Manalerto Kayo
Manalerto Kayo
“Say anggaan na ganaganay bengatla manasingger. . . . Pampelengan yo so pikakasi.”—1 PED. 4:7.
1. Anto so tema na bangat nen Jesus?
SANEN wadia si Jesu-Kristo ed dalin, say tema na bangat to et say Panarian na Dios. Diad panamegley na satan a Panarian, benditoen nen Jehova so sankatalbaan ya inkasoberano to tan pasantosen to so ngaran to. Kanian, imbangat nen Jesus iray papatumbok to a manpikasi ed Dios: “Onsabi komon so panarian mo. Nagawa komon so linawam, unong ed tawen, ontan met ed dalin.” (Mat. 4:17; 6:9, 10) Maganggano lan panganggaen na satan a Panarian so sistema nen Satanas, tan seguroen na satan a nasumpal so linawa na Dios diad interon dalin. Unong ya impropesiya nen Daniel, sayan Panarian na Dios et “buybuyaken to naani tan upoten to naani so saraya ya amin a panarian [ed panaon tayo], et sikato so mansiansia lawas.”—Dan. 2:44.
2. (a) Panon a naamtaan na saray papatumbok nen Jesus a sikatoy manuuley la? (b) Anto ni so arum ya ipapabitar na tanda?
2 Lapud say isabi na Panarian na Dios et importantin maong ed saray papatumbok nen Jesus, sikatoy tinepetan da: “Anto kasi so tanda ed isabim tan say anggaan [na sistema] na mundo?” (Mat. 24:3) Lapud say panuley nen Kristo ed Panarian diad tawen et agnanengneng na saramay wadiad dalin, walaray niiter a nanengneng a tanda. Satan a tanda et tugyopen na nanduruman aspekto a nipasakbay la’d Kasulatan. Lapud satan, natebek na saray papatumbok nen Jesus a mabilay ed satan a panaon a sikatoy ginmapo lan manuuley ed tawen. Gapoan met itan na peryodo na panaon a tatawagen na Biblia a “saray kaunoran ya agew” na mauges a sistema na bengabengatla a manodomina natan ed dalin.—2 Tim. 3:1-5, 13; Mat. 24:7-14.
Pampelengay Manbantay ed Sarayan Kaunoran ya Agew
3. Akin et kaukolan a mapeleng a manbantay iray Kristiano?
3 Oniay insulat nen apostol Pedro: “Say anggaan na ganaganay bengatla manasingger. Mandangka kayo sirin, tan pampelengan yo so pikakasi.” (1 Ped. 4:7) Kaukolan a mapeleng a manbantay iray babangatan nen Jesus ed saray nagagawa ed mundo a pakapatnagay inggapo to lan manuley bilang ari. Tan say pagmaliw dan alerto et lalon kakkaukolan legan a manasingger so anggaan na sayan marelmeng a sistema na bengabengatla. Imbaga nen Jesus ed saray papatumbok to: “Manpuyat kayo sirin; ta agyo amta no kapigan so isabi na katawan na abung [pian ipaakseb so panangukom ed mundo nen Satanas].”—Mar. 13:35, 36.
4. Salambit yo pa so pandumaan ed panmoria na saray totoo a kabiangan na sistema nen Satanas tan saray lingkor nen Jehova. (Ilaktip so kahon.)
4 Maslak ed saray totoo et walad kontrol nen Satanas, tan agda im-imanoen so kabaliksan na saray nagagawa ed mundo natan. Agda natetebek a manuuley la si Kristo ed Panarian. Balet ta maniimano iray tuan babangatan nen Kristo tan natetebek day peteg a kabaliksan na saray agawgawa’d apalabas a siglo. Manlapu la nen 1925, amoria na saray Tasi nen Jehova a say Guerra Mundial I tan saray ebento ya agawa kayari na satan et mabiskeg a paneknek a si Kristo et ginmapo lan manuuley ed tawen nen 1914. Kanian, ginmapo la so kaunoran iran agew na sayan mauges a sistema a walad pakayari nen Satanas. Dakel a maobserban totoo, anggaman agmikabat ed kabaliksan na saray nagagawa et nibiig day baleg a pandumaan na saray panaon sakbay na Guerra Mundial I, tan kayari na satan.—Nengnengen so kahon a “Ginmapo Lay Panaon na Gotgotan.”
