Abuloyan Yon Naimpluensyaan na Saray Salita nen Jesus so Awawey Yo
Abuloyan Yon Naimpluensyaan na Saray Salita nen Jesus so Awawey Yo
“Say imbaki Dios salitaen to so saray salita na Dios.”—JUAN 3:34.
1, 2. Anto so nayarin pangikomparaan ed saray salita nen Jesus diad Sermon ed Palandey, tan akin a nibaga tayon nibase itan ed “saray salita na Dios”?
SAY sakey ed saray sankabalgan a diamante natan et say Star of Africa, a 530-karat. Mabmabli iyan bato! Balet, mas mabmabli nen say satan iramay espiritual a kayamanan a naromog ed Sermon nen Jesus ed Palandey. Agla’ya pankelawan ta say Lapuan na saray salita nen Kristo et si Jehova! Oniay inkuan na Biblia nipaakar ed si Jesus: “Say imbaki Dios salitaen to so saray salita na Dios.”—Juan 3:34-36.
2 Anggaman nayarin kulang a kapalduay oras labat so karukey na sayan Sermon, 21 a danay itan ya angaon ed waloran libro na Hebreon Kasulatan. Kanian, polidon nibase itan ed “saray salita na Dios.” Nengnengen tayo pa natan no panon tayon niyaplika so pigara ed sarayan mabalobalor a salita ed alay dakep a sermon na inad-aron Anak na Dios.
“Mipulangan Ka nin Unona ed Agim”
3. Kayarin pinasakbayan nen Jesus iray babangatan to nipaakar ed epekto na sanok, antoy insimbawa to?
3 Bilang Kristiano, maliket tan mareen itayon totoo ta walaan tayoy masanton espiritu na Dios, a kabiangan ed saray bunga na satan so liket tan deen. (Gal. 5:22, 23) Aglabay nen Jesus a naandi ed saray babangatan to itan a deen tan liket, kanian pinasakbayan to ra’d saray makapatey ya epektoy panem-em na sanok. (Basaen so Mateo 5:21, 22.) Insan to inkuan: “Kanian no isasaklang mo so bagat mo ed altar, et nanonotan mod’man a say agim et walay bengatlan pamusolan to ed sika. Itilak mod’man so panangarom ed arap na altar, et onla ka, ta mipulangan ka nin unona ed agim, insan ka ed satan onla tan isaklang mo so panangarom.”—Mat. 5:23, 24.
4, 5. (a) Anto imay ‘panangaro’ a sinalambit nen Jesus ed Mateo 5:23, 24? (b) Panon kaimportante so pipulangan ed naopendin agi?
4 Say ‘panangaro’ a sinalambit nen Jesus et ontutukoy ed antokaman a bagat ya isasaklang ed templo diad Jerusalem. Alimbawa, importante iray bagat ya ayep ta kabiangan iratan nensaman ed panagdayew ya isasaklang ed si Jehova na saray totoo to. Balet, walay indanet nen Jesus a mas importante ni—say pipulangan ed naopendin agi antis a mangisaklang na panangaro ed Dios.
5 Say kabaliksan na ‘mipulangan ka ni ed agim’ et say ‘pikareenan.’ Anto sirin so naaralan tayo ed sayan salita nen Jesus? Seguradon labay ya ibaga na saya a say paraan na pidedeneng tayo ed arum et baleg so epekto to ed relasyon tayo’d si Jehova. (1 Juan 4:20) Peteg ya anggapoy kana na saray bagat ed Dios nensaman no samay mangiyaapay et aliway pidedeneng to ed kapara ton too.—Basaen so Miqueas 6:6-8.
Kaukolan so Inkamapaabeba
6, 7. Akin et kaukolan so inkamapaabeba sano mipupulangan itayo ed sakey a naopendin agi?
6 Nayarin manubok ed inkamapaabeba tayo so pipulangan tayo ed sakey a naopendin agi. Say toon mapaabeba et agmikolkol tan agmisupiatan ed agagi pian labat nilaban so isisipen ton kanepegan to. Manresulta itan ed tensyon, a singa ed samay agawa ed saray Kristiano ed Corinto nensaman. Nipaakar ed satan, oniay inkuan nen apostol Pablo a talagan pannonoten to itayo: “Peteg a mankabaliksan na sigpot a pakatalo yo no mandedemandaan so sakey tan sakey ed sikayo. Akin ya agyo la paulyanan a sikayo so panggawaan na lingo? Akin ya agyo la paulyanan a sikayo so nasaol?”—1 Cor. 6:7, NW.
