Kasin Naiimpluensyaan na Saray Salita nen Jesus so Pikakasim?

“Sanen asumpal nen Jesus so sarayan salita dakel a katooan so nankelkelaw ed panagbanga’to.”​—MAT. 7:28.

1, 2. Akin et nikelawan iray totoo ed panagbangat nen Jesus?

SARAY salita na bogbogtong ya Anak na Dios a si Jesu-Kristo et nepeg tayon awaten tan iyaplika ed bilay tayo. Peteg ya anggapoy toon makapipara ed panagsalita to. On, nikelawan iray totoo ed paraan na impanbangat to diad Sermon ed Palandey!​—Basaen so Mateo 7:28, 29.

² Say impanbangat na Anak nen Jehova et aliwan singa saray eskriba, a say angibasiyan day andurukey a paliwawa ra et diad saray bangat na ag-ayadyarin totoo. Nambangat si Kristo a “singa sakey a walaay pakauley” lapud saray imbabaga to et nanlapud Dios. (Juan 12:50) Natan et nengnengen tayo no panon a say arum nin balikas nen Jesus diad Sermon ed Palandey et sarag ton impluensyaan tan nepeg ton impluensyaan iray pikakasi tayo.

Agbalot Aaligen so Panagpikasi na Saray Mansimpisimpitan

3. Anto so manunan ideya na imbaga nen Jesus a walad Mateo 6:5?

³ Say panagpikasi et importantin kabiangan na tuan panagdayew, tan kaukolan itayon regular a manpikasi ed kinen Jehova. Balet say pikakasi tayo et nepeg a naiimpluensyaan na saray balikas nen Jesus diad Sermon ed Palandey. Inkuan to: “Bangno mikasi kayo ag ki komon singa saray mansimpisimpitan; ta labalabay day manalagey a manpikasi dia ed saray sinagogas tan dia ed saray suysuyok na pulpulong, pian nanengneng ira na totoo. Tuatua a kuan ko ed sikayo, inawat da lay tumang da.”​—Mat. 6:5.

4-6. (a) Akin a labalabay na saray Fariseo so “manalagey a manpikasi dia ed saray sinagogas tan dia ed saray suysuyok na pulpulong”? (b) Akin a nibagan sarayan mansimpisimpitan et “inawat da lay tumang da”?

⁴ Sano manpipikasi iray babangatan nen Jesus, agda nepeg ya aligen iramay “mansimpisimpitan” a singa saray mantunongtunongan a Fariseo, a kunwarin debotado diad arap na totoo. (Mat. 23:13-32) Labalabay na saraman a mansimpisimpitan so “manalagey a manpikasi dia ed saray sinagogas tan dia ed saray suysuyok na pulpulong.” Akin? Pian “nanengneng ira na totoo.” Niyugali la na saray inmunan siglon Judio so manpikasi bilang kongregasyon legan na panaoy panangiyapay na bagat a popoolan diad templo (manga alas nuebe ed kabuasan tan alas tres ed ngarem). Dakel ed saray manaayam ed Jerusalem so manpipikasi diad sular na templo a kaibay arum ni ran managdayew. Diad paway na syudad, saray debotadon Judio so maslak a manpipikasin mamidua ed sanagew legan a ‘manal-alagey ed saray sinagoga.’​—Ikompara so Lucas 18:11, 13.

⁵ Lapud maslak ed saray totoo et anggapo’d sinagoga odino diad asingger ed templo no oras lay  pikakasi ra, nayari iran manpikasi inerman so kawalaan da ed saratan a bekta. Sano panaoy panagpikasi, ibabana na arum a wala ira’d “saray suysuyok na pulpulong.” Labalabay dan “nanengneng ira na totoo” ya ondadalan ed saratan a nansangaan. Sarayan debotadon mansimpisimpitan et “gawaen da a baraan so saray andurukey a pikakasi” pian nirayew ira na saray makakaimaton. (Luc. 20:47) Nepeg ya agtayo aligen itan.