5. Akin et kakkaukolan a mansiansia itayon alerto?
5 Diad inlabas na ngalngali sakey a siglo, saray makapataktakot ya ebento diad interon mundo et mamapaneknek a manbibilay itayo la’d kaunoran iran agew. Antiktikey lan maong so nakekeran panaon sakbay ya iganggan nen Jehova si Kristo a mangidaulo ed saray makapanyarin anghelikon puersa a maneral ed mundo nen Satanas. (Apo. 19:11-21) Lapud saya, niganggan iray tuan Kristiano a mansiansian alerto. Kaukolan a maganat tayon itultuloy a gawaen itan, legan tayon tatalaranan so anggaan na sayan sistema. (Mat. 24:42) Nepeg a mansiansia itayon manimano. Tan diad panangidaulo nen Kristo, kaukolan tayon sumpalen so sakey ya espisipikon kimey diad interon mundo.
Sankamundoan a Kimey
6, 7. Panon ya onaaligwas so panagpulong na Panarian legan na sarayan kaunoran ya agew?
6 Say kimey a kaukolan a gawaen na saray lingkor nen Jehova et impasakbay bilang kabiangan na tanda a pakapatnagan a manbibilay itayo la’d saray kaunoran ya agew na sayan marelmeng a sistema na bengabengatla. Deneskribe nen Jesus iyan sankamundoan a kimey sanen insalaysay to iray nanduruman nagawa ed panaon na anggaan. Kabiangan ed propesiya to irayan makabkabaliksan a salita: “Saya ya ebanghelyo na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi anggaan.”—Mat. 24:14.
7 Nonoten pa so pigara ed saray katuaan a mikonektaan ed satan a detalye na propesiya nen Jesus. Dagdaiset labat so bilang na saramay mangiyaabawag na maong a balita sanen ginmapo so kaunoran iran agew nen 1914. Balet natan et agaylay indaak da. Masulok lan 7,000,000 a Tasi nen Jehova so manpupulong ed interon mundo, a naorganisa ed masulok a 100,000 a kongregasyon. Tan wala so kaaruman a 10,000,000 a totoo ya akidagup ed saray Tasi nen Jehova nen 2008, legan dan seselebraan so Memoryal na impatey nen Kristo. Satan et makatantandan indaak na saray inmatendi no ikompara nen imbeneg a taon.
8. Akin et agnapatunda na isusumpa so iyaaligwas na panagpulong a kimey?
8 Talagan baleg a pantasi nipaakar ed Panarian na Dios so nagagawa ed sankamundoan sakbay ya onsabi so anggaan na sayan sistema! Tan nagagawa iya anggaman si Satanas so “dios na sayan [sistema].” (2 Cor. 4:4) Amin a politikal, komersyal, tan relihyoson elemento na sayan mundo, pati saray uusaren dan pangipasabi na impormasyon et iimpluensyaan nen Satanas. Anto sirin so rason ed makapakelaw ya itatalona na panagtasin kimey? Lapu itan ed suporta nen Jehova. Kanian, say panagpulong nipaakar ed Panarian et makapadinayew tan makapakelaw a mantutultuloy anggaman mansasagpot si Satanas a patundaen itan.
9. Akin a say iyaaligwas ed espiritual et atawag a milagro?
9 Say iyaaligwas na panagpulong na Panarian tan say idarakel na totoo nen Jehova, ontan met ed idaraak na pikakabat da ed Dios tan ed gagala to et adeskribe bilang sakey a milagro. No anggapo so suporta na Dios, laktip lay panangiwanwan tan proteksion to ed saray totoo to, agnagawa so panagpulong a kimey. (Basaen so Mateo 19:26.) Makaseguro itayo a lapud ikikiwas na masanton espiritu na Dios ed kapusoan na saray alerton totoo a lawas akaparaan a manlingkor, matalonan nasumpal iyan panagpulong a kimey, insan la “onsabi so anggaan.” Satan et asingsingger lan nagawa.