7 Ag-ibabaga nen Jesus ya asinggeran tayoy agi tayo pian kombinsien a sikatayoy duga tan sikato so aliwa. Andi, say nepeg a gagala tayo et say pangipawil ed mareen a relasyon. Pian nagawaan tayo itan, nepeg a matua tayon ibalikas so nalilikna tayo. Kaukolan a bidbiren tayo met ya asakitay liknaan na pipupulangan tayo. Tan, no alingo tayo, seguradon labay tayoy mapaabeban onkerew na dispensa.
“No say Kawanan a Matam so Mangigagapol ed Sika”
8. Ibaga ed antikey iramay salita nen Jesus ed Mateo 5:29, 30.
8 Diad Sermon nen Jesus ed Palandey, walay inter ton alay-abig a simbawa nipaakar ed moralidad. Amta ton saray ag-ayadyarin kabiangan na laman et nayarin nawalaan na mapeligron impluensya ed sikatayo. Kanian oniay inkuan to: “Natan, no say kawanan a matam so mangigagapol ed sika, sukit mo tan ibantak mo itan. Ta magmaong ni a naandi so sakey a kabiangan na laman mo nen say nibuntok so interon laman mo ed Mat. 5:29, 30, NW.
Gehenna. Ontan met, no say kawanan a limam so mangigagapol ed sika, putot mo tan ibantak mo itan. Ta magmaong ni a naandi so sakey a kabiangan na laman mo nen say nibantak so interon laman mo ed Gehenna.”—9. Panon itayon ‘nigapol’ na ‘mata’ odino ‘lima’ tayo?
9 Say ‘mata’ a sinalambit dia nen Jesus et say abilidad a niteen so atension tayo ed sakey a bengatla, tan say ‘lima’ et ontutukoy ed no antoy panguusaran tayo’d saray lima tayo. No agtayo manalwar, ‘nigapol’ itayo na sarayan kabiangan na laman tan ontunda tayo lan ‘miulop ed Dios.’ (Gen. 5:22; 6:9) Sirin, no natutukso itayon ag-ontulok ed si Jehova, gawaen tayoy amin a paraan pian nalabanan itan, anggano singano panukit ed mata odino pamutot ed lima so kairap na satan.
10, 11. Anto so ontulong ed sikatayon napaliisan so seksual ya imoralidad?
10 Panon tayon naamper so mata tayo ya onnengneng ed imoral iran bengatla? Oniay inkuan na matakot ed Dios a Job: “Akisipanan ak ed saray matak: Panon sirin so inengneng ko ed sakey a birhen?” (Job 31:1) Si Job et sakey a de-asawan determinadon agmanumlang ed saray ganggan na Dios ed moral. Ontan met so nepeg ya awawey tayo, de-asawa itayo man odino andi. Pian napaliisan tayoy seksual ya imoralidad, nepeg a paigiya itayo ed masanton espiritu, a mamawala ed saramay mangaaro ed Dios na panagdangka.—Gal. 5:22-25.
11 Pian napaliisan tayoy seksual ya imoralidad, nayarin mas maabig no itepet tayo ed inkasikatayo, ‘Papaulyan ko kasi matak a mamaliing na pampilalek ed imoral iran materyal a maparungtal diad saray libro, telebisyon, odino Internet?’ Tandaan tayo met irayan salita nen babangatan a Santiago: “[Say] sinansakey a too natukso, no natangguyor tan naayat na kaibgan na laman to a dili. Et no say kaibgan na laman so nanlukon la yanak to so kasalanan, et no asabi to lay inkagnap to, say kasalanan yanak to so patey.” (Sant. 1:14, 15) Diad tua, anggan “onlimgis” labat so sakey a dedikadon lingkor na Dios ed agto kaparay sekso tekep na seksual a pilalek, kaukolan to lay manggawa na baleg a pananguman a mipara ed panukit na mata tan pangibantak ed satan.—Basaen so Mateo 5:27, 28.
12. Anton simbawa nen Pablo so ontulong ed sikatayon nalabanan iray imoral a pilalek?
12 Say agmatukoy a panangusar ed lima tayo et manresulta ed grabe iran isusumlang ed estandarte nen Jehova ed moral, kanian nepeg a mapekder so determinasyon tayon mansiansian malinis ed moral. Talinengen tayo sirin iyan simbawa nen Pablo: “Pateyen yo . . . so kabiangan yo a wadia ed tapew na dalin; panaglawan, inkarutak, kaalakan, mauges a getma, tan agum, say panagdayew ed talintao.” (Col. 3:5) Idadanet na salitan “pateyen” so panggawa na determinado iran aksion pian nalabanan iray imoral a pilpilalek na laman.
13, 14. Akin ya importante a paliisan tayoy imoral a panagnonot tan kagagawa?
13 Maseguron labayen na sakey a too a naputot lay lima to, no ipatey toy pamasiansia ed satan. Say piguratibon ‘pangibantak’ ed mata tan lima et importante pian napaliisan tayoy pannonot tan panggawa na imoral a nayarin pansengegay ipatey tayo ed espiritual. Say mogmon paraan pian naliktaran tayoy andi-anggaan a kadederal ya isisimbolo na Gehenna et say pansiansian malinis ed mental, moral, tan espiritual.
