Ponpon na Kristiano​—Mapagalang, Simpli, tan Aabobonan na Dios

ANGGAN arawi ka ni et narengel mo la ray panugaog da. Walaray manurangal ya akasulong na nikaduman andeket a kawes, a dinmudukol la’d dalin lapud pankuyangyang da. Saray sumasayaw et babansagan day maksil a togtog. Arum balet et mangakan tan manliliket tekep na maksil ya elekan, a singa ra manpipiesta. Walaray nipapparukol ed dalin lapud abartek la ra’d sawaan a lambanog tan beer. Anto kasi okasyon? Diad arum a lugar, onia ra so kaslakan a gagawaen no panaoy ponpon, a nilasus so mandaragup pian manpatanir ed inatey.

Dakel ed saray Tasi nen Jehova so manaayam ed saray pasen a say kakakanayon tan kakaabay da et maanito tan matakot ed inatey. Papanisiaan na minilyon a sano ompatey so sakey a too, sikatoy magmaliw ya espiritu a walaay pakayarin ontulong odino mamasakit ed saray mabilay. Sayan sisisiaen et konektado ed dakel a kustombre nipaakar ed ponpon. Siempre, normal labat so panermen lapud impatey na inad-aro. Walaray panaon a si Jesus tan saray babangatan to et nanermen met ed impatey na pinabli ra’d bilay. (Juan 11:33-35, 38; Gawa 8:2; 9:39) Anggaman ontan, agdan balot impanengneng so sobran panag-ermen a kaslakan a nagagawa ed panaon da. (1 Tes. 4:13) Akin? Say sakey a rason et amta ray katuaan nipaakar ed ipapatey.

Oniay malinlinew ya ibabagay Biblia: “Saray mabilay amta ra a sikara ompatey ira; balet saray inaatey agda amta so bengatla . . . No panon so aro ra, ontan so gula ra tan siblet da, atawtaw ya abayag la . . . Anggapo so gawa, no kanonotan, no pakaamta, no kakabatan, dia ed Sheol [kaslakan a lubok na katooan], a laen mo.” (Ecl. 9:5, 6, 10) Ipapalinew na sarayan pinuyanan a teksto ed Biblia a sano ompatey so sakey a too, anggapo lay amta to. Agla makapannonot, makalikna, makapitongtong, odino makatalos na antokaman. Diad impakaamta ed sayan importantin katuaan ed Biblia, panon ton apektaen so paraan na kiyuksoy ed ponpon na saray Kristiano?

“Agyo Diwiten so Marutak”

Anggaman nandurumay rasa tan kulturan binalegan na saray Tasi nen Jehova, mapekder dan papaliisay antokaman a kustombren walay pikonektaan to’d sisisiaen a saray inatey et wala ni amta ra tan sarag dan impluensyaan iray mabilay. Saratan a kustombre a singa say selebrasyon kayari ponpon, anibersaryo na ponpon, panag-atang, tan relihyoson seremonya na saray balo, et marutak tan ag-aabobonan na Dios. Saratan et misiglaotan ed agmakasulatan tan demonikon bangat a say kamarerwa odino espiritu et ag-ompatey. (Eze. 18:4) Saray tuan Kristiano et agnayarin “minabang ed dulang na Katawan tan say dulang na saray demonyo,” kanian ag-ira mibibiang ed saratan a kustombre. (1 Cor. 10:21) Tutuloken da so ganggan ya: “Onsian kayo, . . . tan agyo diwiten so marutak.” (2 Cor. 6:17) Balet no maminsan, walay irap-irap na ipaliis ed saratan a kustombre.