“Baleg ya Irap”
10. Panon a deniskribe nen Jesus so onsasabin baleg ya irap?
10 Onsabi so anggaan na sayan mauges a sistema diad “baleg ya irap.” (Apo. 7:14) Ag-ibabaga na Biblia no panon iya kabayag, balet oniay inkuan nen Jesus: “Ta wala naani baleg ya irap ed satan, ya anggapo so ontan a nanlapud gapo na mundo ya angga ed natan, anggapo, anggapo la naani.” (Mat. 24:21) No ikompara tayo so irap ya asagmak la na mundo, singa samay agawa nen Guerra Mundial II a manga 50 anggad 60 milyon ya inatey, talagan mas teribli so nagawa ed onsabin baleg ya irap. Nagawa so kapantokan na satan ed Armagedon, sano ibaki la nen Jehova so makapanyarin puersa to pian deralen so amin a nakekeran kabiangan na sistema nen Satanas diad dalin.—Apo. 16:14, 16.
11, 12. Anto so nagawa bilang tanda na igapo na baleg ya irap?
11 Say propesiya ed Biblia et ag-angiter na espisipikon petsa no kapigan onggapo so unonan kabiangan na baleg ya irap. Ingen, sinalambit toy nikadkaduman ebento a tanda na igapo na satan. Satan ya ebento et say kadederal na amin a palson relihyon panamegley na saray politikal a pakayari. Diad saramay propesiya ed Biblia a naromog ed Apocalipsis kapitulo 17 tan 18, niyaliling so palson relihyon ed sakey a balangkantis ya akikalugoran ed mapolitikan sistema na mundo. Nabasa tayo’d Apocalipsis 17:16 a magano lan onsabi panaon a sarayan mapolitikan sistema na mundo et “busolen da so balangkantis, tan sikato so gawaen da a maermen tan labos-lakseb, tan kanen da so laman to, tan sikato so lablabasen dan poolan ed apoy.”
12 Sano nagawa la itan, ‘iyan na Dios ed kapusoan da [saray manuley] so panggawa ed kaliktan to’ pian deralen so amin a palson relihyon. (Apo. 17:17) Kanian, nibaga tayon say Dios so panlapuan na sayan kadederal. Panangukom to itan ed saray mansimpisimpitan a relihyon ya abayag lan mangibabangat na saray doktrina a misunian ed gagala na Dios tan mamapairap ed saray lingkor to. Ag-iilaloan na dakel a totoo so manasingger a kadederal na palson relihyon. Balet, iilaloan itan na saray matoor a lingkor nen Jehova, tan legan na sayan kaunoran iran agew, ipupulong da so nipaakar ed satan.
13. Anto so mangipapanengneng a say kaderal na palson relihyon et mapmaples a nagawa?
13 Talagan nabigbigIa iray totoo sano nanengneng day kaderal na palson relihyon. Onia so sinalambit na propesiya na Biblia ya ibaga na saray arum ya “arari ed dalin” nipaakar ed satan a kadederal: “Kasi la, kasi la . . . ta dia ed saksakey oras sinmabi so kaukom mo!” (Apo. 18:9, 10, 16, 19) Say impangusar na Biblia ed salitan “saksakey oras” so mankabaliksan a sayan ebento et mapmaples a nagawa.