⁶ Imbaga nen Jesus a sarayan mansimpisimpitan et “inawat da lay tumang da.” Ontan lay pampilalek dan naimano tan nirayew na totoo​—tan satan labat so naawat da. Satan lan amin so tumang da, ta ag-ebatan nen Jehova so agmasimoon a pikakasi ra. Diad biek a dapag, ebatan na Dios so pikakasi na saray tuan papatumbok nen Kristo, unong ya ipapanengneng na kaaruman nin balikas nen Jesus nipaakar ed saya.

7. Anto so kabaliksan na bilin a manpikasi ed “silir” tayo?

⁷ “Ingen sika, bangno mikasi ka, onloob ka ed silir mo, et no nikapot mo la so pintom, insan ka mikasi ed Amam a wala ed amot, et say Amam a wala ed amot tumangan to ka.” (Mat. 6:6) Say bilin nen Jesus a manpikasi ed silir kayari pangikapot na puerta et agmankabaliksan ya agla nayari mangidauloy pikakasi parad kongregasyon. Noagta, say kabaliksan to et ag-ipapaseseg iray pikakasi ed publiko a say akasentroay imano tan say nirarayew et samay manpipikasi. Nepeg tayo iyan tandaan sano napribilehyoan itayon mangidaulo na pikakasi parad saray totoo na Dios. Nepeg tayo met a tumboken iray kaaruman nin simbawa nen Jesus nipaakar ed pikakasi.

8. Unong ed Mateo 6:7, anton agmanepeg a paraan na panagpikasi so kaukolan tayon paliisan?

⁸ “Diad panagpikasi, agmo agamilen so andi-kakanaan a pangoli-oli na salita, a singa gawa na saray Gentiles lapud isisipen dan natalineng ira nisengeg ed dakel a panagsalita ra.” (Mat. 6:7) Diad saya et analambit si Jesus na sakey nin paraan na panagpikasi ya agmanepeg​—say pangulit-ulit. Aglabay ya ibaga nen Jesus ya agtayo lan balot nayarin uliten iray impapuson kerew tan balikas na pisasalamat sano manpipikasi tayo. Sanen walad hardin na Getsemani si Jesus diad samay labi sakbay na impatey to, aminpiga ton inulit so “saraman lanlamang a salita.”​—Mar. 14:32-39.

9, 10. Akin et nepeg tayon paliisay paulit-ulit a pangibaga ed saray bengatla sano manpipikasi?

⁹ Agtayo nepeg ya aligen so paulit-ulit a pikakasi na “saray Gentiles.” Uulit-uliten da iray memoryadon balikas a kalaktip toy dakel a salitan agmet la kaukolan. Saramay managdayew nen Baal et anggapoy agunggona ra diad intawag da ed sayan palson dios “manlapu ed kabuasan ni angga ed ngarem ya inkuan da, O Baal denglen mo kami.” (1 Ara. 18:26) Natan, minilyon so manpipikasi na andurukey tan paulit-ulit, ya abaloan dan “natalineng ira.” Balet ipapamoria ed sikatayo nen Jesus a say “dakel a panagsalita” tan paulit-ulit a pikakasi et anggapoy kakanaan to’d si Jehova. Onia ni inkuan nen Jesus:

¹⁰ “Agkayo komon sirin singa sikara; ta si Ama yo amta to ray antokaman a kaukolan yo, ed arapen a mankerew kayo ed sikato.” (Mat. 6:8) Dakel a Judion lider na relihyon so nagmaliw a singa saray Gentiles ya angusar na masoliwet iran salita sano manpipikasi. Say impapuson pikakasi a kalaktip toy panangidayew, pisasalamat, tan paney-ey et importantin kabiangan na tuan panagdayew. (Fil. 4:6) Ingen, lingo so paulit-ulit a pangibaga ed saray bengatla a singa laingen papapawayen a mililingwan so Dios. Sano manpipikasi itayo, tandaan a mitotongtong itayo ed Sakey a ‘makaamta no antoray kaukolan tayo’ sakbay tayo nin onkerew ed sikato.

