No Panon a Mangitarok na Liket Iray Salita nen Jesus

“[Si Jesus] so tinmatdang ed palandey; tan . . . dinago na saray disipulo to; tan ginmapon nansalita pian bangatan ira.”​—MAT. 5:1, 2, NW.

1, 2. (a) Antoray kipapasen sanen inggapo nen Jesus imay Sermon ed Palandey? (b) Panon ya inggapo nen Jesus so paliwawa to?

SAY taon ed saman et 31 C.E. Intunda nen Jesus ya agano so panagpulong to diad Galilea pian manselebra na Paskua diad Jerusalem. (Juan 5:1) Kapawil to’d Galilea, sikatoy nampikasi a sanlabi ed Dios parad panangiwanwan diad pamili na 12 apostol. Diad tinmumbok ya agew, sakey a baleg ya ulop na totoo so nantitipon, legan a tatambalen nen Jesus iray mansasakit. Insan yinmurong si Jesus ed gilig na palandey, a kaiba iray babangatan to tan arum nin totoo, tan inggapo toran bangatan.​—Mat. 4:23–5:2; Luc. 6:12-19.

² Inggapo nen Jesus so paliwawa to​—say Sermon ed Palandey​—diad impangipaamta a say liket et resulta na pakawalaan na maabig a relasyon ed Dios. (Mateo 5:1-12) * Say liket et ‘sakey a maabig a kipapasen a saknapen toy manlapud liknaan ya inkakontento anggad pirmin gayaga.’ Ipapabitar na samay siameran likeliket ya insalaysay nen Jesus no akin a maliket iray Kristiano, tan saraya et peteg a makagunggona met ed sikatayo a singa nen imbaga nen Jesus iraya, ngalngali 2,000 taon lay apalabas. Konsideraen tayo natan so balang sakey ed saraya.

‘Saramay Manonot ed Espiritual a Pankaukolan Da’

3. Anto so kabaliksan na pagmaliw a manonot ed espiritual a pankaukolan tayo?

³ “Maliket iramay manonot ed espiritual a pankaukolan da, ta parad sikara so panarian na katawenan.” (Mat. 5:3) Namomoria na saramay “manonot ed espiritual a pankaukolan da” a kaukolan day panangigiya tan panangasi na Dios.

4, 5. (a) Akin a maliket iramay sinononot ed espiritual a pankaukolan da? (b) Panon a napenek so espiritual a pankaukolan tayo?

⁴ Maliket iramay manonot ed espiritual a pankaukolan da “ta parad sikara so panarian na katawenan.” Say impangawat ed si Jesus bilang Mesias et angiter na pankanawnawa ed saray disipulo nen Jesus a manuley a kaiba to ed mangatatawen a Panarian na Dios. (Luc. 22:28-30) Antokaman so ilalo tayo​—kaiba itayo man nen Jesus a manuley ed tawen odino manbilay na andi-anggaan diad paraison dalin diad silong na uley na Panarian, magmaliw itayon maliket no peteg a sinononot tayo ed saray espiritual a pankaukolan tayo.

⁵ Aliwan amin a totoo et sinononot ed espiritual a pankaukolan da, lapud dakel so totoon kulang na pananisia tan agda aapresyaen iray sagradon bengatla. (2 Tes. 3:1, 2; Heb. 12:16) Kalaktip ed saray paraan pian napenek so espiritual a pankaukolan tayo et say maseseg a panagaral na Biblia, makulin panaggawa na babangatan, tan regular ya iyaatendi ed saray Kristianon pantitipon.​—Mat. 28:19, 20; Heb. 10:23-25.

