Napatnagan ed Saray Palsa so Kakabatan nen Jehova

“Saray agnanengneng a kalidad to . . . natebek ira ed saray bengatlan ginawa.”​—ROMA 1:20, NW.

1. Antoy epekto na kakabatan na mundo ed dakel a totoo natan?

DAKEL so agmakaamta ed peteg a kabaliksan na pagmaliw a “makabat.” Walaray mangibabagan makabat lay sakey no dakel so amta to. Balet, saray ipapasen na mundo a makabat et agmakapangiter na napanmatalkan iran giya a pakagamoray peteg a kabaliksan na bilay. Saramay papaimpluensyaan ingen ed sikara et ‘nipapalirpalir dia tan diman tan nitektekkiab ed antokaman a dagem na bangat.’​—Efe. 4:14.

2, 3. (a) Akin a si Jehova so “saksakey a Dios a makabat”? (b) Panon a miduma so kakabatan na Dios ed kakabatan na mundo?

² Talagan nidumaduma balet so kipapasen na saramay akagamor na tuan kakabatan a say Lapuan to et si Jehova a Dios! Ibabaga na Biblia a si Jehova so “saksakey a Dios a makabat.” (Roma 16:27) Kabat to so amin a nipaakar ed palsa, no panon iratan a ginawa tan linmesa. Anggan saray kasiporan a ley ed palsa a pandedependian na totoo ed panre-research da et denisinyon amin nen Jehova. Kanian, agmakapadinayew ed sikato iray imbension na too, tan agmet nasasagyat ed saray dederlengen a pilosopiya ra. On, “say karunongan na sayan mundo kakulangkulangan ed Dios.”​—1 Cor. 3:19.

³ Ibabaga na Biblia a si Jehova et “mangiter na kakabatan” ed saray lingkor to. (Uli. 2:6) Aliwan singa saray pilosopiyay too, say kakabatan a manlalapud Dios et aliwan makilot. Imbes, mabitabitar ed satan so dugan panagkatunongan tan akabase ed suston pikakabat tan pakatalos. (Basaen so Santiago 3:17.) Nandinayewan nen apostol Pablo so kakabatan nen Jehova. Inkuan to: “O say kaaralman na kayamanan na kakabatan tan pakaamta na Dios! Agaylan agnausisa [so] kanonotan to, tan agnatebek ira a dalan to!” (Roma 11:33) Lapud si Jehova so sankakabatan, matalek tayon igigiya itayo na saray ganggan to ed sankaabigan a paraan na panagbilay. Lautla ta anggapo met lan talagay arum a mas makapikabat ed nakaukolan tayo pian magmaliw a maliket.​—Uli. 3:5, 6.

Si Jesus​—Say “Uloen a Komikimey”

4. Anto so sakey a paraan pian naaralan tayo so nipaakar ed kakabatan nen Jehova?

⁴ Say kakabatan nen Jehova, tan say arum niran agnaparaan a kalidad to et napatnagan ed saray bengatlan ginawa to. (Basaen so Roma 1:20.) Manlapud sankabalgan anggad sankamelagan a palsa et nipaparungtal so personalidad to. Inerman a lingawan tayo, diad tawen man o diad dalin, dakel so nanengneng tayon ebidensya na Manamalsan sankakabatan tan maad-aro. Dakel so naaralan tayo nipaakar ed sikato diad panmorekdek ed saray pinalsa to.​—Sal. 19:1; Isa. 40:26.

5, 6. (a) Siopay kaiba nen Jehova sanen pinalsa to so amin a bengatla? (b) Anto so pantongtongan tayo, tan akin?

⁵ Agbukbukor nen Jehova sanen “pinalsa to so saray tawen tan say dalin.” (Gen. 1:1) Ipapabitar na Biblia ya abayag ni antis na impamalsa to ed uniberso, walay pinalsa ton espiritun persona a diad panamegley na satan et apawala so “amin a bengatla.” Sayan espiritun persona et say bogbogtong ya anak na Dios, salanti, say “panguloan ed amin a pinalsa,” a diad saginonor et linma’d dalin bilang si Jesus. (Col. 1:15-17) Singa si Jehova, si Jesus et walaan met na kakabatan. Diad tua, diad kapitulo 8 na Uliran,  sikatoy indeskribe bilang ayadyarin ehemplo na kakabatan. Si Jesus so tinukoy met na satan a kapitulo bilang say “uloen a komikimey” na Dios.​—Uli. 8:12, 22-31.

