Say Lingkor nen Jehova​—‘Asugatsugat Nisengeg ed Impakasumlang Tayo’

“Sikato so asugatsugat nisengeg ed saray impakasumlang tayo, sikato so apasireg nisengeg ed saray inkauges tayo . . . Lapu ed saray [sugat] to natambal itayo.”​—ISA. 53:5.

1. Anto so lawas tayon nonoten sano manseselebra na Memoryal, tan anton propesiya so ontulong ed sikatayon nagawaan iya?

SESELEBRAAN tayoy Memoryal pian nodnonoten so impatey nen Kristo tan amin ya agawaan na impatey tan inkioli to. Ipapanonot na satan so panangiyalangon ed inkasoberano nen Jehova, pamasantos ed ngaran to, pakasumpal na saray gagala to, pati say kilalaban na katooan. Nibagan anggapo lay arum nin propesiya ed Biblia a mas makadeskriben maong ed impansakripisyo nen Kristo tan saray resulta na satan nen say samay akasulat ed Isaias 53:3-12. Impasakbay nen Isaias so panirap na Lingkor tan angiter na espisipiko iran detalye nipaakar ed ipatey na Kristo. Sinalambit to met iray bendisyon a resultay impatey nen Kristo parad saray alanaan ya agagi to, tan ed ‘arum a karnero’ to.​—Juan 10:16.

2. Anto so papaneknekan na propesiya nen Isaias, tan anto so epekto na satan ed sikatayo?

² Pitoran siglo sakbay na inkianak nen Jesus diad dalin, pinuyanan nen Jehova si Isaias a mangipropesiya a say pinili To a Lingkor et  mansiansian matoor anggaman makasagmak na pirmin subok. Say impamuyan nen Jehova ed sayan propesiya et paneknek a sikatoy sigpot a matalek ed katooran na Anak to. Legan tayon uusisaen iyan propesiya, napano so kapusoan tayo na pisasalamat tan napabiskeg so pananisia tayo.

‘Minudmora tan Agpinabli’

3. Akin et nepeg komon ya abrasaen na saray Judio si Jesus, balet panon so impideneng da’d sikato?

³ Basaen so Isaias 53:3. Nonot yo pa labat so liknaan na bogbogtong ya Anak na Dios sanen inkaindan toy liket na panlilingkor ed dikingan na Ama to, tan linma dia ed dalin pian ompatey, diad ontan et niliktar iray totoo manlapud kasalanan tan ipapatey! (Fil. 2:5-8) Say bagat to so mangitarok na peteg a kaperdona na saray kasalanan, ya ililitrato lambengat na samay panagbagat na ayayep ed Mosaikon Ganggan. (Heb. 10:1-4) Agta manepeg labat komon a sikatoy abrasaen tan igalang, nagkalalo la na saray Judio, a manaalagar ed isabi na insipan a Mesias? (Juan 6:14) Imbes ya ontan so nagawa, say Kristo et ‘minudmora tan agpinabli’ na saray Judio, unong ya impropesiya nen Isaias. Oniay insulat nen apostol Juan: “Sikatoy sinmabi ed dilin lugar to, balet ag-inawat na saray mismon kabaleyan to.” (Juan 1:11, NW) Inkuan nen apostol Pedro ed saray Judio: “Say Dios na saray inmuunan atateng tayo, so angigloria ed Lingkor to a Jesus, a sikayon mismo so angiyawat tan angipulisay ed sikato diad arap nen Pilato, sanen sikatoy labay to lan ibulos. On, impulisay yo itan a masanto tan matunong a sakey.”​—Gawa 3:13, 14, NW.

4. Panon a naamtaan nen Jesus so sakit?

⁴ Impropesiya met nen Isaias a si Jesus et “amta to so ermen [“sakit,” NW].” Legan na ministeryo nen Jesus, seguradon asali to met so naksawan, balet ta anggapoy ebidensyan sikatoy nansakit. (Juan 4:6) Ingen, amta toy ermen odino sakisakit na saramay pinulongan to. Akasian to ira tan dakel so tinambal to. (Mar. 1:32-34) Kanian sinumpal nen Jesus imay propesiya a mangibabagan: “Tua a sikato intepel to so saray sakit tayo tan inawit to so saray ermen tayo.”​—Isa. 53:4a; Mat. 8:16, 17.