11. Anto so nepeg a tandaan sano napribilehyoan itayon manpikasi ed publiko?

¹¹ Saray balikas nen Jesus nipaakar ed ag-aabobonan a pikakasi so nepeg a mangipanonot ed sikatayo ya agnaliliketan so Dios ed saray malabor tan masoliwet a salita. Kaukolan tayo met ya isipen a say pikakasi ed publiko et aliwan sakey a pankanawnawa pian pandinayewen iray dumerengel, odino ompan lapud karukey na pikakasi tayo et pitalaran da la so pangibaga tayoy “Amen.” Say pangiyanunsio odino say pamilin ed dumerengel sano manpipikasi et agmet mitunosan ed samay prinsipyo na Sermon ed Palandey ya imbalikas nen Jesus.

 Ibabangat Itayo nen Jesus No Panon so Pampikasi

12. Panon mon ipaliwawa so kaimportantian na kerew a “nagalang komon so ngaran mo”?

¹² Aglabat impaimano nen Jesus ya agnepeg ya usaren so baleg a pribilehyo a panagpikasi ed lingon paraan, noagta imbangat to met iray babangatan to no panon so pampikasi. (Basaen so Mateo 6:9-13.) Say modelon pikakasi et agnepeg ya ipatlep pian ulit-uliten ya ibalikas. Imbes, inter itan bilang pangaligan tayo’d mismon pikakasi tayo. Singa bilang, inyuna nen Jesus so Dios sanen ginapoan toy pikakasi to ed onia ran salita: “Ama min wala ka ed tawen, nagalang komon so ngaran mo.” (Mat. 6:9) Manepeg labat a tawagen tayo ya ‘Ama mi’ si Jehova ta sikato so Manamalsa tayo a manaayam ed “tawen,” ya arawrawin tuloy ed dalin. (Deu. 32:6; 2 Awa. 6:21; Gawa 17:24, 28) Ipapanonot ed sikatayo na terminon ‘mi’ a saray kapananisiaan tayo et walaan met na maapit a relasyon ed Dios. Say tutukoyen na kerew a “nagalang komon so ngaran mo” et onkiwas la komon si Jehova pian napagalangan, odino napasantos toy inkasikato, diad panlinis ed ngaran to ed amin a pakabalawan a nitarok ed satan manlapu la nen walaray nanrebelde ed Eden. Satan a pikakasi so ebatan nen Jehova diad pangekal to ed amin a karelmengan ed dalin, diad ontan et napasantos toy inkasikato.​—Eze. 36:23.

13. (a) Panon a nasumpal so kerew ya “onsabi komon so panarian mo”? (b) Anto so nalalanor ed pakagawa na linaway Dios diad dalin?

¹³ “Onsabi komon so panarian mo. Nagawa komon so linawam, unong ed tawen, ontan met ed dalin.” (Mat. 6:10) Nipaakar ed sayan kerew a walad modelon pikakasi, agtayo lilingwanan a say “panarian” et say Mesianikon gobierno ed tawen diad pananguley nen Kristo tan saray pinaolin “sasanto” a kakaiba to. (Dan. 7:13, 14, 18; Isa. 9:6, 7) No ipipikasi tayon “onsabi” komon so Panarian na Dios, kekerewen tayon onsabi komon itan sumpad amin a walad dalin ya onsusunggay ed uley na Dios. Magano lan nagawa itan. Insan kayari to, magmaliw lan paraiso so interon dalin tan niwala lay inkatunong, kareenan, tan inkaaligwas. (Sal. 72:1-15; Dan. 2:44; 2 Ped. 3:13) Say linawa nen Jehova et nagagawa la ed tawen, kanian diad pampikasin nagawa met komon itan ed dalin, kekerewen tayo a nagawa komon iray gagala na Dios ed planeta tayo, kalaktip lay pangekal ed saray onsusumpa ed sikato natan a singa ginawa to nensaman.​—Basaen so Salmo 83:1, 2, 13-18.

14. Akin a matukoy ya onkerew na ‘kanen ed sayan agew’?

¹⁴ “Say kanen min agew-agew iter mo’d sikami ed agew aya.” (Mat. 6:11; Luc. 11:3) No ontan so ipipikasi tayo, kekerewen tayo’d Dios ya iter to komoy nakaukolan tayon tagano ‘ed sayan agew.’ Saya et mangipapanengneng a manmamatalek itayo ed pakayari nen Jehova a mangasikaso ed saray pankaukolan tayo diad inagew-agew. Aliwa itan a pikakasi pian naikdan itayoy sobsobran probisyon. Imbes, nayarin sayan ikekerew tayo  parad inagew-agew a pankaukolan tayo et mangipapanonot ed samay ingganggan na Dios ed saray Israelita a mantipon ira na mana ‘diad inagew-agew ed sakey a tinandaan a karakel.’​—Exo. 16:4.