Diad Aprika tan arum ni ran lugar, kasmak so panigsisia a no agtumboken iray kustombre, ombarong iray espiritun atateng. Ipapasen a baleg a kasalanan no agnagawaan iratan ta nasalot kuno odino namalas so komunidad. Lapud agpibibiang ed sarayan agmakasulatan a ritual ed ponpon, dakel ed saray totoo nen Jehova so babalawen, iinsultoen, tan ipupungit-pungit na kabaryoan tan kakanayon da. Say arum et aakusaen ya anggapoy pibabali ra’d kaparan too tan andiay respeto ed inatey. No maminsan, ipilit na agmananisian kakanayon a sikara lay mangasikaso ed ponpon na sakey  a Kristiano. Kanian, panon tayon napaliisay komprontasyon ed saramay mangipilit a tumboken tayo iray kustombre ed ponpon ya ag-aabobonan na Dios? Tan nagkalalo lan importante, anto so nagawaan tayo pian makapaliis ed antokaman ya agmalinis a seremonya tan kagagawa a nayarin maneral ed relasyon tayo’d si Jehova?

Ipaliwawam so Desisyon Mo

Diad arum a parte na mundo, akaugalian la a saray sankatatkenan a kakanayon et mibiang ed panagdesisyon ed panangiponpon ed inatey. Nepeg sirin ya ipasipor la na matoor a Kristiano a say mangorganisa tan mangasikaso ed ponpon et saray Tasi nen Jehova, a gawaen da itan base ed saray prinsipyo’d Biblia. (2 Cor. 6:14-16) Seguroen a saray gawaen ed ponpon et agmangonigon ed konsiensia na agagi odino agmakapangigapol ed arum a makaamta ed saray sisisiaen tan ibabangat tayo nipaakar ed ipapatey.

Sano say manangilaman na Kristianon kongregasyon et akerew a mangasikaso ed ponpon, saray aturon mamatatken et makapangiter na saray suhestion tan espiritual a tulong pian amin ya uksoyan et mitunosan ed Makasulatan iran totontonen. No walaray aliwan Tasi a malabay a mangiyarum na marutak iran kustombre, nepeg a mapekder tan makpel tayon ipaliwawa so talindeg tayo bilang Kristiano diad mauyamo tan marespeton paraan. (1 Ped. 3:15) Balet panon to no siansia nin ipilit na saray agmananisian kakanayon ya ipila iray agmalinis a ritual ed saray uksoyan? Sirin nayarin desidien na Kristianon pamilya ya ontaynan la ed satan a ponpon. (1 Cor. 10:20) Sano nagawa iya, sarag yoy mangiyuksoy na antikey a paliwawa diad Kingdom Hall odino diad arum a matukoy a pasen pian ninabang so “panamaligliwa na saray Sulsulat” ed saramay naermenan a maong ed impatey na inad-aro. (Roma 15:4) Anggano anggapo ditan so bangkay, satan et mapagalang tan talagan maabig ya uksoyan. (Deu. 34:5, 6, 8) Anggaman nayarin makapangarum na detdet tan ermen so pibabali na saray agmananisia, sikatayoy naligliwa ed pakaamtan say determinasyon tayon gawaen so duga et sankaimano na Dios, a sikatoy makapangiter ed sikatayo na “sankatageyan ya inkabaleg na pakayari.”​—2 Cor. 4:7.

Isulat Iray Labay Mo

Sano isulat na sakey iray labay ton uksoyan ed ponpon to, mas mainomay so mikatunongan ed saray aliwan Tasi a kapamilyaan, lapud seguradon respetoen da so kerew na inatey. Importantin isulat iray detalye no panon, no iner so pakagawaan na ponpon, tan no siopa labat so intalagan mangasikaso ed ponpon. (Gen. 50:5) Say sankaepektiboan, et no pirmado so dokumento tan walay akatasi. Saramay mangiplaplanoy arapen da tekep na aralem a pakatalos tan karunongan a base’d saray prinsipyo ed Biblia et amta ran agda la kaukolan ya alagden ya ontatken ni ran maong odino mansakit  ni grabe antis dan gawaen iyan kundang.​—Uli. 22:3; Ecl. 9:12.