⁶ Sirin, iparungtal na saray pinalsa so kakabatan nen Jehova tan say Uloen a Komikimey, si Jesus. Dakel so makanakanan leksion a naaralan tayo ed saraya. Pantongtongan tayo pa so apatiran alimbawa na pinalsan adeskribe a “mapalalo a makabat” diad Uliran 30:24-28. *

Makaaral Tayo ed Inkakuli na Gilata

7, 8. Antoran detalye nipaakar ed gilata so nandinayewan mo?

⁷ No aralen tayo so inkadesinyo tan kimkimey na anggan saramay “melag ed tapew na dalin,” walay naala tayon leksion. Alimbawa, imanoen pa so nisipor a karunongan na gilata.​—Basaen so Uliran 30:24, 25.

⁸ Manisia so arum a manag-research a saray gilata et mas dakel na 200,000 a danay nen saray totoo. Amin da et makulikulin mantratrabaho diad dalem na dalin. Naorganisa iraya diad saray kolonya, a diad kaslakan et walaan na taloran klase na gilata: say reyna, lalakin gilata, tan say komikimey. Balang sakey ed saraya et mitutulongan pian napawala iray pankaukolan na kolonya ra. Walay sakey a klase na gilata diad Abalaten ya Amerika a tatawagen a “gilatan managputot na bulong,” a nayarin tawagen a marundunong a hardinero. Aabonoan, iyaalis-alis, tan babawas-bawasan na sayan melmelag ya insekto iray apatubo ton fungus pian ondakel ni anien to. Nalmoan met na saray researcher a sayan maabilidad a “hardinero” et itutukoy-tukoy toy sagpot to depende ed karakel na taganon kaukolan na kolonya. *

9, 10. Panon tayon naalig so inkakuli na saray gilata?

⁹ Makaaral tayo ed saray gilata. Ibabangat dan kaukolan itayon mankuli no labay tayon nagamoran iray maabig a resulta. Ibabaga na Biblia: “Onla ka ed gilata, sika a mangiras; isipen mo so saray dalan to, tan onkabat ka. Sikato ya andian na manunaan, manag-imaton, odino makauley. Itadia to so tinapay to ed tiagew, tan tiponen to so kanen to ed panagani.” (Uli. 6:6-8) Si Jehova tan say Uloen a Komikimey to a si Jesus et parehon makuli. “Si Amak mankikimey ni angga ed natan,” so kuan nen Jesus, “tan siak mankimey ak.”​—Juan 5:17.

¹⁰ Kanian bilang umaalig na Dios tan Kristo, nepeg a makuli itayo met. Antokaman so asainmin tayo ed organisasyon na Dios, kaukolan tayon amin a ‘padaaken so kimey tayo ed Katawan.’ (1 Cor. 15:58) Sirin, nepeg tayon tuloken imay bilin nen Pablo ed saray Kristiano diad Roma: “Aleg so mangiras ed saray kimey. Marlang ed espiritu. Panlingkoran so Katawan.” (Roma 12:11) Aliwan andi-kana iray pansasagpot tayon gawaey linawa nen Jehova, ta oniay ipapaseguro na Biblia ed sikatayo: “Say Dios aliwan  agmatunong pian nalingwanan to so gawa yo tan say aro ya impanengneng yo ed ngaran to.”​—Heb. 6:10.

Protektaan so Relasyon Tayo ed Dios

11. Deskribien pa so ayep a rock badger.

¹¹ Say rock badger (NW, balet nipatalos a “koneho” diad PBS) et sananey nin melag a pinalsa a pakaaralan tayoy makanakanan leksion. (Basaen so Uliran 30:26.) Kapadpara na saya so baleg a koneho, balet ta say layag to et melag tan malimpek, tan antikey iray sali to. Diad mabato iran pasen so pakaromogan ed saya. Say makdem a pakanengneng to, tan saray abot tan letak ed mabaton ayaman to, so onkakanan proteksion to ed saray managsibar. Pian manbilay, adesinyo iraya a mansisimpok, ya onkakana met a salimbeng da tan ontutulong ed sikaran agnaketel no panaoy yelo. *

12, 13. Antoray naaralan tayo ed rock badger?