14 Lapud atawir tayon kasalanan tan ag-inkayadyari, kaukolan tayoy mansagpot pian makapansiansian malinis ed moral. “Noag ingen leweten ko so laman ko,” so kuan nen Pablo, “tan iyan ko ed silong na kaaripenan: ta agla piga no nagawa, no kayarik ya angipulong ed saray arum, siak a dili so nipulisay.” (1 Cor. 9:27) Komon ta determinado tayon mangiyaplika ed simbawa nen Jesus nipaakar ed moralidad, ya agtayo aabuloyan a makapanggawa itayoy bengatlan pakapatnagan na kaandiay apresasyon ed dondon bagat to.—Mat. 20:28; Heb. 6:4-6.
“Mangiter Kayo”
15, 16. (a) Panon ya angipanengneng si Jesus na ehemplo ed panangiter? (b) Anto so kabaliksan na saray salita nen Jesus ed Lucas 6:38?
15 Saray salita nen Jesus tan say sankaabigan 2 Corinto 8:9.) Mabulbulos a tinaynan nen Jesus so mangatatawen a gloria to pian magmaliw a too tan inter toy bilay to ed makasalanan a totoo, ya arum ed saratan et makagamor na kaykayamanan ed tawen bilang kakaiba ton mananawir na Panarian. (Roma 8:16, 17) Tan seguradon impaseseg nen Jesus so inkamabunlok sanen inkuan to:
ya ehemplo to et mamapaseseg ed pagmaliw a maiter. Impatnag toy agaylan inkamabunlok diad inyakar to’d dalin parad pankaabigan na imperpekton totoo. (Basaen so16 “Mangiter kayo, et naikdan kayo; sukat a maong, pinerper, aseksek tan manleplepwas, so iter da ed akwalan yo. Ta [say] sukat a pansukat yo, sikato met so pansukatan ed sikayo.” (Luc. 6:38) Say ‘pangiter ed akwalan’ et ontutukoy ed ugali na arum a managlako, a panoen day binalkesan a maawang a latop a kawes na saray sumasaliw, a pinasadyan napangkuyaboan. Say natural ya inkamabunlok tayo et nayarin manresulta ed pakaawat tayoy daakan, nayarin sano mankakkaukolan tayo.—Eccl. 11:2.
17. Panon ya angipanengneng si Jehova na sankaabigan ya ehemplo ed panangiter, tan anton klase na panangiter so mangitarok ed sikatayo na liket?
17 Aaroen tan tutumangan nen Jehova iramay maliket a mangiiter. Sikaton mismo et angipanengneng na sankaabigan ya ehemplo diad impangiter to’d bogbogtong ya Anak to “pian siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) Insulat nen Pablo: “Say mantanem na daakan, manani met na daakan. Balang sakey gawaen to komon so ginetma to ed puso to; aliwa a dia ed kaermenan odino dia ed pasootan; ta say Dios aroen to so sililiket a mangiter.” (2 Cor. 9:6, 7) Seguradon mangitarok ed sikatayo na liket tan daakan a tumang so pangiter tayoy panaon, biskeg, tan materyal a kaykayarian pian suportaan so tuan panagdayew.—Basaen so Uliran 19:17; Lucas 16:9.
“Agmo Papaknolen so Trumpeta ed Arap Mo”
18. Anto so magmaliw a rason na ‘agpanumang’ ed sikatayo na Ama tayon walad tawen?
18 “Paliisan so panggawa yoy inkatunong yo ed arap na totoo, pian nanengneng da kayo; ta no andi anggapoy tumang yo’d Ama yon wala ed tawen.” (Mat. 6:1) Say tutukoyen dia nen Jesus ya “inkatunong” et say konduktan mitunosan ed linawa na Dios. Agto ibabagan agtayo lan balot manggagawa na maridios iran gawa diad publiko, lapud binilin toray papatumbok to a “pasindagen [da] komon so silew [da] ed arap na saray totoo.” (Mat. 5:14-16) Ingen ta no gawaen tayo iratan “pian nanengneng” tan pandinayewan itayo, a singa tayo saray dramatistan walad entablado, “anggapoy tumang” tayo ed Ama tayon walad tawen. No ontan so motibo tayo, ag-itayo nawalaan na maapit a relasyon ed Dios odino agtayo nagamoran iray magnayon a bendisyon na uley na Panarian.
19, 20. (a) Anto so kabaliksan na samay pasakbay nen Jesus sumpad ‘pamaknol na trumpeta’ sano ‘mamayabol’? (b) Anto so kabaliksan na ag-ipapaamta ed kawigin lima so gagawaen na kawanan?