Say arum et masuyat a manggaway nisulat iran instruksion. Anggaman ontan, say panggawa ed satan et pakapatnagan na inkatatken ed espiritual tan maaron panangiyansakit ed arum. (Fil. 2:4) Magmaong no personal lan asikasoen iyan pamaakaran, imbes a say manggawa ni ed satan et saray kapamilyaan a maneermen, a nayarin desdesen a mangawat ed saray marutak a kustombre ya agmet anggan anisiaan nisay inabobonan na samay inatey a kapamilya.

Pansiansiaen a Simpli so Ponpon

Diad dakel a lugar ed Aprika, niyugali la na karaklan a say ponpon et kaukolan a magarbo tan dakdakel a totooy presente pian agkuno onsanok so espiritun atateng. Arum et mangaanamot ed panaoy ponpon pian ‘nipangta’ so kipapasen da ed komunidad tan say inkaasenso ra. (1 Juan 2:16, NW) Manguusar ira na baleg a sagpot, panaon, tan kuarta pian niiter kuno ed inatey so “manepeg” a ponpon. Pian natangguyor so mas dakel nin onla’d ponpon, mangipepeket ira ed nanduruman lugar na angkakabaleg a poster a mankargay litrato na samay inatey, kanian nipapakabat itan ed publiko. Manggagawa ni ra na saray T-shirt a walay lupa na samay inatey tan ibubunog pian nisulong na saramay maneermen. Say pipilien dan lungon et samay madekorasyon tan ankabli pian pandinayewen iray makanengneng. Diad sakey a bansa ed Aprika, wala ni ra ingey manggagaway lungon a singa kotsi, eroplano, baloto, tan arum ni ran bengatla pian nipatnag so inkayaman, inka-engrande, tan inkamaluho ed bilay. Say gagawaen na arum et eekalen da’d lungon imay bangkay tan idedespley da diad adekoraan a dukolan. No bii so inatey et nayarin kawesan da na amputin trahe-de-boda tan ikdan day dakel ya alahas, dekorasyon, tan makapal a makeup. Matukoy kasi iratan a kagagawa parad saray lingkor na Dios?

Saray matatken ed espiritual a Kristiano et amta ran makabat so ipaliis ed ontan iran alablabas a seremonya na saray totoon ag-anggan mikabat tan mangibabaliwala’d prinsipyo na Biblia. Amta tayo a say alablabas tan agmakasulatan iran kustombre tan kagagawa et ‘ag-kien na Ama noag kien na mundo a mangangga.’ (1 Juan 2:15-17) Nakaukolan a manalwar tayon maong ta ompan natangguyor itayon mikompetensia, a piliten a daegen so arum. (Fil. 2:3)  Ipapanengneng na saray eksperiensya a sano say takot ed inatey et manunan kabiangan na kultura tan kabibilay na totoo, say ponpon et kaslakan a dudumogen na dakel a totoo tan mairap ya asikasoen, tan sirin et agla itan nakontrol. Lapud sobran panamabli ed inatey, napapakiwas laingen iray agmananisia a manggaway agmalinis a kondukta. Diad saratan a ponpon, nayarin walaray agmanunday panugaog da, walay onlakap ed bangkay, mitongtong ed inatey a singano mabilay ni, tan peketan da ni ingen na kuarta tan arum nin bengatla. No nagawa iraya ed ponpon na Kristiano, baleg a pakabalawan so nitarok ed ngaran nen Jehova tan ed totoo to.​—1 Ped. 1:14-16.

Say pakaamta ed peteg a kipapasen na inaatey et seguradon gawaen to itayon makpel pian nagawa so ponpon diad paraan ya agbalot mikonektaan ed minumundon kagagawa. (Efe. 4:17-19) Anggaman si Jesus et sankatalonggaringan tan sankaimportantian a toon nambilay, say impangiponpon ed sikato et simpli tan aliwan magarbo. (Juan 19:40-42) Parad saraman so walaan na “kanonotan nen Kristo,” mapagalang so ontan a simplin ponpon. (1 Cor. 2:16) On, say pamasiansian simpli ed saray ponpon na Kristiano et sankaabigan a paraan pian napaliisan so ibabagay Biblia a marutak iran kustombre tan namantini so kalmadon kaliberliber a mapagalang, marakep, tan matukoy parad saray mangaaro ed Dios.