15. Ipaliwawa so kabaliksan na kerew a “perdonam iray utang mi a singa say impamerdona mi met ed saray akautang ed sikami.”

¹⁵ Say onsublay a kerew a walad modelon pikakasi so mangipapaimano ed sakey a bengatlan kaukolan tayon gawaen. Oniay inkuan nen Jesus: “Perdonam iray utang mi a singa say impamerdona mi met ed saray akautang ed sikami.” (Mat. 6:12) Unong ed ebanghelyo nen Lucas, sarayan “utang” et ontutukoy ed saray “kasalanan.” (Luc. 11:4) Nailaloan tayo labat so panamerdona nen Jehova no ‘aperdona’ tayo la iramay mankakasalanan ed sikatayo. (Basaen so Mateo 6:14, 15.) No ontan sirin, nepeg tayon mabulos a perdonaen so arum.​—Efe. 4:32; Col. 3:13.

16. Anto so kabaliksan na pikakasi nipaakar ed tukso tan pangilaban manlapud sakey a mauges?

¹⁶ “Agmo kami yabuloy ed tukso, ilaban mo kami ingen ed mauges.” (Mat. 6:13) Anto so kabaliksan na sayan duaran mankonektaan a kerew a walad modelon pikakasi nen Jesus? Sakey a bengatla so segurado: Ag-itayo tutuksoen nen Jehova a manggawa na kasalanan. (Basaen so Santiago 1:13.) Si Satanas, salanti, say sakey a “mauges,” so talagan “mananukso.” (Mat. 4:3) Anggaman ontan, walaray nabasa ed Biblia a singano gagawaen na Dios iray bengatla anta diad tua et iyaabuloy to labat iratan. (Rut 1:20, 21; Ecl. 11:5) Kanian, no ibagan “agmo kami yabuloy ed tukso,” kabaliksan to et ipipikasi tayo ya agkomon iyabuloy nen Jehova ya onsuko itayo sano natutukso tayon onsunggay. Kaunoran, say pikakasin “ilaban mo kami ingen ed [sakey a] mauges” et ontutukoy ed kerew ya agkomon abuloyan nen Jehova a nadaeg itayo nen Satanas. Tan makapanmatalek itayo ya ‘ag-itayo paulyan na Dios a natukso na onlabas ed nayarian tayo.’​—Basaen so 1 Corinto 10:13.

Itultuloy Yoy ‘Onkerew, Mananap, Ompatok’

17, 18. Anto so labay ya ibaga na mantultuloy ya ‘onkerew, mananap, tan ompatok’?

¹⁷ Pinaseseg nen apostol Pablo iray kapananisiaan to: “Mansiansia a malet ed pikakasi.” (Roma 12:12) Onia met so ingganggan nen Jesus sanen inkuan to: “Mankerew kayo, et naikdan kayo; mananap kayo, et makalmo kayo; ompatok kayo, et nalukasan ed sikayo. Ta siopaman a mankerew mangawat; tan say mananap makalmo; tan say ompatok nalukasan.” (Mat. 7:7, 8) Duga labat a mantultuloy itayon ‘onkerew’ na saray bengatlan mipakna ed linawa na Dios. Mitunosan ed saray salita nen Jesus, oniay insulat nen apostol Juan: “Saya so katalkan tayo ed [Dios], a no mankerew itayo na bengatla unong ed linawa to, sikato dengelen to itayo.”​—1 Juan 5:14.