Singa “Kinabil na Dios”

5. Panon a minoria na dakel a Judio so impatey nen Jesus, tan akin a lalon angarum iya ed impanirap to?

⁵ Basaen so Isaias 53:4b. Ag-atalosan na dakel ed saray kapanaonan nen Jesus so rason ed impanirap tan impatey to. Minoria dan sikatoy dudusaen na Dios, a singa sikatoy papairapen panamegley na makapadimlan sakit. (Mat. 27:38-44) Inakusaan na saray Judio si Jesus a mangaayew ed Dios. (Mar. 14:61-64; Juan 10:33) Ingen amta tayo a si Jesus et andian na kasalanan tan peteg a mangigagalang ed Dios. Inad-aro ton maong so Ama to, kanian say mismon ideya a sikatoy pateyen lapud akusasyon ya aayewen to so Dios et lalon angarum ed irap a nalilikna to bilang Lingkor nen Jehova. Anggaman ontan, sikatoy lawas ya akaparaan a mangunor ed linawa nen Jehova.​—Mat. 26:39.

6, 7. Diad anton pantalos a nibagan ‘pinasireg’ nen Jehova so matoor a Lingkor to, tan akin a saya et angitarok na ‘liket’ ed Dios?

⁶ Agtayo la pankelawan no nabasa tayoy ibabaga na propesiya nen Isaias a moriaen na arum a “kinabil na Dios” so Kristo, balet nayarin pankelawan tayo so onian ibabaga na propesiya: ‘Apaliket si Jehova ed pamasireg ed sikato.’ (Isa. 53:10) Panon ya ‘apaliket si Jehova ed pamasireg ed sikato’ anta inkuan Ton, “Nia, say aripen ko, . . . say pinilik, a panliketan na kamarerwak”? (Isa. 42:1) Panon a nibaga ya angitarok itan na liket ed si Jehova?

 ⁷ Pian natalosan iyan kabiangan na propesiya, nepeg tayon nonoten a sanen inangatan nen Satanas so inkasoberano nen Jehova, kinuestion toy katooran na amin a lingkor nen Jehova, diad tawen ontan met ed dalin. (Job 1:9-11; 2:3-5) Say impansiansian matoor nen Jesus anggad ipapatey et angiter na naspot ya ebat ed satan ya angat nen Satanas. Kanian, sanen inyabuloy nen Jehova so pamatey na saray kakabusol ed si Kristo, agpanduaruwaan a Sikatoy naiirapan ed pakakanengneng a say pinili ton Lingkor et papateyen. Anggaman ontan, say impakaimaton to’d sigpot a katooran na Anak to et amaliket a maong ed si Jehova. (Uli. 27:11) Kaaruman ni, lapud amta nen Jehova a say impatey na Anak to et mangitarok na bendisyon ed magbabawin katooan, sikatoy sigpot ya aliketan.​—Luc. 15:7.

“Asugatsugat Nisengeg ed Impakasumlang Tayo”

8, 9. (a) Panon a si Jesus et ‘asugat lapud impakasumlang tayo’? (b) Panon iyan pinaneknekan nen Pedro?

⁸ Basaen so Isaias 53:6. Singa ed nababalang a karnero, saray makasalanan a totoo et manyayatawyataw, a manaanap na manangiliktar manlapud sakit tan ipapatey ya atawir ed si Adan. (1 Ped. 2:25) Lapud ag-inkayadyari, anggapo anggan sakey ed kapolian nen Adan so makayarin mangipawil ed abalang to. (Sal. 49:7) Bangbalet, nisengeg ed baleg a panangaro nen Jehova, ‘inggaton to ed samay sakey so kasalanan tayo ya amin,’ salanti, diad inad-aro ton Anak tan pinili ton Lingkor. Diad inyabobon nen Kristo a sikatoy ‘nasugat nisengeg ed saray impakasumlang tayo’ tan ‘napasireg nisengeg ed saray inkauges tayo,’ inako to iray kasalanan tayo diad panamairapan a kiew tan inatey a kasandi tayo.