¹² Antoy naaralan tayo ed rock badger? Unona, imanoen ya agpapaulyan na sayan ayep so inkasikaton niparungtal ed peligro. Imbes, uusaren toy makdem a pakanengneng to pian nanengneng to laray managsibar anggan arawi nira. Tan agmet onaarawi ed saray abot tan letak a sarag ton batikan pian nasalimbengan. Mipadpara, kaukolan met a makdem so espiritual a pakanengneng tayo pian natebek tayoray kaatapan ed mundo nen Satanas. Oniay insimbawa nen apostol Pedro ed saray Kristiano: “Mandangka kayo, manbantay kayo, ta say kabusol yo, say Diablo wala ed kaliberliber yo a singa omoang a leon a mananap na buagen to.” (1 Ped. 5:8) Si Jesus, sanen wadiad dalin et nansiansian alerto ed amin ya impanali nen Satanas a buyaken so integridad To. (Mat. 4:1-11) Maabig so inter ton ehemplo ed saray papatumbok to!

¹³ Say sakey a paraan pian magmaliw itayon alerto et diad panganamot ed saray probisyon nen Jehova a manalimbeng ed espiritualidad tayo. Nepeg ya agtayo papaulyanan so panagaral na Salitay Dios tan pipiaral. (Luc. 4; Heb. 10:24, 25) Sakey ni, no panon a say pansisimpok et baleg a pankaabigan na saray rock badger, kaukolan tayo met so mansiansian maapit ed saray agagi pian ‘makapanpapasesegan’ itayo. (Roma 1:12, NW) No anamoten tayo irayan probisyon nen Jehova a pakasalimbengan tayo, ipapatnag tayoy panangabobon ed insulat nen salmistan  David: “Si Jehova sikato so baton dampay ko, tan salimbeng ko, tan mangiliktar ed siak. Dios ko, dampay ko, a dia ed sikato manmatalek ak.”​—Sal. 18:2.

Mantultuloy Anggan Walaray Isusumpa

14. Anggaman say sakey a duron et singa anggapo labat, anto so nibaga yo no kimuyekyek lara?

¹⁴ Makaaral itayo met ed saray duron. Say sakey a duron, a duaran pulgada labat so kabaleg to et nayarin singa anggapo labat ed sikatayo. Balet seguradon mandinayew itayo no kimuyekyek la iratan. (Basaen so Uliran 30:27.) Kabkabat iraya ed inkasiba ra, tan no kimuyekyek la irayan singa agnakekesawan ya insekto, maganggano ran nasimot iray tanem ya akaparaan lan anien. Inkompara na Biblia so tanol na saray onsasabin insekto, laktip laray duron, ed ungol na saray karwahe tan dayabdab na napopoolan a dayami. (Joel 2:3, 5) Sinali na totoon patundaen so iyaataki ra panamegley na apoy, balet ta aliwa iyan epektibo. Akin? Saray napapaktak a laman na inaatey a duron et manebseb ed apoy, kanian mantultuloy nin makaataki iramay akeran duron. Anggapoy ari odino lider da, balet onaataki iran singa organisadon armada a manatalona ed amin lawarin babeng. *​—Joel 2:25.

15, 16. Akin a saray modernon agew a manangiyabawag na Panarian et singa kimuyekyek a duron?

¹⁵ Inkompara nen propeta Joel so kimey na saray lingkor nen Jehova ed iyaataki na duroduron. Insulat to: “Ombatik ira a singa mabaybayani a lalaki. Kalaben da so bakor a singa totoo a mibabakal et manakar so balang sakey ed sikara ed dalan to, et agda deralen so dasig da. Ag-ira met mantotoldonan. Manakar ira balang sakey ed basbas to et napelag ira ed saray kampilan, et agnabuyak so inkadasig da.”​—Joel 2:7, 8.

¹⁶ Agaylan matukotukoy so impaneskribe na sayan propesiya ed saray modernon-agew a manangiyabawag na Panarian na Dios! Anggapoy singa “bakor” ya isusumpa a makapamatunda ed panagpulong da. Imbes, aaligen day Jesus ya agtinmundan  nanggaway linawa na Dios anggaman binusol na karaklan. (Isa. 53:3) Tua a walaray Kristianon ‘naplag ed kampilan’ lapud pananisia ra. Balet, siansia nin nantultuloy so panagpulong a kimey, tan ondarakel so bilang na manangipalapag. Diad tua, mabetbet a lapud panamasegsegang et kinmayat laingen so maong balita na Panarian ed saray totoon aglawari komon napasabian. (Gawa 8:1, 4) Diad ministeryom ey, aaligen mo met kasi so inkaseseg na saray duron, anggaman ed kaandiay interes tan isusumpa?​—Heb. 10:39.