¹⁸ Say simbawa nen Jesus a mantultuloy ya ‘onkerew tan mananap’ et mankabaliksan a nepeg a masimoon itayon manpikasi tan ag-onsusuko. Importante met ya itultuloy tayoy “ompatok” pian nalukasan ed sikatayo iray bendisyon, gunggona, tan tumang ya iter na Panarian. Balet, kasin makapanmatalek itayo ya ebatan na Dios iray pikakasi tayo? On, no matoor tayo ed si Jehova, lapud oniay inkuan nen Jesus: “Siopaman a mankerew mangawat; tan say mananap makalmo; tan say ompatok nalukasan.” Dakel lay eksperiensya na saray lingkor nen Jehova a mamapaneknek a say Dios so peteg a ‘Dumerengel na pikakasi.’​—Sal. 65:2.

19, 20. No nipaakar ed saray salita nen Jesus a naromog ed Mateo 7:9-11, anto so piparaan nen Jehova ed sakey a maaron ama?

¹⁹ Inyaliling nen Jesus so Dios ed sakey a maaron ama a mangitatarya na maabig iran bengatla parad ananak to. Isipen pan wadman ka ed Sermon  ed Palandey tan dengdengelen moy imbaga nen Jesus ya: “Siopa ta’n too so walad sikayo, a no onkerew so anak to ed sikato na sakey a tinapay, et ikdan toy bato. Odino no onkerew na sira, et ikdan toy sakey ya uleg? No sikayo sirin, anta mauges kayo, amta yoy mangiter na maong iran panangaro ed saray anak yo, agni ingen nagkalalo a mangiter na maong iran panangaro so Ama yo a walad tawen ed saray onkerew ed sikato?”​—Mat. 7:9-11.

²⁰ Anggaman say sakey ya aman too et ipapasen a “mauges” lapud atawir a kasalanan, sikatoy walaan na nisipor a panangaro ed ilalak to. Agto palikdoen so anak to noagta panseetan ton iter so “maong iran panangaro,” odino maong iran regalo. Lapud panangaro to bilang ama, say Ama tayon walad tawen so mangiiter na maong iran bengatla a singa say masanton espiritu to. (Luc. 11:13) Satan so mamabiskeg ed sikatayo a manlingkor diad paraan ya aabobonan nen Jehova, say Manangitarya na “amin a maong a palangkap tan amin ya ayadyarin palangkap.”​—Sant. 1:17.

Mantultuloy a Nagunggonaan ed Saray Salita nen Jesus

21, 22. Anto so makapadinayew ed Sermon ed Palandey, tan anto so epekto ed sika na sarayan salita nen Jesus?

²¹ Say Sermon ed Palandey et talagan sankaabigan a paliwawa a nidalatdat diad dalin. Pandinayewan itan lapud saray ibabangat to ed sikatayo nipaakar ed Dios tan say inkalinew to. Singa nipabitar ed saray punton apantongtongan ed sarayan serye na artikulo, nagunggonaan itayon maong no iyaplika tayo so simbawa a naromog ed satan a paliwawa. Sarayan salita nen Jesus et mamaaligwas ed kabibilay tayo natan tan mangiter na ilalo parad maliket ya arapen.

²² Diad sarayan artikulo, daiset ni labat so apantongtongan tayo nipaakar ed espiritual iran kayamanan a walad Sermon nen Jesus ed Palandey. Kampega lan saramay akadngel ed paliwawa to et “nankelkelaw ed panagbanga’to.” (Mat. 7:28) Seguradon ontan met so magmaliw a reaksion tayo sano panoen tayoy kanonotan tan kapusoan tayo na saraya tan arum nin mabmablin salita na Matalonggaring a Managbangat, si Jesu-Kristo.

Antoray Ebat Mo?

• Anto so imbaga nen Jesus nipaakar ed saray agmasimoon a pikakasi?

• Akin et agtayo nepeg ya ulit-uliten iray ibabaga tayo sano manpipikasi?

• Antoray kerew a walad modelon pikakasi nen Jesus?

• Panon itayon mantultuloy ya ‘onkerew, mananap, tan ompatok’?

[Tepetepet Parad Panagaral]

[Litrato ed pahina 15]

Kinondena nen Jesus iray mansimpisimpitan a nampikasi pian labat nanengneng tan narengel na arum

[Litrato ed pahina 17]

Antam ta no akin a matukoy so ikerew na kanen tayon inagew-agew?