Saramay Maneermen a “Maliket”

6. Siopa “iramay maneermen,” tan akin a “maliket” ira?

⁶ “Maliket iramay maneermen, ta sikara so naligliwa.” (Mat. 5:4) Saramay “maneermen’ et sikara lanlamang “iramay manonot ed espiritual a pankaukolan da.” Ag-ira maneermen lapud manrereklamo ira ed kipapasen da’d bilay. Say paneermenan da et say mismon makasalanan a kipapasen da tan saray sirkumstansya a resulta na ag-inkayadyari na totoo. Akin a sarayan maneermen et “maliket”? Lapud walaan ira na pananisia  ed Dios tan ed si Kristo, tan naliligliwa ira’d pakawalaan da na maabig a relasyon ed si Jehova.​—Juan 3:36.

7. Anto so nepeg a panmoria tayo ed mundo nen Satanas?

⁷ Kasin paneermenan na balang sakey ed sikatayo so ag-inkatunong a kasmak ed sayan mundo nen Satanas? Anto so peteg a nalilikna tayo ed saray iyoopresi na sayan mundo? Insulat nen apostol Juan: “Amin a wala ed mundo, kilalawan na laman tan kilalawan na mata tan maapan gloria na bilay, aliwa a kien na Ama noag kien na mundo.” (1 Juan 2:16) Balet panon to no nalilikna tayon say panagdayew tayo ed si Jehova et kalkalna lan naimpluensiaan na “espiritu na mundo,” say puersan manodomina ed saray totoo a nisian ed Dios? Kaukolan a masimoon itayon manpikasi, manaral na Salita na Dios, tan onkerew na tulong ed saray mamatatken. Legan itayon mas onaapit ed si Jehova, makaromog itayo na “ligliwa,” antokaman so panlalapuan na gonigon tayo.​—1 Cor. 2:12; Sal 119:52, NW; Sant. 5:14, 15.

Talagan Maliket “Iray Mauyamo”!

8, 9. Anto so kabaliksan na pagmaliw a mauyamo, tan akin a sikaray maliket?

⁸ “Maliket iray mauyamo, ta sikara so manawir ed dalin.” (Mat. 5:5) Say “kauyamoan” odino inkaulimek et aliwan kakapuyan tan agmankabaliksan na pankunkunwarin matamoy. (1 Tim. 6:11) No mauyamo itayo, nipatnag tayoy inkaulimek diad panggawa na linawa nen Jehova tan pangawat na panangiwanwan to. Napatnagan met so kauyamoan tayo diad pidedeneng tayo ed saray kapananisiaan tan ed arum. No maulimek itayo, onkikiwas itayo a mitunosan ed samay simbawa nen apostol Pablo.​—Basaen so Roma 12:17-19.

⁹ Akin a maliket iray mauyamo? Lapud “ta sikara so manawir ed dalin,” kuan na mauyamon si Jesus. Sikato so manunan Tomatawir na dalin. (Sal. 2:8; Mat. 11:29; Heb. 2:8, 9) Anggaman ontan, saray mauyamo a “mitatawir ed Kristo” et minabang met ed tawir to a dalin. (Roma 8:16, 17) Diad mangaraldalin a sakop na Panarian nen Kristo, panggayagaan met na dakel a maulimek a totoo so maandon bilay.​—Sal. 37:10, 11.

10. Panon a say kakulangan na inkauyamo et mangapekta ed saray pribilehyo tayo tan ed relasyon tayo’d arum?

¹⁰ Kaukolan a magmaliw itayon mauyamo, a singa si Jesus. Balet panon to no walay tendensia tayon mikolkol? Say ontan ya agresibo tan aliwan makaaron ugali et pansengegay iyarawi na totoo ed sikatayo. No sakey itayon agin laki a mankaliktan ed saray responsabilidad ed kongregasyon, say pakawalaan na onian ugali et pansengegay agtayo pakakualipika. (1 Tim. 3:1, 3) Inkuan nen Pablo ed si Tito a mabetbet ton panonotan iray Kristiano ed Creta ya “ag-ira mikokolkol, maong komon so linawa ra, ya ipanengneng da so amin a kauyamoan ed saray amin a totoo.” (Tito 3:1, 2) Talagan bendisyon irayan mauyamo!