14. Panon ya onkiwas si Jehova sano atakien la na saray kakabusol iray lingkor to?
14 Amta tayo a pigaran panaon kayari kaderal na palson relihyon, onggapo so panangataki ed saray lingkor nen Jehova, a mangipupulong ed saray mensahe na panangukom. (Eze. 38:14-16) Sano nagawa la itan, saray onaataki et kaukolan a mangarap ed si Jehova, ya angisipan a protektaan to iray matoor a totoo to. Inyabawag nen Jehova: “Dia ed imon ko tan dia ed apoy na sanok ko sinalitak, . . . et naamtaan da ak naani a siak si Jehova.” (Basaen so Ezequiel 38:18-23.) Diad Biblia et nabasa tayon inkuan na Dios a “say maniwit ed sikayo [saray matoor a lingkor to] diwiten [da] so bukel na mata to.” (Zac. 2:8) Kanian, sano igapo la na saray kakabusol so sankamundoan a panangataki ed saray lingkor na Dios, onkiwas si Jehova. Satan so mamaarap ed unor a kabiangan na baleg ya irap, salanti, diad Armagedon. Diad silong na panangidaulo nen Kristo, ipaakseb na saray makapanyarin anghelikon puersa so panangukom nen Jehova sumpad sistema nen Satanas.
No Anto so Epekto ed Sikatayo
15. Anto so epekto ed sikatayo na impakaamtan say anggaan na sayan sistema et asingger la?
15 Anto so epekto ed sikatayo na impakaamtan asingsingger lay isabi na anggaan na sayan mauges a sistema? Insulat nen apostol Pedro: “Diad inengneng a saraya ya amin a bengatla naderal ira naani, anton nengneng na inkatoo so nepeg yon pagmaliwan ed amin a masantos a panagbilay tan kasimpitan”! (2 Ped. 3:11) Idadanet na sarayan salita a kaukolan tayo so manimanon maong pian naseguron say kondukta tayo et mitunosan ed saray kakaukolanen na Dios, tan kalaktip ed panagbilay tayo iray kimey a mangipapatnag na maridios a debosyon tan panangaro ed si Jehova. Kabiangan ed satan a kimey so panggawa na anggaay nayarian tayo ya ipulong so maong a balita na Panarian sakbay ya onsabi so anggaan. Inyarum ni nen Pedro: “Say anggaan na ganaganay bengatla manasingger. . . . Pampelengan yo so pikakasi.” (1 Ped. 4:7) Onapit itayo ed si Jehova tan nipanengneng tayoy panangaro ed sikato panamegley na mabetbet a pampikasi, a kerewen ed sikatoy panangiwanwan to panamegley na masanton espiritu tan say sankamundoan a kongregasyon to.
16. Akin a kaukolan a maap-apit tayon tuloken iray simbawa na Dios?
16 Diad sarayan maatap a panaon, kaukolan a maap-apit tayon tuloken iyan simbawa ed Salita na Dios: “Nengneng yo sirin a tinekepan na panlikas no panon so panaakar yo, aliwan singa andi kalakal, noag ingen singa makalakal. Ya anamoten yo so panaon, ta saray agew sikara so mauges.” (Efe. 5:15, 16) Mas lalon kasmak so kaugsan ed sayan panaon tayo nen say nensaman. Manggagawa si Satanas na dakel a bengatla pian patundaen odino abalaen iray totoo ed panggawa na linawa nen Jehova. Bilang lingkor na Dios, amta tayo la iraya, tan agtayo iyabuloy so anggan antokaman a mamakapuy ed katooran tayo ed Dios. Amta tayo met no anto so asingsingger lan nagawa, tan manmamatalek itayo ed si Jehova tan ed saray gagala to.—Basaen so 1 Juan 2:15-17.
17. Deskribe yo pa so reaksion na saramay makaliktar ed Armagedon sano onggapo la so kioli.
17 Nagawan-nagawa so alay dakep a sipan na Dios a bilayen lamet iray inaatey la, lapud “wala naani kioli ed bilay na saray matunong tan agmatunong.” (Gawa 24:15) Imano yo pa no panon kadanet itan a sipan: “Wala naani kioli ed bilay”! Agtayon balot itan panduaruwaan lapud si Jehova a mismo so angisipan ed satan! Oniay ibabaga na Isaias 26:19: “Saray inatey mo ombilay ira. . . . Liing tan mankanta kayo, sikayo a manayam dia ed dabok. . . . Say dalin ipaway da naani so saray inatey.” Sarayan salita et inmunan asumpal sanen akapawil iray totoo na Dios nensaman diad dalin na saray atateng da. Saya so mangiiter ed sikatayo na talek ed literal a pakasumpal na satan a sipan diad balon mundo. Talagan niwala so baleg a liket sano makapiulop lamet iray apaoli ed saray inadaro ra! On, say anggaan na mundo nen Satanas et asingger la, tan say balon mundo na Dios et maganggano la. Talagan kakkaukolan tayo sirin so mansiansian alerto!