⁹ Oniay insulat nen apostol Pedro: “Ta saya so inkatawag yo, ta si Kristo nairapan met lapu ed sikayo, dia ed impangitilak to na panuliranan, pian tumboken yo so bakat to. A sikaton dili inako to so kasalanan tayo ed laman to dia ed tapew na kiew, pian no inatey itayo ed kasalanan, manbilay itayo ed katunongan.” Insan, diad impangaon to’d propesiya nen Isaias, inyarum ni nen Pedro: “Atambal kayo na saray sugat to.” (1 Ped. 2:21, 24; Isa. 53:5) Saya so angiter na pankanawnawa parad saray makasalanan pian makapipulangan lamet ed Dios, unong ya intultuloy ya imbaga nen Pedro: “Aminsan si Kristo [inatey] nisesengeg ed saray kasalanan, say matunong lapu ed saray agmatunong pian itarok to itayo ed Dios.”​—1 Ped. 3:18.

“Singa Sakey a Kordero a Niarap ed Panagpateyan”

10. (a) Panon so impaneskribe nen Juan a Managbautismo ed kinen Jesus? (b) Akin a dugaruga iraman a deskripsion nen Juan?

¹⁰ Basaen so Isaias 53:7, 8. Sanen anengneng nen Juan a Managbautismo si Jesus ya onaasingger ed sikato, inkelyaw to: “Nia so Korderoy Dios, a mangekal na kasalanay mundo!” (Juan 1:29) Diad impaneskribe ed si Jesus bilang Kordero, nayarin sankanonot nen Juan iramay salita nen Isaias, a sikato so “singa sakey a Kordero a niarap ed panagpateyan.” (Isa. 53:7) Tan impropesiya nen Isaias ya “inkalbo to so kamarerwa to angga ed patey.” (Isa. 53:12) Makapainteres ta diad samay labi ya inggapo nen Jesus so Memoryal na impatey to, sikatoy angiter na sakey a kopa na alak ed saray 11 a matoor ya apostol to, insan to inkuan: “Sikato ya’y dalak ed sipan a sikatoy naibung nipaakar ed amayamay a pangekal ed saray kasalanan.”​—Mat. 26:28.

11, 12. (a) Anto so iyiilustra na inkamabulos nen Isaac a paibagat no nipaakar ed bagat nen Kristo? (b) Anto so nepeg tayon nonoten nipaakar ed Babaleg ya Abraham, si Jehova, sano manseselebra itayo na Memoryal?

¹¹ Singa si Isaac, si Jesus et mabulos ya inmabuloy a sikatoy nisaklang bilang bagat. (Gen. 22:1, 2, 9-13; Heb. 10:5-10) Ingen, anggaman mabulbulos met ya inmabuloy si Isaac, say anali balet a mangibagat ed sikato et si Abraham. (Heb. 11:17) Diad mipadparan dalan, mabulos ya inawat nen Jesus a sikatoy ompatey, bangbalet ta say Lapuan na uksoyan nipaakar ed dondon et si Jehova. Say bagat na Anak to et balikas na aralem a panangaro na Dios ed katooan.

¹² Oniay inkuan a mismo nen Jesus: “Ontan lay impangaro na Dios ed mundo, ya inter to so bogbogtong ya anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) Insulat met nen apostol Pablo: “Say Dios ipurek to so dilin aro to  ed sikatayo, ta anta makasalanan itayo ni, si Kristo inatey lapud sikatayo.” (Roma 5:8) Kanian, anggaman igagalang tayoy Kristo panamegley na panselebra ed impatey to, nepeg ya agtayon balot lilingwanan a say angiyuksoy pian magmaliw a posible so bagat et say Babaleg ya Abraham, si Jehova. Seselebraan tayoy Memoryal parad kirayewan to.

Say Lingkor ‘Patunongen To so Dakel a Totoo’

13, 14. Panon a say Lingkor nen Jehova et ‘pinatunong to so dakel a totoo’?

