Say Salita nen Jehova et Mabilay

Saray Pabitar ed Libro ya Apocalipsis​—II

ANTOY nagawa’d arapen ed saramay mandadayew ed si Jehova a Dios tan saramay agmandadayew ed sikato? Antoy pansumpalan nen Satanas tan saray demonyo to? Antoran bendisyon so nagamoran na saray matulok a katooan legan na Sanlibon Taon ya Uley nen Kristo? Say ebat ed saraya tan ed arum nin makanan tepet et imparungtal na Apocalipsis 13:1–22:21. * Karga na sarayan kapitulo so unor a 9 ed 16 a pasingawey ya inawat nen apostol Juan sanen magano lan manampot so inmunan siglo C.E.

“Mapalar so manbasa, tan saray ondengel ed sarayan salita na saya ya angipropetaan, tan unoren da so saray bengatlan wadman a nisulat,” so inkuan nen Juan. (Apo. 1:3; 22:7) Say pambasa tan pangiyaplika ed nanaaralan tayo ed libron Apocalipsis et makatulong ed sikatayon mantultuloy a manlingkor ed Dios, mamabiskeg na pananisia tayo ed Sikato tan ed Anak ton si Jesu-Kristo, tan mangiter ed sikatayo na masnag ya ilalo ed arapen. *​—Heb. 4:12.

INYIBUNG SO PITORAN KOPA NA SANOK NA DIOS

(Apo. 13:1–16:21)

“Sinmanok so saray nasyon,” so ibabaga na Apocalipsis 11:18, “tan say sanok [na Dios] sinmabi la, tan say panaon . . . pian bagbagen [to] so saray mamagbag ed dalin.” Pian naamtaan tayo no akin a sinmabi so sanok na Dios, ibabaga na komawalon pasingawey no antoy gagawaen na “ayep . . . a wala so samplora a saklor to tan pitoran ulo to.”​—Apo. 13:1.

Diad komasiam a pasingawey, anengneng nen Juan so “Kordero [a] manal-alagey ed tapew na palandey na Sion” tan kaiba toy “sanlasus apataplo tan apat a libo.” Saraya et ‘asaliw manlapud saray totoo.’ (Apo. 14:1, 4) Tinumbokan itan na saray panangiyabawag na saray anghel. Diad tinmumbok a pasingawey, anengneng nen Juan so “pitora ya anghel a wala ed sikara so saray pitora a bakbak.” Mapatnag ya imbakin mismo nen Jehova irayan anghel pian iyibung so “pitora a kopa na sanok na Dios” diad nanduruman elemento na mundo nen Satanas. Karga na sarayan kopa iray panangiyabawag tan pasakbay nipaakar ed panangukom ya idapo na Dios. (Apo. 15:1; 16:1) Sayan duaran pasingawey so mangidedetalye ed kaaruman niran panangukom na Panarian a misiglaotan ed komatlon ey-ey tan ed pangipaknol na komapiton trumpeta.​—Apo. 11:14, 15.

Makasulatan Iran Tepet a Naebatan:

13:8​—Anto so “libro na bilay na Kordero”? Piguratibo iyan libro a say karga to labat et kangaranan na kakaiba nen Jesu-Kristo a manuley ed mangatatawen a Panarian to. Akasulat met dia so kangaranan na saray alanaan a Kristianon wadia ni’d dalin, a walaan na ilalon manbilay diad tawen.

13:11-13​—Panon ya onkikiwas a singa dragon tan mamapaakseb na apoy ed tawen so atap ya ayep a walaan na duaran saklor? Say katuaan a say atap ya ayep a duaray saklor to​—say Anglo-Amerikanon Pakapanyari ed Mundo​—et mansasalitan singa dragon so mangipapanengneng ya uusaren toy panamagyaw, pananesdes, tan karawalan pian ipaskar ton awaten na totoo so pananguley to. Singa met iya mamapaakseb na apoy manlapud tawen lapud ipapasen toy inkasikaton singa propeta, diad pangibabaga ton tinalo to laray mauges a puersa diad duaran guerra mundial na koma-20 siglo, pati say Komunismo.

 16:17​—Anto so “dagem” ya angikalboan na komapiton kopa? Say “dagem” et isisimbolo toy satanikon kanonotan, say “espiritu [inklinasyon na nonot] a natan manggawa ed saray anak na kasusumpa.” Sayan makasamal a dagem et susungapen na interon mauges a sistema nen Satanas.​—Efe. 2:2.