Naeerasan Ira Parad “Inkatunong”

11-13. (a) Anto so kabaliksan na pakaerasan tan pakapegaan parad inkatunong? (b) Panon iran “napenek”?

¹¹ “Maliket iramay naeerasan tan napepegaan parad inkatunong, ta napenek ira.” (Mat. 5:6) Say walad nonot nen Jesus ya “inkatunong” et say panggawa na duga, panamegley na itulok ed linawa tan ganggan na Dios. Inkuan na salmista a sikatoy “ombetag nipaakar ed pantintindek” to ed matunong a hudisyal a desisyon na Dios. (Sal. 119:20) Kasin papablien tayon maong so  inkatunong, a singa tayo naeerasan tan napepegaan diad pankaliktan ed satan?

¹² Inkuan nen Jesus a maliket iramay naeerasan tan napepegaan ed inkatunong lapud “napenek ira.” Agawa iya kayari na Pentecostes 33 C.E. sanen say masanton espiritu nen Jehova et ginmapon angiter ed mundo na makakombinsin ‘paliwawa nipaakar ed inkatunong.’ (Juan 16:8) Diad panamegley na masanton espiritu, pinuyanan na Dios iray totoo a manugyop ed saray Kristianon Griegon Kasulatan, a makagunggona parad “pakapanontonan a sikato so wala ed katunongan.” (2 Tim. 3:16) Say espiritu na Dios et ontutulong met ed sikatayon “ikawes . . . so too a balo, a sikato so pinalsay Dios ed loob na kaptekan tan matuan [“inkatunong,” NW].” (Efe. 4:24) Agkayo kasi naliliketan a naamtaan a saramay magbabawin onkekerew na perdona ed saray kasalanan da, panamegley na dondon bagat nen Jesus et nawalaan na maabig a talindeg ed imaton na Dios?​—Basaen so Roma 3:23, 24.

¹³ No mangaraldalin so ilalo tayo, say pakakaerasan tan pakakapgaan parad inkatunong et sigpot a napenek sano naawat tayoy andi-anggaan a bilay diad silong na matunong iran kipapasen diad dalin. Balet legan ya anggapo ni itan, magmaliw itayo komon a determinadon manbilay unong ed saray estandarte nen Jehova. Inkuan nen Jesus: “Anapen yo nin unona so panarian, tan say inkatunong [na Dios].” (Mat. 6:33) Say panggawa ed satan et mamano ed saray kalimaan tayo na maridios iran kimey tan mangiter na tuan liket.​—1 Cor. 15:58.

No Akin a Maliket “Iray Mapangasi”

14, 15. Panon tayon nipatnag so panangasi, tan akin a maliket iray “mapangasi”?

¹⁴ “Maliket iray mapangasi, ta nakasian ira.” (Mat. 5:7) Saray “mapangasi” et napapakiwas na nalilikna ran panangabagey ed arum. Inabagey nen Jesus iray dakel a totoo, kanian mamilagro ton pinaabig iray sakit a mamapairap ed sikara. (Mat. 14:14) Nipanengneng met so panangasi sano perdonaen na totoo iray nankasalanan ed sikara, a singa met ed mapangasin impamerdona nen Jehova ed saray nagbabawin managkasalanan. (Exo. 34:6, 7; Sal. 103:10) Nipanengneng tayo so panangasi diad panggawa na ontan, tan diad saray kimey a pakainawaan na saramay naiirapan. Say panginabang na katuaan ed arum et sakey met a maabig a paraan pian nipanengneng so panangasi. Lapud inabagey nen Jesus so dakel a katooan, “ginapoan to so nambangat ed sikara na amayamay a bengabengatla.”​—Mar. 6:34.