“Ompeket Kayo ed Maong”

17. Akin et mapekepeket so sali na tuko anggan diad saray pinopinon dingding tan gubida?

¹⁷ Singa anggapoy epekto na grabidad ed tuko. (Basaen so Uliran 30:28.) Diad tua, pandindinayewan na saray sientista iyan melag a pinalsa ta sarasarag ton kalaben a mapmaples iray dingding tan pinopinon gubida ya ag-anggan napepelag. Panon ton nagagawaan itan? Anggapoy vacuum odino glu na sali to. Ingen, say kada gamet na tuko et naapisan na adasig a nilibon singa tinmuturon buek. Kada sakey ed sarayan singa buek et walaan na piganlasus a singa bago, a say nguro ra et tapyak tan mapekepeket. Say pinan-iiban puersa a papawalaen na sarayan bago et sobra nin panlibit ed belat na tuko. Kanian anggano batik-batik ed gubidan singa kapino na salming et agnapelag! Naninteresan a maong na saray researcher so kapeket na sali tuko, tan ibabaga ran no naalig da iya, makapawala iray beket ya agbastabasta naaknit. *

18. Panon tayon naseguro a lawas itayon ‘akapeket ed maong’?

¹⁸ Anto so naaralan tayo ed tuko? Oniay ipapaseseg na Biblia: “Busol yo so mauges. Ompeket kayo ed maong.” (Roma 12:9) Saray mauges ya impluensya a kasmak ed mundo nen Satanas et sarag to itayon akniten ed saray maridios a prinsipyo. Alimbawa, nayarin naapektoan so determinasyon tayon gawaen no antoy maong diad pililimog tayo ed totoon agmanguunor ed ganggan na Dios, diad eskuelaan o diad trabaho, odino diad panamegley na makapuy a panagligliwaan. Agmo aabuloyan a nagawa itan ed sika! Pinasakbayan itayo na Salitay Dios: “Agka komon makabat dia ed saray dili a matam.” (Uli. 3:7) Imbes, tumbok moy makabat a simbawa ya inter nen Moises ed saray totoo na Dios nensaman: “Sika, nepeg mo a takotan si Jehova a Dios mo. Sikato so nepeg mo a panlingkoran, tan dia ed sikato so peketan mo ya agmo aknitan.” (Deu. 10:20) No lawas itayon akapeket ed si Jehova, aaligen tayo si Jesus, ya oniay impanukoy ed sikato: “Sika inarom so katunongan, tan binusol mo so kaugsan.”​—Heb. 1:9.

Saray Naaralan Tayo ed Pinalsa

19. (a) Antoran kalidad nen Jehova so atebek mo ed saray pinalsa? (b) Panon tayon nagunggonaan ed kakabatan a manlalapud Dios?

¹⁹ Singa naamtaan tayo la, saray kalidad nen Jehova et natebek ed saray bengatlan ginawa to, tan dakel so naaralan tayon makanan leksion manlapud saratan. No kapigan ondarakel so naaamtaan tayo nipaakar ed saray pinalsa nen Jehova, diman itayo met lalon mandinayew ed kakabatan to. No mantultuloy tayon mangimano ed kakabatan a manlalapud Dios, magmaliw itayon mas maliket natan tan nasalimbengan itayo diad arapen. (Ecl. 7:12) On, naeksperiensya tayon mismo so inkapeteg na panamaseguron naromog ed Uliran 3:13, 18, a kuanto: “Mapalar so too a makaromog na kakabatan, tan say too a makagamor na pakatalos. Sikato so sakey a kiew na bilay ed saray ompeket ed sikato, tan mapalar so balang sakey a mamemben ed sikato.”

[Saray paimano ed Leksab]

Kasin Nanonotan Mo?

Antoran praktikal a leksion so naaralan tayo ed . . .

• gilata?

• rock badger?

• duroduron?

• tuko?

[Tepetepet Parad Panagaral]

[Litrato ed pahina 16]

Kasin makuli ka a singa say gilatan managputot na bulong?

[Saray litrato ed pahina 17]

Misisimpok iray “rock badger” pian nasalimbengan ira. Ontan met kasi gagawaen mo?

[Saray litrato ed pahina 18]

Singa saray duron, ag-ontutunda iray Kristiano ed ministeryo ra

[Litrato ed pahina 18]

Singa say tuko a mapekepeket, ag-onaaknit iray Kristiano ed no antoy maong

[Credit Line]

Stockbyte/Getty Images