Saray Leksion Parad Sikatayo:

13:1-4, 18. “Say [atap ya] ayep” et mangisisimbolo ed saray gobierno na totoo a sinmakbit manlapud “dayat,” salanti, manlapud magulon katooan. (Isa. 17:12, 13; Dan. 7:2-8, 17) Sayan ayep, a pinawala tan pinabiskeg nen Satanas et walaay numeron 666, a mangidadanet ed inka-imperpekto na saya. Say pakatalos nipaakar ed sayan ayep et ontulong ed sikatayon agtumboken odino agdayewen iya, anggaman ontan so gagawaen na karaklan a totoo.​—Juan 12:31; 15:19.

13:16, 17. Anggaman nayarin dakel so nasasagmak tayon irap diad panggagaway inagew-agew a kimkimey, a singa say ‘pansaliw odino panlako,’ agtayo aabuloyan a nadesdes itayon pauleyan ed atap ya ayep. No awaten tayoy ‘tanda na ayep ed lima tayo odino diad moling tayo,’ aliling toy aabuloyan tayo so atap ya ayep a mangontrol ed kakikiwas tan mangimpluensya’d panagnonot tayo.

14:6, 7. Say inyabawag na anghel et mangibabangat ed sikatayo a nepeg tayon apuraan ya ipulong so maong a balita na niletneg lan Panarian na Dios. Nepeg tayon tulongan iramay iyaaralan tayo na Biblia ya ontakot ed si Jehova, tan mangigloria ed Sikato.

14:14-20. Sano asumpal lay panagtipon ed saray “aanien na dalin,” salanti, say panagani ed saray nisalba, panaon la pian ibantak ed “baleg a darapilan na alak na sanok na Dios,” so atipon ya “ubas na dalin.” Satan ya ubas​—say nanengneng a mauges a gobierno nen Satanas a manguuley ed katooan, kaiba la iray “bogel” na mauges a bunga​—et deralen la’d andi-anggaan. Determinado itayo sirin ya agpaimpluensyaan ed sayan na ubas na dalin.

16:13-16. Isisimbolo na “espiritu a marutak [“marutak ya impuyan iran balikas,” NW]” so denedemonyon propaganda a denesinyo pian seguroen a saray arari na dalin et agnaimpluensyaan ed pangikalboy pitoran kopa na sanok na Dios, imbes et sikaray nimaneobran onsumpa ed si Jehova.​—Mat. 24:42, 44.

16:21. Legan a manasingger so anggaan na sayan mundo, say panangiyabawag ed panangukom nen Jehova sumpad mauges a sistema nen Satanas et nayarin mangilanor ed insalita iran ambelat a panangukom na Dios, a niyaliling ed kinmigtel a danum. Balet, siansia nin say maslak ed katooan et mantultuloy ya agmamagalang ed Dios.

MANUULEY LAY MANANALON ARI

(Apo. 17:1–22:21)

“Say Babilonia a Baleg,” say sankamundoan ya empiryo na palson relihyon, et makapadimlan kabiangan na mauges a mundo nen Satanas. Diad koma-11 a pasingawey, sikatoy nilitrato bilang “baleg a balangkantis”​—sakey ya imoral a bii​—ya “akayurong ed tapew na sakey ya ayep ya ambalanga.” Sikatoy sigpot a deralen na “samploran saklor” na mismon atap ya ayep ya akaluganan to. (Apo. 17:1, 3, 5, 16) Say onsublay a pasingawey et mangiyaabawag ed kadederal na sayan “baleg a syudad” a niyaliling ed balangkantis, tan ibabaga met na saya ed saray totoo na Dios ya apuraen day ‘ompaway ed sikato.’ Say inkagba na sayan baleg a syudad et nandageyeman na dakel. Balet, wala so panliliket ed tawen, lapud “bansal na Kordero.” (Apo. 18:4, 9, 10, 15-19; 19:7) Diad koma-13 a pasingawey, say akalugan ed “kabayo ya amputi” et mibakal ed saray nasyon. Panganggaen toy mauges a mundo nen Satanas.​—Apo. 19:11-16.

Anto balet so nagawa ed “uleg a daan, a sikato so Diablo tan Satanas”? Kapigan so kibantak to ed “dayat na apoy”? Satan so sakey ed saray tema na koma-14 a pasingawey. (Apo. 20:2, 10) Impasimar na unor a duaran pasingawey so panagbilay legan na Milenyo. Diad pansamposampot na sayan “puyan,” anengneng nen Juan so ‘danum na ilog ya onaagus ed pegley na lansangan,’ tan sakey a marakdakep ya imbitasyon so iiter ed ‘siopaman a napgaan.’​—Apo. 1:1; 22:1, 2, 17.