Kaukolan Kasi Panliliket?

Kayari tulor, nayarin akaugalian na saray kakanayon, kakaabay, tan arum ni ra so manduroypo pian manselebra tan mansasayaw ed maksil a togtog. Sarayan selebrasyon ed ponpon et maslak a walay kaiba ton alabas a panag-inum na alak tan imoral iran kagagawa. Ikakatunongan na arum a say ontan a panliliket et makatulong pian naandi so ermen ed impatey na inad-aro. Say amta na arum et kabiangan labat iya na kultura da. Panisiaan na dakel balet a say ontan a maingal a panliliket et importantin ritual a kaukolan a gawaen pian napagalangan tan nidayew so inatey tan nibulos so kamarerwa to, diad ontan et makapiiba la ed saray inmuunan atateng to.

Amta na saray tuan Kristiano a makabat so Makasulatan a bilin ya: “Say sinagem sikato so magmaong nen panelek, ta ed panamegley na ermen na lupa say puso napaliket.” (Ecl. 7:3) Kaaruman ni, amta da iray gunggona’d panmorekdek ed kinatikey na bilay tan say ilalon kikioli. On, diad saraman so walaay maapit a relasyon ed si Jehova, ‘say agew na ipatey et magmaong nen say agew na kianak da.’ (Ecl. 7:1) Natan ta amta tayon say ontan a panliliket ed ponpon et misiglaotan ed espiritistikon sisisiaen tan imoral iran kagagawa, sirin et agmatukoy ed saray tuan Kristiano so pangorganisa odino anggan say iyatendi ed ontan iran selebrasyon. Say pilimog ed totoon labalabay day ontan iran panliliket et mangipatnag na agpanagrespeto ed Dios tan ed konsiensia na saray kaparan managdayew ed si Jehova.

Ipanengneng ed Arum so Pidumaan Tayo

Agaylay liket tayo ta nibulos itayo la’d takot ed inatey a kaslakan ed saray totoon walad espiritual a kabilungetan! (Juan 8:32) Bilang “anak na liwawa,” ipapanengneng tayoy ermen tayo diad paraan a sankapatnagan so katuaan ed sikatayo, salanti, diad paraan a masimpit, marespeto, tan kalmado lapud seguradon ilalo a kikioli. (Efe. 5:8; Juan 5:28, 29) Say ontan ya ilalo so mamuger ed sikatayo ed alablabas a panag-ermen a kaslakan ed saramay “anggapo so ilalo ra.” (1 Tes. 4:13) Mangiter itan ed sikatayo na pakpel a dapagay malinis a panagdayew, ya agpadadaeg ed takot ed too.​—1 Ped. 3:13, 14.

No matoor tayon tumboken iray prinsipyo na Biblia, saray totoo et ‘nibiig da so manlilingkor ed Dios tan say agmanlilingkor ed sikato.’ (Mal. 3:18) Nasabi panaon, naekal lay patey. (Apo. 21:4) Sirin, leleg tayon aalagden so kagawa na satan a balibalin sipan, komon ta naromogan nen Jehova a sikatayo et andi-mantsa, andi-matik, tan sigpot a biig ed marelmeng a mundo tan saray kagagawa na satan ya agmamapagalang ed Dios.​—2 Ped. 3:14.

[Litrato ed pahina 30]

Makabat so pangisulat ed saray labay tayo nipaakar ed panangiyuksoy na ponpon

[Litrato ed pahina 31]

Say Kristianon ponpon et nepeg a simpli tan mapagalang