19 No duga so motibo tayo, tumboken tayo iyan bilin nen Jesus: “Kanian sano mamayabol ka, agmo papaknolen so trumpeta ed arap mo, a singa gawaen daray mansimpisimpitan dia ed saray sinagogas tan dia ed saray pulpulong, pian sikara so idayew na saray totoo. Tudtua ya kuan ko’d sikayo, Inawat da lay tumang da.” (Mat. 6:2) Say ‘payabol’ et ontutukoy ed saray donasyon parad saray mankaukolan. (Basaen so Isaias 58:6, 7.) Si Jesus tan saray apostol to et walaan na pundo a panulong ed saray mairap-bilay. (Juan 12:5-8; 13:29) Diad literal et talagan agmamaknol na trumpeta so sakey antis a mangiter na payabol, kanian mapatnag ya angusar si Jesus na hyperbole sanen inkuan ton agtayo “papaknolen so trumpeta” ed unaan tayo sano “mamayabol” itayo. Agtayo ibambando itan, a singa ginawa na saray Judion Fariseo. Tinawag ira nen Jesus a mansimpisimpitan ta ibabando ray pangiiter day payabol ‘diad saray sinagoga tan pulpulong.’ ‘Inawat la’ na sarayan mansimpisimpitan so “tumang da.” Say tumang da et angangga labat la’d pakagamor na dayew na too tan seguro et say pakayurong ed arapan, diad abay na bantog iran rabbi ed sinagoga, ta anggapo lay naawat da ed kinen Jehova. (Mat. 23:6) Panon balet so nepeg ya ikiwas na saray babangatan nen Kristo? Oniay inkuan nen Jesus ed sikara—tan ed sikatayo:
20 “Balet sika, sano mamayabol ka, agmo aabuloyan a naamtaan na kawigin limam so gagawaen na kawanan mo, pian saray payabol mo so magmaliw a maamot, tan diad ontan et sika so tumangan na Amam ya onnenengneng diad maamot.” (Mat. 6:3, 4, NW) Saray lima tayo et kaslakan lan saniban mankikimey. Kanian, say kabaliksan na ‘ag-ipapaamta ed kawigin lima so gagawaen na kawanan’ et agtayo la ipappaamta iray gagawaen tayon pananulong, anggan diad saramay totoon say kaapit da ed sikatayo et singa kaapit na kawigin lima ed kawanan a lima.
21. Anto so pigara’d saray itumang na say Personan “onnenengneng ed maamot”?
21 No agtayo ilas-lastog iray gagawaen tayon panangiter, maamot so ‘pamapayabol’ tayo. Sirin, tumangan itayo na Ama tayon “onnenengneng diad maamot.” Lapud say mangatatawen ya Ama tayo et walad tawen tan agtayo nanengneng, diad sikatayoran totoo et sikatoy “maamot.” (Juan 1:18) Say pangiyapit ed sikatayo nen Jehova ed inkasikato, pamerdona to ed saray kasalanan tayo, tan pangipagamor toy andi-anggaan a bilay so pigara’d saray itumang na sayan personan “onnenengneng diad maamot.” (Uli. 3:32; Juan 17:3; Efe. 1:7) Aminpigapiga nin mas maong iratan nen say pakaawat na pandinayew na totoo!
Mabalobalor Iran Salita a Nepeg a Pablien
22, 23. Akin a nepeg tayon pablien iray salita nen Jesus?
22 Petepeteg a say Sermon ed Palandey et napnoy espiritual iran ankablin bato a marakdakep ed anggan anton anggulo. Seguradon saray lugan na satan et makapangitarok ed sikatayo na liket anggano wala itayo’d mundon napnoy problema. On, magmaliw itayon maliket no pablien tayoray salita nen Jesus tan abuloyan tayo iratan a mangimpluensya ed awawey tan dalan na kabibilay tayo.
23 Amin a “makadngel” tan insan da “sumpalen” no antoy imbangat nen Jesus et nabendisyonan. (Basaen so Mateo 7:24, 25.) Kanian, komon ta determinado itayon mangiyaplika ed simbawa nen Jesus. Diad ontumbok ya artikulo et nasingbat so arum niran salita to diad Sermon ed Palandey.
Panoy Pangebat Mo?
• Akin et importantin mipulangan itayo ed naopendin agi?
• Antoy gawaen tayo pian ag-itayo nigapol na ‘kawanan a mata’ tayo?
• Anto so nepeg ya awawey tayo nipaakar ed panangiter?
[Tepetepet Parad Panagaral]
[Litrato ed pahina 11]
Talagan balibalin liknaan so ‘pakapipulangan’ ed naopendin agi!
[Saray litrato ed pahina 12, 13]
Bebendisyonan nen Jehova iramay maliket a mangiiter