¹⁵ Talagan walaan itayo na rason pian miabobon ed saray balikas nen Jesus: “Maliket iray mapangasi, ta nakasian ira.” No tratoen tayo iray totoo ed mapangasin paraan, ontan met so pantrato ra ed sikatayo. Sano say Dios so mangusay la’d sikatayo, nayarin pilien ton agla ipaakseb so sakey ya ambelat a panangukom no angipanengneng itayo na panangasi ed arum. (Sant. 2:13) Say kaperdona  na saray kasalanan tan say andi-anggaan a bilay et para labat ed saray mapangasi.​—Mat. 6:15.

No Akin a Maliket Iray “Malinis so Puso Ra”

16. Anto so kabaliksan na pagmaliw a ‘malinis ed puso,’ tan panon a saramay walaan na ontan a puso et ‘makanengneng ed Dios’?

¹⁶ “Maliket iramay malinis so puso ra, ta nanengneng da so Dios.” (Mat. 5:8) No “malinis so puso” tayo, napatnagan itan ed pidedeneng tayo, diad saray pilalek tan motibo tayo. Ontan met, nipatnag tayoy “aro a nanlapu ed sakey a puso a malinis.” (1 Tim. 1:5) No malinis so inkatoo tayo, “nanengneng [tayo] so Dios.” Agkabaliksan na satan a literal tayon nanengneng so Dios, lapud anggapo so too a ‘makanengneng ed Dios tan manbilay.’ (Exo. 33:20) Ingen, lapud ta naspot ya impatnag nen Jesus so personalidad na Dios, sarag ton ibaga: “Say akanengneng ed siak anengneng to so Ama.” (Juan 14:7-9) Sikatayoran managdayew nen Jehova diad dalin et ‘makanengneng ed Dios’ diad pangobserba ed saray gagawaen to parad panmaongan tayo. (Job 42:5) No nipaakar ed saray alanaan a Kristiano, makasabi ed kapantokan so pakanengneng da ed Dios sano sikaray napaoli ed espiritu tan literal lan makanengneng ed mangatatawen ya Ama ra.​—1 Juan 3:2.

17. Anto so epekto ed sikatayo no malinis so puso tayo?

¹⁷ Lapud say malinis a puso et malinis met ed moral tan espiritual, agpilaleken na satan iray momoriaen nen Jehova a marutak. (1 Awa. 28:9; Isa. 52:11) No dalisay so puso tayo, saray balikas tan gawagawa tayo et malinis, tan anggapoy pansimpisimpitan ed panlilingkor tayo’d si Jehova.

Saray “Mareen” et Magmaliw ya Ananak na Dios

18, 19. Panon so ikikiwas na saramay “mareen”?

¹⁸ “Maliket iray mareen, ta natawag ira ya ‘ananak na Dios.’” (Mat. 5:9) Saray “mareen” et nabidbiran ed saray bengatla a gagawaen da tan agda gagawaen. No kabiangan tayo ed saramay totoo a walad isip nen Jesus, mareen itayo tan ‘agtayo itumang so mauges ed mauges.’ Imbes, lawas tayon ‘tumboken so maong, ya ipakana itan ed sakey tan sakey.’​—1 Tes. 5:15.

¹⁹ Samay Griegon salita a nipatalos bilang “mareen” diad Mateo 5:9 et literal a mankabaliksay “managpareen.” Pian nibilang itayon mareen, kaukolan ya aktibo itayon mangiyalibansa na kareenan. Saray managpareen et agmanggawa na antokaman a bengatlan pansengegay ‘pansian na saray manuna a sankaaro.’ (Uli. 16:28) Bilang kabiangan ed saray mareen, manggawa tayo na saray positibon kundang pian ‘natumbok tayo so kareenan ed amin a totoo.’​—Heb. 12:14.

