gawaen tayo no diad teritorya tayo et dakel so singa ag-interesado?

• Antoray nagunggona tayo diad panangiyaral na Biblia?

[Tepetepet Parad Panagaral]

[Saray litrato ed pahina 9]

Kasin papalaknaben moy metodom ed panagpulong pian makaromog ka na matuan-impanpuson totoo?