¹³ Basaen so Isaias 53:11, 12. Oniay imbaga nen Jehova nipaakar ed pinili ton Lingkor: ‘Say matunong a lingkor ko patunongen to so dakel a totoo.’ Panon? Say unor a kabiangan na bersikulo 12 so ontulong ed sikatayo pian naebatan iya. “Tan nanggawa na impangiyesel a nipaakar ed saray akasumlang.” Amin ed poli nen Adan et nianak a makasalanan odino ‘sumusumlang,’ kanian awaten da so “bayar na kasalanan,” salanti, say patey. (Roma 5:12; 6:23) Kakkaukolan sirin so pipulangan na saray makasalanan a totoo ed kinen Jehova. Marakdakep so impaneskribe na kapitulo 53 na propesiya nen Isaias ed no panon a si Jesus et nanggawa na impangiyesel odino amegley parad makasalanan a katooan. Oniay nabasa tayo: “Say dusa a pakapipaknaan tayo nigaton ed sikato, et lapu ed saray inkalewet to natambal itayo.”​—Isa. 53:5.

¹⁴ Sanen inako nen Kristo iray kasalanan tan sikatoy inatey parad sikatayo, ‘pinatunong to so dakel a totoo.’ Insulat nen Pablo: “Pinaabig na Ama pian dia ed sikato [si Kristo] manayam ya ami penel, tan dia ed kakanaan to ipulang to so amin a bengatla ed sikaton dili, bangta ginawa to so kareenan ed panamegley na dala ed [“panamairapan a kiew,” NW], . . . anggan saray bengatla ed tapew na dalin, odino saray bengatla dia ed saray katawenan.”​—Col. 1:19, 20.

15. (a) Sioparay “bengatla dia ed saray katawenan” a binitla nen Pablo? (b) Siopa labat iray makanepegan a mibiang ed saray emblema ed Memoryal, tan akin?

¹⁵ “Saray bengatla dia ed saray katawenan” a mipulangan ed si Jehova panamegley na niibung a dala nen Kristo et saray alanaan a Kristiano, a tinawag pian manuley a kaiba nen Kristo diad saray katawenan. Saray Kristiano a “minanabang ed inkatawag a mangatatawen” et niyabawag a ‘matunong parad bilay.’ (Heb. 3:1; Roma 5:1, 18) Insan la ra’d satan awaten nen Jehova bilang espiritual ya ananak to. Say masanton espiritu so mamapaneknek a sikaray “mitatawir ed Kristo,” a tinawag ira pian magmaliw ya arari tan saserdote ed mangatatawen a Panarian. (Roma 8:15-17; Apo. 5:9, 10) Nagmaliw iran kabiangan na espiritual ya Israel, say “Israel na Dios,” tan sikaray nagmaliw a kabiangan na sakey a “balo a sipan.” (Jer. 31:31-34; Gal. 6:16) Bilang kabiangan na balon sipan, makanepegan iran mibiang ed saray emblema diad Memoryal, kalaktip so kopa na ambalangan alak, a nipaakar ed saya et inkuan nen Jesus: “Saya a kopa sikato so balon sipan dia ed dalak, a naibung nisengeg ed sikayo.”​—Luc. 22:20.

16. Sioparay “bengatla ed tapew na dalin,” tan panon a sikaray nawalaan na apatunong a talindeg ed arap nen Jehova?

¹⁶ “Saray bengatla ed tapew na dalin” et saray arum a karnero nen Kristo, a walaan na ilalon manbilay na andi-anggaan diad dalin. Sikaray pagamoran met na pinilin Lingkor nen Jehova na apatunong a talindeg ed arap To. Lapud walaan ira na pananisia ed dondon bagat nen Kristo tan sirin et “inurasan da so kawekawes da, tan sikara so pinaputi ra ed dala na Kordero,” inyabawag ira  nen Jehova a matunong, aliwan bilang espiritual ya ananak noagta bilang kakaaro, ya inikdan to ira na marakdakep a pankanawnawan makaliktar ed “baleg ya irap.” (Apo. 7:9, 10, 14; Sant. 2:23) Lapud ag-ira kabiangan na balon sipan tan andian na ilalon manbilay diad tawen, sarayan arum a karnero et agmibibiang ed saray emblema ed Memoryal, ingen ta onaatendi ira bilang marespeton maniimaton.