20. Siopa iray “ananak na Dios” natan, tan siopa niray magmaliw ya ananak na Dios?

²⁰ Maliket iray mareen lapud “natawag ira ya ‘ananak na Dios.’” Saray matoor ya alanaan a Kristiano et tinagibi nen Jehova tan “ananak [ira] na Dios.” Walaan ira na maapit a relasyon ed si Jehova bilang ananak to lapud anisia ira ed si Kristo tan interon puso ran dadayewen so “Dios na aro tan kareenan.” (2 Cor. 13:11; Juan 1:12) Komusta met balet iray mareen ya ‘arum a karnero’ nen Jesus? Magmaliw ya “Andi-anggaan ya Ama” ra si Jesus legan na Sanlibon Taon ya Uley to, balet sano mangangga la itan, si Jesus et manpasakop la ed si Jehova tan magmaliw iran ananak na Dios.​—Juan 10:16; Isa. 9:6; Roma 8:21; 1 Cor. 15:27, 28.

21. Panon so kakikiwas tayo no manbibilay tayo “unong ed espiritu”?

²¹ No manbibilay itayo “unong ed espiritu,” sankaimano na totoo a kabiangan ed saray kalidad tayo so pagmaliw a mareen. Ag-tayo “pasanoken so sakey tan sakey,” odino “mansisibletan [ed] sakey tan sakey.” (Gal. 5:22-26) Imbes, “manayam [itayo] ed kareenan ed ganaganay totoo.”​—Roma 12:18.

 Maliket Anggaman Napapasegsegang!

22-24. (a) Antoray makasengeg no akin a maliket iramay napapasegsegang lapud inkatunong? (b) Anto so konsideraen tayo ed ontumbok a duaran artikulo?

²² “Maliket iramay napapasegsegang nisesengeg ed inkatunong, ta parad sikara so panarian na katawenan.” (Mat. 5:10) Pian palaknaben iya, inyarum nen Jesus: “Maliket kayo sano balbalawen tan papasegsegangen kayo na saray totoo tan papalsaan da kayo na amin a klase na mauges a bengatla nisengeg ed siak. Manliket kayo tan onlukso kayo ed gayaga, ta baleg so tumang yo diad katawenan, lapud ontan met so impamasegsegang da ed saray propeta ya akadkauna nen sikayo.”​—Mat. 5:11, 12.

²³ Singa met ed saray propeta na Dios nen saman, amta la na saray Kristiano a sikaray balawen, pasegsegangen, tan palsaan​—“nisesengeg ed inkatunong.” Balet no sungdoan tayo irayan subsubok, nawalaan itayo na liket lapud napapaliket tan nidadayew tayo si Jehova. (1 Ped. 2:19-21) Saray ir-irap et agmamawas na liket tayo diad panlilingkor ed si Jehova, natan odino anggan diad arapen. Agmet itan mamawas ed liket a tarok na panuley a kaiba nen Kristo ed mangatatawen a Panarian odino say liket ed pakagamor na andi-anggaan a bilay bilang kabiangan na mangaraldalin a sakop na satan a gobierno. Saray ontan a bendisyon et paneknek na panangabobon, kamaongan, tan inkamabunlok na Dios.

²⁴ Dakel ni so naaralan tayo ed Sermon ed Palandey. Walaray nanduruman leksion a naaralan ed ontumbok a duaran artikulo. Nengnengen tayo no panon a niyaplika iratan a salita nen Jesu-Kristo.

[Paimano ed leksab]

Panon Mon Ebatan?

• Akin a maliket “iramay manonot ed espiritual a pankaukolan da”?

• Antoray makasengeg no akin a maliket “iramay mauyamo”?

• Akin a maliket iray Kristiano anggaman napapasegsegang ira?

• Dinan ed saramay likeliket a sinalambit nen Jesus so anenyeg ed sika?

[Tepetepet Parad Panagaral]

[Litrato ed pahina 7]

Saray siameran likeliket ya impabitar nen Jesus et makagunggona ed sikatayo natan, a singa met nensaman

[Litrato ed pahina 8]

Say sakey a maabig a paraan pian nipanengneng so panangasi et diad panginabang tayo na katuaan manlapud Biblia