 Makasulatan Iran Tepet a Naebatan:

17:16; 18:9, 10​—Akin a “saray arari na dalin” et nanermen ed inkaderal na Babilonia a Baleg, anta sikara lanlamang so aneral? Sikaray maneermen lapud inkamakasarili ra. Kayarin aderal so Babilonian Baleg, amoria na saray arari na dalin no panon kaimportante ed sikara so palson relihyon. Ginawa na Babilonia a Baleg a singa duga so panamairap a ginawgawa na sarayan arari. Tinmulong met itan ed pamaseseg ed saray tobonbalo pian mibakal. Nagkalalo la, sikatoy mausa-usar ed sikara pian napansiansian mapasakop so totoo.

19:12​—Akin a si Jesus lambengat so makapikabat ed ag-abitlan ngaran to? Sayan ngaran et ompatnag a mangirerepresenta’d posisyon odino pribilehyo nen Jesus, unong a nideskribe ed Isaias 9:6, a panggayagaan to legan na agew na Katawan. Anggapoy makapikabat ed satan a ngaran nilikud ed si Jesus lapud ta nikadkaduma iray pribilehyo to, tan sikato lambengat so makarandan ed no antoy kabaliksan na pamemben ed ontan ya atagey a posisyon. Anggaman ontan, inabang nen Jesus so pigara’d sarayan pribilehyo diad saray indibidual a manitibukel ed nobya to, kanian singa ‘akasulat ed sikara itan a balon ngaran to.’​—Apo. 3:12.

19:14​—Sioparay kaiba nen Jesus a mibakal no Armagedon? Kabiangan ed ‘saray ehersito ed tawen’ a miiba ed si Jesus diad bakal na Dios iray anghel ontan met ed saray alanaan ya akaawat lay mangatatawen a tumang.​—Mat. 25:31, 32; Apo. 2:26, 27.

20:11-15​—Sioparan kangaranan so nisulat ed “libro na bilay”? Karga na sayan libro so amin a kangaranan na saramay makaawat na andi-anggaan a bilay​—saray alanaan a Kristiano, saray kabiangan na baleg ya ulop, tan saramay matoor a lingkor a makaeksperiensya na “kioli ed bilay na saray matunong.” (Gawa 24:15; Apo. 2:10; 7:9) No nipaakar ed saramay ‘paolien ya agmatunong,’ say kangaranan da et nisulat ed “libro na bilay” no onkiwas ira unong ed saray totontonen a “nisulat ed saray libro” a nalukasan legan na Milenyo. Balet, say kangaranan da et agni permanentin nisulat. Say kangaranan na saray alanaan et magmaliw labat a permanentin akasulat no napaneknekan dan matoor ira anggad patey. (Apo. 3:5) Say kangaranan na saramay natumangan na bilay diad dalin et magmaliw a permanentin akasulat sano nalampasan day unor a subok diad sampot na sanlibon taon.​—Apo. 20:7, 8.

Saray Leksion Parad Sikatayo:

17:3, 5, 7, 16. ‘Say kakabatan a nanlapu ed tagey’ so ontutulong ed sikatayon natalosan so “misteryo na saya a bii, tan say [kolor eskarlata ya] ayep ya angitarok ed sikato.” (Sant. 3:17) Sayan simbolikon atap ya ayep et ginmapo bilang Liga na Nasyones insan diad saginonor et niletneg lamet bilang Nasyones Unidas. Agta say impakatalos ed sayan misteryo so mamakiwas ed sikatayon manseseg ed panangipulong na maong a balita na Panarian tan ed panangiproklama na agew na panangukom nen Jehova?

21:1-6. Segsegurado itayon saray impasakbay a bendisyon ed uley na Panarian et ontua. Akin? Lapud nipaakar ed saraya, oniay nibaga: “Agawa la.”

22:1, 17. Irerepresenta na “ilog na danum na bilay” so probisyon nen Jehova pian naagwat so matulok a katooan manlapud kasalanan tan patey. Wala la natan so naalan kabiangan na sayan danum. Agtayo labat sirin pisalamatan ya awaten so imbitasyon ya ondago tan “mangala ed danum na bilay ya andi-bayar” noagta malikeliket tayo met ya inabang iya ed saray arum!

[Saray paimano ed leksab]

[Litrato ed pahina 5]

Agaylan makapakelkelaw iran bendisyon so awaten na matulok a katooan diad uley na Panarian!