Kasin Nanonotan Mo?
• Anto so tema na bangat nen Jesus?
• Diad panaon tayo, panon lan kalaknab so panagpulong na Panarian?
• Akin et kakkaukolan a manalerto itayo?
• Panon kayon apaseseg na samay sipan a walad Gawa 24:15?
[Tepetepet Parad Panagaral]
[Kahon/Litrato ed pahina 16, 17]
Ginmapo Lay Panaon Na Gotgotan
The Age of Turbulence: Adventures in a New World so paulo na libro nen Alan Greenspan a nipalapag nen 2007. Diad loob na ngalngali 20 taon, sikato so tsirman na Federal Reserve Board diad Estados Unidos, a mangiimaton ed amin a sistema na panagbangko ed satan a bansa. Indanet to so makatantandan pandumaan na situasyon na mundo sakbay na 1914 tan kayari na satan:
“Unong ed saray report nensaman, sakbay na 1914 et maabig so pidedeneng na saray totoo tan saray bansa ed balang sakey tan onaaligwas so kultura tan teknolohiya ra, a singa nadampot day inkaperpekto. Anampot met nen koma-19 a siglo so kagulgulan panaglako ed saray aripen. Singa kalkalnan nababawasan met so makapabaing a karawalan. . . . Diad satan a siglo et mapmaples so indaak na saray imbension ed interon mundo, niwala iray riles, telepono, elektrisidad, panag-siniyan, luluganan, tan nanduruman de-koryentin kagawaan ed abung. Dinmukey met so bilay na totoo lapud inyaligwas na saray panagtambal, mas maabig iran nutrisyon, tan anggan say malaknab a panagbunog na saray malinis a danum . . . Iilaloan na amin ya agmangangga iyan iyaaligwas.”
Balet . . . “Anggaman mas dakel a bilay so atigway nen Guerra Mundial II, mas makapasinagem so Guerra Mundial I ed saray totoo tan saray bansa. . . . Agko nalingwanan iramay panaon sakbay na Guerra Mundial I, sanen ompatnag a mapmaples tan agmangangga so iyaaligwas na katooan. Balet natan, say panmoria tayo et anguman lan maong no ikompara’d samay apalabas a siglo, ingen ta mas realistiko. Diad sayan panaon ya onaaligwas lay bilay lapud globalisasyon, kasin say makapatalagnaw iran bengatla, ipepetang na globo, tan pakana na saray aktibista so sengegan a naulit lamet imay Guerra Mundial I nensaman? Agtayo segurado ed ebat.”
Nanonotan ni nen Greenspan a sanen sikatoy maneeskuela, inkuan na propesor to ed Economics a si Benjamin M. Anderson (1886-1949): “Il-iliwen na saramay nagnap lay pakatalos tan panagnonot da sakbay na Guerra Mundial I iramay panaon antis na satan. Talagan agnaparaan so kareenan a wala ed saman a panaon.”—Economics and the Public Welfare.
Mipadpara met itan ed konklusyon na libron A World Undone, nen G. J. Meyer, a nipalapag nen 2006. Oniay nabasa tayo: “Ibabaga ran saray makatantandan inkagawa so ‘akapanguman ed amin a bengatla.’ Peteg ya agawa iya ed samay Baleg a Bakal [1914-1918]. Talagan inuman na satan a bakal so amin a bengatla: aliwa labat lan saray ketegan, gobierno, pansumpalan na saray bansa, noagta pati say panmoria na totoo ed inkasikara tan ed mundo. Nagmaliw itan a singa lungaw ed panaon, tan amawala itan na agmaligen a mundo a midumaan a maong ed samay akauna ed satan.”
[Litrato ed pahina 18]
Diad Armagedon, ibaki nen Jehova iray makapanyarin anghelikon puersa to