Misalsalamat Tayo’d si Jehova tan ed Naabobonan a Lingkor To!

17. Panon a say impanaral ed propesiyan walad Isaias ya akasentro ed Lingkor et makatulong ed sikatayon niparaan so nonot tayo ed panselebra na Memoryal?

¹⁷ Say impangusisa tayo’d saray propesiya diad Isaias nipaakar ed Lingkor et sakey a maabig a bengatla pian niparaan so kanonotan tayo’d panselebra na Memoryal na impatey nen Kristo. Ontulong iya ed sikatayon ‘onnengneng ed si Jesus a [“Manunan Ahente,” NW] tan Manamayadyari na pananisia tayo.’ (Heb. 12:2) Naaralan tayon say Anak na Dios et aliwan rebelyoso. Aliwan singa si Satanas, say Anak na Dios et nanliketan toy paibangat ed si Jehova, a bibidbiren ton sikato so Soberanon Katawan. Naaralan tayo a legan na ministeryo nen Jesus diad dalin, impanengneng to so panangabagey ed saray totoo a pinulongan to, a tinatambal to so dakel ed sikara diad pisikal tan espiritual a sakit da. Diad impanggawa ed satan, impanengneng to no anto so gawaen to bilang Mesianikon Ari diad balon sistema na bengabengatla sano ‘ipasen to so inkatunong ed dalin.’ (Isa. 42:4) Say seseg ya impanengneng to ed panagpulong na Panarian bilang “silew na saray Gentil,” et sakey a panonot ed saray papatumbok to a kaukolan dan ipulong so maong a balita ed interon mundo tekep na seseg.​—Isa. 42:6.

18. Panon a say propesiya nen Isaias et mamano ed kapusoan tayo na pisasalamat ed si Jehova tan ed matoor a Lingkor to?

¹⁸ Say propesiya nen Isaias so mamaaralem met na pakatalos tayo ed baleg a sakripisyon ginawa nen Jehova sanen imbaki to so inad-aro ton Anak diad dalin pian manirap insan ompatey parad sikatayo. Aliketan si Jehova, aliwan diad impakanengneng ed paniirap na Anak to, noagta diad impakaimaton ed sigpot a katooran nen Jesus anggad ipapatey. Kaukolan a miliket itayo ed si Jehova, a bibidbiren ya amin a ginawa nen Jesus et amaneknek a matila si Satanas tan amasantos ed ngaran nen Jehova, a nanresulta’d kiyalangon To bilang makanepegan a Soberano. Kaaruman ni, inako nen Kristo iray kasalanan tan sikatoy inatey a kasandi tayo. Diad impanggawa to ed satan, nagmaliw a posible parad melag a pulok na alanaan iran agagi to tan ed arum a karnero a nawalaan na apatunong a talindeg ed imaton nen Jehova. Legan a mantitipon itayo parad Memoryal, napano komon na pisasalamat so puso tayo parad si Jehova tan ed matoor a Lingkor to.

Bilang Repaso

• Diad anton pantalos ya “apaliket” si Jehova sanen ‘apasireg’ so Anak to?

• Panon a si Jesus et “asugatsugat nisengeg ed saray impakasumlang tayo”?

• Panon a say Lingkor et ‘mamatunong ed dakel’?

• Panon a say impanaral ed propesiya nipaakar ed Lingkor et angiparaan ed nonot tan pusom parad panselebra na Memoryal?

[Tepetepet Parad Panagaral]

[Litrato ed pahina 26]

‘Sikatoy minudmora, tan agtayo pinabli’

[Litrato ed pahina 28]

“Inkalbo to so kamarerwa to angga ed patey”

[Litrato ed pahina 29]

Onaatendi iray ‘arum a karnero’ ed Memoryal bilang marespeton maniimaton